27‏/11‏/2008

من يوميات هو وهي


المكان: كافيه على النيل
الزمان: في يوم من الايام الساعه 9 بليل

الموجودين: هو وهي بيتناقشوا

هو: وحشتيني يا حبيبتي عامله ايه

هي: الحمد لله يا حبيبي كويسه قولي شغلك عامل ايه؟

هو: الحمد لله كويس

يرن موبايل هو .........

هو: ياه دي هاله معلش يا حبيبتي هرد علشان في شغل مهم

هي: طيب رد بس مش تعد تكلم كتير معاها يعني قولها اني معاك

هو: ايوه يا هاله خلصتي الورق الي قولتك عليه لو ماخلصش بكره بصي مش عارف ممكن اعمل فيكي ايه ماشي
يسكت لان هاله بتكلمه
هو: ماشي يا هاله المهم خلصيه علشان يدخل بكره يلا سلام يا باشا

هي: هتعمل فيها ايه بقى لو مش عملت الشغل وازاى تقولها كده اصلا وازاى تقولها يا باشا

هو: طيب فيها ايه بس هو انا قولت ايه

هي: مايصحش تقولها يا باشا وبعدين لازم يكون في بينكم حدود مش تعدوا تهزروا وتضحكوا سوا كده عادي على الاقل علشاني مش انا خطيبتك

هو: دي غيره بقى

هي: لا مش غيره انا بس مضايقه انك بتكلمها كده انا عارفه انها زميلتك وبس بس كمان مابحبش تعاملاتك معاها تكون كده لاتهزروا سوا ولا حاجه

هو: دلوقتي انا ماهزرتش انا بعاملها زي واحد صاحبي ثانيا عادي يعني انا مش شايف حصل حاجه يعني هفضل اعاملها رسمي انا بتخنق من كده

هي: معلش اتخنق على الاقل ده احترام ليا انك خاطب مش كفايه ان عندك سكرتيره

هو: انتي عارفه ان انا شغلي كتير ومقابلاتي مع الناس كتير وكنت محتاج حد ينظم كل ده وبعدين الشغل الي جابوهالي مش انا روحت جبتها

هي: عندك 23 سنه لحقت تنسى مواعيدك ومقابلاتك مع الناس ومال لما يكن عندك 50 سنه هتنساني بقى

هو: حبيبتي انتي عارفه انا بحبك قد ايه بلاش كده بقى احنا اكلمنا في المواضيع دي 100 مره وانا قللت كل هزاري وكلامي معاهم علشانك بس اني اتعامل رسمي قوي كده طول الوقت كده هتخنق انا بقى كفايه اصلا شغلي عليا مش هفضل رسمي ومخنوق طول اليوم


وكالعاده يستمر النقاش هي عارفه هو بيحبها قد ايه لكن بتقلق من زميلاته خصوصا انها عارفه هما قد ايه بنات على سنجه مليون مش عشره بس ونفسها يتعامل معاهم رسمي وهو رافض ياترى ايه رايكم

هناك 36 تعليقًا:

الـسـيـدة نـون يقول...

فيه حاجة كدة قى زميلات العمل بتخلى الراجل بيحب يهرج معاهم ويشيل الكلفة بينه وبينهم

هو ممكن يكون بيحب خطيبته جدا

بس هو بيكون عايز برضه يكون ظريف وخفيف الدم مع زميلاته

وبحس ان فى النقطة دى الرك على البنت
يعنى لو الواحدة من دول تروح شغلها علشان شغلها وبس
ولو حد فكر انه يهرج معاها توقفه عند حده
كانت الحياة تبقى حلوة

انا شايفة ان هى متقلقش
لان هو كان بيتكلم قدامها عادى

امتى بقى هى تخاف؟
لما تحس ان هو بيتكلم بطريقة مريبة قدامها زى مايكون خايف ان كلمة كدة ولا كدة تقع منه قدامها
ساعتها هى لازم تخاف لان معنى كدة ان الموضوع اكبر من زمالة وان فيه حاجة غلط بتحصل من وراها

