16‏/3‏/2009

حب ولا تعود (الجزء التاني)

الجزء الاول من البوست ده هو البوست الي فات على طول للي ماقرئهوش وشكرا لكل تعليقاتكم عليه ونبدا التاني
------------------------------------------------------------------
وبعد مرور كزا شهر

هي وصاحبتها في كافيه

صاحبتها: في واحد متقدملي


هي:عادي ما كتير اتقدمولك وانتي رفضتي وكنت بعرف من طنط بس الي مش عادي ان انتي الي تقوليلي مش طنط يبقى العريس ده في حاجه مختلفه ايه هي بقى اعترفي يا جميل


صاحبتها: ابدا فاكره هيثم


هي: هيثم مين؟


صاحبتها: هيثم يابنتي الي اتقدملي من 4 سنين وانا رفضته لانه كان لسه طالب


هي: ياه ايوه ايوه افتكرته ده كان بيحبك قوي


صاحبتها: هو ده اتخرج واشتغل واتقدم تاني وطبعا انتي عارفه ان اصلا ماما وبابا حبوه جدا من الاول ودلوقتي بقى اتقدم تاني


هي: طيب ماتفكري ليه لا خدي الي بيحبك اكيد هتحبيه في يوم وشوفي ده لسه مصمم مع انك بهدلتيه يعني وعذبتيه


صاحبتها: اهله كمان ناس كويسين قوي وحبتهم قوي


هي: خلاص فكري وصلي استخاره


وفعلا تمت الخطوبه ................

وبعد مرور كزا شهر من الخطوبه.........


هي وصاحبتها خارجين سوا وقاعدين في نفس المكان

هي: ها ياستي عامله ايه مش عارفه اتلم عليكي العريس واخدك مني


صاحبتها: هههههههه لا انا اقدر استغنى


هي: المهم طمنيني عامله ايه؟


صاحبتها: اهو الحمد لله


هي: يعني بقيتم ازاى سوا شكلك عايزه تقولي حاجه


صاحبتها : اه في حاجه كده حصلت ومش لاقيالها تفسير


هي: قولي كلي اذان صاغيه


صاحبتها: هو كلمني من يومين


هي: يالهوي وعملتي ايه


صاحبتها: ولا حاجه ماردتش ولما كتر من الرن رديت وقولته انا اتخطبت واسفه ماتكلمش تاني وهو من ساعتها ماكلمش فعلا


هي: طييب كويس كده احسن المهم انتي كويسه


صاحبتها: عارفه انا هوصفلك كان شعوري ايه انا ماقولتوش ماتكلمش تاني مش علشان انا بس اتخطبت او علشان ماحسش اني خاينه او كده


هي: ومال؟


صاحبتها: ماعرفش ماحستش اني عايزه اكلمه بعد ما كلمته وقفل روحت على طول كلمت هيثم وفضلت ارن عليه كتير وانا عارفه انه في الشغل ومش بيعرف يكلم وهوفي الشغل وانا عماله ارن وفعلا كلمني وقالي في ايه خضتيني


هي: هاه وقولتيله ايه


صاحبتها: انا ارتبكت وقولته مافيش حاجه كنت بس عايزه اسمع صوتك


هي: ياسلام على الرومانسيه


صاحبتها: عارفه ان انا فعلا كان نفسي اسمع صوته بس حسيت اني عايزه اكلمه قوي تفسري ده بايه؟
هي: ابدا حبيتيه


صاحبتها: ومال ليه لما بقارن احساسي بهيثم عن احساسي زمان باول حب ليه مش زي بعض ليه بحس ان في فرق هل ده علشان كان الحب الاول مع اني بجد مش بفتكر الشخص نفسه خالص انا بفتكر الاحساس بس انتي فاهماني؟


هي: اه يعني انتي بتقارني بين احساسك بهيثم واحساسك زمان بالحب الاول الي طبعا كان مشتعل اكتر من كده وفي هيام اكتر ورومانسيه اكتر وكل ده


