4‏/11‏/2008

متخلفه....????!!!!

طبعا ماقصدش هنا اني اشتم نفسي انا اقصد بالكلمه هنا مش الشتيمه لا اقصد الصفه طبعا ده في راي الناس وهقولكم ليه

اولا انا بسمع كلمه انتي متخلفه دي كتير ليه بقى؟؟؟؟؟
بسمعها لما اقول رايي في عمل المرأه لاني ضدد عمل المرأه لان دلوقتي انا خلصت الكليه وقاعده مابضورش على شغل ولا حتى عندي النيه اني اشتغل الكل بقى بيقولي انتي متخلفه ومال دخلتي كليه قمه وحاسبات ليه علشان تعدي في البيت كنتي بقى ادخلي اي كليه وخلاص وبعدين لازم تعملي نفسك وتعملي قيمه وشخصيه و ووووو حاجات كتيره كده

لكن انا رايي ان انا الحمد لله مش محتاجه للشغل يبقى اشتغل ليه واتعب نفسي ليه وبعدين انا في رايي دخلت كليه قمه مش بقصد الشغل لا ده علشاني انا وعلشان ولادي وبيتي ما لو كده بقى ماكان الاريح ماتعلمش خالص ماشي انا مابقولش الي بيشتغلوا وعايزين يشتغلوا بطلوا بس دي وجهه نظري ان انا مادخلتش كليه قمه علشان الشغل لا انا دخلتها علشان نفسي اولا وبيتي وحياتي بعد كده افرض في يوم احتجت فعلا للشغل يبقى معايا مجال فعلا كويس واقدر اشتغل بيه كويس
لكن دلوقتي اشتغل ليه وبعدين في رايي شخصيتي مش بالشغل ومش هتكون في الشغل اه الشغل بيدي خبره في التعامل مع الناس انا ماقدرش انكر ده بس مش هو الاساس ولو من غيره هبقى بقى من غير شخصيه و سلبيه
وبعدين الحمد لله ربنا خلقني بنت لا عليا بقى مصاريف ولا لازم عليا اجيب فلوس وانا في بيت بابا هو يصرف عليا ولما اجوز جوزي يصرف ابهدل نفسي في المواصلات والصحيان بدري والزعيق وكل ده ليييييييييييه؟ انا مش عايزه اشتغل وربنا مايحوجني للشغل


ملحوظه: انا كاتبه البوست ده من زهقي من الناس واصحابي الي بيقولولي اشتغلي دوري على شغل ومال انتي تعبتي 4 سنين في حاسبات ليه كنتي دخلتي اي حاجه اسهل ده ردي عليكم

هناك 35 تعليقًا:

من غير عنـــوان يقول...

طبعا الشغل مش بس عشان الفلوس
ولا المجتمع ولا عشان بنتعب في الجامعه

دي مسألة كيان

اتمنى تشريفك لمدونتي المتواضعه... يمكن تلاقي رد على حاجات كتير

أحــوال الهـوي يقول...

لكل انسان و جهة نظره و رايه في الحياة و ما ينفع شخص ليس من الملزم ان يليق بالاخر
و هناك شباب كثيرون يفضلون الا تعمل زوجاتهم ماداموا قادرين علي نفقة و اعالة زويهم
الاعتراض الوحيد قولك (اشتغل ليه واتعب نفسي ليه )الحياة كلها تعب و هل تعتبرين اختيارك برعاية زوجك و اولادك راحة ؟
افعلي ما تريه مناسبا لحياتك وفقك الله و سدد خطاك

تحياتي

Geo Amr يقول...

الحمدلله انى لسه فى بنات ليها الراى دة انا موافق على كل كلمة فى البوست واؤيدك بشدة جداااااااااااااا اول حاجة انتى دخلتى الكلية قمة دة لنفسك وامنيتك تانى حاجة على علشان خاطر اولادك وبجد طالما المراة ليست محتاجة للعمل ليه تعمل وتترك اولادها ياجماعة والله والله مسئوليه المراة فى بيتاها دى مسئولية كبيرة جداااااااااااااااااا ويمكن تكون اكبر من مسئولية الرجل فى العمل لانها هى التى تربى جيل جديد واما ان يكون جيل صالح او يكون جيل فاسد يعنى هى التى تبنى وشكرا جدااااااا على موضوع البوست

الطائر الحزين يقول...