او لما تحس ان هو بيحشر اسم زميلته فى الشغل فى كل مناسبة ومن غير مناسبة
معنى كدة ان زميلة الشغل دى واخدة حيز كبير من تفكيره ما يصحش انها تاخده

فساعتها لازم يكون ليهم هنا وقفة هما الاتنين

بس الموقف المكتوب فى البوست انا شايفاه عادى
بيحصل كتير جدا
والرجالة مش بيكونوا قصدهم حاجة

بس هماعلى فكرة بيكون عندهم ازدواجية
يعنى هى لو قالتله انا هاشتغل هيرفض
ويقولها تشتغلى بقى ويبقى فيه بينك وبين زمايلك هزار وههيئ ومهيئ
لا ماتشتغليش ابدا
تقوله اشمعنى انت بتهزر مع زميلاتك
يقولها انا عارف نفسى
لكن معرفش غيرى بيكون بيفكر ازاى

يعنى هو حلال عليه انه يهرج مع زميلته
لكن مش عايز خطيبته او مراته تشتغل علشان مش عايز زميلها فى الشغل يهرج معاها زى ماهو بيهرج مع زميلاته


انا هاتابع معاكى التعليقات لانى عايزة اعرف راى الاخوة الرجل فى الموضوع ده


سلام
اختك خيخة

غير معرف يقول...

والله انا رأي مع خيخة

عموما هو ممكن يكون بيلاقي في بنت تانية اضافة لعالمه النسائي

وهي شايفه ان هو انسان كويس
ممكن خاطب او متجوز لكن ممكن يخطب ويجوز

عموما ازدوجية الرجال مش حقيقية اوي

هو لو بيحب بيغير اوي
علشان كدا فعلا
مشعايزها تشتغل
ومش عايزها تكلم حد في التليفون
ومش عايزها حتي تروح افراح قرايبها

بيحاول يقيد حريتها علشان بيحبها وبيخاف عليها

في النهاية مناقشات وخناقات

وبعد الجواز بكام شهر مش فاض حتي يقعد معاها لانه اصاب بحالة امتلاك لتلك المرأة فبيدور علي السكرتيرة


كان في دراسة قريتها من فترة ان كل رجال الاعمال والمحامين
بنسبة 80 % اتجوزو سكرتيراتهم خاصة للحفظ علي اسرار العمل
((طبعا قلبك وقف ))

عموما انا شايف كمان ان الراجل بجد بيكون محور تفكير البنت يعني هي اللي بتعاملوا بطريقة معينة

تخليه يعاملها بنفس الشيء

اما الصح الانسان يركز في شغلو وبس



وبصراحة 9 بالليل مش وقت تليفونات خالص لان مواعيد العمل انتهت بالفعل

المفروض مش تتصل ولكن دي تلاكيك بنات

عموما انتي عمرك ماتقدري تحكمي علي تصرفات حد بتحبيه علشان الخناقات دايما بترجع للاسباب التافهة الا وهي

انتي بتغيري علي

لا عادي دي صاحبتي

هو في حقيقة عايز اقولها

الرجال الشرقيين

من كانو قبل الارتباط الرسمي متعددي علاقات يستمرو في علاقاتهم فترة كبيرة تحت مسميات مختلفة

ممكن تتأكدي من كدا من عدد ساعات مكالماتو في الموبايل

الرسايل وخاصة المرسلة

ممكن تكوني زكية وبلاش خناقات علي الفاضي والمليان لانه في الحالتين عنده جملة واحدة انتي عارفه انا بحبك قد ايه بلاش تبصي لد او لدي

والباقي انتي بتسمعيه كل يوم

وبفتكر هنا دايما دور هاني رمزي في فيلم السلم والثعبان

اتمني مش اكون طولت
واكون ضفت لمعلوماتك

Foxology يقول...