صاحبتها: بالظبط عارفه انا دلوقتي بجد ماتخيلش اني ممكن اجوز حد تاني غير هيثم بس في نفس الوقت ليه نفسي احساسي بيه يكون زي الاحساس الي كان في حاجات غريبه مش قادره افسرها صحيح بفرح لما بيجي يزورنا بس ليه مش نفس فرحتي مع ان هيثم في كل حاجه انسان بيحبني جدا طموح بحب عيلته جدا وهما بيحبوني جدع كريم قوي بس نفسي افسر الي جوايا ده ايه


هي: بصي ماتقرنيش اي احساس بالحب الاول لانه طبعا الحب الاول هيكسب عموما ياستي بعد الجواز لا هيكون في حب اول ولا تاني ولا هيكون في حب اصلا ههههههههههههه


صاحبتها: يا مفتريه حرام عليكي لا بجد في ايه؟


هي: ماعرفش بس ده تفسيري اكيد مع الوقت هتحبيه زي الحب الاول واكتر مع الجواز والعشره

ده كان راي هي لصاحبتها وهو ده الراي الي صاحبتها مش عارفه تقتنع بيه ياترى انتم رايكم ايه ايه تفسير حاله صاحبتها ؟ وياترى هي بتحب خطيبها ولا اتعودت عليه ؟ وازاى تحبه فعلا وتوصل احساسها زي الحب الاول؟

هناك 38 تعليقًا:

صوت من مصر يقول...

احجز اول تعلــــــــــــــــــــيق

صوت من مصر يقول...

هى وصاحبتها بيفهموا بصراحه كده كلام البنات عجيب
الله يرحمنا احنا الشباب

عمرو يقول...

صباح الخير
مبدئيا كده الحب الأول لا يتبقى منه غير فرحة اللقاءات و اٍستيقاظ المشاعر البريئه الغضه و شويه شويه بينزوى فى ركن بعيييييد فى الذاكره و بيدارى تحت الكثير جدا من أحداث الحياه و الوجوه و الأشخاص
مافيش نصيحه معقوله ممكن أن تقال لجعل الخطيب ينحب لأن الحب لا يمكن أن يكون منفذ بخطه مدروسه مسبقا لأنه حاله بتصيب الاٍنسان ممكن بغير سبب و ممكن برضو بأسباب لا حصر لها و لكنه فى النهايه بيحتاج لمقومات كثيره اٍن وجت و تآلفت حدث الحب و اٍن ... فلا يمكن أن يحدث ..

adel يقول...

هي اه اتعودت علي خطيبها مش اكتر

بس لوهو كويس مع الوقت هتحبه و هتنسي التاني تماما او بالاصح الامن اللي هتحسه مع خطيبها هيبقي نقطة في صالحه

وده المهم ... الامن
الحب من غيره ملوش لازمة

*البت المشمشية *حلوة بس شقية * يقول...

بصى ياستى
هيا كدة احساسها بخطيبها مجرد تعود لسه موصلتش لمرحلة الحب
بدليل انها لما التانى كلمها
جريت تكلم خطيبها عشان متحسش بلذنب مش اكتر
هو فيه تكملة للقصة ولا لاء

جارة القمر يقول...

هي في رايي انه لما التاني كلمها راحت تكلم خطيبها علي طول وعاوزة تسمع صوته كانت عاوزة تتاكد من حبها لخطيبها وهي فعلا اكيد حبته
وبعدين مش المفروض نقارن الاحاسيس ببعضها لان كل حاجة بتختلف عن التانية
ربنا يسعدك وتقبلي مروري

ELMASRYA - MOSLEMA LELLAH يقول...

