12‏/3‏/2009

قرار صعب وصح (جزء الاول)


البوست ده طويل قوي فهقسمه على جزئين هي تعتبر موقف او ممكن تقولوا عليها موضوع في احاسيس كتيره بتحصل لكتير مننا وعايزه رايكم فيها نبدا بالجزء الاول وللعلم انا حاولت اختصر كتير من التفاصيل الي اعتبرتها مش مهمه بسم الله
--------------------------------------------------------
اتصال هاتفي وترد هي

هي: اهلا ازيك عامله ايه

صاحبتها: الحمد لله على كل شئ

هي: عملتي ايه؟

صاحبتها: عملت الي قولتك عليه سيبته

صمت من هي وصاحبتها لمده ثواني

هي: وانتي عامله ايه دلوقتي؟

صاحبتها: حاسه بوحده بحزن ايدي كل شويه بتمسك الموبايل نفسي اكلمه اسمع صوته

هي: ده كان قرارك

صاحبتها: كان قرار عقلي وكان القرار الصح للاسف انتي عارفه كويس كانت كل حاجه بينا مختلفه حياتنا مستوانا كل حاجه كانت كل حاجه بتقولي انه هيكون جواز فاشل حاولت حاولت كتير اني اقول لنفسي هقدر لكن ماقدرتش وماعرفتش

هي: ايوه عارفه صعب اننا نضحك على نفسنا ونقول هنقدر وبنحب بعض الجواز مش حب وبس الجواز حياه الجواز عيلتين بيدخلوا في بعض لازم يكونوا قريبين من بعض

صاحبتها: حتى لما ماما شافتني كده على طول بفكر سالتني وقولتها قالتلي طبعا ماينفعش هو صحيح مستقبله كويس بس هتعرفي تعيشي حياته هتعرفي تعيشي في الارياف وانتي الي عمرك ماروحتيها هتعرفي تعيشي في بيت عيله عايشين كلهم سوا وانتي الي طول عمرك بتحبي الاستقلال والخصوصيه في حياتك ؟ بينا وبينهم اختلافات كتير ممكن لعلمك يكون مافيش اخلاف مادي بينا كبير بس بكلم عن الاجتماعي وده الاهم وده الي هتعيشي معاه

هي: انتي قولتلها ايه؟

صاحبتها: فكرت في كلامها ولقيت اني مش هعرف اهون عليا انه يكون ذكرى حلوه في حياتي عن انه يبقى قرار جواز خاطئ اخدته اندم عليه العمر كله

هي: يبقى قرارك كان صح يا حبيبتي وماتزعليش الزمن بيداوي كل حاجه

صاحبتها: حبيته قوي اول انسان دخل قلبي لما حبيته الدنيا كلها كانت حلوه ليه بس ليه ماقدرتش اقول لقلبي لا ليه

هي: لان قلوبنا مانعر فش نتحكم ومش كل حاجه بتمناها بنلقاها ان شاء الله ربنا يجعلك نصيب احسن

صاحبتها(وكانت صوتها كله دموع): تعبانه قوي خايفه اضعف بس علشانه وعلشاني سيبته وانا بحبه

السؤال هنا ياترى قرار صاحبتها كان صح ولا غلط وهل لو وافقت كانت هتكون فعلا جوازه فاشله ؟ مع العلم ان الشخص ده كمستوى علمي هو زيها وهيكون اعلى بس كمستوى اجتماعي لا




11‏/3‏/2009

ليه........


اولا بشكركم كلكم بجد في دعواتكم لاختي وربنا يشفيها يارب ويشفي كل مريض يارب امين والحمد لله على كل شئ وانتم كلكم بجد ناس رائعين بجد والله العظيم شكرا جدا لعالم التدوين الرائع ده وللناس العسولين الي هما انتم ربنا يخليكم ليا ونبدأ البوست


------------------------------------------------------------------------


ليه مش قادر تفهمني
ليه مش قادر تحس بيا
ليه بحس ان انت في مكان وانا في مكان تاني
ليه مع اننا كل يوم بنكلم بس بيكون اغلب كلامنا صمت
ليه بحس انك شايل هموم
وانا شايله هموم
وكل واحد كاتمها جواه
اسالك مالك تعبان ليه مهموم ليه
تقولي مافيش ماتشغليش بالك
قربني منك خليني جواك
ليه دايما بحس انك حاسس اني مش هفهمك
ليه باعدني
مع اني عارفه وانت عارف اننا مالناش غير بعض
ليه في دايما حاجز
وكل ماقرب احاول اشيله معاك الاقيك بتبعد وتقول مش عايز اتعبك معايا
نفسي تعرف انك بكده بتألمني
نفسي تعرف اني عايزه اكون معاك في كل حاجه
في ألمك قبل فرحك
وفي دمعتك قبل ضحكتك
عارف ليه؟ ولا دي كمان نسيتها
لاني بحبك وماليش غيرك

8‏/3‏/2009

ااه من تعب القلب


وانا صغيره لما كانت ماما او بابا بيتعبوا لاقدر الله كنت مابرضاش ابدا ادخل الاوضه الي بيكون الشخص التعبان فيهم فيها ابدا كانوا ينادوني ويتحايلوا عليا ادخل ولو دخلت ببص كده عليهم ومابكونش مستوعبه ان ماما مثلا تعبانه كنت بعد اشدها اقولها قومي فاكره زمان كان بابا عمل عمليه وفعلا طول ما انا كنت معاه في الاوضه ماكنتش بكلم ولا حتى كنت بقوله سلامتك كنت بعد ابصله بصمت كنت بعد اسال نفسي يعني ايه عيان ويعني ايه تعبان وليه مش عارف يقوم ويمشي كان عقلي صغير انه يستوعب يعني ايه تعب


وكبرت وبدات افهم يعني ايه تعب ومرض بس ماقدرتش اتخلص من عادتي القديمه في اني مابقدرش اشوف حد من عيلتي تعبان او مريض بعد برضو ابصله بصمت غريب واضح ان عقلي لسه رافض يستوعب

دلوقتي وانا بكتب البوست ده انا في اشد حزني لان اختي تعبانه قوي وعملت عمليه قدامي من غير بنج عيطت صوتت اتألمت كنت معاها وماسكاها كنت حاسه ان قلبي هيقف
الغريب ان انا كمان عملت عمليه قبل كده من غير بنج وبرضو اتألمت وصوتت وعيطت بس الي اكتشفته ان الألم الي بيحس بيه المريض اخف بكتير من ألم قلبي على اختي الي حساه دلوقتي والي بحسه في كل يوم بروح معاكي يا حبيبتي المستشفى بغيرلك على الجرح وانتي بتتألمي وبتمسكي في ايدي جامد وانا بكون هموت

مش هقول غير الحمد لله يارب على كل شئ واحنا احسن من غيرنا بكتير ويارب اشفيكي يا اختي قريب ويارب اشفي كل مريض يارب وياريت يا جماعه تدعولها معايا