هههههههههههههههههههههه

هما كل البنات المخطوبات كدة ولا ايه ؟؟؟ :)

فتش عن المرأة فعلا

من واقع تجربتى الشخصية احب اقولك بجد طالما واثقة فيه ومتأكدة منه يبقى خلاص اه ده غصب عنك وده فى الحقيقة غيرة مهما كانت شكلها الخارجى الا انها برضه من جواها غيرة .. لكن برضه ظروف الشغل بتخللى الواحد مننا غصب عنه يتخلى شوية عن الرسميات خصوصا لو مكان الشغل الكل نفس السن تقريبا وده بجد عن تجربة لكن ده مش معناه انى فى الشغل بروح اضحك واهزر طول اليوم لا طبعا الضحك على حاجات معينة وبحدود علشان انا بحترم خطيبتى وزوجتى فى غيابها قبل وجودها :)

تحياتى وربنا يكملكم على خير :)

غير معرف يقول...

السلام عليكم
الصراحه كلمه مستفزه
ايه يا باشا دي
قد تكون بحسن نيه
بس لازم يراعى وجودك
و ف غيابك
انا مش معاه الصراحه
و لازم ليكى وقفه معاه
ادبحى القطه
و العين الحمرا
و....
كفايه كده لتقلب بغم
طيب اديله فرصه كمان و ما يكررهاش ادامك ابدا
و بعدين كويس انه اكلم قدامك و عرفك انها زميلته
هو
بس بيختبر مشاعرك و هايشوفك هاتتصرفى ازاى و انتى احسنت التصرف و حددتى موقفك

Ehab يقول...

يا سلام
هو ليه بتقيسوا بمكيالين
لو الست وقفت عند البياعين تلاقيها واقفه تفاصل وتضحك وتتكلم
وممكن البياع يحكي معاها ويرغي وهي تقولك عادي
انما جوزها يضحك مع حد في الشغل تبقى جريمتة مهببه

انا عارف ان الهزار مش صح وان بعض الزميلات اصلا بتبقى عارفه ان الكلام ليه معاني اخرى والهزار مش بغرض شريف وبيبقى برده حلو وتديله سكك علشان يقرب اكتر
بس مش كلهم بالصوره الفزيعه دي
وفي النهايه لازم يكون عندك حاجتين مهمين جدا
1- ثقه في نفسك
2- ثقه في جوزك

سلااااااااااااااااااااااااام

رئـــــيسـة حزب الأحلام يقول...

انا رائ انها ماتغرش لانة لو كان عاوز يتزوج واحدة من الشغل كان عمل من قبل مايشوفها لكن قلبه اختار وكمان فى الشغل بيتهيألى بيبقى فى حدود وتسيبه لضميره بس انا بينى وبينك مابحبش التهريج يعنى باخدها رسمى اوى ومابحبش ارفع الكلفة مع ان فى ناس شايلينها كتير
تحياتى لكى ياقمر

Mona Shereif يقول...

بصى يا قمر
انا عايزاكى متكبريش المواضيع على الفاضى اوك؟
ومتحاوليش تعكننى وتلومى كتير المفروض انه يلاقى الراحه معاكى انتى- على فكره انا بقول الكلام ده لنفسى-
جايز انا مكنتش فى موقف زى موقفك ومعرفش احساسك ساعتها بس لازم تعرفى حاجه واحده هو ان موقف المرأه " موقف التلطيف"
احنا اتخلقنا علشان كده
شكرا على سؤالك يا جميل تسلميلى
انى ما زلت اتنفس الحمد لله
ربنا يبارك لكم يارب ويجمعكم على خير ان شاء الله وانا كمااااااااااااان

Eno يقول...

السلام عليكم

ازيك ياحاسوباتيه الموقف قريب اوي مني
الله يسامحها الغيره بأه

بس انا عاجبني رئي مني ( ساعات ساعات ) وبصراحه انا بحاول ابقي كده وبحاول اسيطر علي غيرتي عشان الشئ اللي يزيد عن حده يتقلب لضده خلي بالك :)

متشكره اوي لسؤالك عليه بجد :)
تحياتي :)

غير معرف يقول...

هو دة الراجل
مهما اتغير

المستنصر بالله يقول...

شوفى هو احساس الغيره مش بايديها دة طبيعى بس طالما اتكلم قدامها عادى يبقى مش تخاف ولا تقلق الخوف من اللى بيخبى يبقى فيه حاجه غلط

تحياتى لحضرتك

mahasen saber يقول...