جميل قوي

الموضوع شاددني جدا يا حاسوباتية

يسلموا إيديكي

أنا رأيي إن البنت دي بتحب حب خطيبها ليها

واتعودت على اهتمامه بيها

وفرحانه أو نقول راضية جدا بمعاملة أهله ليها

لكن الحب الرومانسي لم يحدث بعد

وهناك احتمالين :

أن يحدث بعد الزواج وكده يبقى عظيم جدا

أو

لا يحدث وتكون حياتها معه مبنيه على التعود وعشرته الطيبه

نصيحتي لكل من تمر بنفس تجربتها

تتم زيجتها بمن يحبها طالما لا توجد به عيوب ظاهرة تكون سببا في عدم تحملها للحياة معه

لأن حتى من تتزوج بمن يحبها فإنها بمرور الوقت تتحول حياتهما لحياة روتينية عادية

وتتساوى الزيجه المبنية على الحب مع الزيجه التقليدية

دمتي سالمة

Eno يقول...

مش لاقيه تعليق اقوله يمكن عشان مش عارفه احط نفسي مكانها !

بس هي ضروري تمحي كل ذكري وكل احساس قديم من جواها عشان تعرف تبدأ من الاول كل ومشاعرها صافيه لشخص واحد بس بدون اي مقارنات بالقديم :)

تحياتي :)

عابرة السبيل يقول...

صح صحيح فهذا هو الاصح

مظبوووووووووووط جدا وماحدش يقدر يعدل على كلامك

غير معرف يقول...

دا راي الشخصي وشوفتو كتير قدام عيني

==========================

الحب المبني علي الاقناع تماما زي رحلة روحتيها علشان اهلك ضغطوا عليكي الرحلة حلوة بس انتي من جواكي مش كنت عايز تروحي الرحلة



بعد ما تيجي من الرحلة بتحاول تقنع نفسك ان الرحلة جميلة واليوم كان لذيذ والحياه هايلة والناس كانت زي العسل

بس من جواك مقتنع ان الرحلة دي انت رحتها غلط ودا مش معناه ان الرحلة وحشة ولكن معناه رفض داخللي للذهاب

======================
عندما كلمها علي التليفون ارادت ان تقنع نفسها انها حقا نسيت هذا الحب وان كان يتكر علي لسانها لعنة الح الأول هي مازالت داخليا تعشقه وتقارن به الرجال

هي في عقلها الباطن تعلم مشاعرها جيدا ولكنها مثل اي امرظاة شرقية

تريد ان تتزوج قبل ان يفوت قطار الزواج وحتي لا يطلق ليها انها عانس

عموما انصحها بالآتي
تغيير تليفونها
الا تحكي ابدا عن حبها الاول لاحد

تحاول ان تسعد خطيبها ولا تفكر في سعادتها تحاول ان تكون ايجابية حتي يشعر بها

واذا شعرت انها فكرت به ثانيا فلتعلم تماما انها خائنة ولا تستحق شيئا


الزواج والحب احيانا يكونوا شيئا واحدا ولكنهم ليسا تذكرة سعادة مؤكدة المفعول

بدليل ان اكثر المعذبون هم العاشقين

وأكثر من يعاني من الخيانة هم الأحباب

لذلك اتمني ان تقتنع انها في امانة رجل المفروض انها
تحافظ علي ماله وشرفه وكرامته سرا وعلانية

واذا لم تستطيع ان تحافظ علي الامانة سوف تتأكد يوما ان الغدر والخيانة يعاقبهم بها الله في الدنيا وستري نتيجة كذبها

الاسرة ليست سبيل لحوارات النفاق الاجتماعي

الزواج عقد مقدس يرتبط بكل المعاني السامية اهمها الاخلاص والوفاء

لجين أبو الدهب يقول...

هو للاسف البنات كده اول حب لها تنزل بقلبها على طول ..

بس الحالة التانية اللى هى عايشها كده احسن ..

هى مش بتحب الاولانى ولا اخدت على التانى انما بتحبه ..

انما الفرق انها بقيت تحبه بعقل ..

وعايزة اقولك حاجة سواء كان الحب الاول ليها او الحب التانى كل حاجة بتختلف بعد الزواج ..

