3‏/4‏/2008

ادوني مساحتي سيبوني براحتي


هو انهارده هكلم عن موضوع مهم مش حاله من حالاتي لا موضوع عام كنت بتناقش فيه مع واحده صاحبتي وحبيت اني افتحه للنقاش
وهو ان لسه في اهل بيمنعوا دخول الانترنت للبيت اعتقادا منهم انه مصدر الفساد العالمي هو الانترنت مع ان الغريبه ان كل ولادهم تقريبا بيدخلوا سايبر
افتكر ان فكره المنع دي فكره غلط جدا جدا خصوصا دلوقتي لان حاليا ماتقدرش تمنع اي حاجه عن اي حد لان الاهل الي بيمنعوا دخول النت على البيت دول اكيد ولادهم بيدخلوا من اماكن تانيه اما عند اصحابهم او من سايبرات وما اكترها دلوقتي
انا اعرف ناس حتى لو بيدخلوا نت البيت لو ولادهم فتحوه بيفضلوا قاعدين جنبهم خوفا انهم يفتح حاجه وحشه كمان ده غلط جدا
عارفين المشكله في رايي اننا مش عارفين معنى كلمه حريه وثقه
لازم ندي لاولادنا حريه وفي نفس الوقت لازم نفهمهم صح ونديهم معاها ثقه فيها ايه يعني لما النت يدخل البيت النت زي اي حاجه في الدنيا سلاح ذو حدين فيه الكويس وفيه الوحش ويعني لو احنا منعنا النت من البيت هل كده خلاص بتضمنوا ان الولاد مش هيدخلوا ولا هيشوفوا الحاجات الوحشه لا طبعا لانه ممكن يدخل من اي مكان ويشوفوها في اي مكان
هديكم مثال انا مثلا اول ما استخدمت النت زمان وعملت ايميل ماكونتش لسه اعرف ازاى اعمل ديليت او بلوك فلقيت ايميل وحش مبعوتلي عارفين عملت ايه
روحت قولت لبابا ده في ايميل وحش عندي اعمل ايه الراجل لا اتعصب ولا زعقلي بكل سهوله علمني ازاى اعمل ديليت وبس ولا عمره قطع النت ولا عمره جه قعد جنبي وانا على النت لان هو اداني ثقه واداني حريه معاها وعلمني ازاى استخدمها صح لان الي عارف ان الحاجه دي غلط مش هيعملها حتى لو هو لوحده لكن الي اتعود انه مش بيعمل الغلط علشان في رقابه عليه بمجرد ان الرقابه دي هتروح عنه لحظه ممكن جدا يعمل الحاجه الغلط دي لانها بالنسباله شئ ممنوع والممنوع مرغوب
هقولكم مره حاجه شفتها على التلفزيون عاجبتني قوي كان برنامج بيستضيف الدكتور هاني السبكي وهو دكتور نفسي فاتصلت واحده في البرنامج وقالت انا عندي دش وبنتي مره بتقلب فيه شافت قناه وحشه وكمان كانت قناه (شواذ) وجت البنت وقالتلها فقامت الام قامت قاطعه وصلت الدش خالص وقطعت التلفزيون
فطبعا الدكتور رد عليها وقالها طبعا ده غلط لان البنت شافت خلاص وكويس جدا انها جت قالتلك ماخبتش او ماراحتش قالت لواحده صاحبتها وتديها معلومات غلط المفروض الي يحصل انك تعدي معاها وتفهميها ايه الي شافته وانه غلط علشان ماتخافش انها تقولك على حاجه تانيه بعد كده وكمان ترجعي الدش وتعملي تشفير للقنوات دي
انا بس حبيت اذكر القصه دي لان بجد لازم نعمل كده لازم الاهل يكونوا قريبين لاولادهم لان في العصر ده افتكر في رايي ماعادش في حاجه اسمها ممنوع او عيب او ماينفعش خلوا ثقه وتفاهم بين الاولاد والاهل علشان يجوا ويحكوا مش يروحوا لناس تانيه يدوهم معلومات غلط والنت وجوده او عدمه مش هو الي هيمنع الفساد او هيفتحه
في النهايه رايي ان لازم نربي اولادنا صح ونربيهم على الحريه والثقه ونسيبهم بعد كده مش نكون حراس عليهم هما لوحدهم هنلاقيهم بيبعدوا عن الغلط لوحدهم من غير وجود حراس عليهم ورقابه مشدده او سياسه المنع بس طولت عليكم
-----------------------------------------------------------
شكر خاص جدا لفطومه لانها هي الي اقترحت عليا العنوان ده وجابتلي الصوره دي شكرا فطومه حبيبتي

هناك 37 تعليقًا:

Grogal يقول...

