حاسوباتيه

عيد ....سعيد او مبارك .........تفرق

2010-11-17T01:25:00.002+03:00

كعادتي كل عام ارسل سموي حفظني الله واطال عمري تهنئه
الى عامه الشعب ....كل سنه وانتم طيبين يا شعب
...............................................................................................

ملحوظه رفيعه: حاجه غريبه طول عمري اعرف ان القنوات المصريه تكتب عيد سعيد لكن سبحان الله اتغير وبقى عيد مبارك ياسبحان مغير الكلام على الانتخابات

كلمه من امرأه الى رجل .....

2010-01-10T01:42:00.002+03:00

وتقول اني ضلع منك وانت كلك مني ....

القاسي

2009-12-22T05:23:00.002+03:00

القاسي باين عليه الحب لكن قاسي بيبص في عيوني وعامل ناسي من وسط كل الكون لمس احساسي

تعبلي قلبي وكله من لهفه عنيا اول ما اشوفه الشوق اليه يدارى فيا واجري عليه وانا فاكره مش باين عليا واتاري قلبي سبقني راح من بين ايديا

ياعيونه قوله ياقلبه ماتخبوش كفايه الليل بطوله ودمعته سهران معايا

دي عينيك منين مابروح بلاقيهم ورايا

عذبت روحك ليه كده ايه الحكايه

القاسي

عيد سعيد

2009-11-25T21:54:00.002+03:00

سمو الاميره :حاسوباتيه

التي لم تلد الامه مثلها تهنئكم بالعيد من الان نظرا لانشغالها لاحقا بالرد على رسائل المعجبين حفظها الله للامه

--------------------------------------------------

كل سنه وانتم بالف خير يارب

للمتجوزين

2009-10-09T07:07:00.003+03:00

تعريفي للجواز هو شر لابد منه

طبعا انا ما اجوزتش لسه بس جبت التعريف ده من كل المجوزين بصراحه ماشفتيش حد بيشكر فيه فانا طول عمري اسال ليه هو وحش قوي كده؟ ومالقتش اجابات وافيه بصراحه فقررت اسال كل المجوزين والي لسه الحظ معاهم وماجوزوش تعالوا نعرف ليه هو كده لاني بصراحه بقى عندي رعب من كلمه

1- ايه هو تعريفكم للجواز بعد ما عرفتوه وعاشرتوه ماحدش لو سمحتم يقول انه تكوين بيت وعيله انا عايزه اجابه غير تقليديه اجابه افهمها واقتنع بيها

2- هل فعلا الحب بعد الجواز اقوى؟ طيب ازاى وكل المجوزين شغالين خناق علطول ياترى الحب بيختفي ليه؟3- ايه احلى حاجه في الجواز غير الاولاد والارتباط بلي بنحبهم قولولي حاجات حلوه تانيه لعل وعسى اقدر اتقبل فكره الجواز

4- ايه اسؤ حاجه في الجواز غير المسؤوليه طبعا هو ليه سيئات كتير لازم نعرفها منكم

5- ليه نسب الطلاق كترت كده مع ان اغلبم كانوا بيحبوا بعض وعاشوا قصص حب فظيعه ليه النهايه دي بتحصل؟

6- ليه دايما اسمع الكلمه دي ان الجواز حاجه تانيه خالص ؟ يعني هو الي انا مخطوباله بيتحول لشخص تاني بعد الجواز بتخطب لاحمد يطلع تامر مثلا ولا ايه الي بيحصل

7- ليه دايما اول سنه جواز هي اصعب سنه وفيها كل الخلافات وازاى نعديها وتخلص على خير بدون خساير

8- في فتره الخطوبه كل حد يعمل ايه علشان يعرف الشخص الي هيجوزه ده كويس ويعرف طباعه؟

9- نصيحه كل مجوز يقدمها لكل الي مجوزوش غير طبعا انكم تنصحونا اننا مانعملهاش لان هو شر لابد منه يعني لازم يحصل

اخيرا هقول كلمه قراتها قبل كده وهي يارب كل الي مجوزوش يجوزا ويارب كل الي اجوزا مايحقدوش على الي ماجوزوش

صوره جامده

2009-09-28T06:59:00.002+03:00

انا مش مبيناله انا ناوياله على ايه ساكته ومستحلفاله ومش قايلاله ساكته ليه (هدوء ماقبل العاصفه)

خليه يشوف بعينيه ايه الي ناويه عليه ( ده اذا كان لسه فيه عينين اصلا)

هخليه يخاف من خياله ( هههه بستاهل)

توزيع العديات

2009-09-21T04:41:00.002+03:00

كل سنه وانتم طيبين وكل امانيكم تتحقق يارب وعيد سعيد عليكم كلكم واهو انا جبت العديات لو سمحتم بقى بالطابور وبالدولار اهو كمان يلا ان شاء الله ماحد حوش

كل سنه وانتم طيبين

عن المخلوق زيدان هكلم

2009-09-07T06:04:00.005+03:00

طبعا كل شئ في الكون ده مخلوق خالقه ربنا سواء كان انسان او حيوان او نبات او جماد بس بقى في مخاليق بشر في نظري لاترقى لمستوى كلمه انسان ليه بقى؟
لانهم بيعملوا حاجات الانسان الي عنده ولو جزء من الدم والاخلاق مايعملوهاش ابدا علشان كده النوعيه دي في رايي هما مخلوقات فقط لكنها لاترقى للانسان

المهم المخلوق بقى الي هو زيدان ده الي مش هقول اسمه لانه مايستحقوش بالمره وانا ماليش في الكوره نهائي بس بجد كل ما ادخل موقع الاقي اخباره هو وصديقته عادي كده جدا ولا كان ده حرام ده ايه لاشهار بالمعصيه ده ده بجح جدا بجد وغايظني جدا
وكله كوم وخطيبته مي الي سابها الي بيقولوا ان مي كساب هي السبب ايه التفاهمه دي هو ده اصلا حد يتخانق عليه والله لو معاه كنوز الدنيا
مش قادره استوعب ان واحده تجوز واحد كده مقرف جدا ومجاهر بمعصيه وياريتها هينه دي مصيبه استخفر الله
الكلمه لوحدها تقشعر لا وبيجي في التلفزيون معاها عادي جدا ده والله نسي ربنا والموت والحرام
يعني معقوله المخلوق ده هو المفروض قدوه الشباب ده المفروض يشيلوه من المنتخب اصلا

شوفوا بقى الفرق بينه وبين الرائع ابو تريكه ده الي انسان بجد وقدوه بجد مع اني عمري ماشفت ماتش كوره بس بحترم الراجل ده جدا لانه يستحق كده

عموما مش هقول غير ربنا يهديه يارب ويرجعله عقله
------------------------------------------------------

ملحوظه: بعتذر ليكم كلكم جدا اني مابجيش عن حد بس بجد الوقت في رمضان بيعدي هوا ومشغوله مش عارفه اقعد على الجهاز اشوفكم بعد رمضان باذن الله

نكته رمضان

2009-08-24T05:44:00.003+03:00

كل سنه وانتم طيبين يارب معلش جت متأخره بس بجد كنت مشغوله شويه

يارب كل امانيكم تتحقق يارب ويوفقكم

وحبيت اقولكم نكته جاتلي بالمناسبه الجميله دي يارب تعجبكم

--------------------------

ابليس سمع العيال بتغني رمضان جانا ... وقف يغني : رجب حوش صاحبك عني..

-------------------------

يعني هيفا مش سايبانا حتى في رمضان

يلا كل سنه وانتم طيبين

فضفضه

2009-08-11T06:15:00.002+03:00

تعبت قوي تعبت من حاجات كتير
تعبت من انها لازم هي الي تستحمل
لازم تضغط على اعصابها
تعبت من سماع كلمات معلش واستحملي واصبري
تعبت من انها دايما لازم تتحمل وتصبر
نفسها مره هو يتحملها
نفسها مره تنفجر وتصرخ وهو يطبطب عليها ويهديها مش يزود احزانها
اه هو فعلا واقع في مصيبه كبيره مابتحصلش الا واحد في المليون
بس هي تعبت جايت اخرها بجد
بتحاول ترضيه بكل الطرق
لكن اغلب محاولتها بتفشل
حتى حاولت ترجعله ابتسامته لكن برضو فشلت
اتغير قوي قوي
بقى قاسي حتى عليها وعلى كل الي حواليه
ماكانش كده ابدا
مش هو ده الي اخترته
مش هو ده الي حلمت بيه
هي قسوه الزمن والظروف بتغير قوي كده؟
قالولها كتير اصبري بكره هيكون احسن
لكنها بتصحى كل يوم على الامل ده وتلاقي ان انهارده اسؤ من امبارح
لما بتمشي في الشارع وتشوف اي اتنين بيحبوا بعض بتكون مبسوطه خالص علشانهم
شكلهم بيبان عليهم عيونهم مليانه امل وفرحه
لكن هي نسيت كل ده معاه
بقوا بعاد قوي قوي عن بعض
مابقاش هو الحلم الي حلمته
علشانه جزأت حلمها ده لاجزاء كتير
وتنازلت عن اجزاء كتير فيه وقالت معلش
لكنه للاسف وصل لاجزاء مش هتعرف تتنازل عنها اكتر
هي مقدره كل الظروف
لكن هي بشر انسانه ليها قدره تتحمل بيها
حتى دموعها الي كان بينهار قدامها
ماعادتش بتهمه
بقى بينهم سد كبير
وهي قررت يا يشيل هو السد ده او على الاقل يحاول
يا يفضل موجود لغايه لما تكون ماتقدرش تشوفه تاني
وساعتها هي هتمشي في طريق تاني من غيره

دعوه للتسامح

2009-08-04T05:10:00.004+03:00

طبعا البوست ده تحت رعايه البنوته المشمشيه الجميله وانا بعتذر اني اتأخرت عليكي بس بسبب ظروف والله

المهم اليوم الي قالتي عليه مشمشيه عن الموضوع ده كلمتني واحد صاحبتي لسه مجوزه بقالها 4 شهور وصاحبتي دي ليها حكايه مؤلمه شويه حابه اقولها حيت انها ليها علاقه قوي بموضوع التسامح ده او حتى اكبر بكتير من مجرد تسامح

صاحبتي دي كانت بتحب جوزها ده جدا بس كان باباها معترض عليه لان هو معاه دبلوم بس هي مصممه عليه وكان باباها ومامتها مطلقين من زمان من وهي صغيره وهي كانت معتبره حبيبها ده كل حاجه

المهم باباها اعترض وهي صممت فالعند خلى مامتها تروح تاخدها من بيت باباها وتخليها عندها وتجوزها هي من غير موافقه باباها وانا بدقق هنا على العند ده جدا لان مامتها عملت كده لمجرد العند في باباها بس لا اكتر ولا اقل

المهم هي اجوزت من 4 شهور كلمتها وقتها ونصحتها كتير ان ظهر البنت في الدنيا هو باباها وقولتها كتير انها تكلمه تقوله حتى على معاد الفرح خافت ومارضيتش (مع العلم ان باباها هو الي رباها ومامتها ماكنتش بتشوفها اصلا خالص )

هي دلوقتي الحمد لله كويسه ومبسوطه وحامل كمان فرحت جدا ليها وبرضو قولتها كلميه حرام عليكي قوليله حتى انك حامل وهو هيفرح وينسى كل حاجه تقولي برضو خايفه وتتحجج باي حجج اقولها يا بنتي رمضان جاي اهو ومناسبه حلوه يعني عاجبك كده انك دايما تروحي لاهل جوزك بس وبيت ابوكي موجود وماتعرفيش تروحيله تقولي هفكر وتقولي ان انا الوحيده الي بجبلها سيره باباها وبنصحها تقولي اصل لو كلمته هيقفل السكه في وشي قولتها ده يقفلها مره وميت مره كمان ده انتي تروحي تبوسي رجليه والتراب الي يمشي عليه وتستسمحيه كمان وهو هيرضى بس طبعا بترفض

طبعا هي صعبانه عليا جدا وبجد مهما كان الزوج كويس الا ان الواحد مايعرفش الزمن فيه ايه وظهر البنت في الدنيا هو باباها واكيد عايزاه

الزوج ممكن يتعوض لكن الاب مش هيتعوض ولا هيعوضني عنه ميت راجل تاني

يعني انا جت في بالي القصه دي وحبيت اقولها اقول ان لازم نسامح بعض خصوصا لو كانوا اهل يا بنات ماحدش بيحل مكان حد يعني الاب اب والزوج زوج والام ام ماينفعش اعتبرجوزي بابايا ولا ينفع اعتبرحماتي امي ولا حتى بحب اني انادي حماتي بماما ولا انادي حمايا بابا لان الحمد لله كل واحد له ام واب وهي كمان بتنادي حماتها ماما

ربنا يهديكي يا صاحبتي يارب وقلبك يحن وتسامحي

تفرقنا السنين

2009-07-27T04:25:00.002+03:00

تفرقنا السنين ونجتمع والجرح نفس الجرح......

على درب الفراق دموعنا تسبق خطاوينا......

شرحت ظروفنا للوقت لكن ما فهم للشرح......

صبرنا والصبر جمره ورا الأضلاع كاوينا........

بنت ومخطوبه ومجوزه

2009-07-21T05:48:00.002+03:00

المخطوبه(جايه بعد مكالمه مع خطيبها): اووووووف الرجاله دول عالم خنيقه بجد

البنت: ليه بس ؟ عملك ايه؟

المخطوبه: تأخير بره البيت عن الساعه 10 ونص ممنوع اروح سينما مع صحباتي ممنوع زمايل اولاد اكلمهم في حاجه في الشغل ممنوع كله ممنوعات وانا مش متعوده على الخنقه دي بصراحه

المجوزه: يابنتي عامل نفسه بقى راجل عليكي ولسه بيغير وكده حركات مخطوبين يعني

البنت: ياه احلى حاجه الغيره دي ماعرفش خنكاقي ليه ده انا نفسي احب واتحب ويغير عليا

المخطوبه: يا اختشي كنت فاكره الخطوبه دي هتكون اسعد الاوقات لكن الي يقول كده يبقى غلطان لان برضو فيها مشاكل انا كنت مالي ياربي بس ومال الجواز وقرفه ماكنت بحريتي ملكه نفسي اعمل الي عايزاه ومدلعه اخر دلع

المجوزه: ومال لما تجوزي هتقولي ايه ؟ مسؤوليه بقى وعيال وبس يابت وبس ياواد وهو ولا هنا فالح بس يقولي سكتي العيال تقولش عيالي لوحدي والله مافيش احلى من ايام زمان فين دلع البيت اصحى براحتي وانام براحتي مافيش زن ولا مسؤوليه يارب يوم بس من ايام زمان

البنت: انتم عقدتوني يعني افضل ما اجوزش خالص ولا اعمل ايه؟ انا كنت بحلم احلام كتير في الخطوبه والجواز انتم مدمرين كل الاحلام

المخطوبه: بصي يا حبيبتي الجواز شر لابد منه يعني لازم نجوز ونعمل بيت وعيله سنه الحياه بقى بس يعني نصيحه بلاش تعيشي نفسك الوهم وتعدي تحلمي كتير لان في الواقع مافيش الاحلام الوردي دي قوي

المجوزه: اهي زي ما قالتك كده ماهو لو كنا بنتناسل ذاتيا ماكوناش احتاجنا نجوز هي بس الامومه احلى مافي الجواز

ال3 في صوت واحد هههههههههههههههههههه

المخطوبه : عندك حق والله بس نفسي ومنى عيني خطيبي يبطل خنقته عليا دي انا مش متعوده على كده

المجوزه: وانا نفسي جوزي يحس اني بجد بتعب ويتمل معايا التعب ده

البنت: وانا نفسي........ هههههههههههه هو انتم خليتوا نفسي في حاجه بعد كلامكم ده عقدتوني هههههههههههه
لا المجوزه مرتاحه ولا المخطوبه ولا الي لسه
-------------------------------------------------------------

كل واحده منهم عندها مشاكلها ياترى ايه رايكم في مشاكلهم وتتحل ازاى وافتكر الامثال دي موجوده كتير

ممكن اجوز عليكي؟..حقك يا حبيبي

2009-07-10T04:45:00.002+03:00

هو: عايز اسألك سؤال بجد وتجاوبي بصراحه

هي : اتفضل

هو: لو اجوزت عليكي هتعملي ايه؟

هي(وحاجب طالع والتاني نازل): حقك يا حبيبي

هو: نعم بجد بتكلمي بجد مش هتطلبي الطلاق ؟

هي: ههههههههه طلاق ليه عبيطه اسيبك انت وهي وتمشوني

هو: يعني ايه؟

هي(مطلعه العين الحمرا): بص انا ماعنديش مانع تجوز بس شرطي الوحيد انك تيجي تقولي انا هجوز مش تعملها من ورايا لان موتي وسمي انك تخبي عليا حاجه وهقولك حقك اجوز