بعد الزواج بينشأ حب من نوع تانى خالص بيترتب على حاجات كتير رومانسية وعشرة وتعامل ومواقف صعبة وكل حاجة ..

يعينى ما دام هى مستريحلة له وهو كويس معاها حتى لو بتحبه دلوقتى حب بعقل هاتعشقه بعد الزواج ..

وجزاكِ الله خير ياحاسوباتيه على الافكار المية مية ..

دمتِ بخير ..

MǿиY El-Shreef يقول...

ازيك ياجميل

صراحه .. انا مادرش افيدك ف حاجه انا بعاني منها

بس فعلا لو قارنتي حبك الاول بأي حب تاني ع وجه الارض حبك الاول هيكسب

وبما ان هيثم بيحب صاحبتك اوي وهي كمان ابتدت تحبه يبقى الاحسن ليها انها تنسى احساس زمان وان شاء الله هو هيقدر ينسيها ده

عموما ربنا معاها وان شاء الله كل حاجه تبقى بينه وبينها تمام

سلوى يقول...

هي عايزة إييييييييييه ؟
إتخطبت لشخص بيحبها وفيه كل الصفات الطيبه

وفي نفس الوقت عايزة تحس نفس الإحساس بتاع حبها الأول
مفيش حد بياخد كل حاجه
والنفس طماعه وهتفضل تزين لها الماضى
ومش هتخليها تتمتع بحاضرها وتستكشف الجمال فيه

خليها تمنح نفسها وقت
وإن شاء الله هتلاقي مع خطيبها اللي بتتمناه
ربنا يهديها

شيماء جمال(شيمو القمر) يقول...

بصى يا عثل أنا هقول اللى فهماه

الحب الأول ده لا يستطيع أحد نسيانه مهما فعلنا ، لأن به أول كلمة بحبك بتقوليهاوأنت حساها قوى وأول لمسة إيد وأول كل حاجة حلوة بتبقى فيه ، وفى علم المنفس بيقولوا إن إحنا بننجرف بكل ما لدينا من مشاعر تجاه الحب الأول هذا .

لكن خطيبها هذا هى اختارته بعقلها وأقوى أنواع الحب هو حب العقل ، ونصيحتى إنها تحبه من كل قلبها وتتعامل معاه برومانسية لأقصى درجة عندها وهى اكيد هتوصل للإحساس اللى هى عيزاه

تحياتى وتمنياتى لها بكل سعادة

وتمنياتى لك انت بكل السعادة
شيمو القمر

رئـــــيسـة حزب الأحلام يقول...

بصى فعلا الحب الاول والمقارنه اللى حاصلة بين الحب الاول وخطيبها واحساسها انها كانت عايزة تكلم هيثم الحب الاول دة يخلينى اشك انها لسه ماتخلصتش من الحب دة وهى لازم تقف مع نفسها الاول واقفة ولازم يكون خطيبها هو كل حياتها
وربنا يوفقها يارب
جميل اسلوبك اوى وفى حاجات تمس ناس كتير

Sweet Violet يقول...

من الواضح انها مسألة تعود

بس لو هى زى مابتقول انه بيحبها و هو انسان كويس يبقى فى امل انها تحبه من قلبها كمان مع عقلها

لكن ده مش هيحصل طول ماهى بتعمل مقارنه

وعلى فكرة لو هى استمرت على موضوع المقارنة دى هتتعب قووووى

Ahmed يقول...

معلش ياحاسوبتيه
انا كلامي رخم بس بصراحه انا مبحبش أخبي اللي جوايا

بصراحه انا مش عارف ايه ده بالظبط؟

هيا وفقت على هيثم ليه؟
عشان تتجوز وخلاص
عشان الظروف مناسبه وخلاص

كون انها بتقارن بين هيثم والحب الأول (دا لو كان فعلا حب) يبقى كده بتظلم هيثم بشكل غريب

انا مش عارف
يعني هيا مش مكفيها السبب اللي انفصلت من الأول تقوم تقارن التاني بشكل يظلمه

معلش انا كلامي رخم بس بصراحه انا بحب الوضوح من الأول
مبحبش اللي بتدي أمل لواحد وبعد كده تقوله سوري

مرة تانيه بعتذر عن أسلوبي وأتمنى ميضايقكيش

الشاعر الحزين يقول...