See please here

Gardagami يقول...

See please here

nosha يقول...

حاسوباتية
موضوعك جميل وبيتكلم عن حاجة محتاجين إننا نتكلم عنها كتير جداً مش بوست وبس بس إحنا ممكن نكتب كتب ومجلدات كاملة عن الموضوع ده
وللأسف إحنا عندنا في مصر وفي جميع الدول العربية فجوة واسعة وكبيرة جداً بين الآباء والأبناء وده اللي بيخلينا دائماً بيننا وبين الآباء صدامات وصراعات كبيرة ولازم علشان نحل مشكلة زي دي إننا يكون فيه ثقافة وعلم وتفاهم وود بين الآباء والأبناء محتاجين يكون فيه ثقة متبادلة وأحترام للأراء والأفكار علشان نقدر إننا نحل المشاكل الكبيرة جداً التي بتواجه كل شاب مننا وكل بنت كمان
تحياتي ليكي و لموضوعك الجميل

wa7di يقول...

كنت فكرانى اول تعليق
انى زوعلانة جدا جدا
بصى يا بونيتى الأهل بيعملوا كده ليه ؟؟
طبعا خوف على عيالهم
بصى وجهه نظر الأهل بتتبنى على اللى بيسمعوه من الناس
نظرا لانهم ما استخدموش التكنولوجيا
عندك مثلا الاب وهو فى الشغل يسمع واحد يقول
ده انا ابنى دخل على النت ودخلت عليه فجأة لقيته معرفش عامل ايه
ده فلان اتصاحب على ناس على النت وفسدوا أخلاقه
ده علان معرفش عمل ايه
ده النت بيبوظ اخلاق العيال والواد بيفضل سهران عليه وسقط فى الكلية

والأم مع جيرانها مثلا
دى بنت ام فتحى دخلولها النت وسهرانه ليل ونهاار عليه ياختى لما كل يوم بتقوم من عليه بعلقة

ده غير الاعلام اللى فاضح المواقع اياها والسرقة والنهب واللى بالى بالك احم

فالاهل هيعملوا ايه غير انهم يرفضوا
اسكتى اسكتى انا عندى تجربة لواحد جارنا هبقى اعمل عليه بوست

هبقى اجى اكمل تانى هروح ازاكر بقى

Salar يقول...

SECURITY CENTER: Look Please Here

Foxology يقول...

الموضوع جميل جدا والله

فعلا لازم يكون فى حرية لأن الحرية هتلزمنى انى احترمها واحترم اللى ادان ىالحرية دى سواء اهلى اللى انا عايش معاهم او حتى ضميرى اللى المفروض انه يكون القاضى الخصوصى بتاعى

شكرا للبوست :)

wa7di يقول...

أنا جه تانى

بصى يا سوسو
تعالى نحط نفسنا مكان أهلنا
حاجة جديدة ظهرت فى عالم كله فساد ومش أمان زى الأول
بنسمع عنها حاجات مش كويسه
او بنعتقد ان ولادنا مش هيستفيدوا منها
ما احنا بردو اتعلمنا وكبرنا من غير النت واتجوزنا وربينا عيالنا ومكناش نعرف لا نت ولا دش
أنا أم مثلا بخاف على ابنى أو بنتى
مش معقول هتخلى ولادك يجربوا حاجة جديدة انتى نفسك ماتعرفيش عنها حاجة
مثلا مثلا يعنى فلنفرض موزايه
انتى عمرك ما اكلتى موز ولا تسمعى عنه
جت بنتك او ابنك قالوا لك يا ماما فى حاجة اسمها موز وانا عايز اكلها
انا عن نفسى مقدرش اخليه يجرب
افرض طلعت حاجة مش كويسه
يبقى ضيعته
المفروض انى اعرف ايه الموز ده واطمن انه مش هيضره واديهوله واسيبه براحته طول عمره ياكل موز لغاية ما يتقلب قرد انا مالى

عارفة زى ايه كمان
زى مامتى ومامتك واحنا صغيرين لما كنا بنشرب شوربه مثلا
هى عارفه ان الشوربة مفيدة و وووووو
بس بتنفخ فيها الأول قبل ما بتديهالنا
لانها مفيدة لينا ممكن بردو تضرنا وتاذينا
فهمانى

أنا مش هقول على الأهل متخلفين ولا من جيل انقرض ولا معندهمش عقل يفهموا التكنولوجيا
بس المفروض ان الاولاد بقى يقعدوا ويفهموهم الحياة بقت شكلها ايه
صحيح هتكون صعبه عليهم
بس الاهل مش عايشين فى دنيا غير دنيتنا

صدقينى هو خوف مش أكتر ,, احنا اللى بنظلمهم وبنقول انهم مش قادرين يفهمونا
بالعكس احنا اللى مش قادرين نفهمهم

سلاموز بقى كفاية كده توداى

snohe يقول...