هو: ياسلام بس؟

هي: بص انت عارفني لما احب انكد عليك بنكد من غير سبب لما تطق في نفوخي انكد بنكد عليك ايامك كلها بتكون سودا صح ولا يا نور عيني انت؟

هو: صح انتي هتقوليلي

هي: خلاص وانت حقك تجوز عليا عادي بس انا كمان حقي اخلي ايامك سودا ابقى بقى قابلني لو يوم واحد عشته كويس معاها او حتى معايا ولو قولت انك هتخبي فانت برضو عارف اني هعرف وبرضو هنكد عليك فابقى اعملها ماشي يا حبيبي

هو: اعوز بالله منك ده انتي مفتريه ده كان مجرد سؤال تقولي كل ده هو الي يجوز مره يبقى مجنون لو فكر تاني خصوصا لو مراته انتي

هي: ايه قولت ايه يا حبيبي ماسمعتش

هو: ولا حاجه ياستي هو انا نطقت

هي: اه بحسب

شهيده الحجاب

2009-07-05T18:18:00.002+03:00

ياناس حد يديني عقله 17 طعنه في الدكتوره مروه الحرس كان فين ده غير طعنتين في جوزها ولما الحرس فاق ضرب جوزها بالرصاص ازاى يعني بأي منطق ده ماحدش يتحرك طول ال 17 طعنه وجوا المحكمه ليه وازاى؟

زنبها ايه ؟ عملت ايه؟ علشان لبست حجاب تبقى ده ذنبها؟ ذنب ايه ابنها الي عنده 4 سنين بس وكمان كانت حامل؟ ده لو حد من الغرب دول صباعه الصغير حصله حاجه عندنا كانت قامت الدنيا كلها وكانوا عملوا حرب علينا تقوم دي ميته كده وقدام العالم كله وفي المحكمه والي يغيظ ومجنني هو رد السفير المصري المحترم بتاعنا في المانيا لما معتز الدمرداش بيساله هل طلعت الحكومه الالمانيه اعتزار رسمي ؟ يقوم السفير قايله هما مش معنى انهم يكلموني وانا السفير يبقى اعتزار رسمي؟ نعم ده الاعتذار الرسمي حتى معنز قاله اعتقد الاعتذار يكون موثق مش بمكالمه تلفون

ايه الهبل الي بيحصل ده دمنا بقى رخيييييييييييييص قوي كده والله حرام الله يرحمك يادكتوره مروه ويصبر اهلك ويقوم جوزك بالسلامه علشان ابنك الصغير ده وسامحينا مش عارفين ناخد حقك للاسف لان دمنا رخيص قوي

الاسطوره ..شكرا بجد

2009-06-30T03:44:00.002+03:00

عمرو دياب بجد شكرا الالبوم رائع لان انت انسان اكتر من جميل

انا بجد برتاح نفسيا لما بسمعه وانا دلوقتي في اشد حاجه لاي راحه نفسيه

شكرا ليك

مستحيل استغنى عنك

2009-06-25T04:26:00.003+03:00

بحبك قد عمري قبل عمري بعد عمري حبي ليك فوق المشاعر والحدود

بحبك قد روحي قبل روحي بعد روحي مش هلاقي زيك انت في الوجود

مستحيل استغنى عنك مستحيل ده انا كلي منك

انت اكتر من حبيبي انت كل مافيك حبيبي

نفسي اقولك اني عاشقه ودايبه موت

----------------------------

ياريت تفهم بقى يا اخي وتبطل تلمح ان ممكن مايكونش بينا نصيب وهتعدي صدقني هتعدي الازمه دي بس نعديها سوا مش كل واحد في مكان لان بدات اصدق انك مش عايزني وانك بتقصد تبعدني عنك

ياريتني زيك يابحر

2009-06-19T19:47:00.002+03:00

ليتنى مثلك يابحر خاليه الهموم..او اتسع مثلك لكل تلك الدموع ..فعلمنى لأكون بحراً او لا أكون

كله عادي

2009-06-11T02:02:00.004+03:00

كل شئ بقى عادي
زعلانين..عادي
قلوبنا مكسوره..عادي
حياتنا مش عارفين نعمل فيها ايه ..عادي
كل حاجه بقت عادي عارف ليه لاننا اتعودنا على كل ده
اتعودنا ان مافيش فرح اتعودنا على الالم
بس عارف ايه اصعب شئ
ان احنا بقينا بعاد قوي
ان بقى الصمت هو لغتنا سوا
ان انا ماعونتش بشوفك ولا بتشوفني
ان كل حاجه في نفس الوقت بايظه
ان كلمه بحبك منك ساعات بحسها واجب بتقوله

اني بحس ان القدر بيبعدنا بعيد قوي

اني اكلمك وانت تكون في عالم تاني
ان حبنا بقى اقل بكتير من العادي
------------------------------------

الكلام المكتوب ده انا كتبته كده من غير تفكير ولا تنظيم ولا اي حاجه يمكن مش هتفهموني لانكم ماتعرفوش الظروف الي بمر بيها بس انا كتبته وانا في اسؤ الظروف بجد يمكن الوحيده الي تعرفها اينو بس يا اينو كل حاجه كل مادى بتبوظ

المهم انا بعتزر ان انا مابدخلش اي مدونات خالص مع انكم واحشني جدا بس مش قادره وبصراحه ماليش نفس لاي شئ اصلا

بعتذر جدا لشمس النهار انها بتقول ان كل الي بكتبه نكد بس صدقيني المدونه دي الحاجه الوحيده الي بكلمها كاني بكلم نفسي فانا اسفه ليكي بس مش قادره اتحرم من ده كمان

عارفه ان اغلب الي بكتبه نكد زي ماقولتي بس والله غصب عني ماتزعليش مني

وكلكم انا اسفه ان كلامي كده بس انا هنا بكلم مع نفسي

يابخت الي اسمه عمرو

2009-06-04T05:03:00.005+03:00

وحشتوني جدا انا امتحنت بس لسه النتيجه ماظهرتش ادعولي وندخل في البوست بقى

مبدئيا كده انا عمري ماقبلت شخص اسمه عمرو في حياتي لكن الي متاكده منه انه اسم يحمله شخص اكيد رائع وده الدليل

اولا:

الحلم الاسطوره عمرو دياب الي باموت فيه ومستنيه البومه على نار

ثانيا:

عمرو موسى راجل بجد ومحترم جدا

واخيرا

الداعيه الجميل الاستاذ عمرو خالد

وبما اني بحب ال3 دول وكل واحد له مجال مختلف بس نفس الاسم اذا نستنتج ان يابخته الي اسمه عمرو

وتستمر الحياه ........

2009-05-21T02:19:00.002+03:00

كان عندها احساس غريب بيقول ان اليوم ده هيحصل في حاجه وانه هيكون فيه حاجه غريبه بس ماحطتش الموضوع في بالها وكالعاده كل يوم صحيت الصبح وراحت شغلها وبعد الشغل راحت السوبر ماركت تشتري حاجات مامتها قالتلها عليها
وفي الوقت ده الموبايل رن على نغمه عمرو دياب (حبيبي يا مالك قلبي بالهوى.....) وشها ظهرت عليه ابتسامه جميله وردت على الموبايل
الو ازيك يا حبيبي ؟
الحمد لله يا حبيبتي وانتي؟
الحمد لله في السوق بشتري شويه حاجات

واستمرت المكالمه............

في الوقت ده كان في واحد بيراقبها وبيبصلها ولما خلصت المكامله قرب منها وجه قدامها
هي لما شفته واقف قدامها حست ان الزمن توقف ماقدرتش تكلم ماحستش باي شئ حواليها فضلت تبصله في صمت وبس

وبدا هو الكلام

- ازيك يا باشمهندسه بسمه؟

- (نزلت عينها في الارض وردت): الحمد لله ازيك انت يابشمهندس؟
- كويس الحمد لله ازي شغلك والدنيا معاكي
- الحمد لله الدنيا كويسه واشتغلت في شركه كويسه وانت عامل ايه؟
- اهو زي ما انا اه صحيح مبروك الخطوبه
- ( بلعت ريقها بصعوبه وقالت): الله يبارك فيك عقبالك
- هههههه صدقيني اول ما الاقي الانسانه الي تخليني اوفي بوعدنا هجوزها فورا عارفه انا مبسوط قوي انك لاقيتي الانسان ده حاسس اني مطمن عليكي انا اسف بس انا لاحظتك وانتي بتكلميه وشفت عينيكي وهي بتلمع وابتسامتك الحلوه عرفت وقتها انك بتحبيه وانك وفيتي وعدنا ان رغم فراقنا فكل واحد يجوز الي يحبه برضو مش اي حد

- (بصت هي للارض تاني كانها بتفتكر كل لحظه كانت بينهم سيل من الذكريات رجعلها في لحظه )وقالت بصوت منخفض ومش عايز يطلع : شكرا عقبالك يا باشمهندس

- بصلها هو قوي نفس نظره الوداع الي شافتها قبل كده بتكرر تاني قدامها وقالها: ماشي ربنا يسعدكم استاذن انا
- كانت عينها بتقوله خليك شويه ابصلك اطمن عليك بس لسانها ماقدرش يقولها وقالتله : ويسعدك يارب
- مع السلامه ويارب دايما اطمن عليكي
- ماقدرتش تكلم وتقوله مع السلامه رسمت على وشها مجرد ابتسامه وبس

مشي هو وهي لفت وشها تشوفه لاخر لحظات وابتسمتله وقالت لنفسها ياااااااه ماتغيرتش الحمد لله يارب اني شفته واطمنت عليه

وفضلت تبصله لغايه ما اختفى وسط الناس والزحام.............

----------------------------------------------------
طبعا انا عارفه اني مش بعرف اكتب قصص ولا حاجه بس دي زي ماجت على بالي كتبتها وانا اقصد منها ان ممكن الانسان يحب ويحصل فراق لاي سبب وهنا قصدت ماذكرش السبب لان مش ده موضوعنا انا قصدت ابين ان ممكن بعد الفراق يحصل حب تاني وجديد والحياه تستمر صحيح بتكون في اثر للذكريات زي ماشفنا لما هي شافته بس هي كمان بتحب خطيبها بالعكس ده كان اتفاق بينها وبين حبيبها السابق ان لازم كل واحد فيهم يحب تاني ويجوز عن حب مش مجرد جواز وبس

ياجماعه ادعولي عندي امتحان مهم جدا علشان قدمت في منحه يارب انجح واسفه اني مقصره معاكم بس بزاكر بقى

قالي الوداع

2009-05-16T04:10:00.002+03:00

ياريته قال هيروح يغيب وماكنش قال بقى له حبيب ياريته راح من غير جراح هيفيده ايه يسيب جراح فيا حسيت اني لقيت حلم السنين وصحيت فجأه بقيت من المجروحين

مشهد مقزز

2009-05-11T03:39:00.002+03:00

طبعا كلنا عارفين فيلم (عمروسلمى) الي كان الصيف الي فات الي الحمد لله انا مادخلتوش لاني بشمئز من الكائن الي اسمه تامر ده المهم ان الفيلم اتعمل ومش مكفيهم جزء واحد لا اتحفونا بالجزء التاني منه ومن حظي السئ اني كنت بقلب في القنوات فشوفت اعلان الفيلم وبالتحديد شفت مشهد اقل مايقال عنه انه مقزز جدا

المشهد ان مي عز الدين نايمه وتامر بيقولها انتي زي الملايكه وانتي نايمه المهم هي بتصدر صوت شخير مقزز برضو يقوم هو يعمل ايه بقى واسفه على اللفظ الي هقوله يقوم هو تافف عليها

بصراحه انا اصابتني حاله من القرف فظيعه بعد ماشفت المشهد ده يعني بيعود الناس عدم الاحترام بين الازواج وان ده عادي انا بصراحه تخيلت الموقف ده نفسه حصل معايا لقيت ان رد فعلي الطبيعي على جوزي لو فكر انه يعملها بس اني بظهر ايدي وهديله قلم على وشه واروح بيت اهلي لان ساعتها هو انسان غير محترم ومش محترمني كمان ولو حتى كان بيهزر وبكل فخر هطلق

ده رايي بصراحه ياترى ايه رايكم وهل لاحظتم المشهد ده واصابكم الاشمئزاز زيي؟

اعتزلت الاحلام

2009-05-07T04:05:00.004+03:00

كنت بحلم كتير وبحاجات كتير
لكن بعترف دلوقتي اني تعبت من الاحلام
بعترف اني يأست انها تتحقق
بعترف اني ماعونتش حتى بفكر فيها
بعترف اني بقيت بمنع نفسي من الحلم
بعترف انها طلعت كلها اوهام بعيش نفسي فيها
اصل هحلم ليه؟
وعلشان ايه؟
علشان الحلم مايتحققش
علشان اتعب وبس
قولت كتير بكره هيكون احسن
قولت كتير لنفسي كلمه (معلش)
زهقت من كل الكلمات دي
زهقت من اني استنى امل وحلم مش جاي
قلبي ماعاتش متحمل يأس تاني
وانكسار تاني
وجرح تاني
وألم تاني
ودموع تاني

قررت اعتزال الاحلام
--------------------------

بعتذر اني مش هقدر ازور مدوناتكم لاني الفتره دي مش مركزه خالص اسفه

كلمه بحبها

2009-05-02T03:34:00.003+03:00

نحتفظ بأقفاص الطيور واحواض السمك في بيوتنا لنعرف ان هناك حياه

فضفضه

2009-04-27T02:21:00.002+03:00

بقالي كام يوم بفكر اكتب عن ايه اكتب بوست اقول فيه ايه يعني بس لقيت ماليش نفس ماليش نفس لاي حاجه حاسه ان قلبي حزين يائس حاسه ان في كتله هم وحزن كبيره قوي جوايا قعدت افكر في عام 2008 لقيت اني فقدت فيه ناس كتير عزيزه عليا وورا بعض ولما جه 2009 قولت اكيد هيكون احسن بس للاسف لقيته اسؤ حاسه ان كل الي حواليا مخنوقين وزعلانين ماما حاسه في عينها حزن كبير حاسه ان ملامحها كبرت فجاه من التعب على اخواتي الاتنين الي كانت بتعمل عمليه والي دخلت المستشفى ولسه تعبانه طول عمري اسمعها بتقول تحصل اي حاجه الا ولادي يكونوا بس كويسين واهو الحمد لله على كل شئ

ولا خطيبي الي كل ما اكلمه الاقي دايما صوته زعلان او مخنوق او مضايق لان حصل ظروف وكل حاجه كان مخططنها باظت وكل ماتكون في فرصه تروح غصب عنه هو كمان متحمل كتير وانا عارفه بس انا تعبت من انه ماعاتش بيتحمل كلمه وان لازم اتحمل كل شئ

نفسي اصرخ انا تعبت بجد تعبت ماليش نفس لاي حاجه نفسي اجري كتير اصرخ بصوت كبير اعيط قوي يمكن ارتاح

عموما انا قولت افضفض وخلاص وان شاء الله استعيد توازني الداخلي مع نفسي بس بجد الوقت ده اصعب وقت قضيته في حياتي والحمد لله على كل شئ يارب

الحمد لله

2009-04-25T18:23:00.002+03:00

الحمد لله يا جماعه احب اطمنكم ان اختي رجعت البيت وهتكمل العلاج من البيت الحمد لله شكرا ليكم كلكم ولدعواتكم ربنا يخليكم ليا ووحشتوني جدا بجد وكل مدوناتكم وحشتني جدا

اعتذار للكل

2009-04-20T04:46:00.002+03:00

انا اسفه جدا اني مش بزوركم وهنقطع عن المدونه لفتره ماعرفش لغايه امتى وده لظروف ان اختي في المستشفى وماعرفش هتطلع امتى هي الحمد لله بتتحسن بس ببطئ ادعولها وارجو انكم تقبلوا اعتذاري وماتنسونيش

بيتي ومطرحي

2009-04-15T03:53:00.003+03:00

ده انت بيتي ومطرحي ماعرفش لو تعرف ان انت سكني الي بسكن ليه وبرتاح ده قلبي صحي

انت حياتي ودنيتي وده املي وفرحتي

بحبك(ياكسوووفي)