ما علاقة التعليم بالعمل؟؟؟!!!!!!!!

أؤيدك

لاتعمل الا اذا احتاجت او احتاجها العمل

قلم رصاص يقول...

السلام عليكم

إزايك يا حاسوباتيه عذرا مش متابع التد\وين بقالي فترة فلذلك مش متابع تدويناتك

بي انا ليا تعليق علي هذا البوست

أولا : انيت مش لازم تشتغلي علشان تجيبي فلوس زي ما بعض الناس بتعملي دلوقتي شغال من أجل الفلوس أي صار عبد المال

ولكن انت تشتغلي من أجل كيانك الشخصي ومن أجل لا تنسي ما تعلمتيه في الدراسة فمع الزمن من السهل جدا أن تنسي ما تعلمتيه لعدم المممارسة وخاصة لما تتزوجي فالمسئوليات الزةوجية تكثر وكل هذه عوامل تبعدك عن تخصصك

ثانياً : حلم .. حلم أي انسان انه يبقي حاجة كبيرة في المجتمع وانه يخدم المجتمع ويبقي له شخصيته ويثبت وجوده فعلا في المجتمع ممكن تبدأي شغل في شركة خاصة بعد كدة تبقي مسئولة كبيرة في الشركة ديت شوية شوية تفتحي شركة صغيلارة لواحدك شوية شوية تكبر كل دة حلم ومستقبل محتاج جهد وتنظيم مش أكتر

ثالثاً : إذا كل بنت أو ولد ترك مجاله إذا لهم حق الأوروبيون أن يسبقونا وانهم يقولوا علينا دول متخلفة اذا كان المتخصصين بتوعنا بيبعدوا عن العمل وبيتركوا مجالاتهم

رابعاً: اذا كنتي انسانة منظمة وناجحة في عملك فكل هذا يساعدك علي تربية أبنائك لا أبداً سيضيعك عن الاهتمام بهم بل العكس فكل ما كان الانسان منظم ومرتب وناجح في شئء فمن الصعب ان يكون فاشل في ناحية أخري بل العكس سيكون ناجحا دائما باستمرار

وفي الأخر ديت وجهة نظر

Mony يقول...

نفس رأي و الله

حتي انا قلت لزوجي في اول الزواج

انا واحدة مش بتاعة شغل و لا بهدلة

انما لو قررت اني هشتغل يبقي ده لازم يكون اني انا محتاجة فلوس بس


انا برضه الناس قالبه دماغي بالموضوع ده


ربنا يخليلي زوجي و هو اللي يصرف علي

و يرزقك بالزوج الصالح اللي يقر عينك و مايبخلش عليكي بأي حاجة ابدا

دعـاء عـلى يقول...

ما دام انتى عايزه كده يبقى براحتك طبعا ... ما هو مش دستور يعنى اللى يخلص لازم يشتغل ...
بس ده أنا بقول امتى أخلص و أشتغل ... حاسه انى هتسلى جامد لو اشتغلت فى المجال لانى بحبه جدا ... و على فكره أنا قصدى الشغل فى المجال عامه مش لازم شركه بعيده و مواصلات و زعيق و صحيان بدرى زى ما بتقولى (:
ممكن تدورى على حاجه تشتغليها من على جهازك فى البيت و انتى قاعده ملكه كده و اهو منها تسلى نفسك
بذمتك انتى مش هتطقى خلاص و لا انتى من اللى بيحبوا الفراغ ؟؟ (:

Eno يقول...

