6‏/2‏/2009

الظلنتين


باقي على الظالنتين اقصد الفالنتاين اسبوع وبما ان سيادتي كنت قبل كده اسمع بس عنه ماعمريش اهتميت بيه ابدا وكنت اعد اقول ايه الهبل ولعب العيال ده تقولش الدنيا كلها اتقلب عليها جردل بويه احمر وكنت اتريق جدا على كل حاجه في اليوم ده وكنت لو صادف كنت نازله في اليوم ده اعد اضحك قدام كل محل زي الهبله بالظبط اضحك على كل حاجه ولو لقيت واحده او واحد شايلين بقى اكياس عليها قلوب ودباديب والكلام ده اضحك واتريق للصبح

بس فعلا الواحد مايتريقش على حد لان كل ده جه فوق نفوخي وبما اني مخطوبه وبما اني جاهله خالص مالص في موضوع الهدايا ده فانا محتاسه جدا اعمل ايه ماهو مش معقوله الراجل يجيبلي هديه حلوه كده وانا عامله مش واخده بالي زي الفالنتين المصري الي فوجات انه موجود اصلا وانا ماكنتش اعرفه وكان موقفي بايخ ساعتها بجد انا مش بفهم نهائي في حاجات الهدايا دي ولا اعرف الرجاله دول يجبلوهم ايه وماحدش يقولي دباديب او قلوب بكرهم كره العمى مش بحبهم وبينرفزوني
بس انا عايزه استشاراتكم اعمل ايه وادوني كده افكار للهديه لحسن انا محتاسه قوي ومش بعرف في الحاجات دي نهائي ولا اعرف الرجاله دول يجبلوهم ايه وايه الي بيحبوه كل الي اعرفه انهم بيحبوا اكيد البرفانات بس ده جبته قبل كده عايزه حاجه تانيه هو في بالي حاجه بس مش مقتنعه بيها قوي لسه او عايزه حاجه جنبها ومش هتريق تاني لحسن شكلي يومها هاخد تريقه العالم كله وشكرا ليكم مقدما وكل ظالنتين وانتم طيبين

هناك 38 تعليقًا:

الجواز و سنينه يقول...

هابى ظالنتاين
و كويس انك قلتيلى انه فاضل عليه اسبوع علشان اجهز للخناقه من دلوقت
ههههههه
اما بخصوص الهديه
و بما انك جيبتى برفان فممكن تجيبيله ساعه حلوه كده او قميصين على زوقك
مالها الدباديب اهه بدل الحوسه اللى انتى فيها دى
و ممكن تجيبى برواز شيك كده و تحطيى فيه صورتك او صوره تجمعكم انتوا الاتنين يعنى اتصرفى
بس اوعى تطنشى

عاشقه الرومانسيه يقول...

كل ظلنتين وانتى متظلتنه
فى حد فى الدنيا يتريق على عيد الحب
ياشيخه حرام عليكى
ده اهم من عيد الام وعيد العمال وعيد تحرير سينا كمان

بتحسى فيه ان كل الدنيا بتحب بعضها
يوم جميل فعلا والله
بالنسبه للهديه ممكن طقم اقلام كويس
او جرفته شيك بالقميص بتاعها
(لو كان بيلبس جرفتات)
او ساعه يد
وممكن ترنج حلو للبيت
ولازمن وحتما ولابد الدبدوب
او قلب كبير كده من اللى بيتباع فى المناسبه دى
جنب الهديه الاساسيه

ربنا يسعدك ويهنيكم يارب

عاشقه وغلبانه يقول...

Happy valantin"s day

موقفك ده بيفكرني بكله شخص عزيز عليا اوي في منزله الاب كان يقولي لاتشمت في اخيك فياعفيه الله ويبتلك
ههههههههههههههههههههه

كنتي بتتريقي علي الناس ياحاسوبتيه
مش عارفه ان لك يوم

عموما هاتي قميص شيك
كرافت شيك برضو
اهم حاجه التغليف
ممكنتجيبي بقي الحاجات الصغيره بس الغاليه زي الفضيات
شوفتي انا ماتريقتش ازاي علشان عارفه ان ليا يوم
ههههههههههههههههههههههه


وحشاني كتير علي فكره

أحــوال الهـوي يقول...