جاي في السريع

2009-04-10T05:43:00.002+03:00

جاي في السريع ده اسم فيلم ناقش الموضوع الي عايزه اناقشه انهارده والي بسميه الجواز على الطاير الموضوع ان بيكون واحد مسافر بره ينزل اجازه يخطب واحده ويسافر وينزل مره تانيه يجوزها او ينزل مره واحده بسرعه يخطب ويجوز
ماقدرش اقول ان الجواز بالطريقه دي غلط بس انا بستغرب هل الي بتتخطب كده بتتعرف على خطيبها ازاى بتتعرف على طباعه ازاى ؟ يعني مثلا لو واحده مخطوبه وخطيبها حتى بيجيلها مره كل شهر او مره كل اسبوعين فهي بتعاملها معاه وجها لوجه بتعرف حاجات عنه سواء بقى حاجات سلبيه او ايجابيه لايمكن كانت تعرفها من مجرد كلامهم في التلفون مثلا لا دي بتعرفها من تعاملاتهم سوا وجها لوجه
هل فعلا ممكن تعرفي ولو الطباع الاساسيه فيه من مجرد مكالمات تلفون ؟
في رايي لو كان اتقدملي حد كده ماكنتش هوافق لان هكون صعب عليا اني اتعامل مع صوت بس وفجاه الصوت ده يجي ويكون جوزي
طبعا مع احترامي لكل الي عملوا كده لان طبعا دي ظروف لكن انا مجرد بناقش فكره عندي وحبيت اعرضها للنقاش

كذبك حلو

2009-04-06T05:31:00.002+03:00

كذبك حلو شو حلو لما كنت شي كذبه بحياتك كذبك حلو اتذكرني شي مره ورجعني عبالك

كذبك حلو يا أول كذبه صدقتها بحياتي .. كذبك حلو يا احلى كذبه واختارتها بذاتي

صوره وكلمه

2009-03-26T04:22:00.003+03:00

I love walking in the rain because no one knows im crying

شوكولاته وانت

2009-03-21T05:26:00.004+03:00

بحبك قد مابحب الشوكولاته وانت عارف قد ايه بحبها حتى واحنا زعلانين بعد اكل شوكولاته عشقي الاول (وش مطلع لسانه)

حب ولا تعود (الجزء التاني)

2009-03-16T06:24:00.003+03:00

الجزء الاول من البوست ده هو البوست الي فات على طول للي ماقرئهوش وشكرا لكل تعليقاتكم عليه ونبدا التاني
------------------------------------------------------------------

وبعد مرور كزا شهر

هي وصاحبتها في كافيه

صاحبتها: في واحد متقدملي

هي:عادي ما كتير اتقدمولك وانتي رفضتي وكنت بعرف من طنط بس الي مش عادي ان انتي الي تقوليلي مش طنط يبقى العريس ده في حاجه مختلفه ايه هي بقى اعترفي يا جميل

صاحبتها: ابدا فاكره هيثم

هي: هيثم مين؟

صاحبتها: هيثم يابنتي الي اتقدملي من 4 سنين وانا رفضته لانه كان لسه طالب

هي: ياه ايوه ايوه افتكرته ده كان بيحبك قوي

صاحبتها: هو ده اتخرج واشتغل واتقدم تاني وطبعا انتي عارفه ان اصلا ماما وبابا حبوه جدا من الاول ودلوقتي بقى اتقدم تاني

هي: طيب ماتفكري ليه لا خدي الي بيحبك اكيد هتحبيه في يوم وشوفي ده لسه مصمم مع انك بهدلتيه يعني وعذبتيه

صاحبتها: اهله كمان ناس كويسين قوي وحبتهم قوي

هي: خلاص فكري وصلي استخاره

وفعلا تمت الخطوبه ................

وبعد مرور كزا شهر من الخطوبه.........

هي وصاحبتها خارجين سوا وقاعدين في نفس المكان

هي: ها ياستي عامله ايه مش عارفه اتلم عليكي العريس واخدك مني

صاحبتها: هههههههه لا انا اقدر استغنى

هي: المهم طمنيني عامله ايه؟

صاحبتها: اهو الحمد لله

هي: يعني بقيتم ازاى سوا شكلك عايزه تقولي حاجه

صاحبتها : اه في حاجه كده حصلت ومش لاقيالها تفسير

هي: قولي كلي اذان صاغيه

صاحبتها: هو كلمني من يومين

هي: يالهوي وعملتي ايه

صاحبتها: ولا حاجه ماردتش ولما كتر من الرن رديت وقولته انا اتخطبت واسفه ماتكلمش تاني وهو من ساعتها ماكلمش فعلا

هي: طييب كويس كده احسن المهم انتي كويسه

صاحبتها: عارفه انا هوصفلك كان شعوري ايه انا ماقولتوش ماتكلمش تاني مش علشان انا بس اتخطبت او علشان ماحسش اني خاينه او كده

هي: ومال؟

صاحبتها: ماعرفش ماحستش اني عايزه اكلمه بعد ما كلمته وقفل روحت على طول كلمت هيثم وفضلت ارن عليه كتير وانا عارفه انه في الشغل ومش بيعرف يكلم وهوفي الشغل وانا عماله ارن وفعلا كلمني وقالي في ايه خضتيني

هي: هاه وقولتيله ايه

صاحبتها: انا ارتبكت وقولته مافيش حاجه كنت بس عايزه اسمع صوتك

هي: ياسلام على الرومانسيه

صاحبتها: عارفه ان انا فعلا كان نفسي اسمع صوته بس حسيت اني عايزه اكلمه قوي تفسري ده بايه؟
هي: ابدا حبيتيه

صاحبتها: ومال ليه لما بقارن احساسي بهيثم عن احساسي زمان باول حب ليه مش زي بعض ليه بحس ان في فرق هل ده علشان كان الحب الاول مع اني بجد مش بفتكر الشخص نفسه خالص انا بفتكر الاحساس بس انتي فاهماني؟

هي: اه يعني انتي بتقارني بين احساسك بهيثم واحساسك زمان بالحب الاول الي طبعا كان مشتعل اكتر من كده وفي هيام اكتر ورومانسيه اكتر وكل ده

صاحبتها: بالظبط عارفه انا دلوقتي بجد ماتخيلش اني ممكن اجوز حد تاني غير هيثم بس في نفس الوقت ليه نفسي احساسي بيه يكون زي الاحساس الي كان في حاجات غريبه مش قادره افسرها صحيح بفرح لما بيجي يزورنا بس ليه مش نفس فرحتي مع ان هيثم في كل حاجه انسان بيحبني جدا طموح بحب عيلته جدا وهما بيحبوني جدع كريم قوي بس نفسي افسر الي جوايا ده ايه

هي: بصي ماتقرنيش اي احساس بالحب الاول لانه طبعا الحب الاول هيكسب عموما ياستي بعد الجواز لا هيكون في حب اول ولا تاني ولا هيكون في حب اصلا ههههههههههههه

صاحبتها: يا مفتريه حرام عليكي لا بجد في ايه؟

هي: ماعرفش بس ده تفسيري اكيد مع الوقت هتحبيه زي الحب الاول واكتر مع الجواز والعشره

ده كان راي هي لصاحبتها وهو ده الراي الي صاحبتها مش عارفه تقتنع بيه ياترى انتم رايكم ايه ايه تفسير حاله صاحبتها ؟ وياترى هي بتحب خطيبها ولا اتعودت عليه ؟ وازاى تحبه فعلا وتوصل احساسها زي الحب الاول؟

قرار صعب وصح (جزء الاول)

2009-03-12T05:42:00.004+03:00

البوست ده طويل قوي فهقسمه على جزئين هي تعتبر موقف او ممكن تقولوا عليها موضوع في احاسيس كتيره بتحصل لكتير مننا وعايزه رايكم فيها نبدا بالجزء الاول وللعلم انا حاولت اختصر كتير من التفاصيل الي اعتبرتها مش مهمه بسم الله

--------------------------------------------------------

اتصال هاتفي وترد هي

هي: اهلا ازيك عامله ايه

صاحبتها: الحمد لله على كل شئ

هي: عملتي ايه؟

صاحبتها: عملت الي قولتك عليه سيبته

صمت من هي وصاحبتها لمده ثواني

هي: وانتي عامله ايه دلوقتي؟

صاحبتها: حاسه بوحده بحزن ايدي كل شويه بتمسك الموبايل نفسي اكلمه اسمع صوته

هي: ده كان قرارك

صاحبتها: كان قرار عقلي وكان القرار الصح للاسف انتي عارفه كويس كانت كل حاجه بينا مختلفه حياتنا مستوانا كل حاجه كانت كل حاجه بتقولي انه هيكون جواز فاشل حاولت حاولت كتير اني اقول لنفسي هقدر لكن ماقدرتش وماعرفتش

هي: ايوه عارفه صعب اننا نضحك على نفسنا ونقول هنقدر وبنحب بعض الجواز مش حب وبس الجواز حياه الجواز عيلتين بيدخلوا في بعض لازم يكونوا قريبين من بعض

صاحبتها: حتى لما ماما شافتني كده على طول بفكر سالتني وقولتها قالتلي طبعا ماينفعش هو صحيح مستقبله كويس بس هتعرفي تعيشي حياته هتعرفي تعيشي في الارياف وانتي الي عمرك ماروحتيها هتعرفي تعيشي في بيت عيله عايشين كلهم سوا وانتي الي طول عمرك بتحبي الاستقلال والخصوصيه في حياتك ؟ بينا وبينهم اختلافات كتير ممكن لعلمك يكون مافيش اخلاف مادي بينا كبير بس بكلم عن الاجتماعي وده الاهم وده الي هتعيشي معاه

هي: انتي قولتلها ايه؟

صاحبتها: فكرت في كلامها ولقيت اني مش هعرف اهون عليا انه يكون ذكرى حلوه في حياتي عن انه يبقى قرار جواز خاطئ اخدته اندم عليه العمر كله

هي: يبقى قرارك كان صح يا حبيبتي وماتزعليش الزمن بيداوي كل حاجه

صاحبتها: حبيته قوي اول انسان دخل قلبي لما حبيته الدنيا كلها كانت حلوه ليه بس ليه ماقدرتش اقول لقلبي لا ليه

هي: لان قلوبنا مانعر فش نتحكم ومش كل حاجه بتمناها بنلقاها ان شاء الله ربنا يجعلك نصيب احسن

صاحبتها(وكانت صوتها كله دموع): تعبانه قوي خايفه اضعف بس علشانه وعلشاني سيبته وانا بحبه

السؤال هنا ياترى قرار صاحبتها كان صح ولا غلط وهل لو وافقت كانت هتكون فعلا جوازه فاشله ؟ مع العلم ان الشخص ده كمستوى علمي هو زيها وهيكون اعلى بس كمستوى اجتماعي لا

ليه........

2009-03-11T05:21:00.003+03:00

اولا بشكركم كلكم بجد في دعواتكم لاختي وربنا يشفيها يارب ويشفي كل مريض يارب امين والحمد لله على كل شئ وانتم كلكم بجد ناس رائعين بجد والله العظيم شكرا جدا لعالم التدوين الرائع ده وللناس العسولين الي هما انتم ربنا يخليكم ليا ونبدأ البوست

------------------------------------------------------------------------

ليه مش قادر تفهمني
ليه مش قادر تحس بيا
ليه بحس ان انت في مكان وانا في مكان تاني
ليه مع اننا كل يوم بنكلم بس بيكون اغلب كلامنا صمت
ليه بحس انك شايل هموم
وانا شايله هموم
وكل واحد كاتمها جواه
اسالك مالك تعبان ليه مهموم ليه
تقولي مافيش ماتشغليش بالك
قربني منك خليني جواك

ليه دايما بحس انك حاسس اني مش هفهمك
ليه باعدني
مع اني عارفه وانت عارف اننا مالناش غير بعض
ليه في دايما حاجز
وكل ماقرب احاول اشيله معاك الاقيك بتبعد وتقول مش عايز اتعبك معايا
نفسي تعرف انك بكده بتألمني
نفسي تعرف اني عايزه اكون معاك في كل حاجه
في ألمك قبل فرحك
وفي دمعتك قبل ضحكتك
عارف ليه؟ ولا دي كمان نسيتها
لاني بحبك وماليش غيرك

ااه من تعب القلب

2009-03-08T06:02:00.001+03:00

وانا صغيره لما كانت ماما او بابا بيتعبوا لاقدر الله كنت مابرضاش ابدا ادخل الاوضه الي بيكون الشخص التعبان فيهم فيها ابدا كانوا ينادوني ويتحايلوا عليا ادخل ولو دخلت ببص كده عليهم ومابكونش مستوعبه ان ماما مثلا تعبانه كنت بعد اشدها اقولها قومي فاكره زمان كان بابا عمل عمليه وفعلا طول ما انا كنت معاه في الاوضه ماكنتش بكلم ولا حتى كنت بقوله سلامتك كنت بعد ابصله بصمت كنت بعد اسال نفسي يعني ايه عيان ويعني ايه تعبان وليه مش عارف يقوم ويمشي كان عقلي صغير انه يستوعب يعني ايه تعب

وكبرت وبدات افهم يعني ايه تعب ومرض بس ماقدرتش اتخلص من عادتي القديمه في اني مابقدرش اشوف حد من عيلتي تعبان او مريض بعد برضو ابصله بصمت غريب واضح ان عقلي لسه رافض يستوعب

دلوقتي وانا بكتب البوست ده انا في اشد حزني لان اختي تعبانه قوي وعملت عمليه قدامي من غير بنج عيطت صوتت اتألمت كنت معاها وماسكاها كنت حاسه ان قلبي هيقف
الغريب ان انا كمان عملت عمليه قبل كده من غير بنج وبرضو اتألمت وصوتت وعيطت بس الي اكتشفته ان الألم الي بيحس بيه المريض اخف بكتير من ألم قلبي على اختي الي حساه دلوقتي والي بحسه في كل يوم بروح معاكي يا حبيبتي المستشفى بغيرلك على الجرح وانتي بتتألمي وبتمسكي في ايدي جامد وانا بكون هموت

مش هقول غير الحمد لله يارب على كل شئ واحنا احسن من غيرنا بكتير ويارب اشفيكي يا اختي قريب ويارب اشفي كل مريض يارب وياريت يا جماعه تدعولها معايا

تهيييييييس

2009-03-03T04:55:00.004+03:00

تسلم وفر على نفسك اي كلام علشاني.. تسلم لو بتهيألك هرجع تاني تبقى بتحلم انا روحت وراحت برضو عليك

(بتضحكني جدا الاغنيه دي وحسيت الصوره دي للاغنيه دي )

صور الفيس بوك

2009-02-28T04:57:00.002+03:00

اولا قبل ما ابدا البوست احب اعتذر لكل الناس الي ماروحتش مدوناتهم لان النت عندي كان فاصل وبيقطع بس بجد هحاول ادخل عند الكل ودايما يارب منورني بزيارتكم

نبدا بقى

الفيس بوك افتكر الكل عارفه هو من اكبر مواقع التعارف طبعا في مواقع كتير جدا تانيه انا بس عايزه اتناقش في موضوع معاكم مش عارفه هو انا تفكيري قديم ولا انا صح ولا غلط ؟؟

الموضوع هو الناس الي بتحط صورها على المواقع دي صورها بقى وصور اهاليهم وافراحهم واصحابهم وكل الصور انا بصراحه ضدد ده لان انا فاكره زمان كنت اتربيت ان عيب واحد مثلا يكون معاه صوره بنت وكان بقى عيب جدا مش عارفه ده اختفى ليه وماعاتش عيب لدرجه اني خايفه مره افتح موقع من المواقع دي والاقي حد حاطط صورتي علشان كده وانا في الكليه لما كنت بصور مع صحباتي بقولهم الصوره الي اطلع فيها ماتتحطش على الفيس بوك لان بصراحه بقى عادي جدا اي حد يدخل عند اي حد ويقبله ويشوف كل صوره انا ضدد ان حد ماعرفوش يشوف صوري كده عادي طبعا ده غير المصايب الي كلنا عارفنها الي ممكن تنتج عن وجود الصور دي مع اي حد مستهتر وماعندوش اخلاق يبقى ليه اصلا احد نفسي في موضع شك او خوف او قلق
ده رايي واتمنى اعرف رايكم لانها بقت عادي جدا واغلب صحباتي تقريبا حطين صورهم وقرايبي كمان

الحزن مؤنسنا

2009-02-24T05:46:00.002+03:00

الكلام الجميل ده قراته في مجله زمان وحبيت تشاركوني فيه يارب يعجبكم

يوما ما تفاخرنا
بأن الحزن يجهلنا
يراوغنا عن بعد نداعبه.. يداعبنا
لكنه ابدا لن يداهمنا
واليوم صار الحزن يؤنسنا
تعارفنا
وفي الاحلام يراودنا
يمر اليوم تلو اليوم
يمر الوجه في الصبح على الوجه
دون سلام..تجاهلنا تناسينا
كلام الشوق هجرناه
وحتى الحب لو كذبا كرهناه
وبات الصدق يلهبنا ويؤرقنا
لو اننا يوما تساءلنا
من نحن؟ ولماذا نحن هنا ؟
يوما كنا روحين في جسد
صرنا اليوم جسدين بلا روحين
بلا قلبين بلا امل يجمعنا
تفرقنا..تمزقنا..تناكرنا
ويوما ما على الفرح تعاهدنا
وكأن العهد سحابه صيف
حديث الليل
لم يصمد لضوء النهار