يااااااااااااااه

ده بجد وصف تقريبي لكل اللي جوايا
انا مش بحب الشغل ومش قولت كده غير بعد ماجربت يعني عن تجربه خضت فيها بكامل قوايا العقليه

بس حسيت اني مش قادره اتعامل مع اللي حواليا خاللص وسبته ولغيت الفكره دي من دماغي تمام وادركت اني شهدتي وعلامي ده لنفسي ولبيتي ولي اولادي فيما بعد

واجمل حاجه انك تاخدي القرار منك من
غير تأثير من اي حد

صوت من مصر يقول...

عارفه انا فعلا بحترم البنت الى بتشتغل لانها بتعبر عن كيانها
؟

مهرة سالم يقول...

الله عليكي ...
أنا فعلا زي ما كتبتي تمام ...
أنا أدرس بأي كليه أحب ..
وأتخرج...
وأجلس في المنزل أربي أبنائي..
إلي أنا مسؤوله عنهم ومحاسبه أمام الله...
...........
طبعا في ناس لسوء أحوالهم الماديه يحتاجون للشغل ...
وبالطبع لا أعترض على عملهم..
.......
بالنسبه لي المرأه تبدع في بيتها..
.........
دمتي بخير..

SemSem يقول...

اول زيارة لى فى المدونة
الكلام اللى بتقوليه عين العقل والله
وفيه مصلحة للجنسين
البنت لما متشتغلش
يبقى الولد يلاقى شغل
يبقى يقدر يتجوز
يبقى البنت تتجوز
يبقى اتفكت ازمة العنوسة اللى ف البلد
ياريت والله البنات كلها تعمل زيك كده
علشان نلاقى شغل بدل ماكل حاجه نقدم فيها نلاقى البنات فيها وفى الاخر يقولوا عنوسة
طيب ماانتوا السبب!!!!!!
اسف للازعاج جداااااا
تحياتى وباذن الله زيارتى دى مش الاخيرة

طارق هلال يقول...

'طيب أنا خريج زراعة وباشتغل فى المجال بتاع الانترنت وفى شركة متوسطة ومجالى فريد شوية فى اليونيكس ، وعلشان أحسن المستقبل بتاعى مش عارف لأنى مش خريج حاسبات ولا خريج هندسة اتصالات ..، ممكن تسلفينى شهادتك بما أنك مش محتاجاها؟؟

أنا رأيي أنك مش لازم يعنى تشتغلى فى شركة ولكن ممكن تعملى مشروع صغير ليكى يكون زى تسلية أو تقضية وقت ومنه برضه ما تنسيش اللى انتى اتعلمتيه
مشروع استضافة أو برمجة مواقع أو حتى دروس حاسوبية أون لاين

ابو على يقول...

واللهى عداكى العيب وقزح

دا رايك واكيد مدام بابا بيصرف عليكى ومشتكاش .... ربنا يرزقه من وسع
ومدام جوزك... ان شاء الله طبعا.... هايصرف عليكى ماهو اكيد مش هايحتاج لشغلك ... لازما يبقى ملياردير
طبعا عداكى العيب وقزح

وليه تتعبى يا بنتى بعد كليه الحاسبات والمعلومات
ما الكومبيوتر ف البيت وقضيها برامج سوفت ويير وهارد ويير وجيمز وشويه تشات مش عيب يعنى
وطبعا لما تتجوزى هتاخدى الكومبيوتر معاكى واكيد اكيد هاتشترى واحد لجوزك

ههههههههههههههه
هاتحطى واحد ف اصاله وواحد على باب الشقه
وتراسلو بعض بقى على الكومبيوتر

حاسوباتيه: ( تسمع باب الشقه وهو بيزيق) انت جيت يا حبيبى
اللى طالع عينه: ( والعرق يتصبب من وجهه على الكيبورد) انتى لسه قاعده على الزفت دا ماتقومى بقى تشوفلنا حاجه ناكلها

حاسوباتيه: ( وهيا تسرع بالكرسى الالكترونى ابو عجل على المطبخ) حاضر يا حبيبى

هيع هيع

romansy يقول...