شوفى بئه يا جميله الراجل فى الغالب يحب موت انه يكلم ستات الدنيا
سواء معرفه شخصيه او اجتماعيه او زمالة عمل او دراسه
انما تجرب الست تعرف زميلها وتكلمه قدامه
طبيعى هيكيل الامور بمكيلين
ويهد الكافيه فوق دماغها ودماغ اليى فيه

basma saghir يقول...

بصي بقى ياستي
المفروض متعملش كدة..عايزاها تبقى هادية وراسية وتقيييييييييلة...واهم من ده وده تبقى واثقة من نفسها جدا
وتفتكر انه بيحبها..وبيحبها قوي كمان
ها...

تثق في نفسها وفيه..صدقيني حبة ثقة صغيرين هيحلوا الاشكال الفظيع ده :)

أنا يقول...

إيه التربيسة ديه ؟؟؟ده كده حتخنق عليه عالفكرة و حيفرقعها
بس تعرفى لو كانوا هما الاتنين متفقين على حاجة و احدة و بتمشى عليهم هما الاتنين مفيش مشاكل
يعنى لو أتفقوا هما الاتنين يكلموا الجنس التانى فى نصاق رسمى جدا و راضيين بكده فده مش غلط ..

Ahmed يقول...

الهزار مع بنات في الشغل كده أمر طبيعي في ظروف الشغل

بس كل واحد ونيته

صوت من مصر يقول...

عارفه احلى حاجه انى شغال فى مكان مفهوش اى بنت او ست كلهم رجاله لانه مشروع بيتبنى
تانى حاجه هو غنى جدا عشان يكون عنده سكرتاريه ولسه خاطب الى بيحبها ؟
بس لذيذه

أسامة وغيداء يقول...

بوست جميل جدا , وأعجبني كثيرا

مصطفى محمود يقول...

السلام عليكم ورحمة الله وبركاته

أنا هقول رأيي في عجالة مع العلم إني مجربتش الوضع دا بس دي مشاهدات فقط.

أولا هي لازم تكون واثقة من نفسها أكتر
ثانيا الستات عموما بيتعاملوا مع الرجالة بمبدأ الامتلاك ,, وهو ما يرفضه الرجل وبيتخنق منه.

ثالثا الراجل لو مراته مالية عينه يستحيل هيبص لأي واحدة أيا كانت.
الجمال مش كل حاجة

بس كده

سلام :)

قلم رصاص يقول...

والله اولا لازم هي تكون واثقه جدا من نفسها لسبب بسيط جدا .. انه لو علاقته بزميلته دي ابعد من كونها زماله فقط .. ما كانش استمر معاها هي لحد دلوقتي..وكان لاف على زميلته


والله اعلم

تقبلي تحياتي ومروري الاول

حاجات جوايا يقول...

بصى انا ليا وجهة نظر ممكن أوووى يختلف معاها الكتير
بس انا شايفة انها صح
اعتقد ان الرجال مش هيتصلح حالهم الا لما الستات يقعدوا فى البيت

لان اى اتنين زمايل فى العمل ممكن أوووووووى تتطور العلاقة بينهم بحكم التعود والظهور فى افضل صورة وتزيين الشيطان .. ده من وجهة النظر البريئة

وممكن أوى كل واحد فيهم يحاول يوقع التانى من تحت لتحت عشان يثبت لنفسه انه جذاب .. وده من وجهة النظر الشريرة

فمقدرش بقى اقولك المفروض ( هى ) تغير على ( هو ) ولا متغيرش
لان مش معنى ان مفيش بينهم حاجة دلوقت غير مجرد زمالة .. انهم هيفضلوا كده على طوووول

مفيش حاجة مضمونة فى الحاجات دى

طولت عليكى يا جميل

يللا سلام
سالى

طوبه فضه وطوبه دهب يقول...

حبيبتى جميل اسلوبك وحقا ارى ان الغيره هى اجمل مافى الحب لاتدل على انتقاص الشخصيه انما هى تكمل الشخصيه وتجملها حتى لو كانت كلها ثقه فيه وكله ثقه فيها الا ان هذه الغيره تشعر كل منهما ان الطرف الاخر مهتم به ومازال يهمه شئونه وقد لاترى تلك الغيره فى الكلام او الاسلوب انما قد تلمسيها فى نظره العين او فى تصرف معين وهذا اسمى معانى الحب تحياتى حبيبتى على اسلوبك الجميل

مهرة سالم يقول...