بقلم: السيد ابراهيم احمد

جوزك على ماتعوديه

2009-02-17T06:15:00.002+03:00

المكان بيت هي
الزمن حوالي الساعه 9 بليل كان موجود هي واختها وقريبتهم

قريبتهم: هو انتي لازم قبل ماتنزلي تقولي لخطيبك

اختها: ايوه يابنتي لازم تقوله يعملها تصريح هههههههه

هي : انا مش باخد اذن انا مجرد اني بقوله اني نازله المكان الفلاني يعني علشان يعرف انا فين

قريبتهم: ويعرف ليه اصلا انتي لسه خطيبته بس مش مراته

هي : يعني دي حاجه بتريحه علشان يكون عارف انا فين وكمان مش بتزعجني يعني عادي

اختها : ده كمان لازم تيجي في معاد ماتتاخرش عنه

هي : والله المواعيد الي متفقين عليها مناسباني وانا كمان مابحبش اتاخر بره البيت ولو اتاخرت بكلمه اقوله اني هتاخر

قريبتهم : بس انا مش معاكي في كده هو اولا لسه مالوش كلمه عليكي ثانيا مش تعوديه على كده لما تجوزي هتزهقي كل حته تروحيها لازم تقوليله

هي : حاسه ان لازم اقوله وبعدين هو مش بيمنعني من الخروج هو كل طلبه اني اعرفه قبل ما اخرج

قريبتها : انتي حره بس لازم مش تعوديه على كده يا بنتي جوزك على ماتعوديه

(قريبتها خرجت من الاوضه)
هي لاختها: هو انا غلطانه في كده ولازم اعوده على اني اخرج من غير ما اقوله ولا انا صح

اختها : مش عارفه لما اتخطب يمكن اعرف

ياترى انتم رأيكم ايه تقوله ولا ؟ وهل مقوله جوزك على ماتعوديه دي صح ولا ؟

دمعه

2009-02-11T05:32:00.002+03:00

سألتها مره: ماذا يقول البحر لو سقطت فيه دمعه من مهجور؟

قالت: انه يقول انسان أحمق ومخبول يحاول ان يجعل له بحرا من قطرتين

قلت: أراك يا فيلسوفتي لا تفهمين لغه الوجود

قالت: فما ترى انت؟

قلت: انه يقول عندئذ: تباركت يارب أنا الجبار المالئ ثلاثه ارباع الارض قد آلمني دمعه محب متألم فهل يحمل هو ثلاثه ارباع الهم في الارض

(جون ويليام)

الظلنتين

2009-02-06T05:40:00.002+03:00

باقي على الظالنتين اقصد الفالنتاين اسبوع وبما ان سيادتي كنت قبل كده اسمع بس عنه ماعمريش اهتميت بيه ابدا وكنت اعد اقول ايه الهبل ولعب العيال ده تقولش الدنيا كلها اتقلب عليها جردل بويه احمر وكنت اتريق جدا على كل حاجه في اليوم ده وكنت لو صادف كنت نازله في اليوم ده اعد اضحك قدام كل محل زي الهبله بالظبط اضحك على كل حاجه ولو لقيت واحده او واحد شايلين بقى اكياس عليها قلوب ودباديب والكلام ده اضحك واتريق للصبح

بس فعلا الواحد مايتريقش على حد لان كل ده جه فوق نفوخي وبما اني مخطوبه وبما اني جاهله خالص مالص في موضوع الهدايا ده فانا محتاسه جدا اعمل ايه ماهو مش معقوله الراجل يجيبلي هديه حلوه كده وانا عامله مش واخده بالي زي الفالنتين المصري الي فوجات انه موجود اصلا وانا ماكنتش اعرفه وكان موقفي بايخ ساعتها بجد انا مش بفهم نهائي في حاجات الهدايا دي ولا اعرف الرجاله دول يجبلوهم ايه وماحدش يقولي دباديب او قلوب بكرهم كره العمى مش بحبهم وبينرفزوني
بس انا عايزه استشاراتكم اعمل ايه وادوني كده افكار للهديه لحسن انا محتاسه قوي ومش بعرف في الحاجات دي نهائي ولا اعرف الرجاله دول يجبلوهم ايه وايه الي بيحبوه كل الي اعرفه انهم بيحبوا اكيد البرفانات بس ده جبته قبل كده عايزه حاجه تانيه هو في بالي حاجه بس مش مقتنعه بيها قوي لسه او عايزه حاجه جنبها ومش هتريق تاني لحسن شكلي يومها هاخد تريقه العالم كله وشكرا ليكم مقدما وكل ظالنتين وانتم طيبين

صوره وكلمه

2009-02-01T06:32:00.002+03:00

الي بينا نص حاله نص للحب الي يمكن نصها التاني استحاله

عيب قوي

2009-01-28T05:34:00.002+03:00

طبعا بما اني قاعده في البيت وبحب التلفزيون فانا بعد قدامه وبقلب فيه كتير وانا بقى بقلب في قنوات كتير طبعا بتاعت مساتبقات منهم والي بشوفهم قنوات
Zoom –mazzika-melody trix

طبعا اغلبنا عارفين المسابقات الي بتيجي عليهم بس هنا لا هقول للناس دول نصابين ولا بياخدوا فلوسكم ولا حاجه من دي كل واحد عارف هو بيعمل ايه وهو حر انا الي هكلم عنه هنا هو –معلش في اللفظ- السفاله الي بتحصل في القنوات دي طبعا في ناس بتكلم بتفضل تهزر وتتمايع واسمع كلام كتير وحش جدا والي يفرس ان المذيعه ولا المذيع الي و اقفين عادي جدا وماشيين مع الناس في الكلام

الي تكلم المذيع تقوله بحبك وباموت فيك والي يكلم المذيعه طبعا بطريقه بشعه جدا والي تتكلم بمياعه وسفاله فظيعه انا مش فاهمه يعني اضعف الايمان الي بيكلم بطريقه مش ظريفه اقعطوا عنه الخط ما انتم بتقطعوه لما حد بيشتم في القناه ويقول نصابين مش بتقطعوا ده ليه

والي يغيظ ان المذيعه ولا المذيع عادي بتمايلوا كده ومايعين موت وبيقواوا كلام الناس ولا المذيغين بصراحه عيب والله عيب ومايصحش يتقال وعادي ولا اللبس الفظيع الي بيلبسوه وياريت على كده لا كمان بيعدوا يرقصوا ايه ده

طيب والله والله انا مره سمعت صوت بنت انا عن نفسي اقلها هقول انها شاربه حاجه مش حاسه بالدنيا وعماله تقول للمذيع بحبك وكلام كده مش ممكن ياجماعه عييييييييييييييييييييب قوي قوي كمان
ربنا يهدي بنات وشباب المسلمين يارب

تاااااج

2009-01-26T05:22:00.002+03:00

لتاج ده جالي من هجور العسوله ونقول بسم الله

1- لو كاان ينفع تختار عصر تعيش فيه هيبقي انهي؟ ومين الحاكم؟

والله هو في كذا عصر اولهم طبعا عصر الرسول صلى الله عليه وسلم او عصر عمرو بن الخطاب لاني بحب الصحابي الجميل ده جدا او عصر الملوك و الملك فاروق هو الحاكم او عصرنا دلوقتي بس يكون عمرو موسى هو الريس

2- أول أولويه في حياتك؟
بصي هو الاولويات كلا شويه بتختلف يعني لما كنت في الدراسه لسه كانت اولياتي اخلص من الدراسه والتعليم والكليه دلوقتي بعد ما خلصت اولوياتي اكون بيتي انا واعمل اسره صغننه كده وبيت واكون ان شاء الله سعيده فيه يارب

2- أكتر حاجه بتحبها في رمضان؟
القطايف هههههههه اصل بحبها جدا ومش باكلها غير في رمضان حتى لما اكلها بعده مش بتكون بطعامه رمضان
لا بجد بقى رمضان كله حلو بحب فيه جو الايمان الجميل والخشوع الي بيكون عندنا كلنا بحب فيه اني بحس انه اقرب وقت بكون فيه قريبه من ربنا قوي وكل الناس كمان وياريت كانت كل السنه رمضان

3- أوصف أجمل فطار ممكن تفطره؟

لما بفطر عند خالتو لان كلنا بنجمع

4- لو انت حاكم هتكون عادل؟ وهتعرف ازاي؟

اولا عمري ماهكون رئيسه حتى لو اتعرض عليا هرفض بس خلينا نقول لو اكيد هحاول اكون عادله باني اخلي القران هو الدستور الي همشي عليه في البلد وهو القانون

5- مين أكتر اعلامي بتحبه؟

منى الشاذلي
عمرو اديب
محمود سعد

7- لو ممكن شغلانه تانيه تختار ايه؟

لا مش هشتغل ابدا وربنا مايحوجني للشغل عمري

8- تاني بلد تحب تعيش فيه بعد مصر؟
تركيا

9- اوصف ترتيبات أجمل فرح ممكن تحضره؟

فرحي طبعا احلى فرح في عيني حتى لو الترتيبات لا قدر الله ماكانتش مظبوطه قوي
10- بتراعي كلام الناس والقيل والقال؟ وليه؟

لو في حاجه غلط بعملها اكيد هكون خايفه وقلقانه بس لو صح مش مهم حد بقى لاني هكون واثقه ملي بعمله

- صحيت من النوم لا موبايل ولا كمبيوتر ولا كاميرا ديجيتال ورجعنا لعصر الاحصنه والحمام الزاجل؟

ياريت والله دايما بقول التكنولوجيا دي وجع دماغ على الفاضي

12- السعاده هي ... ؟

الرضا بكل شئ قسمه ربنا حتى لو شايفينه وحش لو رضينا بيه هنكون مبسوطين

13- عندك أمل؟ وأسبابك؟

انا من الشخصيات المتشائمه شويه للاسف بس رغم ده لازم يكون في ولو ضوء صغير للامل والا هنعيش ازاى

14- لما تحب تهرب من كل حاجه بتروح فين؟
بقرأ قران في اوضه لوحدي بهدى قوي

15- امتي أخر مره أخدت فيها نفس وقلت ياااااه أنا كبرت؟
يوم خطوبتي حسيت اني كبرت قوي كنت فرحانه بس قولت ياه كبرت وهبقى مسؤوله بقى عن بيت واسيب بيتنا

16- بتشرب سجاير ولا لا؟ وايه رأيك في الستات والرجاله اللي بيشربوا؟

لا مش بشرب وطبعا هي حاجه مضره للصحه جدا وافتكر كل الي بيشربوها عارفين ده وهما حرين

17- بتعرف ايدك الشمال ازاي؟

بعمل نفسي باكل فبلاقي ايدي اليمين هي الي بتتحرك فبعرف ان التانيه هي الشمال ههههههههههههههههه

18- أكتر آله موسيقيه بتحبها؟
الاكسليفون مع اني عمري ما مسكته اصلا بس بحبه وبحب نغمته قوي

19- ليه الزوق والنخوه اتعدموا؟

في حاجات كتير انعدمت ماجاتش على طول يعني عايزه تقعنعيني ان الي واقع بنطلونه منه او الي ضارب جل في شعره و جاتله صاعقه كهربائيه فيه والي بيسيب بنته تخرج وهي لابسه ضيق وملزق دول كلهم عندهم نخوه لا طبعا
بس طبعا اكيد في لسه عندهم ربنا يحفظهم

20- ايه الحاجات اللي لو حصلت هتبقي سعيد؟

والله في شويه مشاكل كده لو اتحلت هبقى سعيده وراضيه وربنا يسهل برضو

21- تحب أرض زراعيه ولا اجنس عربيات ولا كام عماره ولا فلوس في البنك؟

عماره طبعا لان من خلالهم هجيب الفلوس وبحب اكون صاحبه املاك يارب طبعا يعني

22- تحب البحر ولا النيل؟

ده اوقات وده اوقات يعني لو مضايقه من الدنيا احب البحر لانه بيتحرك وموجه بيطلع طاقهع الغضب الي عندي اما لو هاديه النيل لانه مريح

23- مركب ولا طياره؟

طياره

- شخص مجنون ولا عاقل؟
- على حسب الموقف يطلب العقل ولا الجنون يعني متنوع

- تقرا كتاب ولا تتفرج علي فيلم؟

اتفرج على فيلم

حاله اكتئاب

2009-01-20T04:02:00.003+03:00

تحديث:
شكرا ليكم كلكم ربنا يخليكم ليا يارب شكرا لاي حد علق واي حد سال عليا انا الحمد له بقيت احسن صحيح المشاكل ماخلصتش بس نوعا ما بقيت احسن الحمد لله وشكرا ليكم كلكم بجد شكرا ربنا يخليكم ليا
----------------------------------------------------------------------------------------------------------------------------

تعبانه قوي من كل حاجه عندي اكتئاب شديد ومزمن وهو ايه بقى في حياتنا مايجيبش اكتئاب افتح التلفزيون الاقي دم واموات واطفال ميته وناس بتتخانق مع بعض

افتح النت كلها اخبار تغم حتى انتم المدونين مافيش مدونه افتحها الا والاقيها كلها صور توجع القلب
او الي كاتب كلام كله حزن

مسكت الموبايل كلمت كل صحباتي مالقيت ياربي واحده فيهم عندها خبر حلو كلهم عندهم مشاكل مشاكل مشاكل

حتى انا عندي مشاكل كتير مشاكل مع هو ومشاكل تانيه برضو ماعرفش في ايه بجد انا تعبانه قوي وتعبت بجد من كتره الهموم باين ان سنه 2009 سنه باينه من اولها
الي عنده خبر حلو او نكته حتى يقولها ونبي خلينا ولو نبتسم بلاش نضحك

كلمه بحبها

2009-01-13T04:52:00.003+03:00

زهدك في راغب فيك نقصان حظ .....ورغبتك في زاهد فيك ذلته نفس

هي وصاحبتها

2009-01-07T04:30:00.002+03:00

هي: ازيك عامله ايه واحشاني

صاحبتها: الحمد لله كويسه انتي واحشاني اكتر ازيك وازي خطيبك

هي : الحمد لله كويسين اهو ادعيلي بس

صاحبتها: خير مالك شكلك مضايقه

هي: يعني لسه مالقيتش الشقه وبضور عليها ربنا يسهل

صاحبتها: لا مش معقول هو ماعندوش شقه

هي: اه ماعندوش لسه هنجيبها

صاحبتها : غريبه وباباكي موافق على كده

هي: بابا وافق خلاص احنا مخطوبين يا بنتي وبعدين فيها ايه يعني لما مايكونش عنده شقه مااحنا بنضور عليها اهو وربنا يسهلها

ده الحوار الي كان بين هي وصاحبتها وانا هقول رايي فيه وعايزه رايكم كمان معايا

رايي ان ليه في بنات بتفكر كده ماهو علشان التفكير ده بتزداد تأخر الجواز انا بصراحه مش فاهمه فيها ايه بما اي اتنين يبدؤوا مع بعض من الاول وبحاجات بسيطه واساسيات البيت مش لازم يعني فرش البيت من الالف للياء لان بجد بتكون في حاجات كتير جدا نقدر نستغنى عنها وحرام نجيبها واحنا مش قادرين نجيبها او نداين علشان نجيبها
يعني بالعقل احنا اتنين لسه بنقول يا هادي نبقى مداينين لا وغير كده حاجات كتير مش بنستخدمها اصلا ليه كل ده علشان الناس يعني معلش مش مهم الناس في رايي لان رايهم مش هو الي هيوفرلي السعاده الي عايزاها في بيتي وانا مش بقول الكلام ده من الخيال انا شفت تجارب كده كتير قدامي وكبروا سوا وبقى عندهم بدل الشقه الصغيره الي جابوها في الاول شقه اكبر ومكان احسن وعفش كامل مش ناقصه حاجه

يبقى ليه احمل العريس فوق طاقته في ناس رايها انه لو دفع اكتر هيحافظ عليا اكتر وهيكون كده تعب بقى فيا والكلام ده انا عايزه اقولهم ان غلاوت اي بنت عند جوزها مش بالفلوس غلاوتها في حبه ليها وافتكر كلنا بنشوف حالات الطلاق الي بتكون الست فيها عايزه تعمل اي حاجه بس تخلص من الشخص ده ساعتها فادتها الفلوس الي هو دفعها في ايه بقى