عندك حق

بيسوو يقول...

بصي بقى الموضوع متفرع ومتشعب..ليه علاقة بطريقة تربية الاهل نفسهم..قصدي يعني الاهل نفسهم اتربوا ازاي..كان في ثقة بينهم وبين اهلهم...وحاجة كمان الا وهي الخبرات الي الاهل اخدوها مع ولادهم..بمعنى هل الاهل شافوا ان ابنهم او بنتهم يستحق الثقة دي

من ناحية ان المنع بقى مش هيعمل حاجة وان الولاد ممكن يشوفوا اي حاجة برة البيت..فده صحيح..بس عايزة اقلك ان خوف الاهل على ولادهم هو الي بيخليهم بتصرفوا كدة ومش بيشوفوا غير ان الحق معاهم...حقهم انهم يخافوا على ولادهم في زمن مايعلم بيه الا ربنا

ده غير طبعا ان الحوار شبه ملغي عند معظم الاهالي

بس في النهاية المحرك ورا كل التصرفات دي هو اكيد الحب اللامحدود

الطائر الحزين يقول...

اكيد مش هيمشوا وراهم فى كل حته يروحوا فيها


لازم يكون الامر من قناعه داخلية وبتوجيهنا ومراقبة من بعيد



تحياتى

Sometimes يقول...

wa7di

عجبنى تعليقها جدا جدا جدا وانا معاها فى كل اللى قالته

SKOBL- Little Lazy Me يقول...

بصراحة معاكي حق جدا .. أنا أول مرة سمعت الرأي ده سمعته من صديق لللأسرة راجل بأحترمه جدا ..قاللي اننا المفروض نعرف ولادنا كل حاجة و نعرفهم ايه الصح منها و ايه الغلط .. طبعا كله بتسلسل زمني تبعا لسنه و الناس اللي متوقع يحتك بيهم .. مثلا أنا حاقولك .. لو ابني مثلا - بعد عمر طويييل - بدأ فترة مراهقته و جه سألني عن حاجة محرجة ، الأسهل ليا اني أقوله عيب كده و ما تتكلمش في الموضوع ده تاني و هكذا ، هو فعلا حيعرف انه عيب و مش حيتكلم فيه تاني قدامي .. لكن هو لسه عايز يعرف ده عيب ليه ، و كذا و كذا ، و كل الحاجات دي .. ساعتها حيسأل حد من صحابه .. و هي دي المصيبة ، ان ممكن صاحبه ده يكون سيء .. أو حتى كويس بس عنده معلومات غلط عن الموضوع .. و ساعتها حيعرف الحاجات مشوهة بل و ممكن يعمل الخطأ ده من ورايا
أنا في الأول ما كنتش مقتنع ، لكن لما أخويا الصغير دخل اعدادي .. قلتله لما تسمع حاجة مش فاهمها قل لي .. و هو جه و سأل ، و الحمد لله ربنا سهلها و شرحتله الصح عن الحاجات اللي سأل فيها و فهمته بدون ما أتعدى حاجز الأدب ، و ما دام هو كده كده حيسمع يبقى يسمع الصح أحسن و يسمعه مني و أنا عارف أنا باقول ايه على اساس ديني و علمي أحسن مما يسمع من الشارع و الزمايل في الفصل .. دلوقتي هو أما بيسمع حاجة غلط بييجي يحكيلي و بيتريأ على الناس العبيطة ، اللي لو ما كنتش حكيتله كانوا حيبقوا مصدره و مدرسينه .. مش معقول الأهالي حيفضلوا مكسوفين يكلموا العيال و العيال طول النهار في الأفلام و المسلسلات شايفين كل حاجة و لو دخل كتب اي حاجة ع النت ممكن يقرا بلاوي كتير غلط .. الأهالي لسه عايشين ع اللي هما اتربوا عليه و ده غلط ، بس هما كتر خيرهم ، أنا شايف ان في جزء كبير ع الاخوات الكبار .. بس ده بيحتاج انك الأول تزرع نوع من الصداقة بينك و بين الصغير .. ولازم تتحمل شوية هزار من بتوع العيال اللي حاسين انهم كبروا .. بس في النهاية .. تأكد انك حفظته من الخطأ بنسبة تسعين في المية .. و ما تتكسفش ، فكر في طريقة كويسة تشرح بيها الموضوع و دايما حوط الغلط باطار من ضياع الدين و الصحة و الأخلاق .. ما تهولش لكن قول ، ممكن تحكي انك كان ليك واحد زميلك كان بيعمل كذا و دلوقتي بقى عنده كذا و بيقول ياريتنيما عملت كده .. و حتى لو غلط و انت عرفت .. ما تصلبوش و تقطعه ، لومه و قلله امال لو ما كنتش عارف ان ده غلط و بينيل الدنيا و حتستفيد ايه ما انت كل حاجة عارفها و صح و كده .. الكلام البسيط ده ابسط و أجمل و أكثر تأثيرا من التهديد و الوعيد .. و طبعا لازم شوية شده .. مانت لا ترخي و لا تشد زيادة عن اللزوم .. ده بالنسبة للولد و البنت .. و ما تقوليش بقى صحابه كويسين و ولاد ناس و أنا عارف أهليهم لا يمكن يكلموه في حاجة وحشه .. لأن دي فطرة انك تعرف المجهول .. و دي غرائز عند الناس كلها .. و زي ماانتي قلتي الممنوع مرغوب عند الكل ..معلش طولت عليكم بس أنا فعلا حبيت أوضح بتجربة أد ايه اننا لازم نكون بنفكر صح ، مش بنهرب من الوحش و نستخبى لأنه كده كده حيلاقينا ..
و لك كل التحيات