ههههههه
سيستمر الحال على ما هو عليه
حتى لوتعامل مع زميلاته بكل رسميه..
.......
دمتي بخير..

اقصوصه يقول...

في رايي الشخصي

لازم يكون في حدود معينه للتعامل

بين اي اثنين

سواء فالجامعه او فالوظيفه او في اي مكان

لكن هالموضوع بالنهايه يتخلف

لان كل شخص له اسلوبه

وشخصيته الخاصه فيه :)

mohamed talaat يقول...

كفاية خناقات بقى...هو بيقولها يا باشا..و بيقولك يا حبيبتي..متهيألي في فرق واضح...
و ارجوكي..سيبي الراجل في حاله..بجد مش ناقص

أحــوال الهـوي يقول...

ده كله علشان يا باشا امال لو قال ياجميل كانت عملت ايه
ده لقب عادي يا باشا و تقال للسواق و الدكتور و الزبال
القصة دي حقيقيه و بتحصل دايما لو انا اتصلت بالسكرتيرة و قلت لها علي الشغل و شكرتها في الاخر او قلت تسلم ايدك من باب المجامله ... تتعلق المشانق و لنت خفيف الدم اهو و بتعرف تقول كلام حلو
وان يوم غلست علي السكرتيرة في الرد تطلع مراتي تقول انت اصلك جبار مفتري معايا و مع الناس
يعني كده مش خالص كده مش خالص
انتم عايزين ايه؟؟؟؟

تحياتي

mohra يقول...

اظن المشكله فى الشخصيه ...مافيش فى الموضوع بيحبهم و لا لا...هو اتعود على التعامل بالشكل ده
ده اسلوب مش مقبول فى نظرى سواء كان خاطب او لا لكن الحقيقه باشوفه طوووووووووول الوقت
و فى الغالب بيدينى انطباع مش و لابد عن الشخصيه..بس احيانا بيكونوا ولاد حلال و الله

Aиgel يقول...


غاليتي حاسوباتيه

أنا عندي رأي وصدقيني ده ناجح بنسبة كبيرة
سواء كانت خطيبته حبيبته زوجته

طبعاً حواء لابد لها من الغيرة وإلا فإنها لا تحب آدم

بس في شروط وأسرار في الغيرة
أولاً شيء متكونش غيرة مفرطة من كل شيء
ثانياً ياريت تكون غيرة بدلع مش غيرة شك وظن
ثالثاً وده الأهم أنها تكون واثقة في نفسها.. يعني مش كل ما تغير تبين غيرتها وكمان مش هقولك تشوف هما فيهم إيه وتعمل زيه .. لكن هقولك إنها تجدد دايماً من نفسهاً تجدد من أسلوب حوارهم ميبقاش كله رسمي ميبقاش كله هزار ميبقاش كله كلام عن الغيرة
تحاول تتعرف على زميلاته في الشغل لو مفيش مشكلة عن طريق حفلة بسيطة حفلة تعارف وتشوف بيتعاملوا ازاي ويمكن هي تكون صدقات معاهم وبالتالي واحدة واحدة مش هتغير كل الغيرة دي لأنها هتكون على علم بخروجاتهم ونظراتهم وكده

في بقى حاجة حلوة اوي وهي أن في راجل بيحب اوي إن الإنسانه اللي مرتبط بيها تغير عليه عشان بتحسسه بثقة انه مقبول وفي حد بيغير عليه لكن مبيحبش غيرة الشك أبداً

لكن صدقيني في حركة لو عملتها هتكون في صالحها لأنه من كتر الغيرة مكن ينفر منها
وهي إنها لما يتكلم مع حد او عن حد تتكلم عادي معاه ومتبينش غيرتها وكأن الأمر عادي هيحس هو بده وهيحاول تخليها تغير وهي ولا تبين له
بعد كده هيحكي لها عن اسراره لوحده صدقيني هيبطل يهزر او هيخفف من ده
وهي بقى تغيير عليه بس زي ما قلت غيرة مش مفرطة وغيرة فيها دلع توضح عن الحب مش عن الشك

وأتمنى يكون رأيي مفيد
وأنا عن نفسي بعمله (:

أختك
Angel Love


غير معرف يقول...