كمان الاهل لازم يعزروا ويقدورا ويعرفوا ان بادام الشخص كويس يبقى خلاص يسهلوا الموضوع ومايطلبوش حاجات فوق طاقته لانه حتى كده حرام الرسول صلى الله عليه وسلم قال من ترضون دينه ماقالش ماله او شقته

المختصر المفيد ان بلاش نجيب حاجات مستغنيين عنها وبلاش نغالي قوي في الافراح والشقق كده مش مهم تبقى البدايه صعبه شويه نقدر نستحمل سوا المهم انه يكون انسان طموح يبقى بكره معاه احسن واجمل من انهارده
ومعلش نستحمل سوا شويه ونستغنى عن حاجات في العفش ونجيب شقه صغيره في الاول وربنا يسهلها للكل يارب

قله ادب

2008-12-30T01:58:00.001+03:00

طبعا كلنا بنعيش اصعب وقت دلوقتي ملي بيحصل في غزه وبجد كلنا قلبنا بيوجعنا ولازم ندعيلهم كلنا بجد ويخلصنا من اليهود يارب امين

بس بقى في حاجه مضايقاني وفرساني موت ومش قادره اسكت عنها وهي الهجوم البشع والسافل على مصر
اولا ماقبلش حد يشتم الحكومه بتاعتنا غيرنا احنا نشتمهم ماشي حكومتنا ونشتمهم براحتنا لكن حد تاني يتطاول علينا وعلى مصر والحكومه دي ساعتها تبقى قله ادب

انا مش بهتم بالسياسه ولا بحبها لكن الي اعرفه كويس ان مصر عملت الي عليها وزياده معونات وقدمنا معونات معبر رفح وفتحناه وقبل اصلا كل الي بيحصل ده مصر حاولت كتير تعمل صلح بين حماس وفتح وحركات السلام

كللللللللل ده وترجعوا تشتموا فيها ليه بقى عايزين نعمل ايه اكتر من كده مين اصلا من الدول العربيه عمل كل ده دلوقتي بتشتموا في مصر لا وكمان ببجاحه بصراحه غريبه
وكمان عندنا ظابط ياسر مات على الحدود لسه عنده 36 سنه بس ومات من فلسطينيين ومانطقناش ولا اكلمنا ولا حتى عاتبنا وقدرنا وكل ده ومش عاجب

في رايي مافيش ارض بتتحرر الا بولادها مايروحوا يجمعوا كل الفلسطينين الى عايشين بره بلادهم ومعاهم طبعا فلوس وعايشين عادي جدا ولا كان في حاجه يجمعوا ويعملوا جيش صح يحاربوا بيه
ما لبنان حرروا نفسهم واحنا حررنا نفسنا
في رايي الفلسطينين الصح هما الي جو البلد بس ودول الي لازم نساعدهم بس برضو كل واحد عربي يحترم نفسه وبلاش قله ادب معانا

حسبني الله ونعم الوكيل في اليهود وكل من نفرق بين العرب

نوم وفراغ وقعده البيت

2008-12-23T02:34:00.002+03:00

احلى 3 حاجات ممتعه في الدنيا النوم والفراغ وقعده البيت
ياسلام بعشق ال3 حاجات دول خصوصا اني اول مره اجربهم السنادي لاني طبعا لسه اول سنه اخلص من الدراسه وهمها بما اني كنت فاشله جدا وبكره الدراسه والامتحانات والكليه والدوشه دي جدا وكنت واخده الكليه من منازلهم مع ان كليتي عمليه بس ماكنتش بروح وبنجح بالزق وبدعاوي الوالدين كل ترم وكنت لازم اشيل في الاخر مابطلعش صافي كده ابدا

فالسنادي بقى خلصت من الدوشه دي ودوشه التعليم ده كله منه لله قاسم امين الي كان السبب الي نادى بتعليم المراه وكل الي بينادوا بتعليمها ماله البيت بلا تعليم ووجع دماغ ماكفايه قوي نكتب ونقرا كفايه كده قوي بجد طول عمري بابا يقولي بادام تعبانه قوي كده سيبي التعليم يا حبيبتي هو انا غاصبك عليه بس نعمل ايه بقى مش معقوله كل اهلي متعلمين وانا اطلع جاهله البرستيج برضو بتاعي مايسلمحليش فاطريت اتعلم المهم انه خلص

فبقى السنادي بالنسبالي سنه ممتعه جدا بنام براحتي وبصحى براحتي دماغي رايق من موضوع التعليم ده والامتحانات صحيح ماما كل يوم تزعق اني بصحى متاخر بس بقولها سيبيني ارتاح من عناء 16 سنه صحيان بدري علشان المدارس والكليه وبعدين خلاص هجوز واصحى غصب عني وهيكون ورايا مسؤوليه سيبوني ارتاح بقى واخد راحتي

كمان انا عاشقه للبيت وقعدت البيت وفرجه التلفزيون كده ياسلام
فعلا النوم والفراغ والبيت ممتعين جدا بالنسبالي

انوثه

2008-12-13T21:42:00.004+03:00

تحديث
مبسوطه قوي بجد في بوش مع انه خساره في الجزمه وبجد ده احلى خبر في نهايه 2008 وياريت كلنا ندعي للبطل منتظر الزيدي وربنا بفك كربه يارب وبجد تستاهل يابوش وبضم كمان جزمتي لجزمه منتظر ومبروك عليك يابوش
------------------------------------------------------------------------

ايه ايه مالكم اتخضيتم من العنوان كده ليه اه عادي هتكلم عن الانوثه الكلمه الي الناس بتتخض منها الايام دي لان في دماغهم انها كلمه مش كويسه وللاسف الاعلام هو الي خلاها كلمه مش كويسه لانه بيظهر الانوثه انها ست مش كويسه وبتلبس لبس مايصحش وقالوا ان دي الانثى طبعا ده مفهوم غلط انا هناقش كلمه انثى في رايي المتواضع او الي شايفاه صح

اولا بحمد ربنا ميت مره اني انثى مش راجل علشان الراجل عليه مسئوليه ووجع دماغ كتير كده الحمد لله انه مش علينا المسؤوليه الصعبه دي
نيجي بقى يعني ايه انثى في رايي؟
دلوقتي بقت في ظاهره غريبه جدا ان البنت تتفاخر انها مسترجله وانها راجل وانها بتعامل الناس على اساس انها راجل وبقى تعاملها جد وجامد وكده
لا يا حبيبتي انتي بنت مش راجل علشان تتعاملي زي الراجل لا تعاملي على انك بنت بمعنى صوتك يكون هادي مش صوت عالي ومزعج في الشارع
تكوني شيك ولبسك جميل وفي لمسه انوثه حلوه طبعا ماقصدش يكون ملزق الي اغلب البنات لابساه ده لا طبعا يكون محتشم وحلو ولذيذ وشيك
وكمان التعاملات مع الناس تكوني فيها رقيقه ومش تقولي كلام مايصحش بنت تقوله او كلام بتاع الرجاله وتقولي اصل انا كده لاني بشوف بنات كتير بتقول كلام بجد مايصحش بنت عسوله كده تقوله او يطلع من بقها ابدا

كمان الابتسامه الرقيقه في التعامل مع الناس مش الضحكه الغريبه الي بقيت بسمعها كتير قوي من البنات ضحكه بصراحه مايصحش برضو خالص مابقولش مش تضحكي اضحكي بس مش كده برضو مش تفرجي الناس عليكي واقصد بالابتسامه انك تخلي وشك مبتسم مش متجهم كده ومكشر وينفر الناس منك

كمان من اهم الحاجات في البنت انها ماتخليش حد يتعود عليها قوي وده طبعا بنشوفه كتير في الجامعه ده بيخلي الي قدمها مش يعملها اعتبار واحترام لانها شالت الحدود وخلت الحياه ايزي بينهم وده برضو غلط

انتي ممكن يكون ليكي زمايل وتتعاملي معاهم وكله بس اعرفي ازاى تفضلي انثى رقيقه وجميله وكل واحد عارف حدوده معاكي كويس ويخاف يقرب من الحدود دي

انا في رايي دي الانثى الي بجد انثى وبنت جميله مش زي ما الاعلام بين ان كلمه انثى عيب لا انا مش بعتبرها عيب ابدا بس نعرف ازاى نوجها صح

وكلمه اخيره لا البنت المسترجله صح ولا المدلعه صح
وخليكي زي الورده الي فوق دي ماتجرحيش نفسك بصوت عالي او لبس مش كويس والكلام ده

الى عامه الشعب

2008-12-07T23:53:00.003+03:00

كعادتي كل عام ارسل سموي حفظني الله وأطال عمري تهنئه الى عامه الشعب........كل سنه وانتم بخير يارب وفي سعاده دايمه وكل واحد قبل مايمشي ياخد حتت اللحمه بتاعته ماتنسوش بقى

من يوميات هو وهي

2008-11-27T04:54:00.004+03:00

المكان: كافيه على النيل
الزمان: في يوم من الايام الساعه 9 بليل

الموجودين: هو وهي بيتناقشوا

هو: وحشتيني يا حبيبتي عامله ايه

هي: الحمد لله يا حبيبي كويسه قولي شغلك عامل ايه؟

هو: الحمد لله كويس

يرن موبايل هو .........

هو: ياه دي هاله معلش يا حبيبتي هرد علشان في شغل مهم

هي: طيب رد بس مش تعد تكلم كتير معاها يعني قولها اني معاك

هو: ايوه يا هاله خلصتي الورق الي قولتك عليه لو ماخلصش بكره بصي مش عارف ممكن اعمل فيكي ايه ماشي
يسكت لان هاله بتكلمه
هو: ماشي يا هاله المهم خلصيه علشان يدخل بكره يلا سلام يا باشا

هي: هتعمل فيها ايه بقى لو مش عملت الشغل وازاى تقولها كده اصلا وازاى تقولها يا باشا

هو: طيب فيها ايه بس هو انا قولت ايه

هي: مايصحش تقولها يا باشا وبعدين لازم يكون في بينكم حدود مش تعدوا تهزروا وتضحكوا سوا كده عادي على الاقل علشاني مش انا خطيبتك

هو: دي غيره بقى

هي: لا مش غيره انا بس مضايقه انك بتكلمها كده انا عارفه انها زميلتك وبس بس كمان مابحبش تعاملاتك معاها تكون كده لاتهزروا سوا ولا حاجه

هو: دلوقتي انا ماهزرتش انا بعاملها زي واحد صاحبي ثانيا عادي يعني انا مش شايف حصل حاجه يعني هفضل اعاملها رسمي انا بتخنق من كده

هي: معلش اتخنق على الاقل ده احترام ليا انك خاطب مش كفايه ان عندك سكرتيره

هو: انتي عارفه ان انا شغلي كتير ومقابلاتي مع الناس كتير وكنت محتاج حد ينظم كل ده وبعدين الشغل الي جابوهالي مش انا روحت جبتها

هي: عندك 23 سنه لحقت تنسى مواعيدك ومقابلاتك مع الناس ومال لما يكن عندك 50 سنه هتنساني بقى

هو: حبيبتي انتي عارفه انا بحبك قد ايه بلاش كده بقى احنا اكلمنا في المواضيع دي 100 مره وانا قللت كل هزاري وكلامي معاهم علشانك بس اني اتعامل رسمي قوي كده طول الوقت كده هتخنق انا بقى كفايه اصلا شغلي عليا مش هفضل رسمي ومخنوق طول اليوم

وكالعاده يستمر النقاش هي عارفه هو بيحبها قد ايه لكن بتقلق من زميلاته خصوصا انها عارفه هما قد ايه بنات على سنجه مليون مش عشره بس ونفسها يتعامل معاهم رسمي وهو رافض ياترى ايه رايكم

عندما يخذلون احساسك الجميل

2008-11-16T02:47:00.003+03:00

عندما يخذلون احساسك الجميل..
..ويرحلون عنك كالأيام..كالعمر..
..وينبت في قلبك جرح بأتساع الفراغ خلفهم..
..ثم تأتي بهم الأيام اليك من جديد..
..فكيف تستقبل عودتهم..
..وماذا تقول لهم..؟
قل لهم:- ..انك نسيتهم..
..وأدر لهم ظهر قلبك,وأمض في الطريق المعانات لهم..
..فربما كان هناك..
في الجهة الأخرى..أناس يستحقونك أكثر منهم..
قل لهم:- ..ان الأيام لا تتكرر..
وان المراحل لا تعاد..
وانك ذات يوم..خلفتهم..
تماما كما خلفوك في الوراء وان العمر لا يعود الى الوراء أبدا..
قل لهم:- ..انك لفظت آخر حلم بهم..
..حين لفظت قلوبهم..
..وانك بكيت خلفهم كثيرا..
..حتى اقتنعت بموتهم..
..وانك لا تملك قدرة اعادتهم الى الحياة في قلبك مرة أخرى..
..بعد أن اختاروا الموت فيك..
قل لهم:-
..ان رحيلهم جعلك تعيد أكتشاف نفسك
..واكتشاف الأشياء حولك..
..وانك اكتشفت أنهم ليسوا آخر المشوار
..ولاآخر الأحساس..
..ولاآخر الأحلام..
..وان هناك أشياء أخرى جميلة..
..ومثيرة..
..ورائعة..
.تستحق عشق الحياة واستمراريتها..
قل لهم:-
..انك أعدت طلاء نفسك بعدهم..
..وأزلت آثار بصماتهم من جدران أعماقك..
..وأقتلعت كل خناجرهم من ظهرك..
وأعدت ولادتك من جديد..
,وحرصت على تنقية المساحات الملوثة منهم بك..
وان مساحتك النقية ما عادت تتسع لهم..
قل لهم:
..انك أغلقت كل محطات الأنتظار خلفهم..
..فلم تعد ترتدي رداء الشوق..
..وتقف فوق محطات عودتهم..
تترقب القادمين..
..وتدقق في وجوه المسافرين..
وتبحث في الزحام عن ظلالهم وعطرهم وأثرهم..
.على صدفة جميلة تأتي بهم اليك..
قل لهم:-
..ان صلاحيتهم انتهت..
..وان النبض في قلبك ليس بنبضهم..
..وان المكان في ذاكرتك ليس بمكانهم..
..ولم يتبق لهم بك سوى الأمس..
..بكل ألم وأسى وذكرى الأمس..
قل لهم:-
..انك نزفتهم في لحظات ألمك كدمك..
..وانك أجهضتهم في لحظات غيابهم كجنين ميت بداخلك..
..وانك أطلقت سراحهم منك كالطيور..
..وأغلقت الأبواب دونهم..
.وعاهدت نفسك ألا تفتح أبوابك الا لأولئك الذين يستحقون..
قل لهم:-
..ان لكل احساس زمانا..
..ولكل حلم زمانا..
..ولكل حكاية زمانا..
..ولكل حزن زمانا..
..ولكل فرح زمانا..
..ولكل بشر زمانا..
..ولكل فرسان زمانا..
..وان زمنهم أنتهى بك مند زمن..
قل لهم:-
لا تقل لهم شيئا..
..استقبلهم بصمت..
فلصمت أحيانا قدرة فائقة على التعبير..
.عما تعجز الحروف والكلمات عن توضيحه

ملحوظه:البوست ده انا كنت نزلته زمان اول مابدات التدوين وعلشان بحب الكلمات دي جدا حبيت انزلها تاني والكلمات دي كنت قرأتها من سنين في مجله وعاجباني جدا واتمنى تعجبكم

متخلفه....????!!!!