fatma يقول...

بت يا حااسوباتيه أنا جه تالت

انا wa7di يابت
بس عملت نيو لووووك ايه رأيك !!

قولت بقى ادخل احط كمان كومنت بالنيولوك الجديد
فى الأول بشكر sometimes كتير كتير على دعمها وموافقتها ليا


تانى حاجة كان عندى تعقيب صغير على كلام SKOBL- Little Lazy Me فى الجملة دى


الأهالي لسه عايشين ع اللي هما اتربوا عليه و ده غلط


اسمحلى حضرتك انا مش معاك فى الحته دى
الأهل اتربوا فى زمن أحسن مننا
زمن الحاجة الرخيصه اللى مكانتش بتخليهم يسرقوا ولا ينهبوا ولا يقتلوا
زمن القيم والأخلاق والمبادئ
زمن = تجارب بتنضاف ليهم ومن خلالها بتنطبع على شخصيتنا
الأهل لو غيروا مبادئهم وغيروا قيمهم علشان الزمن اتغير يبقى على الدنيا السلام
يبقى ازاى هقدر اثق فى كلمة واحده من أهلى ؟؟
أجمل ما فى أهلنا انهم مش من جيلنا
مختلفين اه بس متفاهمين
اجمل حاجة هو الاختلاف ده لانه بيكملنا
بيعرفنا زمان ايه ودلوقتى ايه علشان نقدر نحكم عقلنا فى الصح والغلط

أهلنا مش متخلفين
مش معنى انهم مكانوش على أيام النت والدش والتكنولوجيا اللى حصلت دى
يبقوا عايشين غلط
احنا نفسنا ان شاء الله لما نبقى أهل لأولادنا هنبقى بالنسبة لهم متخلفين
لان التكنولوجيا بتتطور وكل يوم فى جديد
والام والاب مش هيسيبوا تربية العيال ويتابعوا التكنولوجيا ويسيبوا شغلهم ورسالتهم
التكنولوجيا مش اسلوب نعيش بيه
دى بتساعدنا بس اننا نفهم اكتر

لو فعلا الاهل عايشين غلط يبقى نعلم امهاتنا وابائنا يقعدوا يكتبوا فى المنتديات ويعملوا ايميل ويقعدوا يشيتوا ويتعرفوا على فريندس جداد ويعملوا مدونات ويكونوا حياة الكترونية
ما افتكرش انها هتبقى فكرة ظريفه

التكنولوجيا سلاح ذو حدين
ومهما كانت ثقة الاهل فى اولادهم فخوفهم عليهم انهم يستخدموا حاجة جديدة وغريبة
فده مايقللش ابدا من الثقة دى

وربنا يخلى اهلنا لينا دول البركة اللى فاضله فى الدنيا دى

الفاتح الجعفري يقول...