أنا رأيى انها أخطئت فى الأول

لكن خلاص الموضوع انتهى واتخطبت لواحد بيحبها
يبقى خلاص بقى مجرد تفكيرها للحب القديم يبقى خيانه لخطيبها
وأنا بقول الحب القديم مش الحب الأول
لأن مفيش حاجه اسمها الحب الاول
لأن لو فيه حب أول هيبقى حب الله سبحانه وتعالى

وحسيت من كلامك ان خطيبها انسان كويس قوى وبيحبها

يبقى لازم تديله حقه ومتظلمهوش
ولو ينفع تعجل من الزواج يكون أفضل لأنه هينسيها القديم

وتقبلى خالص تحيااااتى

ستيتة يقول...

اسألك سؤال
ليه حب انطونيو وكيلوباترا
روميو وجوليت
قيس وليلى
قيس ولبنى
فضل موجود لحد النهاردة؟

دايما الحب اللي ميكملش ببيت العدل
الحب بتاع يوتوبيا
بتاع الدباديب والمسجات والفسح بيكون احلى

مش ممكن نقارنه بحب الغسيل والطبيخ والطلق والولادة والخناقات والأختلافات

طبيعي اني لما افكر في الحب بدون مسؤليه
الحب المستحيل
يظل بداخلنا شعور انه لو كان كمل كنت ها ابقى فرحانة

بعد ما الصديقة تتزوج وبعد ما تعرف الفرق بين راجل حبه حقيقي
في الصحة والمرض
في الفقر والغنى
في الشباب والهرم

ساعتها بس ها تعرف ان ده هو الحب الحقيقي

ولكن يظل بداخلها زغزغة قلب للشيء الجميل الذي لم تشوبه شائبة خلاف او مسئولية

شمس النهار يقول...

موضوع الحب الاول ده غريب قوي مش عارفه يمكن عشان هو اغلبه بينتهي يابفراق يابجرح وغالبا مابيكملش خالص عشان اغلبه بيجي في سن مبكره وبتكون المشاعر غضه وليده غير مكتمله
وعشان مابيكملش بيفضل عامل غصه في القلب لأنه عادتا بيبقا الجرح الاول مش الحب الاول
بس صدقيني كل ده بيتنسي لما بيجي الحب الحقيقي الصح المكتمل
وبيكون احلا عشان المشاعر نضجت تماما لكن مثلا اللمسه هنا مش اول لمسه لكن في الحب الاول بتكون اول لمسه واول اي شئ مابيتنسيش
بس برضه حلاوة اللمسه بتاعت الحب الحقيقي اجمل بكتيرليه عشان برضه النضج اللي بيكون وصل له الانسان
وشويه شويه خلاص الوهم الاول بينتهي عارفه ليه وهم عشان هو لو كان حب حقيقي ماكنش اخد لقب كان
وكان استمر بس عادتا هو بيكون وهم
انا حاسه اني هييست خالص صح

موناليزا يقول...

يكفيها سعادة انها نست حبيبها الاول ولا تتذكر سوى احساسها وده فى حد ذاته كويس جدا

عاشقه الرومانسيه يقول...

اكيد حالها افضل من غيرها لانها قدرت تنسى حبها الاول
وبتحاول تتقبل الحب الجديد وان شاء الله هاتنجح
والدليل انها نست الاول وكل اللى باقى معاها الانفعال بالحب ده واحساسها بيه

Unknown يقول...