2008-11-04T04:13:00.005+03:00

طبعا ماقصدش هنا اني اشتم نفسي انا اقصد بالكلمه هنا مش الشتيمه لا اقصد الصفه طبعا ده في راي الناس وهقولكم ليه

اولا انا بسمع كلمه انتي متخلفه دي كتير ليه بقى؟؟؟؟؟
بسمعها لما اقول رايي في عمل المرأه لاني ضدد عمل المرأه لان دلوقتي انا خلصت الكليه وقاعده مابضورش على شغل ولا حتى عندي النيه اني اشتغل الكل بقى بيقولي انتي متخلفه ومال دخلتي كليه قمه وحاسبات ليه علشان تعدي في البيت كنتي بقى ادخلي اي كليه وخلاص وبعدين لازم تعملي نفسك وتعملي قيمه وشخصيه و ووووو حاجات كتيره كده

لكن انا رايي ان انا الحمد لله مش محتاجه للشغل يبقى اشتغل ليه واتعب نفسي ليه وبعدين انا في رايي دخلت كليه قمه مش بقصد الشغل لا ده علشاني انا وعلشان ولادي وبيتي ما لو كده بقى ماكان الاريح ماتعلمش خالص ماشي انا مابقولش الي بيشتغلوا وعايزين يشتغلوا بطلوا بس دي وجهه نظري ان انا مادخلتش كليه قمه علشان الشغل لا انا دخلتها علشان نفسي اولا وبيتي وحياتي بعد كده افرض في يوم احتجت فعلا للشغل يبقى معايا مجال فعلا كويس واقدر اشتغل بيه كويس
لكن دلوقتي اشتغل ليه وبعدين في رايي شخصيتي مش بالشغل ومش هتكون في الشغل اه الشغل بيدي خبره في التعامل مع الناس انا ماقدرش انكر ده بس مش هو الاساس ولو من غيره هبقى بقى من غير شخصيه و سلبيه
وبعدين الحمد لله ربنا خلقني بنت لا عليا بقى مصاريف ولا لازم عليا اجيب فلوس وانا في بيت بابا هو يصرف عليا ولما اجوز جوزي يصرف ابهدل نفسي في المواصلات والصحيان بدري والزعيق وكل ده ليييييييييييه؟ انا مش عايزه اشتغل وربنا مايحوجني للشغل

ملحوظه: انا كاتبه البوست ده من زهقي من الناس واصحابي الي بيقولولي اشتغلي دوري على شغل ومال انتي تعبتي 4 سنين في حاسبات ليه كنتي دخلتي اي حاجه اسهل ده ردي عليكم

ماكنتش اعرف .............

2008-10-14T23:20:00.003+03:00

ماكنتش اعرف اني هرتحلك كده
ماكنتش اعرف انك هتبقى توحشني كده
ماكنتش اعرف انك هتبقى غالي كده
ماكنتش اعرف اني هبقى احلم بيك
هبقى احلم ببتنا سوا
هبقى احلم بحياتنا سوا
ماكنتش اعرف انك لما تبعد او تزعل ابقى عايزه اجري اسامحك
لاني ماكنتش اعرف اني مش هقدر على زعلك كده
ماكنتش اعرف اني هغير عليك كده
ايوه عارفه اننا مختلفين في حاجات
ومتفقين في حاجات
وكتير بنتخانق
وكتير بنتصالح
بكون مضايقه قوي لما بنتخانق
ومبسوطه قوي لما بنتصالح
كنت غريب وبقيت قريب
كنت بعيد وبقيت قريب
ماكنتش اعرف اني هحبك كده

كل سنه وانتم طيبين

2008-10-07T05:09:00.001+03:00

كل سنه وانتم طيبين يارب معلش جت متاخره انا عارفه وشكرا لاي حد سال عليا وشكرا لكل الردود الي جاتلي على اخر بوست بس معلش اعزروني انا ماعرفتش ارد لان كان الجهاز بايظ والنت فاصل واهو معلش حاسوباتيه صحيح بس باب النجار مخلع بقى عموما ان شاء الله استنوا البوست الجاي قريب وشكرا لكل الناس وكل سنه وانتم طيبين

هو وهي

2008-09-07T05:04:00.004+03:00

الساعه 10 بليل مكالمه بين هو وهي

وكانت هي بتحاول تقنعه بموضوع وهو مش موافق عليه خالص انها تعمله

هي: انت مش موافق ليه انا نفسي اعرف ايه المانع يعني او الغلط ؟

هو: انا خايف عليكي ومش موافق تروحي لاني قلقان عليكي من الطريق والسفر

هي: انا مخنوقه وعايزه اغير جو فيها ايه يعني

هو: انا خايف عليكي وعلى انكم تتاخروا

هي: يوه بقى انت كل حاجه مش بتوافق عليها كده انا اتخنقت

هو: انا مش بوافق على كل حاجه وبخنقك ده الحق عليا اني بخاف عليكي

هي: طيب انا بقى عايزه اروح

هو: ماشي روحي بس انا من جوايا مش موافق وقلقان بس روحي علشانك

هي: انت ليه بتصدر قرارات وبتطلب مني انفذها من غير نقاش

هو: لا انا بناقشك اهو وبقولك اني خايف عليكي ده مش معناه اني بخنقك

هي: انا هسالك سؤال

هو: اتفضلي اسالي

هي: لو اختلفنا في موضوع وماحدش اقنع التاني برايه راي مين الي هيحصل

هو: رايي طبعا

هي: ليه بقى ؟

هو: لان انا هكون جوزك ولازم تسمعي كلامي وتحترميني

هي : يا سلام اسمعه كده هي اوامر بتديهالي وانا المفروض اسمعها ولا ايه

هو: لا مش اوامر بس احنا بنتناقش الاول ومش وصلنا لقرار يبقى رايي الي يمشي لاني الراجل

هي: ليه بقى وانت ماتعملش حاجه انا عايزاها وانت مش موافق عليها علشان خاطري حتى

هو: لا هعمل واهو وافقت على السفر مع اني مش راضي عنه بس واقفت علشانك

هي: سيبك من الموضوع ده انا بكلم عموما يعني لازم اعمل رايك لو اختلفنا ومش وصلنا لراي واحد صح

هو: اه لازم لاني الراجل ولازم كلامي يسمع وتحترميه

ولسه النقاش مستمر عن الموضوع ده ياترى هي تسمع كلامه لو هي حتى مش موافقه تعمله ولا كل واحد يعمله الي في دماغه وعايزه ؟

رمضان كريم

2008-08-31T06:32:00.003+03:00

في الاول كل سنه وانتم طيبين وبالف خير يارب

رمضان السنادي بالنسبالي مختلف خالص لان في شخص دخل حياتي حابه قوي ان احنا نعمل كل حاجه سوا فيه ناويه اخطط هنعمل ايه علشان نفسي نعمله سوا انا وانت .............

مستنيه قوي فانوس رمضان منك عارفه انك هتجيبهولي ودي اول مره حد يجيبلي فيها فانوس رمضان عايزاه كبير وملون وعايزاه من الفوانيس بتاعت زمان مش الجديده عايزاه منك ............

عايزه نفطر سوا ونفسي نروح الجامع ونصلي التراويح سوا ونطلع من التراويح ونعدي ناكل ايس كريم وكالعاده هتجيب واحد ليك وواحد ليا وهاكل بتاعك وتروح تجيب تاني برضو ليا وليك.........

عايزه نعمل جدول سوا نقرا فيه القران سوا نبقى واقفين عند نفس الجزء ونفس الصفحه ونفس الايه..........

ناكل قطايف سوا وناكل كنافه سوا ..............

نفسي قوي كل ده يحصل يارب يحصل وكل سنه وانت طيب ونعمل كل ده سوا على طول سوا

M&H

2008-08-15T04:09:00.003+03:00

بكلمه منك تنسيني الي عدى اوام تخليني احس بقيمه الايام تطمني لسنين قدام ..........كان فين هواك من بدري يا حبيبي وكل ده فين ده انا من قبلك انا عايشه مع العايشين.......

دبلتك

2008-06-10T02:05:00.005+03:00

وحشتوني جدا جدا خلصت امتحانات اخدت كفاره من التعليم كله وعقبال المشروع واسفه اني مش علقت على تعليقاتكم على اخر بوست شكرا لاي حد كتب بس بجد كنت مشغوله واهو جيت وجبت معايا بوست جديد بس قبل ماتقرؤوه اعرفوا ان البوست ده مش عني انا لا اتخطبت ولا حاجه دي بس فكره خطره على بالي وحبيت اكتب عنها وحشتوني جدا جدا جدا وشكرا جدا ليكم كلكم على كل تعليقاتكم واسفه على فتره غيابي دي بس عارفين الامتحانات بقى وكده والحمد لله واسيبكم معاها

.......................................................................................................................

لسه حاسه بيها ولسه مكانها معلم في صباعي لسه بمسك صباعي ده واحاول امسكها زي ماكنت بعمل كنت دايما احب المسها واعد ألفها تقريبا ماكنتش بسيبها كانت منوره ايدي كنت ببوسها كل يوم قبل ما انام واول ما اصحى لما كنت بنزعل كنت ببصلها جامد وافضل اشكلها منك وهي الي بتصالحني عليك كنت لما واحده صاحبتي او اي حد يقولي اقلعيها عايزه اشوفها كنت بزعل قوي لغايه لما قررت ان الي عايز يشوفها يشوفها وهي في ايديا ومش هشيلها من صباعي ابدا كان اسمك مكتوب عليها وكنت مصممه واحنا بنشتريها اكتب عليها حبيبي مش اسمك وبس
بس مش عارفه ازاى قدرنا نشيلها ازاى قدرت انا اشيلها وازاى قدرت انت تشيل دبلتك فين الغلط انت كنت انسان ممتاز تتمناه اي بنت وانا كنت بتقول اني حلم حياتك كنا بنحب بعض قوي يا حبيبي قوي ولسه بحبك قوي وكل يوم بحبك اكتر
بس عارف يوم ماقررت اشيلها كان قرار صعب قوي الغريبه اننا قررناه سوا وبكل هدوء وكل الي حوالينا بقيت بلاقي الف سؤال وسؤال ومش عارفه ارد اقول ايه علشان كده فضلت الصمت
يمكن كنا ومازلنا بنحب بعض جدا بس مش كل حب ينفع يكمل لجواز على قد ماكنا بنحب بعض على قد ماكنا مختلفين في حاجات كتير لا انت غلط ولا انا غلط بس مش قدرنا نكون سوا
طول عمري بقول ان الجواز عامل زي التروس الي ليها اسنان الي بتدخل في بعض وبتكمل بعض علشان تمشي احنا ماعرفناش نمشي زيها حاولنا كتير يمكن العند وصلنا لكده ويمكن لان كل واحد شايف رأيه بس الصح
حتى لما انفصلنا انفصلنا بهدوء كبير وباحترام وحب كل واحد بيشيله للتاني وطلبت نكون اصدقاء بس انا رفضت عارف ليه لانك حبيبي وهتفضل طول عمرك حبيبي وماقدرش اتضحك على نفسي واخليك غير كده فضلت البعد يمكن اقدر انسى او حتى اعرف مين فينا الغلطان
بحبك قوي قوي ولسه دبلتك معلمه في ايدي برغم كل المده دي زي مايكون ايدي مش عايزه تصدق او تتعود على بعدك او تصدق انك سبتها ....بحبك

حاله خوف

2008-05-06T03:08:00.002+03:00

في عز فرحتنا دايما نلاقي الخوف واقف في سكتنا مشتاق لينا وملهوف كاننا واحشينه مع اننا عايشينه خوف خلانا واحنا مغمضين بنشوف .....
ياما حاولنا وكان نفسنا ننسى روحنا نسيب نفسنا بس تملي بيفوقنا شعور بالخوف......

الكلمات دي من اغنيه هدى عمار اسمها خوف في فيلم قص ولزق وحبيت ابدأ بيهم الحاله دي
حاله الخوف الرهيبه الي بقت ماليه حياتنا بقينا خايفين من كل حاجه خايفين من بكره ومن انهارده ومن الناس ومن الوقت وبقينا من كتر الخوف بنعمل حساب لكل حاجه بشكل مرعب
بشكل خلانا كل واحد عايش في دوامه من الخوف بقينا حتى بنخاف من نفسنا ساعات وبنعملها حساب وبنخاف منها بنخاف لحسن تقولنا انها نفسها تتحرر من الخوف ده نفسها تطير وتطلع وتخرج من الدايره دي نفسها تنطلق وتجري براحتها نفسها ماتعملش لكل خطوه حساب نفسها تقول الي هي عايزاه وبس ومش مهم الي هيحصل بعد كده
نفسها مش كل حاجه تخاف منها وتفكر فيها قوي كده نفسها لما تحب تقول انا بحبك ونفسها لما تتعب تقول انا تعبانه ونفسها لما تفرح تقول انا فرحانه
ليه بقينا بنخاف كده ليه بقينا من كتر خوفنا بنخبي مشاعرنا كده ونقول اصله بنخاف اصل خايفين اصل قلقانين
وبعدها نرجع نندم ونقول ياريت كنا قولنا وباعلى صوتنا
تعبت من الخوف الي جوايا ده تعبت من انه دايما معايا بقينا لما بنزعل بنخاف ولما بنفرح بقينا بنخاف لدرجه بتخلينا نستنى ونقول اصل ده فرح مؤقت وهيروح وده برضو من خوفنا مش بيكون عندنا فرحه كامله ابدا من كتر خوفنا
الخوف بيخلينا ساعات نخسر ناس كتير حوالينا لمجرد اننا خايفين نقرب منهم قوي خايفين نقرب منهم وبعدين الزمن يفرقنا فبنقول بلاش نقرب احسن احنا خايفين
فعلا نفسنا نسيب نفسنا نسيبها براحتها تعمل الي هي عايزاها والي نفسها فيه من غير خوف وتفكير وترتيب
ياريت نقدر نعيش من غير خوف ياريت

2008-04-30T22:10:00.003+03:00

ده تاج جاني من حبيبتي الاموره منمونه ومعلش يا منمونه اتاخرت عليكي ياجميل
نبدا بقى التاج بسم الله

لو أعطيتك ثلاث وردات .. من هم الثلاث الأشخاص اللى هتعديهم الورد اللى معاك ؟؟
اول ورده لبنات غرفه 205 في المدينه في اسيوط سنه 2004 وبقولهم كلهم وحشوتي جدا يا عيال
تاني ورده لحبيبتي الدكتوره نهى الي قريبا هتكون معيده في طب وبقولها الف مليون مبروك يا دك
ثالت ورده بقى يا ستي هخبيها للانسان الي هكمل معاه حياتي (هو يجي بس وانا اجيبله جنينه يلا ان شاء الله ماحد حوش ) بس يعني ماتتاخرش سيادتك يعني كفايه كده هههههههههههه والا هاخد الورده ليا وامري لله

لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه؟؟
اول سطر اشهد ان لا الله الا الله وان محمد رسول الله
تاني سطر نفسي انجح واخلص بقى من التعليم كله
ثالث سطر برغم كل حاجه شفتها في الكليه الا اني قضيت فيها احلى ايام كل الدفعه هتوحشني وانتي بالزات يا منمونه ويارب نفضل سوا على طول حتى بعد التخرج مش تنسيني بقى خليكي جدعه

ما هو هدفك فى الحياة ؟؟
والله حاليا ودلوقتي اني اخلص البكالريوس الي تاعبني ده ونفسي اخلصه لاني يعني زهقت قوي من التعليم
بعد ما ربنا يفرجها واتخرج عايزه احاول ابدا بقى اخد كورسات واضور على شغل مش عارفه بالصراحه الموضوع ده لسه مش واضح هعمل ايه بس كل تفكيري دلوقتي منصب ان انا نفسي اخلص البكالريوس بسلام

إن شاء الله بكرة هيكون أحسن من النهارده" ِهل تصدق هذه المقولة ؟؟ و لماذا ؟؟
والله بصي مش دايما بصدقها مع ان المفروض اننا نصدقها على طول علشان يكون عندنا امل وتفاؤل بس بصراحه انا مش دايما متفائله ولا دايما مكتئبه يعني على حسب حالتي المزاجيه
بس اغلب الاوقات مش بصدقها بصراحه لاني بحب اعمل حساب لو فرضنا انه مش هيكون احسن طيب اعمل ايه وبرضو بفرض لو كان احسن هعمل ايه يعني بفرض الاحتمالين

أجمل مقولة سمعتها / سمعتيها فى حياتك ؟؟
هما اتنين بحبهم قوي
اول واحده ( ان من اعظم التحدي ان تضحك والدموع تزرف من عينيك)
تاني واحده (الحياه كالبحر الهائج فاذا اردت السلامه فخذ معك سفينه الصبر)

من المغنى اللى بتحبه أوى و إيه أحلى أغنية ليه بتحبها ؟؟
اكيد حبيب قلبي عمرو دياب بحبه جدا طبعا وبحب كل اغانيه بلا استثناء بصراحه بس احلى اغنيه هي تملي معاك وكمان الليلادي وطبعا كل كل اغانيه بحبها وانا بسمعه دلوقتي وانا بجاوبك اهو على التاج

غزة" تمثل لك إيه فى حياتك ؟؟
غزه بلد عربي مسلم نفسي ازورها وتتحرر واصلي في المسجد الاقصى كلنا ان شاء الله

لو تزوجت / تزوجتى و أنجبت بنتين و ولدين أى الأسماء تختار لهم ؟؟

الولدين نبيل وعمرو او يوسف او يحي
البنتين سندس وهيا وممكن كمان نغم

هههههه ده على كده هجيب دسته بقى انا قولتك كل الاسماء الي بحبها اصلا

عمرك غشيت فى أمتحان و انت ضغير ؟؟
لا غشيت وانا كبيره بصراحه

لو أتعرض عليك رشوة كبيرة و انت فى زنقة ماليه هتعمل إيه ؟؟
بصي انا عندي مبدا مهم جدا مش هغيره ان شاء الله طول حياتي وهو ان المال الحرام مش بيدوم يعني نفرض ان انا وافقت ساعتها ماهو كل ده هيطلع عليا وهيرجعلي في حاجات وحشه في اولادي او عيلتي او هيكون مال نقمه عليا مش خير ساعتها هستفيد ايه بقى انا
انا رايي اموت من الجوع ولا اعمل كده بس لان بجد انا مقتنعه ان المال الحرام نقمه خطيره على الانسان وان ربنا اكيد هيعوضني عارفه يا منمونه لو اقتنعنا بكده فعلا كلنا مش هتلاقي رشوه خالص بس الناس بتنسى وبتنسى ان ربنا هيعوضها ويكون معاها هاتليلي واحد في الكون عنده مال حرام وبياكل منه وعايش مبسوط اراهنك مهما كان فلوسه كتير اراهن انه لايمكن يكون مبسوط واكيد المال ده نقمه عليه مش نعمه ابدا
بس ده رايي واكيد مش هوافق حتى لو هموت لان الموت في الحاله دي اهون من المال الحرام

تمرر التاج ده لمين ؟؟
امرره لاي حد عايزه وهو تاج جميل فعلا

أعطى لإنتمائك لوطنك درجة من مائة ؟؟
بصي مش هكون كدابه واقول ميه في الميه انا جيت مصر بقالي 5 سنين بس وبصراحه من ساعه ما جيت وانا في مشاكل كتير الحمد لله اكيد على كل حاجه بس يعني الامارات برضو واحشاني جدا جدا ماقدرش انسلا انها البلد الي عشت فيها طول حياتي وليا فيها ذكريات كتيره
ومصر اكيد بحبها بس مش بنسبه كامله بصراحه يعني ممكن نقول 80% مش تزعلوا مني بس انا صريحه نفسي بجد مصر تبقى احسن نفسي تكون احسن بلد

كيف ننساهم

2008-04-20T22:33:00.001+03:00

ليس المهم ان ننساهم..لكن المهم ألا نحتفظ بهم في اعماقنا ذكرى مظلمه تطفئ استمراريه الحياه بنا.