جميل قوى روحك الاسريه عجبنى كلامك انك دخلتى كليه قمه علشان اولادك القادمين
وكمان فيه ازواج مش بيحبوا ان زوجاتهم تشتغل لانهم بيكونوا بيحبوهم قوى وبيخافوا عليهم قوى
وكمان انا بحب الزوجه اللى هى ليه بس

Unknown يقول...

بصى مع انى مختلفة مع رايك تماما لكن فى نفس الوقت مقدرش افرضه عليكى كل واحد حر يعمل اللى هو عايزه ومش من حق حد يحدد لك اولوياتك الحياة وجهات نظر

3omda يقول...

"تشتغلي من أجل كيانك الشخصي" أكتر جمله بكرهها مع اني مش ضد عمل المرأه،بس انا من وجهة نظري الشخصيه،أن المرأه تشتغل لاحد السببين
-ان هي محتاجه للشغل. او
-ان الشغل محتاجها. تخصص يفيد النساء الاخريات ويرفع عنهم الحرج مثل"طبيبه النساء"
ممكن أعرف ليه البنت او الست تحب تتبهدل في المواصلات ومديرها في الشغل يعكنن عليها فبدورها تعكنن علي زوجها.أو هي نفسها تقوم بالدورين معاً الدور الاول خارج المنزل "بحثاً عن الرزق".
والدور الثاني داخل المنزل رعايه زوجها وأطفالها
---يعني ربنا وزع الادوار وهي مش عاجبها وعايزه تأخد الدورين.

شمس النهار يقول...

انت طبعا حره
ليه همه بيضغطوا عليكي
مادام انت مقتنعه بده
خلاص
وعلي فكره كليتك تخصص ممكن تعملي حاجات من البيت
بس عشان تكوني اب ديت
عشان تخصصك الزمن فيه بيجري
والتقنيه بتتغير كل شويه
من باب الحفاظ علي المعلومه
ربنا يوفقك لزوج يصونك ويحفظك

مصطفى محمود يقول...

ما شاء الله عليك

نادر لما تلاقي ست مش متأثرة بالمجلس القومي للمرأة الميمون .

عموما يا أختي الدنيا ابسط من كده
العمل دا غرضه هو تكسب قوت اليوم والعيش عيشة كريمة .
عشان كده هو مكلف به الرجل
مادام الرجل يقدم ما عليه وليس هناك داعي لعمل المرأة فإن من الأدعى أن تتفرغ المرأة لعملها في مصنع المجتمع .
آه
مش الست هي المصنع والمدرسة اللي بتقدم للمجتمع ناس ياصالحين يا طالحين ؟

واحد كبير قالي من زمان لما تيجي تتجوز ياحبيبي -إذا كنت هتتجوز يعني- اختار الست الصح
عشان دي هي اللي هتقعد مع ولادك طول النهار وانت بره .
لو خايف عليهم وعايز مصلحتهم يبقى اختار اللي تطلعهم زي مانت عايز

مش كده


بحييك على رزانة عقلك .
مهو عيبنا إننا بنركب الموجة وخلاص .
عصر التطور بقى

سلام :)

مصطفى محمود يقول...

آه صحيح
معلش

بس عايز أقول إنك مش متخلفة ولا حاجة :D
لأ والله ست العاقلين .

المتخلف هو اللي مبيوزنش الامور بعقله :)
اللهم عافنا

Foxology يقول...

والله موضوع الشغل من عدمه يرجع للأنسان صاحب الموضوع اللى هو انتى

وكلامك منطقى فى نقطة ان التعليم علشان انفع نفسى وبيتى وولادى كلامك صح مفيش شك فيه فعلا

ربنا يوفقك فى حياتك :)

hager يقول...