بصى الحب الاول ده
هو الحب الاول مالوش تانى
يعنى حاجة كده فريدة متفردة:)
فأذا كانت منتظرة انه يتكرر تانى بنفس الطريقة مع خطيبها فلا أعتقد
انه حيحصل :(لكن ممكن حب اخر من نوع اخر يحصل ...أزاى؟حب القلب والعقل
حب تبقى عارفة ان اللى ادامك ده
مش ملاك ونزل من السما لكِ
لكن انسان فيه الحلو
وفيه الوحش لكن
المجموع لصالحه
وبالتالى
من
الممكن او من المفضل العيش معه

حنين القلب يقول...

مفيش احساس بيكون زى الحب الاول وده مش علشان الانسان اللى كان اول حب كان روعه ومش ليه مثيل
لا لا لا
ده لان الحب الاول بيكون فيه كل حاجه اول مرة وليها طعم جديد
اول كلمه بحبك طالعه مش قلب بيرتجف ونفسه يسمعها منك
اول لمسه ايد وقشعرة بتخليكى عايزة تطيرى من الفرحه
ومش تنسى انه بيكون فى اغلب الاوقات فى سن صغير بتبقى المشاعر لسه بخيرها والعقل فاضى وهيمان ومش بيفكر غير فى الحبيب

انما الحب فى سن ناضج بيبقى احسن وفيه تكافؤ ومشاعر هاديه مش مجنونه

هى بتحبه بس عايزة ترجع الزمان
على رأى الست
قول للزمان ارجع يا زمان

اتمنى دوام التواصل

الـسـيـدة نـون يقول...

الحب الاول
مليان جنان
مشاعرنا مدلوقة
ومش محسوبة

الحب الاول
مليان زغازيغ
وشوشنا بتضحك
وعيونا بتلمع من الفرحة


الحب الاول
اكلة جديدة ماكلنهاش قبل كدة
فبالتالى منعرفش هل الاكلة كدة مظبوطة ومستوية ولا عايزة شوية ملح وتتحط على نار هادية



عمرها ما هتحس مع خطيبها نفس احساس الحب الاول
مش معنى كدة انها مش بتحب خطيبها
هى بتحبه
بس مش بتحبه بقلبها وخلاص على كدة
دى كمان بتحبه بعقلها

وعلشان كدة المشاعر بقت محسوبة
وعرفت خلاص امتى تحط ملح
وامتى تهدى النار
وامتى تزود شوية مية


لما اتصلت بهيثم
كانت بتستقوى بيه

بتستمد قوتها من وجود خطيبها

كانت عايزة تسمع صوته لمجرد انها تتاكد ان فيه حد جانبها بيحبها




هو السؤال كان ايه بقى؟


سلام
اختك خيخة

تامر علي يقول...

أحسن حاجة تسيب الاتنين وتدور على واحد فريش :)

طبعاً غلط جداً المقارنة في الوقت ده أصلاً ... الموضوع الأول يجب عدم التفكير فيه أصلاً والا يبقى الموضوع كله تهريج وقرارات انفعالية .

فتــافيت (رحاب الخضري) يقول...

هاقولك حاجة
احنا بنحب الحب الاول اللي راح وضاع وعيطنا عشان وتعبنا ويمكن كمان اضربنا عن الاكل وخسينا نص ونزننا

لانه كان مستحيل يمكل.. وبقى ماضي
فبقى ممنوع.. والممنوع مرغوب وهابفضل شالغل بالنا

فننسى الحب الاول ونطلعه من حياتنى

وياريت نبطل نعدد حبينا كام مرة.. علشان ننسى انهو حب فيهم الاول ده

هي مش هاتعرف تحب زي ديه.....

هي يا تحب يا متحبش ومش بمزجها ابدا

في مقال ليا عن الحب الاول .. وهبله وعبطه وعبله

قولت ان الحب جازبية اشد من الجازبية الارضية.. هو بس اللي من حقه الاختيار

مش بيدينا نحب حد قد ايه..؟؟.. ولا نحبه ازاي..؟؟ ولا لامته ولا اي حاجة خاااااالص

احنا بنحب زي ما الحب بيأمرنا وبس

هي تتأقلم بقى وربنا يعينها.. والمعايشة ممكن تولد حب اعمق من حب كان اول وعابر من غير معايشة حقيقية

لكيت كتير ويمكن اكون خرجت كمان بره البوست

بس جيت اقولك بس وحشتييييينييييييييييي

basma saghir يقول...