عندما ننتظر شمس الفرح بعدهم ..فلا تشرق ..كيف ننساهم؟
عندما نظن أن القادم خلفهم سيكون أفضل فلا يكون كذلك..كيف ننساهم؟
عندما نحاول الفرار منهم فلا ننجح الا في الفرار اليهم..كبف ننساهم؟
عندما نتصفح دفتر حياتنا فلا نقرأ سوى تفاصيل حكاياتهم ..كيف ننساهم؟
عندما ندقق في الوجوه المحيطه بنا فلا نرى سوى وجوههم..كيف ننساهم؟
عندما ننصت الى الاصوات المختلفه فلا نسمع سوى نغم اصواتهم..كيف ننساهم؟
عندما نمتلئ بالدموع فلا نبكي الا شوقا اليهم..كبف ننساهم؟
عندما نزور الاطلال فلا نلمح سوى بقاياهم..كيف ننساهم؟
عندما يغيب عنا الوجود فلا نشعر الا بغيابهم ..كيف ننساهم؟
عندما يصيبنا الوهن فلا نحتاج الا الى وجودهم ..كيف ننساهم؟
عندما نختنق بدموعنا فلا ننادي الا اطيافهم..كيف ننساهم؟
عندما يهطل المطر فلا نحن الا اليهم..كيف ننساهم؟
عندما تسألنا عنهم الطرقات كلما مررنا بها ..كيف ننساهم؟
عندما نشم رائحه وجودهم حولنا برغم الغياب..كيف ننساهم؟
عندما نفرد أجنحه خيالنا فلا نحلق الا في اتجاههم .زكيف ننساهم؟
عندما نكتشف ان قابليتنا للحياه توقفت بعدهم..كيف ننساهم؟
عندما يضيق بنا الكون فلا يتسع الكون الا لاحلامنا بهم..كيف ننساهم؟
عندما نتفنن في اختراع الصدف فقط كي نلتقي ذات صدفه جميله بهم..كيف ننساهم؟
غندما نحاول اعاده الزمان الى الوراء كي نعيد عهدهم ..كيف ننساهم؟
عندما نتفقد اعماقنا فلا نجد سوى اثار بصماتهم..كيف ننساهم؟
عندما نبحر فوق امواج الشوق فلا تلقي بنا الامواج الا على شواطئهم..كيف ننساهم؟
عندما يسرقنا النسيان من كل شئ الا هم..كيف ننساهم؟

وبعد انتهاء الحكايات..جميل ان تتذكر لكن الاجمل ..ان تنسى...
ترى ..
لو عرض النسيان يوما للبيع فما عدد اولئك الذين سيسارعون الى شرائه؟

ادوني مساحتي سيبوني براحتي

2008-04-03T23:16:00.004+03:00

هو انهارده هكلم عن موضوع مهم مش حاله من حالاتي لا موضوع عام كنت بتناقش فيه مع واحده صاحبتي وحبيت اني افتحه للنقاش
وهو ان لسه في اهل بيمنعوا دخول الانترنت للبيت اعتقادا منهم انه مصدر الفساد العالمي هو الانترنت مع ان الغريبه ان كل ولادهم تقريبا بيدخلوا سايبر
افتكر ان فكره المنع دي فكره غلط جدا جدا خصوصا دلوقتي لان حاليا ماتقدرش تمنع اي حاجه عن اي حد لان الاهل الي بيمنعوا دخول النت على البيت دول اكيد ولادهم بيدخلوا من اماكن تانيه اما عند اصحابهم او من سايبرات وما اكترها دلوقتي
انا اعرف ناس حتى لو بيدخلوا نت البيت لو ولادهم فتحوه بيفضلوا قاعدين جنبهم خوفا انهم يفتح حاجه وحشه كمان ده غلط جدا
عارفين المشكله في رايي اننا مش عارفين معنى كلمه حريه وثقه
لازم ندي لاولادنا حريه وفي نفس الوقت لازم نفهمهم صح ونديهم معاها ثقه فيها ايه يعني لما النت يدخل البيت النت زي اي حاجه في الدنيا سلاح ذو حدين فيه الكويس وفيه الوحش ويعني لو احنا منعنا النت من البيت هل كده خلاص بتضمنوا ان الولاد مش هيدخلوا ولا هيشوفوا الحاجات الوحشه لا طبعا لانه ممكن يدخل من اي مكان ويشوفوها في اي مكان
هديكم مثال انا مثلا اول ما استخدمت النت زمان وعملت ايميل ماكونتش لسه اعرف ازاى اعمل ديليت او بلوك فلقيت ايميل وحش مبعوتلي عارفين عملت ايه
روحت قولت لبابا ده في ايميل وحش عندي اعمل ايه الراجل لا اتعصب ولا زعقلي بكل سهوله علمني ازاى اعمل ديليت وبس ولا عمره قطع النت ولا عمره جه قعد جنبي وانا على النت لان هو اداني ثقه واداني حريه معاها وعلمني ازاى استخدمها صح لان الي عارف ان الحاجه دي غلط مش هيعملها حتى لو هو لوحده لكن الي اتعود انه مش بيعمل الغلط علشان في رقابه عليه بمجرد ان الرقابه دي هتروح عنه لحظه ممكن جدا يعمل الحاجه الغلط دي لانها بالنسباله شئ ممنوع والممنوع مرغوب
هقولكم مره حاجه شفتها على التلفزيون عاجبتني قوي كان برنامج بيستضيف الدكتور هاني السبكي وهو دكتور نفسي فاتصلت واحده في البرنامج وقالت انا عندي دش وبنتي مره بتقلب فيه شافت قناه وحشه وكمان كانت قناه (شواذ) وجت البنت وقالتلها فقامت الام قامت قاطعه وصلت الدش خالص وقطعت التلفزيون
فطبعا الدكتور رد عليها وقالها طبعا ده غلط لان البنت شافت خلاص وكويس جدا انها جت قالتلك ماخبتش او ماراحتش قالت لواحده صاحبتها وتديها معلومات غلط المفروض الي يحصل انك تعدي معاها وتفهميها ايه الي شافته وانه غلط علشان ماتخافش انها تقولك على حاجه تانيه بعد كده وكمان ترجعي الدش وتعملي تشفير للقنوات دي
انا بس حبيت اذكر القصه دي لان بجد لازم نعمل كده لازم الاهل يكونوا قريبين لاولادهم لان في العصر ده افتكر في رايي ماعادش في حاجه اسمها ممنوع او عيب او ماينفعش خلوا ثقه وتفاهم بين الاولاد والاهل علشان يجوا ويحكوا مش يروحوا لناس تانيه يدوهم معلومات غلط والنت وجوده او عدمه مش هو الي هيمنع الفساد او هيفتحه
في النهايه رايي ان لازم نربي اولادنا صح ونربيهم على الحريه والثقه ونسيبهم بعد كده مش نكون حراس عليهم هما لوحدهم هنلاقيهم بيبعدوا عن الغلط لوحدهم من غير وجود حراس عليهم ورقابه مشدده او سياسه المنع بس طولت عليكم

-----------------------------------------------------------

شكر خاص جدا لفطومه لانها هي الي اقترحت عليا العنوان ده وجابتلي الصوره دي شكرا فطومه حبيبتي

أحاسيس

2008-03-28T16:33:00.003+03:00

أحاسيس
(بعض الاحاسيس تغزونا كالأمراض الخبيثه فتفتك بأجمل الأشياء في داخلنا وتحولنا الى بقايا ...ولا تغادرنا الا حين نغادر الحياه)

احساس بشع..
أن تهبهم كل مساحات الثقه البيضاء
وتمنحهم كل الأراضي الخضراء التي بداخلك
وتضع باقاتك الحمراء عند بابهم
وتسهر لتقرأ اخبارهم فوق جبين القمر
ثم تكتشف أنهم وضعوا اسمك في قائمه ( الاغبياء بلا حدود)

احساس مزعج..
أن تبوج بسرك لصديقك المقرب
وتوصيه بأن يسجنه في قفص صدره
وتنام مطمئنا متخففا من همك وسرك
ثم تستيقظ على صوت اسرارك
ينطلق كالأغنيه من أفراه الاخرين

احساس مرعب..
أن تقف أمام الغرفه الزجاجيه
تنظر الي عزيز يتوسد جراحه
تحصي دقات قلبه
وتنتظر قرار الحياه به
اما بدايه تمنحك الفرح
او ونهايه تصيبك بالذهول؟

احساس مؤلم..
ان يعيشوا بك كالدم
ويلتصقوا بك كأظافر يديك
وتكون لهم كالواحه المريحه
ويكونوا لك الوطن الجميل
ثم تغادرهم كالغريب

احساس مؤلم..
ان تفتح لهم بيتك
ومدينه امانيك
وبوابه احلامك
وتطعمهم حبيبات صدقك
وتمنحهم ثقتك بلا حدود
ثم تستيقظ على نيران الجحود الي اشعلوها فيك
وخلفوك كالوطن المهجور

احساس مخيف..
ان تكتشف موت لسانك عند حاجتك للكلام
وتكتشف موت قلبك عند حاجتك للحياه
وتكتشف جفاف عينك عند حاجتك للبكاء
وتكتشف انك وحدك كأغصان الخريف عند حاجتك للاخرين

احساس لا يوصف..
ان تقف فوق قبر انسان تحبه تحدثه وتحاوره
تصف له طعم الحياه في غيابه
ولون الأيام بعد رحيله
وتجهش بالبكاء كالطفل الرضيع
حين تتذكر انه .. ماعاد هنا..

احساس قاس..
ان تشتاق اليهم بجنون
وتحن الى وجودهم ووجوههم واصواتهم بالجنون ذاته
وتزور اطلالهم في الخفاء
وتتمنى ان يعود الزمان ليله واحده
كي تتذوق طعم الفرح في حضورهم
لكنك تعود كالملسوع بعقارب الحنين
حين تتذكر أن الزمان لا يعود أبدا..أبدا..

همسه اخيره:
ياليت البسمه ماكانت
ولا الاحساس...
ياليت الدنيا خانتي وكل الناس
ولا خنت هواي انت

2008-03-23T23:57:00.002+03:00

ازيكم عاملين ايه يارب تكونوا بخير دايما
التاج ده جالي من قلب ابيض وعجبني فكرته وهجاوب عليه وهو تاج العزوبيه

ما رأيك فى الجملة التى تقول ...العزوبية تاج على رؤوس العزاب لا يراه الا المتزوجين ؟؟

لا مش تاج ولا حاجه دي اوشاعه غلط

ما هى العوائق من وجهة نظرك التى تحول بين الشباب والزواج هذه الايام ؟؟؟ *

اكيد اولها الحاله الاقتصاديه مع ان هي ليها حلول ان برضو الاهل مش يطالبوا بحاجات خرافيه من شاب لسه في اول حياته ويفتكروا انهم برضو كانوا شباب وفي اول حياتهم زيه وان اهم حاجه انه يكون كويس ويحب بنتهم وطموح وده يضمنلها ان بكره احسن من انهارده معاه والرزق في الاول والاخر بتاع ربنا وان يعني ايه الفايده اعد في قصر وقلبي مش فرحان

تاني حاجه ممكن ان الناس بعدت عن بعضها قوي وبقت بتخاف من بعض فممكن يكون الراجل جاهز وكله بس مايعرفش حد او مالوش علاقات مع حد وده طبعا بيزود العزوبيه والعنوسه

من وجهة نظرك هل النكد موجود فى العزوبيه ام فى الزواج ؟ ولماذا ؟

في الاتنين هههههههماهو لازم العازب يحس بنكد من الوحده والمجوز يحس بنكد شويه برضو من الزن لازم يعني ننكد علي الرجاله شويه دي بهارات الحياه علشان تكون لذيذه كده هههههههه

ما الحل من وجهة نظرك لمشكلة (( العزوبية )) فى مصر ؟؟

اكيد يكون في فرص عمل اكتر والاسعار كمان ماتكونش نار كده يعني تغيير شامل في الحاله الاقتصاديه لو ده حصل حاجات كتير هتتحل مش العزوبيه بس وكمان الاهل مش يطالبوا بحاجات كتير فوق طاقه الشباب

من وجهة نظرك ....هل للعزوبية مميزات وعيوب ؟؟؟

اه طبعا يعني العزوبيه مافيهاش مسؤوليه زي الجواز طبعا ومش كل يوم بقى هصحى العيال والبيت والدوشه دي (بس يعني في رايي دوشه مش وحشه قوي)

طبعا عند ماما بصحى براحتي والاكل جاهز وكله جاهز لسيادتي وكله هيطلع فوق دماغي لما اجوز طبعا انا عارفه

عيوب العزوبيه يمكن احساس الوحده وان مافيش عيله عملتها او اسره اعتقد ده عيوبها طبعا وماحدش كده منكد عليك وطالع فين ونازل فين طبعا ده عيب في رايي مش ميزه هههههه

ما هو رأيك فى انشاء مدونة (( رابطة )) للعزاب من المدونين ؟؟؟

فكره حلوه ونخلي شروطها ان الي يجوز او تجوز نطردهم بره الحزب ههههههه شر طرده لانهم اخلوا بشروط الرابطه

أخيرا ....لمن تمرر هذا التاج ...على الأقل خمسة ؟؟؟ *

لكل صحباتي المدونات الي اعرفهم شخصيا لانهم لسه ضمن الرابطه

منمونه

بيسو

فاطمه

برايد

رحاب بسام

واحد من الناس

حاله تأمل

2008-03-18T00:47:00.003+03:00

حاله بقت نادره للاسف من سرعه الحياه وسرعتنا فيها واننا دايما في حاله جري مستمر في الحياه ماعاتش في وقت لحاله تأمل نعيشها ولو حتى لحظات
وده بيؤدي اننا بدانا نفقد احساسنا بجمال الحياه حولينا
يعني مثلا كل واحد فينا يسال نفسه امتى اخر مره وقف قدام شجره فيها وردود ووقف قدامها ولو لحظات لمجرد انه يتأملها ويتأمل جمالها وابداع ربنا سبحانه وتعالى في الوانها؟
للاسف كتير مننا هنقول ياه وحد فاضي يقف قدام شجره او هو عاد في شجر في شوارعنا اصلا وفي ورد الا قليل قوي او انتي عايزه الناس تقول علينا اجننا نقف نتفرج على شجره؟
وبكده حاله التامل بقت نادره جدا مع انها مهمه جدا علشان نحس ولو لحظات بجمال الحاجات حوالينا
هي كمان حاله بتدي للنفس بهجه وفرحه غريبه وهدوء وبتخلينا نهدى شويه من حاله التفكير الدائمه الي عندنا وبتزود احساسنا وبتكبره بالجمال
حاولوا انكم تعيشوا الحاله دي على قد ماتقدروا ولو للحظات وحاولوا نحس بجمال الي حوالينا
ونعيش ولو لخظات تامل..........