اولا التعبير عن الحب و الاهتمام ليس له عيد
و بما اننا ارغمنا علي هذا الوضع ناتي لموضوع الهديه
و الرجاله انواع من ينظر للهديه كقيمة ماديه و الاخر كقيمه معنويه

وزي نصائح البنات الجميله لازم تجيبي هديه تقدري تشفيها عليه يعني بلاش حكاية الترنج

الاهم من الهديه انك تحسسيه انك احلي هديه يهني بلاش التجهيز للخناق زي اختنا الجواز و سنينه
طبعا انت لم تستفيدي حاجة مني
عارف بتقولي دلوقت صح

تحياتي و ربنا يسعدكم

صوت من مصر يقول...

هقولك حل حلو جدا هو اغلبيه البنات بيشتروا ساعه او برفان لان الساعه كل ما بيبص فيها يفتكرك والبرفان كل ما يشمه يفتكرك
لكنى اقولك جيبليه حاجه غير تقليديه ؟
افضل 1000 مره من الساعه والبرفان
ممكن تجبيله مصاصه وكيس شيبسى ( مصراوى عشان المقاطعه ) ولبانه ؟

صوت من مصر يقول...

نسيت
كل سنه وانتى طيبه

ريمان يقول...

هههههههههههه


هابى ظالنتين داى

انا مش بهتم بافالنتين خالص ولا عمرى احتفلت بيه اصلا

بس هقولك على هديه حلوه

اشتريله كده برفان حلو منعنش مفرفش كده


هتبقى هديه حلوه والله

ستيتة يقول...

مسكينة حاسوباتية هانم
مستجد ياولاد
اولا هاتي شيء مما ذكره جميع الساده الأشاوس السابق ذكرهم
حسب أمكانياتك المادية
كل ده على جنب بقى والحركات هي دي الظلانتين بجد

يعني تغليف وورق ورد مجفف وكارت مليان كلام من مصاميص القلب وبلاوي صغننه كده بتبقى في محلات الزلانطين يعني عروسة نونو بورسلين يحطها ع المكتب أدامه وتقوله احذر تكلم البنات انا هنا وها تلاقي حاجات كتير بفلوس بسيطة بس تحفة

كل ظلانتين بيجددوا علشان الشعب يعيش

ماهو بطالة وظلانتين بقى ويجعله عامر

والسنه الجاية نلاقيكو في بيت العدل وانتي بتجيبي له شربات بدل اللي دابت وهو بيجيب ليكي ربطة راس علشان صداع الواد ظئلط

محمد يقول...

أولا شرفتينى بالزياره
ومبروك لكى الخطوبه
شوفى يا ست الكل
بأعتبارى راجل كبير وبفهم شويه
فى نفسية الرجاله
فأنا نصحيتى الاوله
أول حاجه عبرى عن أهتمامك به كأنه أول وآخر رجل فى الدنيا فما الرجل الا طفل له شنب ,
تانى نصيحه لابد أنه يشعر أنك بتخافى عليه
تالث نصيحه أنه يشعر أنه مش مجرد محفظة فلوس ,أنك بتقدرى ظروفه الماديه
أما عن النصيحه الخاصه بالهديه
شوفى أكتر حاجه هو ملهوف عليها ودايما يتكلم عنها وطبعا تكون فى حدود ميزانيتك يعنى مش عايز ولا نفسه فى سياره ساعتها نقوله بلاش طمع
تحياتى لكى ولخطيبك وتمنياتى لكما بالتوفيق
أه نسيت قولى له يحطك فى عنيه

تامر علي يقول...