انا معاكي في حاجه ومش معاكي في حاجه
معاكي ان البيت والاولاد المفروض ليهم الاولويه عن الشغل
ومش معاكي في انك رافضه فكره الشغل بتاتا ومش معاكي برده في انك تبعدي عن المجال
ليــــــــــــه ؟؟
اولاا تقدري تشتغلي وانتي في البيت انتي كل اللي محتاجاه جهاز كومبيوتر ووصله نت وانا اعرف ناس بتشتغل بالطريقه دي
ثانياا اذا بعدتي عن المجال ولا قدر الله احتجتي الشغل في يوم من الايام صعب ترجعي لان في مجالنا في تطور كل دقيقه ده حتي الواحد مش لاقي وقت عشاان يعد يتعلم كل حاجه عاوزها

وسوري علي الاطاله
تقبلي مروري

blue-wave يقول...

مش عارف ليه مش متفق معاكى فى الموضوع دا
مع انى انا كمان نفسى مراتى تاخد بالها من بيتها ومنى لكن بقول ان الشغل برضه احساس بالكيان والشخصيه
وكمان علشان تساعدى جوزك فى الحياة ولا مش ناويه؟؟؟

mohra يقول...

لا انتى مش متخلفه و لا حاجه و عيب جدا ان احنا نهاجم الناس و نشتمها لانها تخالفنا فى الرأى
من حقك انك ما تشتغليش طبعا
انا بيجلى الشعور ده احيانا لكن كلمه صغيره لكى لو مش ناويه تشتغلى ما كنتيش دخلتى حاسبات مش لانها كليه قمه لكن لانها كليه عمليه و انتى كده اخدت مكان انسان ممكن يصرف على اسره لو كان دخلها
و فى النهايه الشغل له مزايا اخرى غير ماديه و ايضا له مساؤى و فى النهايه انتى حره تماما و مش متخلفه و لا حاجه

غير معرف يقول...

موافقك في رأيك بس الحياة مع الايام والراحة في البيت بتخنق \\بس لي وجهة نظر ممكن تشتغللي بطريقتك

ممكن تعمللي برامج وانتي في البيت

وتبيعي تسويق الكتروني ممثلا

وممكن برضو تحاوللي تعمللي شركة او حاجة صغيرة ويساعدك جوزك او باباكي مثلا

وممكن تكوني ام مثالية وتذاكري لاولادك وتهتمب بجوزك وتدي الاولاد دروس في البيت بدل ما يطلعو بري


فعلا الفلوس مش كل حاجة

بس الخوف من الملل من المنزل زي \

يبتدي وزنك يزيد
تبتدي تهمللي في نفسك \

عموما انا رغم كل دا موافقك لان بعتبر ماما ام مثالية وعمرها لاشتغلت ولا احزنون

تحياتي

المـــفـــــــقــــــــوعـــــة مــرارتـهــا يقول...

السلام عليكم
بصي انا قلت كدة اول مااتجوزت
اشتغل ليه واتبهدل ليه وقعدت ودلوقتي بأدور علي شغل عشان زهقت من قعدة البيت لكن كل الشغل بيحتاج للخريجين الجداد
مش فاهمة ليه
المهم ان تعليمي ده فايد اولادي كتيييير
الشغل بينفع في حالة تأخر سن الجواز اللي منتشر دلوقتي بين الشباب والبنات خصوصا لان البنت اللي بتلاقي نفسها اتأخرت عن الجواز مش معقولة تقعد تحط ايديها علي خدها وتستني وإلا هاتتجنن
ورغم رأيي ده بس انا شايفة انه لو كل الستات قعدوا في البيت الرجالة هاتلاقي شغل وتشتغل وتفتح بيوت وتتجوز
عموما ربنا يعمل لك الصالح ويفيدك بعلمك حتي لو لأولادك ان شاء الله
تحياتي

فشكووول يقول...

الحاسوباتيه العسل .. تحيات عمك فشكول
احيى فيك روحك الحلوه ورجاحة عقلك ورقة احساسك ونعومة كلمتك مع انك حاسوباتيه وانا معاك فى كل اللى قولتيه - واللى بيشتغلوا برضه كويسين عشان ما يقولوش على رجعى .. يعنى دول كويسين ودول كويسين وقريت البوست القديم بتاعك ما كنتش اعرف .. حلو من مخ حاسوباتى هنيئا له بك .. ويحقق ربنا احلامك

رؤية يقول...