حاله من جوا

2008-03-12T22:09:00.003+03:00

انا اول مره اكتب حاجه زي كده واول واحده شافت الكلام ده هي بيسو وقولتها يا بيسو ده شويه كلام هبلولي كده قالتلي لا حلو ونزليه يعني لو وحش اتخانقوا معاها لو حلو قوليلي اسيبكم مع شويه الكلام

.............................................................................................................................

ازاى قدرت تقتحم عالمي كده
ازاى قدرت تدخل فيه كده
ده العالم الي ماقدرش حد يدخله قبل كده
ده العالم الي حطيت فيه اسوار وابواب كتيره علشان احمي نفسي فيه
ازاى دخلت وازاى اسواري ماحمتنيش منك
ازاى لقيتها بتنهار قدامك
ازاى باجي قدامك وبنسى كل كلامي
ازاى مش قادره اقاوم الاحساس ده
ازاى سيطر عليا كده
ازاي اسواري اتحولت لسجن سجنتي انت فيه

اول مره احاول اهرب من حد كده وافشل
اول مره احاول ابعد وافشل
اول مره يتهز كياني كده
اول مره قلبي يخرج من سيطرتي ويهزمني
اول مره احس اني مش عارفه اقول لا لقلبي
اول مره عقلي يقف عن التفكير في اي حاجه غيرك
اول مره وانا بكلم حد انسى افكر قبل ما اكلم
لان كلامي معاك من قلبي ليك وبس
اول مره احس اني من جوا قوي بتوجع
اول مره احس اني فرحانه وزعلانه ومبسوطه ومخنوقه وكل ده في وقت واحد
اول مره احس بدقات قلبي كده
اول مره احساس يهزمني كده
اول مره اسرح واتوه في حد
اول مره الاقيني بمشي في طريقك من غير ما احس
يمكن اشوفك
وبشوفك وبتشوفني
بس الفرق بينا انك بتشوفني بعينك بس لكن انا بشوفك بقلبي وعنيا

عارفه انك بالنسبالي المستحيل
عارفه اني بعيده قوي عنك

بس عارف
لا للاسف انت مش عارف ولا حاسس
انا اول مره احب .......وانت مش عارف

حاله طيران

2008-03-07T19:18:00.003+03:00

وانا صغيره افتكر مش انا بس ده كلنا حلمنا اننا بنطير حلمت اني بفرد ايدي وبطير في السما ماكانش في حاجه تمنعني عن الحلم ده ماكونتش لسه عارفه انه مش بيتحقق وانه مجرد حلم بحلم بيه كنت فاكره انه هيجي وقت فعلا هطير فيه زي العصافير والمس السحاب بايدي
وكل ما كنت اكبر اعرف اكتر انه مجرد حلم
ومع مرور الزمن حتى الحلم ماعونتش بحلم بيه لان واحنا صغيرين كانت احلامنا مالهاش دعوه بالواقع والمنطق
لكن لما بنكبر مشاكلنا والواقع وعقلنا بيدخل في احلامنا علشان كده مابنعرفش نحلم بشئ مش ممكن منطقيا انه يحصل
حتى لما ركبت الطياره اول مره كنت فاكره ان انا خلاص بقى هو ده الطيران والحلم اتحقق لقيتني برضو مش انا الي بطير ومش عارفه افرد ايديا ومش عارفه المس السحاب
بس عارفين ساعات بنحتاج اننا نخلق حلم نعمله بنفسنا نهرب بيه شويه من الواقع حتى لو كان حلم يقظه او حلم غير منطقي
علشان كده انا لسه بحلم اني بطير برغم انه حلم بخلقه بنفسي بس بيديني امل في بكره وبيقولي انه هيكون احلى
ببص للعصافير وبحلم اني بطير وبكره يكون احلى................

دموع مستخبيه

2008-03-03T18:46:00.003+03:00

دموع مستخبيه

ان من اعظم التحدي ان تضحك والدموع تزرف من عينيك.......

كلمات جميله بحبها جدا الكلمات دي يمكن لانها فعلا بتلمس كتير مننا كتير بل كلنا ساعات بيمر علينا اوقات بيكون نفسنا نبكي نبكي جامد من غير ما حد يسالنا فيه ايه؟ بتعيطي ليه؟
نفسي ابكي من غير ما اكلم واحكي واقول لان بيكون صعب نحكي وقتها
نفسي الاقي حد يفهم من غير حتى دموع ان في دموع مستخبيه في عنيا
نفسي لما اكون محتاجه للدموع الاقيها لانها ساعات كتير بتهرب مني
يمكن عزه نفس بتمنع دموعي تنزل
يمكن لاني دايما بتفاخر اني مش ببكي
مع اني كتير ببكي لوحدي
ليه لما دموعي تخوني وتنزل بلاقي مليون حد بيسال ياه هي بتعيط؟ ياه هي بتعرف تعيط ؟ليه بتعيط ليه؟
هو انا للدرجادي ببان جامده
يمكن لان لما اكون عايزه ابكي كتير بقاوم اكتر واضحك اكتر واكتر علشان ماحدش يكشفني
بعترف اني ضعيفه من جوا وبعترف اني عايزه اعيط ايه يعني الناس هتقول ضعيفه قدام المشاكل ماتقول ما انا ياما كنت قويه وياما شلت جوايا لوحدي وماكونتش بحسس الي حواليا بحاجه
بس لا ماعرفش اعمل كده خليني كده احسن وخلي دموعي مستخبيه خليها غاليه لغايه لما الاقي الي يستحق تنزل دموعي قدامه................................

حاله حنين

2008-02-29T03:18:00.003+03:00

حاله حنين

حاله جميله افتكر انها دايما معانا كلنا بنحن للحظه جميله عشناها او ذكرى جميله او اشخاص ماجمعتناش بيهم الايام من سنين او اشخاص غابوا عن عالمنا

وهي حاله يمكن لما بنكون فيها بنسرح لبعيد بنسيب المكان والزمان الي احنا فيه ونرجع للماضي بتحس فيها بسكون غريب جوانا وابتسامه مرسومه على شفايفنا
ساعات بتكون الذكرى حتى صعبه ومؤلمه مثلا انك تفقد حد عزيز عليك في الدنيا دي بس وقتها انا مابفتكرش اللحظه دي انا بفتكر لما كنت معاه وبفتكر الايام والسنين معاه مابحبش افتكر لحظه فراقنا ورحيلهم بحب دايما احول اي ذكرى مؤلمه لذكرى جميله علشان دايما ابتسم لما افتكرها
عارفين انا حتى عندي ذكريات المفروض انها صعبه مثلا خيانه من حد او اي موقف اتعرضت ليه من حد كان المفروض اني فاكراه عزيز عليا مش عارفه ليه مش بحب افتكر الموقف ده لما افتكر الشخصيه دي برضو بحب افتكر الايام الحلوه لينا سوا وبرضو ببتسم
في رايي ياريت نحاول نفتكر الايام الحلوه وبس الي قضينا مع كل الناس حتى لو بعض الناس دول ضربوك من ظهرك هما كده كده بقوا ذكرى جوايا بس لما بفتكرهم بفتكرلهم ايامنا الحلوه لمجرد اني عايزه ابتسم لما اكون في لحظه حنين

دمعه المهجور

2008-02-26T22:23:00.002+03:00

سألتها مره :ماذا يقول البحر لو سقطت فيه دمعه من مهجور؟

قالت:انه يقول انسان أحمق ومخبول يحاول ان يجعل له بحرا من قطرتين

قلت:أراك يا فيلسوفتي لا تفهمين لغه الوجود

قالت:فما ترى أنت؟

قلت:انه يقول عندئذ:تباركت يارب انا الجبار المالئ ثلاثه اربعاع الارض قد آلمني دمعه محب متألم فهل يحمل هو ثلاثه أرباع الهم في الارض

(جون ويليام)

2008-02-26T22:11:00.002+03:00

حاله حب

حبيت اول حاجه اكتبها بنفسي تكون حاله كده تفرح لان النكد جايه حالاته كتير فقولت معلش اخلي اول حاله عن الحب وحاجات كده تفرح

في البدايه كده دي طبعا مش حالتي ابدا ويارب يعني تكون حالتي في يوم من الايام (من بوقي لباب السما عدل يارب) بس خلينا دلوقتي احكي عن الحاله الجميله دي الي بشوفها في عيون واحده صاحبتي مثلا
اولا حاله الحب حاله بتجمع كتير من الحالات التانيه مره تلاقيها فرح ومره زعل ومره نكد ومره غضب ومره اهمال ومره تقل ...وهكذا

ودي اول مميزات حاله الحب انها بتجمع كل حاجه حتى لما تكون حاله صعبه فبتكون برضو ليها جمالها يعني مثلا لما المحبين يتخانقوا ويزعلوا من بعض وتلاقيهم مكشرين ومدينها بوز شبرين في وش بعض برضو ده ليه جماله بالزات لما يتصالحوا تاني

كمان اجمل حاله حب لما تكون حاله قويه طيب يعني ايه هو فيه حب ضعيف وحب قوي ؟
في رايي في لان الحب عامل زي النبته الصغيره باقل حاجه ممكن تكبر وتقوى وباقل حاجه برضو ممكن تتجرح وتموت

ده مش معناه ان اي مشكله ممكن تموت الحب لان موت الحب مش بيكون بسبب المشاكل الخارجه بيكون بسبب احدى طرفين الحب علشان كده بقول ان الحب قوي او ضعيف من جوا الشخصين نفسهم لو هما علاقتهم ببعض قويه وعايزين بعض فعلا هتلاقي كل المشاكل الخارجيه شئ تافهه وهيمر لكن لو اصلا هما مش متفاهمين ومش متوافقين وبيقولوا بنحب بعض هتلاقي كل حاجه باظت والحب هيموت

حاجه اخيره عايزه اقولها عن الحاله دي انها اجمل حاله في الدنيا بس لازم علشان تكون جميله نختار صح وعلشان تكون اجمل وتكمل لازم العقل يدخل مع القلب في اخيارنا
لا العقل لوحده صح ولا القلب لوحده صح لازم الاتنين سوا علشان لما الحب يتوج بالجواز ومسؤوليته تكون مسؤوليه جميله ونكون قدهاويارب الي عايشين الحاله دي يعيشوها سعدا دايما والي مش عايشينها زي حالاتي نعيشها قريبا

عندما يخذلون احساسك الجميل

2008-02-26T02:41:00.002+03:00

عندما يخذلون احساسك الجميل..

..ويرحلون عنك كالأيام..كالعمر..

..وينبت في قلبك جرح بأتساع الفراغ خلفهم..

..ثم تأتي بهم الأيام اليك من جديد..

..فكيف تستقبل عودتهم..

..وماذا تقول لهم..؟

قل لهم:- ..انك نسيتهم..

..وأدر لهم ظهر قلبك,وأمض في الطريق المعانات لهم..

..فربما كان هناك..

في الجهة الأخرى..أناس يستحقونك أكثر منهم..

قل لهم:- ..ان الأيام لا تتكرر..

وان المراحل لا تعاد..

وانك ذات يوم..خلفتهم..

تماما كما خلفوك في الوراء وان العمر لا يعود الى الوراء أبدا..

قل لهم:- ..انك لفظت آخر حلم بهم..

..حين لفظت قلوبهم..

..وانك بكيت خلفهم كثيرا..

..حتى اقتنعت بموتهم..

..وانك لا تملك قدرة اعادتهم الى الحياة في قلبك مرة أخرى..

..بعد أن اختاروا الموت فيك..

قل لهم:-

..ان رحيلهم جعلك تعيد أكتشاف نفسك

..واكتشاف الأشياء حولك..

..وانك اكتشفت أنهم ليسوا آخر المشوار

..ولاآخر الأحساس..

..ولاآخر الأحلام..

..وان هناك أشياء أخرى جميلة..

..ومثيرة..

..ورائعة..

.تستحق عشق الحياة واستمراريتها..

قل لهم:-

..انك أعدت طلاء نفسك بعدهم..

..وأزلت آثار بصماتهم من جدران أعماقك..

..وأقتلعت كل خناجرهم من ظهرك..

وأعدت ولادتك من جديد..

,وحرصت على تنقية المساحات الملوثة منهم بك..

وان مساحتك النقية ما عادت تتسع لهم..

قل لهم:

..انك أغلقت كل محطات الأنتظار خلفهم..

..فلم تعد ترتدي رداء الشوق..

..وتقف فوق محطات عودتهم..

تترقب القادمين..

..وتدقق في وجوه المسافرين..

وتبحث في الزحام عن ظلالهم وعطرهم وأثرهم..

.على صدفة جميلة تأتي بهم اليك..

قل لهم:-

..ان صلاحيتهم انتهت..

..وان النبض في قلبك ليس بنبضهم..

..وان المكان في ذاكرتك ليس بمكانهم..

..ولم يتبق لهم بك سوى الأمس..

..بكل ألم وأسى وذكرى الأمس..

قل لهم:-

..انك نزفتهم في لحظات ألمك كدمك..

..وانك أجهضتهم في لحظات غيابهم كجنين ميت بداخلك..

..وانك أطلقت سراحهم منك كالطيور..

..وأغلقت الأبواب دونهم..

.وعاهدت نفسك ألا تفتح أبوابك الا لأولئك الذين يستحقون..

قل لهم:-

..ان لكل احساس زمانا..

..ولكل حلم زمانا..

..ولكل حكاية زمانا..

..ولكل حزن زمانا..

..ولكل فرح زمانا..

..ولكل بشر زمانا..

..ولكل فرسان زمانا..

..وان زمنهم أنتهى بك مند زمن..

قل لهم:-

لا تقل لهم شيئا..

..استقبلهم بصمت..

فللصمت أحيانا قدرة فائقة على التعبير..

.عما تعجز الحروف والكلمات عن توضيحه

قطره ندى

2008-02-26T01:57:00.002+03:00

قطرة ندى

تنزل على جبين الصباح
وتبـلـِّـلـُـــــه
من حزن ليله تغسله
الخير يزيد والشر مش حيقلله

قطرة ندى
تاهت خطاوينا فى أخر سكة الليل الطويل
ورجعنا نمشى دربنا من أوله
الضلمه بتخلى الطريق صعب وعنيد
والنور هاييجى يسهله
وده كله مع قطرة ندى
تنزل على جبين الصباح
وتبللــــــــه

قطرة ندى
الناس أمانيها تدوب فى الليل
والدمعه تنزل م العيون
والنوم يخاصمها الجفون
والسهرانين يتأملوا
و اما النهار يفتح لكل الأمنيات الباب
الليل لا يمكن يقفله
وده كله مع قطرة ندى
تنزل على جبين الصباح
وتبللــــــــه

قطرة ندى

اول مره اكتب

2008-02-25T02:42:00.000+03:00

بصراحه دي اول مره اكتب حاجه في حياتي بس انا حبيت اعمل المدونه دي بعد ما دخلت مدونات كتير وعجبوني جدا يمكن عملتها لان ساعات بكون مخنوقه وعايزه اكلم فحبيت تشاركوني افكاري وحالاتي المتقلبه دايما في الدنيا دي قعدت افكر كتير اعمل المدونه باسم ايه كان قدامي ثلاثا اسماء اخترتهم وهما :حاسوباتيه او حالات او مرايه

بس اخترت حاسوباتيه مع ان انا اسما بس في كليه حاسبات بس بالنسبالي اسمها (حاسب لتقع) هي كليه كويسه بس انا الي مش كويسه فيها

ماعلينا انا بس حبيت اوضح جبت حاسوباتيه دي من فين

طيب انا ليه فكرت اعمل مدونه علشان بيكون في حاجات كتير ومواضيع كتير نفسي اناقشها وافتحها وساعات بكون مخنوقه ونفسي اكلم وساعات بكون متقلبه الحالات زي ما قولت قبل كده نفسي اكلم عن كل الحالات دي زي(حاله غضب-حاله فرح-حاله حب-...) اهو اي حالات اما بتكون عندي انا او بشوفها على ناس قريبه مني

الحاجه التانيه ان انا هوايتي اجمع اي حاجه قرأتها جميله والهوايه دي بعملها من سنين فجمعت حاجات لا بأس بها هعرضها

تقولي ايه تاني يا حاسوباتيه ....(حاله تفكير).... ماعرفش اهو مدونه عملتها واتمنى ليها انها تكون كويسه يارب