ولو اني مابعترفش بالظلانطين ولا الحاجات دي من البلاوي اللي كنت باشوفها ولسه باشوفها العيال بيعملوها ... بس لو فكرنل في الموضوع كأنها هدية في مناسبة ... فأحسن حاجه ممكن تتجاب بالنسبة للراجل (غير الأكل طبعاً ... أو ممكن تجيبيله سندوتش من عند كوك دور:) ) ممكن مثلاً... لاب توب (غالي قوي هه ) ...طيب مثلاً ..أباجورة بتلف وتنور وتعمل مزيكا.... (عبيطه أوي هه) ... مثلاً ....حزام وزراير قميص معدنية تكون ماركه كده ( بايخه هه) ...مممممم أنتي شوفي اهتماماته ايه وخلاص ... لو بيحب القراءة هاتي كتاب ... لو بيحب الكوره هاتيله أي ماديلية على شكل كوره هايتبسط ... لو بيحب والدته قوي هاتيله هديه لوالدته وأهو عيد الأم قرب وتبقي ضربني عصفورين بحجر .

adel يقول...

ههههههههههه

فانتين ...استغفر الله العظيم
انا بالفلوس دي اجيب كتب احسن

ههههههههههههه

اقوللك هاتيلوا دباديب او ارانيب
اعزيميه علي كشري او كبداكي الي في عابدين

لو احترتي قوي اعملي معاه خناقة لحد ما الفالنتين يخلص و بعد كده خليه يصلحك و يجبيلك هو الهدية

ههههههههههههههههههههههه

البت المشمشية حلوة بس شقية يقول...

ياعينى يا ولاد البت كانت غلبانة وطيبة
هههههههههه
اتخطبتى خودى عندك بقه
هتفضلى تجيبى فى دباديب وارانب
زى ماعادل قال
ماهو لو مجبتيش هيقول علييكى بخيلة
وهوكمان بعد كدة هينفضلك فى موضوعالهدايا ده

م/ الحسيني لزومي يقول...

اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها
www.moatnondedelsh3ab.blogspot.com

بنوتة يقول...

أنا بصراحة زيك بس لما كنتى يعنى معرفش أى حاجة في أى حاجة ولما قريت التعليقات لقيت ان موضوع الساعة ده لطيف بس تكون محترمة جدا
على العموم ربنا يهنيكى ويسعدك
تحياتى ليكى

Unknown يقول...

مبدأيا البنات مش بيجيبوا هدايا في الفالنتين
الصبيان بس اللي بيجيبوا
لكن لو انتي عايزه تجيبي مفيش مشكله انتي اصلا ممكن تجيبي هدية من غير اي سبب

لو مفيش حاجه معينه عجباكي ممكن تقولي للي شغالين في المحل علي سنة وانه خطيبك وهم هيرشحولك احسن حاجه عندهم

بس اعتقد انك لو لفتي علي المحلات هتلاقي حاجات هتشد انتباهك

والمهم انك تجيبي اللي يعجبك انتي

فتــافيت (رحاب الخضري) يقول...
أزال المؤلف هذا التعليق.
فتــافيت (رحاب الخضري) يقول...

بصي يا قمر .. كل ظلانتين وانتي متظلتنة.. ومبسوطة ومع اللي بتحبيه

شوفيه هو ميوله ايه.. يعني في راجل يحب اوي في الفلانتين تبقى هدية فلانتين من دباديب وقلوب وحاجات كدا.. ممكن تنزلي اي محل هدية محترم وتعملي بوكس شيك وتحطي فيه حاجات صغيرة قلوب ومج مثلا وبرواز مع التغليفة .. البوكس بيكون هو اساس الهدية.. مع بوكية ورد احمر.. ده لو ليه في اللون ده

لو لا برضوه خلي البوكية الاحمر ماترجعيهوش عاااااااا .. وهاتي ساعة شيك والبوكس بتعها وديه يتغلف مع ورد مجفف وجلاتور .. وشيفون او دانتيل احمر مع برافن سيادتك على العدية وكارت صغنن في 4 كلمات وبس.. بك عرفت عيد الحب

وبس كدا .. ويارب تعجبك افكاري

سلام يا قمر

princess يقول...

ممكن ميدالية مفاتيح فضة

MaNoOoSh يقول...

هابى ظلانطين الاول
هى الساعة فكرة حلوة اعتقد
بس الولاد لية مبيقولوش اقتراحات اكتر
انا كمان عاوزة اعرف الولاد بيحبوا هدايا ايه
ربنا يوفقك يا عثل
سلام

mohra يقول...