السلام عليكم
موضوع فعلا مهم جدا ,وفعلا لازم نعلم اولادنا الصح والغلط والحلال والحرام بهدوء وحكمة وعدم تعصب او منع او حرمان اوغيره يكفي ان تترك لدي ابنك شعور انك واثق فيه وانه يعتمد عليه
وخاصة في سن المراهقه يجب من الاباء ان يصادقوا ابنائهم ويتركوا لهم مساحات من الحريه ,والله المستعان
جزاكم الله خير

SKOBL- Little Lazy Me يقول...

fatma
سعيد ان رأيي عمل فرق بس أنا ما كنتش أقصد بالجملة دي انهم متخلفين ولا حاجة .. بل بالعك سالناس دي اتربت على مباديء و قيم عظيمة لو موجودة دلوقتي كانت حلت مشاكل كتير أوي .. مثلا زمان كان الواحد لا يمكن يبص لبنت بلده بصة غير انها أخته و انه واجبه يحافظ عليها .. النهاردة الواحد قريبتهم بتسكن قريب منهم يفرح أوي عشان حيعرف " يظبط " ... أنا ما اعترضتش على أخلاق ومان .. أنا مؤمن ان زمان كان مفيش ثقافة دينية زي دلوقت بس كان فيه وازع و ضمير و فطرة مع ثقافتهم الدينية القليلة طلعتهم محترمين .. النهارده مع كل الشيوخ و الدعاه دول و انعدام الضمير و الوازع ( التربية) احنا أسوأ مش أحلى .. ياريت الأهالي تربي زي زمان ..
بس أللي أنا أقصده ان دلوقتي واجب على الأهالي يعرفوا ولادهم الدنيا ماشية ازاي مش يقفلوا عليهم .. مثلا في الريف زمان كان الأب أو الأم يعلم ابنه ان ولاد الناس المحترمين ما يعاكسوش بنات ولا يبصلهم وحش .. و الولد نتيجة لأنه شايف كل الكويسين حواليه كده كان بيتغرس جواه الأدب وكان استحالة يفكر في الوحش لأنه مش موجود قدامه و حتى لو سمع بيه ف يوم حيبقى من باب النشاز اللي الناس بتستحقره .. النهارده في نفس الريف هات اسرة من جيل أجدد في نفس العيلة .. صعب انه ما يقابلش الغلط في عصر بقى الصح فيه هو الاستثناء لقاعدة الغلط .. صعب انه يفضل من غير ما يقابل الغلط في المسلسلات اللي بقى كلها تحشيش و خلاعة و الأفلام اللي بقت كلها اغتصابات و شذوذ ( معلش بس هو ده الواقع ) و القدوة اللي زي اللمبي اللي نص كلامه هبل و نصه شتايم .. و النت اللي ممكن يودي ف داهية لو استعمل غلط (لا ينفي ده انه من أنفع الحاجات لو لستعمل صح ) .. أكيد لازم يوم حيقابل الغلط .. يبقى بدل ما أخلي الغلط ده بالنسباله حاجة مبهمة يحب يعرف عنها بدافع الفضول .. أخليها حاجة هو عارف مساوئها .. حتى لو قابلها حيتجنبها اشمئزازا من انه يتدنى بنفسه لمستواها .. يعني أنا ما كانش قصدي مناقشة تربية الماضي لأننا فعلا بنفتقر ليها .. بس الزمن بيفرض حاجات علينا لازم نغير في أسلوبنا شويه ..انما كنت بناقش مبدأ ان الأهل يناقشواأولادهم و هما اللي يعرفوهم الدنيا فيهاايه وحش و حلو .. يحببه في الحلو و ينفره من الوحش .. و الا الابن حيجرب الاتنين و يبقى يحكم بنفسه ، و الله أعلم حكمه حيبقى ايه .. معلش تاني مرة أطول بس حبيت أوضح وجهة نظري من اجملة اياها .. و أرجع أقولك يا ريت الاهالي بتربي زي زمان ..
و لك كل التحيات

حاسوباتيه يقول...

nosha
شكرا جدا على مرورك ونورتني وفعلا رايك سليم ان في للاسف لسه فجوه وياريت نقدر بتقربنا احنا من ابائنا اننا نقللها وشكرا جدا لمرورك ونورتني ويارب نورني على طول

حاسوباتيه يقول...

Foxology
نورتي يارب دايما كده وفعلا لازم يكون في حريه بس لازم نعلم الاولاد ازاى يستخدموها ونديهم الثقه معاها وشكرا لمرورك

حاسوباتيه يقول...

snohe
شكرا جدا لمرورك ويارب دايما تنورني

حاسوباتيه يقول...

بيسو
حبيبتي بيسو عندك حق فعلا بس وعارفه انهم بيعملوا كده من خوفهم بس لازم يكون في جزء حريه وثقه يدوه لاولادهم شكرا لمرورك ياقمر

حاسوباتيه يقول...