لأ بتحبه ياستي

بتحبه..بتحبه يعني

بس الحب ده هادي قوي ومسالم كدة ورايق

مش انا قلتلك قبل كدة ان الحب الاول ده عامل زي معامرة كدة كله اثارة وحماس ونفسك تكتشفي ايه اللي هيحصل بعد كدة

بس الخطوبة دي حاجة انتي مخططلها وعارفة ايه اللي ممكن يحصل

جوجو يا جوجو
ايه النظام؟ ها :)

احساس طفلة محبة للرومانسية بس واقعية يقول...

انا بتهيألى انها بس بقايا ذكريات فى قلبها من الحب الاول وحب خطيبها ليها هيخليها تنساها
ومادام خطيبها بيحبها وهى مرتاحة لية ولاسرتة يبقى فى امل انه يخليها تحبة
وكدا يبقى حافظت على قلبها وحطتة بين ايدين امينة وكمان عقلها دخل فى اختيار شريك حياتها مش قلبها بس
مع انى كنت معارضة فى الجزء اللى فات
بس فى البوست دا مؤيدة بشدة لرأي صديقتها ولازم هى تقتنع بية

تقبلى مرورى

life يقول...

انا شايفة أن الحب زى الوردة لو أهتمينا بيها مش هتتدبل وده ينطبق على الحب الاول والمليون ماهو كله حب
ويمكن الوردة دى تفقد بعض من ألوانها المبهجة وريحيقها لكنها تعود فى الربيع لتتفتح
لكن أعتقد أن بطبيعة البشر يكون عندهم الممنوع مرغوب حتى لو كان الممنوع ده يودى فى داهية

ولا انكر ان هناك أحاسيساً لا تتكرر مهما حاولنا

وهناك أشخاصاً لا نستطيع أسقاطهم من ذاكرتنا ليس بالضرورة حبنا الاول فقط لكن لأنهم تركو بصمتهم فى قلوبنا
وقد يكونو علمونا أشياء لم نكن نعلم عنها شىء
لكن
أنا لا أؤمن باسطورة الحب الاول

قد لا اكون أفدتك فى حل المشكلة لكن أنا من أستفدت منها بشدة

لكن قولى لصديقتك أن الحياة أختيارات
واحياناً يجب أن نكون واقعيين ولدينا بعض المنطق فى تلك الاختيارات خاصة لو كانت مصيرية
دعها من ذلك التخبط أريدها أن تدرك شىء واحد الحب الحقيقى هو ما يناسب مع واقعها وما يرضا عنه عقلها وقلبها فى آن واحد وهو ما يدوم

أم فريده يقول...

حب هو اصله تعود

لكن الحب اللى بيجى من اول نظرة دة بيبقى اعجاب

بيعجبنى حاجات فية لكن الحب هو

انك تتعود على

كلامة حتى لو كان ساعات يزعل

خصامة حتى لو كان هو اللى غلطان

حبه عشان بيكون من الفلب

خوفه غيرتة حاجات كتير معقدة
لهفتك علية ولهفتة عليكى من كتر ما حس انه مش قادر يتغنى او تستغنى عن

كلمة حلوة كان بيسمعها كل يوم الصبح
اكلة حلوة كانت بتعملها بمزاج
حضن دافى لما بيكون زعلان
عشرة طيبة وخوف من القلب

يبقى حب ولا تعود

الحب هو التعود والعكس

تحياتى

mahasen saber يقول...