المفروض الراجل يعمل حدود

بس المفروض بردو احنا منكبرش المواضيع
لازم يكون عندنا ثقه في نفسنا
انه مهما لف محدش يملي عينه غيرك
وكمان يكوةن عندك ثقه فيه
الغيره العمياء دي انا مش بحبها

بس دا ميمنعش ان موضوعك بجد جميل
بس عارفه
ساعات الراجل بيستفز الست عشان يحس انها بتغير عليه

دمتي بكل خير وود

تحياتي

أنا إللى أستاهل يقول...

والله هو ده دايــما مظلوم قبل الجواز بالشبكة والخطوبة والشقة والعفش والغيرة وبعد الجواز بالهم والنكد بأمانة هو ده ليه الجنة يا جدعان عشان بيسحمل هى

حاسوباتيه يقول...

شكرا لمل الناس الي علقت على البوست واستفد بجد من راي كل واحد فيكم وفعلا لازم اكون واثقه من نفسي اكتر وبلاش الغيره الصعبه دي شكرا ليكم
تحياتي وشرفتوني

Kiara يقول...

وهي لو بتكلم زميلها هيقبل انها تهزر كدا وهو عارف انها بتحبه برده وتقوله متخليش الشغل خنقه برده

لازم يراعي مشاعرها طبعا وتراعي مشاعره

كل سنه وانتي طيبه ياقمر

kh يقول...

السلام عليكم ورحمه الله وبركاته

طبعا انا مع خطيبته فهى معها كل الحق طبعا ما ينفعش يهذر ويضحك مع السكرتيره بتاعته كده أكيد لازم يكون فيه حدود


وسلاااااااااااااااام

zainab يقول...

بجد والله البوست ده عسل قوى
وإنتى كمان عسل
الغيره دى حاجه صعبه

أحــوال الهـوي يقول...

السلام عليكم

كل عام وانتم , والاسرة بخير ..بمناسبة عيد الاضحى المبارك ..أعاده الله عليكم و علي المسلمين بالخير والبركات .


تحياتى

رؤية يقول...

عوامل كتيرة بتاثر فى الموضوع دا
من ضمنها...
الثقة المبادلة بين الطرفين
التمادى فى التصرفات مع الاخرين( الزملاء)
اسلوب التفكير
واشياء متعددة
لكن عموما
اى تصرف مبالغ فيه وخارج عن الحدود المقبولة وان توافرت حسن النية.... بيكون مرفوض

تحياتى لك

غير معرف يقول...

انا جايه بس اقولك
كوووووووووول سنه وانتي طيبه

♥▒▒♥▒▒♥▒▒♥▒▒♥▒▒♥▒▒♥▒▒♥▒▒♥▒▒♥▒▒♥▒
▒♥▒▒♥kol Sana w antom Tayebeeeeeen♥▒▒♥▒▒♥▒▒♥▒▒
♥▒▒♥▒▒♥عـــــيــــد سـعـــيــــد ♥▒▒♥▒▒♥▒▒♥▒▒♥▒▒♥
▒▒♥▒▒♥▒▒♥▒▒♥▒▒♥▒▒♥▒▒♥▒▒♥▒▒♥▒▒♥

Unknown يقول...

ياريت جت معايا ع القلق بس والله ده بيتي اتخرب وسابتني وقلبت عليا الدنيا وبقيت خاين ومخادع وكداب عشان بأكلم بنات بصفة الزمالة وعشان بأكتب ع النت والبنات بتعلقلي يعني الحمد لله على كل حال صحيح أنا زعلان وهموت عليها بس بحق ربنا مظلمتهاش
معلش لو شغلتك بيا بس الحكاية دي جت على جرحي قوي قوي قوي
كل ودي
وكل عام وأنت بخير وصحة وسلامة وإلى الله أقرب