الطائر الحزين
اكيد طبعا لازم يكون عن قناعه داخليه

حاسوباتيه يقول...

wa7di
معلش اتاخرت عليكي يا جميل بصي هو كلامك صح طبعا هو من خوفهم بيعملوا كده بس لازم يتغلبوا على خوفهم ده عارفه الحل واحد من الاتنين مثلا انهم هما نفسهم يتعلموا التكنولوجيا دي ويخلوا ولاده يعلموهم وبكده هنخلق الحوار وهيروح الخوف او مثلا ان الكمبيوتر يتحط في الصاله مثلا مكان بيمشي فيه كل شويه حد وتكون المراقبه موجوده بس من بعيد مش لازم يعد معاه او يحسسه انه مش واثق فيه ممكن يراقبه بس من بعيد وفي نفس الوقت يوجهه مش علشان بخاف عليهم او بسمع من الناس خلاص اقفل عليهم واقول هما كده في الامان لان الزمن ده كله مفتوح لو مافيش نت في البيت فيه في السايبرات في كل مكان في دلوقتي يبقى ده بقى امر واقع لازم نتعامل معاه برشد وبحكمه مش بخوف وهو بقى امر مفروض علينا سواء واقفنا او لا
ودايما كده يارب منوراني

حاسوباتيه يقول...

SKOBL- Little Lazy Me
عاجبني جدا جدا تفكيرك بجد انت صح في كل كلمه وعجبني جدا تصرفك مع اخوك وياريت كل الاخوات يعملوا كده بجد لان الاخ الكبير بيحل كتير محل الاب في حاجات بالزات لو كان الاباء خايفين زياده كده بجد انا معاك جدا وشكرا جدا ليك

حاسوباتيه يقول...

Sometimes
هي فطومه عندها حق طبعا بس برضو زي ماقولت لازم مايكونش خوف زياده خوف بس من بعيد وشكرا جدا لمرورك ولعلمك انا بحب البلوج بتاعك جدا بجد

حاسوباتيه يقول...

الفاتح الجعفري
كلامك فعلا صح بجد وشكرا جدا بلمرورك ويارب تنورني على طول

fatma يقول...

SKOBL- Little Lazy Me

أنا فاهمة قصد حضرتك وعارفه ان حضرتك ماقولتش متخلفين
بس الشباب شايفين كده ,, فأنا كنت بوضح النقطة دى فى ردى
وكلام حضرتك صح طبعا
وسعيدة برد حضرتك عليا

ــــــــــــــــــ

ايييييييييييييه اللى بتقوليه ده يا انسه حاسوباتية

انتى كده جيتى تكحليها عمتيها خالص
طيب ياستى انا همشى معاكى
انتى مثلا هتقبلى ان مامتك تقعد تشيت ؟؟ ولا تحط مواضيع فى المنتديات وبتاع !!
يا خبر ابيض !!
انا ما اتقبلهاش خالص خالص

وايه نحط الكمبيوتر فى الصاله دى ؟؟
انتى جرالك حاجة !! ولا ده تأثير مشروع التخرج ؟؟
ما نأجره احسن بقى
P:
بصى الثقة اللى أهلنا بيدوهالنا نابعه من ثقتهم فى تربيتنا
أنا دايما أقول ان الصح ان الأهل يحطوا أساس من أول ما يبدأوا يربوا اطفالهم وبعد كده يسيبوهم بقى شوية
لانهم عارفين انهم بنوا الأساس
عمرك شوفتى عمارة أساسها مبنى صح ومنظم ومترتب ومتين وتلاقيها طالعه بميل او معووجة ؟
استحاله
اما اللى مش واثق فى عياله بقى فدى تبقى مشكلة ونقص فى التربية

انا طول النهار والليل فى اوضتى وقاعده على الكمبيوتر والباب مقفول
ماما متأكده انى مابعملش حاجة غلط أو تخاف عليا منها
لانها عارفه انها مربية بنتها صح
والحمد لله الواحد ضميره صاحى وبيقدر الثقة دى ومش بخونها

وانتى عامله ايه دلوقتى؟

حاسوباتيه يقول...