الحب الاول ده شئ اسطورى لانه بيجى فى لحظه وبيروح فى نفس اللحظه

بس بيبقى الحب حب حتى ولو لثوانى يكفى انه لحظه بتملى القلب سعاده وبتلون الحياه بالوان حلوه

جميلحوار البناتيت ده يا حاسوبه

Beram ElMasry يقول...

السلام عليكم ورحمة الله وبركاته
عزيزتى الغالية ،انت ام اليوم او غدا ، فكل عام وانت بخير فى عيد الام ، وان كنت تتمنين لطفلك ان يحيا امنا فلقنيه ان الاسرائيلى شر كله ، فلا يامنه برهة ، ولا يسالمه مدى الحياة

يهودى يعنى حنش احسن دوا تقطعوا راسه
كلام نقوله لنسلنا نطبعوا فى كتابه وكراسه
لك تحياتى والسلام عليكم ، ولا سلام مع اليهود
بيرم المصرى

رؤية يقول...

خدعة الحب الاول كالمعتاد
هناك اشياء قد لا تكاد تذكر، ولكن حينما نتكلم عنها ونفكر فيها نصطنع لها مكانا فى الوجود لام تكن موجودة فيه...!

حد فهم حاجة...؟

عموما...
لاحب بالقلم يدوم بدون قناعة العقل...
كلاهما يكمل الاخر والا قتل احدهما الاخر

تحياتى

Dalia w Ahmed يقول...

إحسان عبد القدوس قال "حبك الأول هو حبك الأخير"
وانتي ممكن تفسري الجملة دي بأكتر من تفسير
التفسير الأول أن حبك الأول هايفضل حبك الأخير مهما حبيتي بعده

والتفسير التاني أن حبك الأخير بيمسح أي حب قبله وبالتالي بيكون هو الأول والأخير

بس عارفة .. المسأله مش مسألة حب أول وحب جه بعده... لأنها كان ممكن بعد قصة حبها الأول تحب تاني وتلاقي تفسها بتحب بنفس القوة وبتحس بنفس المشاعر

المسألة أنها بتقارن قصة حب بقصة جواز ودة ما ينفعش ... كأنك بتقارني التفاح بالمانجة ... دي فاكهة ودي فاكهة .. ودة طعم وده طعم ما ينفعش يتقارنوا ببعض

أنا رأيي أن السينما والأفلام غسلت مخنا من واحنا أطفال على شكل معين من الحب .. بس الحياة الواقعية حاجة تانية والجواز لازم يكون مبني على حاجات أقوى بكتير من مشاعر الحب الأول...

القدر و انا يقول...

حاسبوتية
الحب الاول له مذاق مختلف تماما لانه الاول
فى كل شئ
ولا ينسى او يقارن ولا يستمر
ولكنه فقط ذكرى جميلة تطل علينا من وقت لاخر
اما الحب الناضج فهو الحب الحقيقى الذى يدوم رغم صعوبات الحياة لانه مبنى على نبض القلب مع اقتناغ العقل
وهوحب العمر كله
تحياتى

رحلتنا في الحياة يقول...

علشان كده المفروض البنت ولا الولد حتى يستهلك مشاعره فى حب اول وتانى والامور دى علشان مش يظلم الانسان اللى هيرتبط بيه بعد كده وافكار تودى وتجيب

مامة مازن يقول...

السلام عليكم ورحمة الله وبركاته
اختى الحاسوباتيه اقدر اقولك ان الحالة دى موجودة وهى مش مرض عضال صعب الشفاء منه لا دى حالة عادية جدا هتزول بسرعة جدا فى الخطوبة وبعد الجواز لان الحب الحقيقى يبان من الدنيا هيصمد فى وش الحياة واللا هيتهز وينكسر
انا بيتهيئلى كده انا هتحب خطيبها اكتر بمرور الوقت
هى بتدور على نفس الشعور الاول صعب يبقى هو هو لان الانسان بيبقىاصغر خبرته اقل بيتعلق جدا بهذا الشعور الجميل اكثر من تعلقه بهذا الانسان