دى وجهات نظر واختلاف ميول...
رايك يحترم
وراى غيرك كذلك

ولا يملك احد ان يتهم الاخر بالتخلف
طالما رايه مبنى على اسباب تحترم

وانت اسبابك تحترم كثيرا

تحياتى لك.

mahasen saber يقول...

الشغل بالنسبه للست شئ مهم بس يمكن الاستغناء عنه لو الست عندها التزامات وواجبات تجاه اولادها وزوجها ولو الست مش قادره تنسق بين شغلها وبين بيتها
فعليه بيتها وجوزها وولادها اهم

اما لو الامور مستقره يبقى اثبات الذات نعمه وفضل

اقصوصه يقول...

انا معاج فعلا

البنت مش مطلوب منها تشتغل

لو فكرتي تشتغلين ممكن يكون لملا الفراغ

او لسدحاجه ماديه

اما لو انتي ما عندج مشكله بالاثنين

فليش تشتغلين يعني؟

رئـــــيسـة حزب الأحلام يقول...

كل واحد حر
يعنى انتى عايزة تعدى فى البيت فانتى حرة ولكى كامل الحرية تعدى تخرجى للشغل انت حرة
تحياتى لكى ياقمر
الادارة العامة لحزب الاحلام

emey يقول...

اْنا راى اْن شغل المراة تعب ليها لسة هتشتغل وتروح تكمل شغل البيت وتربى الاولاد وتشوف راحة جوزها على دة كلة هتموت مش هتكمل اْسبوع ولوعاشت هتبقا علطول تعبانة مرضانة صدمانة تسمعيش كلا حد اعملى اللى فى دماغك لما انتى ش محتاجة لفلوس ومبسوطة مادية الست هما عملت لبتها وعيالها وجوزها

د.محمد ربيع هاشم يقول...

مدونتك جميلة جدا
سعدتُ كثيرا بالمرور عليها
أدعوك لزيارة منتداي على هذا الرابط والتسجيل به لو أعجبك بعد تصفحك له
http://poems.mam9.com/portal.htm

نوسه وريمان فى هاكونا مطاطا يقول...

السلام عليكم

ازيك يا قمر

انتى كنتى زورتى مدونتى " ملائكيه"

وكنت سعيده جدا بزيارتك وقولت لازم اجى ازورك

ما دام انتى مش محتاجه للشغل يبقى خلاص
مش مشكله

بس لان فعلا زى ما انتى قولتى انك مش مطالبه بمصاريف او اى شىء

وربنا كده يرزقك بالزوج الصالح ان شاء الله

واللى يقولك اشتغلى وانتى قاعده كده ليه قولى انا كده مرتاحه وكل واحد ادرى براحته وعارف اللى يريحه ايه
مع تحياتى

ريمان

أسامة وغيداء يقول...

غريبة إنك مافكرتي تشتغلي أنا مع إني من عائلة ميسورة الحال جدا وماني بحاجة للوظيفة أبدا ومو ناقصني أي شيء من الناحية المادية وعندي كل شيء وجميع وسائل الترفيه من محمول لجوال لدي في دي لتلفزيون وقنوات فضائية لنادي وصديقات وطلعات ومع هذا ما أفكر إني أقعد بالبيت الوظيفة بنظري استقلالية وتداخل مع الناس والاحتكاك بالعالم الخارجي وتكوين الذات ولو مالقيت وظيفة بأتوظف ع الأقل بأي عمل خيري أو جمعية خيرية لكن أكون فقط ربة بيت مستحيل يمكن اختلاف وجهات نظر لكن الوظيفة بالنسبة لي احتياج نفسي مو احتياج مادي لأني ماديا ولله الحمد مومحتاجة الراتب لكن نفسيا محتاجة الوظيفة والإحساس بأني فعالة في المجتمع وتحقيق نفسي .

غيــداء

mahasen saber يقول...

العمل عباده
ده راى واحده صاحبتى فى الشغل لما كنت بكلمها فى موضوع البوست بتاعك
هههههههه
بس رايها صح