fatma
انا برضو الي المشروع ماثر عليا هو اكيد ماثر كتير على فيوزات مخي بس انتي ياقمر مافهمتيش قصدي انا اقصد زي ما انتي قولتي بالظبط وده فعلا الي انا قايلاه في البوست بس انا اقصد ان الاهل يتعلموا نت مش لازم شات يعني مافي مليون حاجه تانيه ده اولا ثانيا انا اقصد حل مشكله انهم يكونوا خايفين قوي انهم يحطوه في الصاله لو هما خايفين للدرجادي لكن انا مثلا زيك جهازي في اوضتي ونفسك بالظبط انا بدي حلول للناس الي خايفه قوي على ولادها وفي نفس الوقت عايزينهم تحت الرقابه لما قولت الصاله قولتها علشان يبقى في رقابه بس من بعيد شويه بس ده الي اقصده لكن انا طبعا معاكي في موضوع الثقه والكلام الي قولتيه وان لازم التربيه واساسها يكونوا صح وده نفس كلامي في البوست بالظبط لكن انا لما رديت عليكي فصدت بس حل للناس الخوافين قوي على ولادهم وبس

fatma يقول...

فى الأول لازم اقول للعالم كله والوطن العربى على وجه الخصوص انك هددتينى على الماسنجر ودخلتينى وزقتينى بالعافية لدرجة انى رجليا كانت هتخبط فى باب المدونة لولا ربنا ستر

دا على اساس ان يعنى أم بعتتلك رساله وقالت لك ربنا ينورلك طريقك يابنتى شوفيلى حل فى فؤاد اللى مش راضى يسيب النت ؟
قومتى قررتى بدون سابق انذار انك تشيلى مسؤلية جيل كامل مهدد بالانقراض وتوجهتى الينا ها هنا علشان تدافعى عن القضية ؟؟

انا مش متخيلة ماما قاعده على النت وانا واقفه جنبها بقولها خلصى يا ماما دورى جه وانتى قاعده على الجهاز من الصبح !!!
دى تبقى عيشة كوميكس قوى

بصى فى النهاية لا يصح الا الصحيح
كل حاجة فى الدنيا سلاح ذو حدين
الصحاب نفسهم ممكن يشكلوا خطر على الواحد وممكن يخلوه انسان ناجح
يعنى مش العيب على النت .. كل حاجة ممكن تبقى صح وتبقى غلط
تبقى عامل نجاح وتبقى عامل فشل
والحدق يفهم
وكل سنة وانتوا طيبين

مفقوعة مرارتي من حماتــــــــــــي يقول...

المسألة صعبة ...ومحتاجة رقابة شديدة من الأهل لأن النت خطير وممكن تلاقي وانتي قاعدة مواقع مش ولا بد بتتحدف عليكي من حيث لا تعلمين
ولو الشباب سنه صغير ممكن يفتح الحاجات دي من باب حب الإستطلاع بس
أنا بجد الموضوع ده محيرني ... لاني اعرف ناس مفروض انهم متربييين كويس جداً
ومع ذلك ضعفوا قدام إغراءات النت وعالمه المفتوح

gannah يقول...

اولا موضوعك حلو كتير وثانيا مهم جدا ولو قعدنا نتكلم فيه مش هنخلص المهم ان النت بقى شىء ضرورى جدا ومهم بس للى يحسن استغلاله

قلب بلا حب يقول...

والله كلامك صح مليون فالميه
صح ايه الفكر في ان في ناس مدخلش نت عشان خايفه علي اولادها من الانحراف..
في حين ان دلوقتى السيبرات بقيت علي قفا من يشيل ..
ولو الواحد من الاولاد دي عايز ينحرف مبقتش صعبه ..

لااااااااااازم بجد الاهل يدو الامان لولدهم و يدوهو الثقه ..

شكراً علي الموضوع الجميل ده..

samourai 4 ever يقول...

عندك حق فعلا
دلوقتى الاباء بيبقوا مشددين اوى على حته النت دى
طب انا اقولك على حاجه
انا مرة كنت بعمل شات مع واحد اعرفه من على النت و بتكلم عادى خالص و بساله على شويه حاجات
و بعدين بابا جه وقف جنبى و قعد يبص على الكلام
مع انى كان ممكن اشيله من قدامه و مش حيعرف يشوف بردوه و لا حيفهم لانه مالوش فى الكمبيوتر و النت اوى
فقلت ايه خليه يبص عشان يبقى واثق منى اكتر و يتاكد انى عمرى محعمل حاجه غلط
صدقينى لو حكيتلك على اللى حصل بعد كدة
ممكن تسالى على راسى و هى سليمه و لا لا
الحمد لله انه مش ماهر فى التصويب
ههههههههههههههههههههههههههههههه

و دمتــــــــــــــــــــــــــم

واحد من الناس يقول...