ههههههههههه
ربنا ما بيسبش حق حد
ممكن كرافت لو بيستخدمهم
هابى زالانتين

غير معرف يقول...

http://www.boswtol.com/mastaba/nkamar_234_02.html

خدي ياحاسبوباتيه اتعلمي
رزقك في رجليك
هههههههههههههههههههه

عاشقه وغلبانه يقول...

علي فكره غير معروف اللي حاططلك اللينك ده انا
بس مش عارفه ليه غير معروف

بكره اتعرف
هههههههههههههههههههههههه
هههههههههههههه

شكلي ماكنتش داخله باسمي
عديها بقي

غير معرف يقول...

هابى ظلنتين

و لاونى بكره العيد ده أوى و معتقدتش إن موقفى حيتغير منه لأى سبب :)

أنتى ممكن تجبيله قميص شيك أو ساعة
أو حاجة لطيفة للعربية لو عنده

أو ممكن تروحى لمحل هدايا تخليه يكتب اسمك و اسمه فى إزازة بطريقة ظريفة و مع الإزازة بقى ممكن تجيبى حاجة تانية حسب الفلوس







بس صدقينى جربى و أبقى هاتى هدية فى يوم غير الفالنتين.....حيكون ليها تأثير جميل أوى..أحسن اليوم النيلة ده بحس إن الهدية بتكون بالأمر و قهرا و وأنتى بتجبيها عينك بتكون فيها

ولد مصري يقول...

محفظة جلد شيك

(وطبعا هتكون فاضية)


علشان لما تقلبيه بعد الجواز مش هيقدر ينطق لأنه عارف إنك انتي اللي جيباها


وماتنسيش تلفيها لفة حلوة وتلزقي عليها قلب كبير علشان يركز في اللفة والقلب ومايخدش باله من معنى المحفظة الفاضية

أي خدمة

غير معرف يقول...

هاتيله منفضه
للسجاد يمكن تنفعه

عاشقه الرومانسيه يقول...

حاسوباتيه بتدور على هديه
والله حلو العنوان
اعملى له موضوع بقى
ايه يا بنتى مفيش بوست جديد

انا كنت معديه قلت اخد الجمعيه
يووووووووه
قصدى
كنت معديه قلت اسلم واقعد شويه
يابنتى وحشتينى

غير معرف يقول...

ههههههههههههه
والله انتي زي العسل..:))
حلوه اوي ظلنتين دي موتتني من الضحك
:D :D :D

شفتي بقي طلع عليكي عشان كنتي بتتريقي عالناس زمان
بس انا هقولك علي افكار هدايا حلوه عشان خطيبك الغلبان دا :))

بصي يا ستي
الفالنتين ليه هدايا معينه
زي الورد
وياريت يكون لونو ابيض او احمر
وهاتي مع الورد شيكولاته
عارفه
الناس اللي بتفهم بس هي اللي بتجيب في الفالنتين شيكولاته

وحوارات الدباديت والهبل دا بتجيبه الناس اللي فعلا مش بتفهم في فن الهدايا خصوصا ان دا راجل

بصي انتي ممكن تجيبي حاجه كبيره زي المخده تكون لونها احمر
تخيلي ينام علي حاجه بتاعتك انتي
قمة الرومانسيه

وممكن تجيبيله برفيوم جامد

وبيبقي فيه ميداليات علي شكل قلب مقسوم نصين انتي تاخدي نص وهو نص بتبقي جامده اخر حاجه

وفي براويز حلوه اوي
ممكن تجيبيله واحد وتحطي فيه صورتك

واهم حاجه
تلفي الهديه لافه جامده
عشان تديها شكل حلو

وابقي طمنيني بقي

وربنا يجعل كل ايامك ظلنتين
ههههههههههههه

ربنا يسعدك يا حبيبتي يارب

تحياتي يا جميل

ولد مصري يقول...