الرد متاخر اوي اوي عارف بس جت كده معايا بقي
قبل اي حاجه الصوره معبره اكتر من الموضوع وبجد فوق ممتاز اختيار ك للصوره دي
تاني حاجه بقي سعات بيقبقي الخوف الزايد هو الي بيعمل كده خايف
وتاني حاجه اغلب الاسر المصريه دلوقتي بتعامل ولدها زي ما كانوا بيتعملوا هما من 20 سنه طبعا استحاله في عصر النت والكمبيوتر
لكن هنقول لمين
بس برضو ارجع واقول اديهم حريه بس مشم طلقه
لزم ارجع الحريه ديك ل فتره واشوف يستهلوهه ولا نسحبهه ولا نقلله ولا هما جديرين بالثقه دي
ولا ايييييييييييييييييييييه؟؟؟؟؟
والصوره بجد فوق ممتازه

ojg يقول...

واو واو واو
3 واو
أولا حبيبة قلبي وروحي وحياتي حاسوباتية
عارفه هتشدي في شعرك دلوقت تقولي وانا اعرفك منين
يا امي الدم بيحن
أصلي حاسوباتية برضو،، قوليلي هو انتي كلية حاسوبات جامعة ايه؟
:))
ارد ع البوست بس ونكمل تعارف بعدين
أولا انا لغايه دلوقت ناس كتيييير بتبصلي شذرا لما اقولهم اني مهندسه كمبيوتر (مش بقول مبرمجة عشان مفيش حد اصلا فاهمها)
ويوقولولي ااااه يعني بتقعدي ع النت
وكأني بقعد مثلا علي غرزة ولا حاجه
واقول للصبح كلام عن ان والله النت زي التليفزيون والانسان هو اللي بيختار يشوف الشيخ الشعرواي ولا يشوف وصلة رقص للفنانة دينا واهو كله بالريموت

وبرضو نظرتهم هي هي
وكأن النت وكر الملذات ومابالك بقى يا سيدي وأنا شغلي طول النهار قدامه يعني استغفر الله العظيم

النظرة دي عااااااااااااااااامة
إلا من رحم ربي
ربنا يهدي الناس وشوية ثقة يا جماعه بس مش تسيب
عشان الولد ولا البنت لما يحس انه عمال يتحذر من حاجه وهو مايعرفهاش،، هيدور عليها مخصووووووص ويروحلها ولو كانت في بكوكو ولا إيه؟؟

أحييكي على موضوعك يا زميلة الكفاح

Akinogal يقول...

Attention! See Please Here

حاسوباتيه يقول...

مفقوعة مرارتي من حماتــــــــــــي

بجد مبسوطه جدا لزيارتك نورتيني بجد وبحب مدونتك موت جدا بصراحه وعندك حق ساعات فعلا الاغراءات بتكون موجوده وفي ناس بتضعف بس عارفه لما يكونوا متربيبن كويس زي ما قولتي بيحسوا برضو بتانيب الضمير وبيرجعوا تاني للطريق الصح ده رايي وافتكر ان بادام الاساس صح حتى لو الانسان غلط بيرجع للصح ولو بعد فتره ونورتيني ويارب دايما منوراني

حاسوباتيه يقول...

gannah

ميرسي جدا لزيارتك ونورتيني وفعلا رايك صح ويارب نوراني على طول

...................................
قلب بلا حب
شكرا جدا لزيارتك وفعلا كلامك كله صح

...................................

samourai 4 ever

هههههههههههه بجد صعبتي عليا وحمد الله على السلامه وكويس ان عمو مش ماهر في التصويب ربنا ستر خلي بالك بقى المره الجايه وربنا معاكي ونورتيني يا قمر ويارب دايما

...................................
واحد من الناس

رايك فعلا صح وانا كمان ضد الحريه المطلقه بس لازم يكون في جزء حريه ومعاك في كل رايك وفعلا صح ويارب منورني على طول

..................................
ojg
منوراني يا حاسوباتيه زمل ويارب دايما كده وفعلا للاسف في ناس لسه بتفكر كده بس هنعمل ايه بقى نصيبنا لازم نتحمل نتيجه دخولنا الكليه دي يارب يخرجني منها على خير واكون لسه بعقلي لحسن بدا يرروح ويارب دايما تنوريني

Ne3oo يقول...

حاسوباتية
موضوعك حلو اوى و انا اول مرة ادخل مدونتك بعد اذنك طبعا
انا رأيى ان الاهل بيبقوا خايفين على ولادهم مش اكتر و دا بقا اختلاف فى وجهات النظر بين الاجيال و انا شايف ان الحل قعدة عرب كدا يعنى بين الابن و الاباء عشان يناقشوا الموضوع دا
تقبلى مرورى .تحياتى