تعليق على كلام هاجر

بلاش مخده

ليكون بيعرق ولا بيرايل وهو نايم تبقى المخدة ريحتها وحشة وكل ما يشمها يفتكر إنك إنتي جايبها وبعدين تقولي إحنا السبب

تحياتي

mahasen saber يقول...

يا جميله انتى مخطوبه بسم الله ما شاء الله ربنا يسعدك
ويوفقك ويكرمك فى زوج المستقبل

بالنسبه للهديه اعتقد يكون جميل لو جبتيله جاكت او تشيرت شيك مع باقة ورد من ابو ريحه ههههههههههه

بس الهديه مش شرط فالنتين من عدمه اعملى زى ما الرسول الكريم قال ..صلى الله عليه وسلم.. تهادوا تحابوا


ربنا يسعدكوا يا حاسوبه ويكتبلكوا الخير فى بعض

شمس النهار يقول...

شوفي ياستي
هاتي هديه تكوني حاسه نك عايزهتشتريها له
يعني انزلي لفي في المول واكيد عينك هتقع علي هديه تحسيه فيها
بس خلاص

Kiara يقول...

يابنتي مش بالاقتراح الاهم
انتي حابه ايه تجيبهوله يعني ايام زمان اما كنت مرتبطه يحني كان نفسي اجيب سبحه فضه لان كان نفسي انه لما يسبح يكون بسبحه انا جيباها ليه وكتير انتقدني في الهديه دي قولت ساعتها مش مهم مش تعجبكم المهم ان الهديه دي شداني ونفسي اجبهاله وعشان كدا بقولك شوفي انتي عاوزه تجيبي ايه

و القادم....أجمل يقول...

و الله أنا من رأييء إنكوا متحتفلوش
يومها أساسا
خليكي مختلفة
أي يوم تاني جيبيله هدية
و اقنعيه ان دا مش عيدنا نحتفل بيه
و بعد كده جيبيله الهدية في يوم عااادي جدا و قوليله حبيت اجيبلك هدية
بس كده
;)

mnoon يقول...

السلااااااااام عليكم

الزياره الأولى

هابى ظالانين دى

أنا ضد الهدايا

لما يكون لها ميعاد محدد تتقدم فيه

كده دخلت الهديه فى دور الواجب

حاولى تطلعى من الليله دى أحسن

وبعدها لما تجيبى هديه من غير مناسبه

هيبقى لها طعم تااااااااانى

وبالنسبه للهدايا اللى ممكن تقدميها

ممكن كتاب معين يكون بيحبه

ولو بدأتى تهادى بالكتب مش هتخلصى

دا لو هو بيحب القراءه

Unknown يقول...

شفتي ان اخرة التريقه وحشه

ممكن تجيبي ساعه رجالي او كرافت او كافلنجس

و دي بما انك مالكيش في الهدايا الرجالي فهحطلك الترجمه

الكافلنجس هي زراير للقميص بتاع البدله بس زراير محترمه مش عاديه

كل فالنتين و انتي طيبه

حاسوباتيه يقول...

شكرا ليكم كلكم يا جماعه انا خلاص جبت الهديه بس مش هقولكم عليها هههههه وكل سنه وانتم طيبين

hager يقول...

ههههههههههههه والله انتي عسل
انا كنت لسه هديكي افكار بس لقيتك قولتي جبتي الهديه .. واضح اني انا اللي جايه متاخر
عاما كويس انك جبتيها وان شااء الله يتبسط بيها :)

غير معرف يقول...

هههههههههه

هابى فلانتين بقى مع انه عدى بس عشان

ابقى قولتها


حلو كتير النوع ده من المدونات

تحياتى

غير معرف يقول...

انا لسة مخطوبة جديد وبجد محتارة زيك بس فى افكار كتير جدا حلوة مش وحشة بس برضة هتحسى ان مش هية دى الحاجة اللى نفسك تجيبيها عايزة حاجة مختلفة جدا وجميلة ورقيقة فى نفس الوقت انا بفكر مثلا اكمنى بحب الرسم وبرسم حلو اوى ارسم صورتة وابروزها ويارب دايما هابى فالنتين دى وكل يوم يبقى عيد حب عند كل الناسى