20‏/1‏/2009

حاله اكتئاب




تحديث:
شكرا ليكم كلكم ربنا يخليكم ليا يارب شكرا لاي حد علق واي حد سال عليا انا الحمد له بقيت احسن صحيح المشاكل ماخلصتش بس نوعا ما بقيت احسن الحمد لله وشكرا ليكم كلكم بجد شكرا ربنا يخليكم ليا
----------------------------------------------------------------------------------------------------------------------------

تعبانه قوي من كل حاجه عندي اكتئاب شديد ومزمن وهو ايه بقى في حياتنا مايجيبش اكتئاب افتح التلفزيون الاقي دم واموات واطفال ميته وناس بتتخانق مع بعض

افتح النت كلها اخبار تغم حتى انتم المدونين مافيش مدونه افتحها الا والاقيها كلها صور توجع القلب
او الي كاتب كلام كله حزن

مسكت الموبايل كلمت كل صحباتي مالقيت ياربي واحده فيهم عندها خبر حلو كلهم عندهم مشاكل مشاكل مشاكل

حتى انا عندي مشاكل كتير مشاكل مع هو ومشاكل تانيه برضو ماعرفش في ايه بجد انا تعبانه قوي وتعبت بجد من كتره الهموم باين ان سنه 2009 سنه باينه من اولها
الي عنده خبر حلو او نكته حتى يقولها ونبي خلينا ولو نبتسم بلاش نضحك

هناك 41 تعليقًا:

ستيتة يقول...

وانا يهون عليا تانمي مكتئبة
خدي اخر اخبار ستيتة
بفتح التلفزيون ياستي جت ايدي على النايل تي في
لقيت خير اللهم اجعله خير شاب "مجازا" بيقدم برامج المرأه
الواد شفته مرة قبل كده لابس بلوزة بخرز وترتر قلت خلي نيتك حسنة ياستيتة ياوحشة
يمكن تي شيرته اتحرق عند المكوجي ملقاش الا بلوزة مامي
النهارده يااوختي لابس بلوزة فوشيا
اه ورحمة جوز خالتي فوشيا عليها اسكيرف فوشيا في موف ورابطه زي ماجده في الحقيقة العارية
انا بتفرج عليه وانا بكلم نفسي "ياترى دي الحقيقة ولا العارية"
الواد بيرد ع التليفون بصوت وضحكة تشكك أي عنتر في نفسه وتخليه يروح للدكتور بتاع النوم في العسل ويقوله انت تمام يابني دي حااااااااالة عااااااااااااااامة
اضحكي ياقمر لحسن اعتزل وفي الليل بتيجي الهموم ع النوفوخ بس اول ما الشمس بتصحى والصبح بيتنفس بتصغر الهموم وربك بيكشفها كلها
استعيني بالله ولا تُعجزي ياباشمهندسة المصريين كلهم
بوسة وتحية وحضن كمان من ستوتة

Che يقول...

بصى عشان اكتئابك انا هاقولك نكته
بيقولك مرة بوش ( قبل ما يمشى ) و بلير ( قبل ما يمشى برضه ) و صاحبنا قاعدين بيلعبوا كوره .. المهم الكورة وقعت فى نهر كله تماسيح .. بوش نده واحد من المارينز و قاله انزل هات الكوره قاله لا انا عندى عيال و عايز اربيهم
بلير نده واحد من اسود الصحراء و قاله انزل هات الكورة .. قاله لا انا عندى عيال و عايز اربيهم
صاحبنا نده عشكرى امن مركزى و قاله انزل هات الكورة .. قام نط و هوب هوب جاب الكوره و طلع
سالوه لما طلع ماخفتش من التماسيح ليه ... قال عشان عندى عيال و عايز اربيهم

Mona Shereif يقول...

اشتغلت

غير معرف يقول...

عندى دكتور نفسانى خطير بقالى سبع سنين بتعالج عنده من الاكتئاب ده و لسه ماخفتش ممكن احجزلك عنده لو حبيتى
نكته مش كده هههههه

أحــوال الهـوي يقول...

سلامتك من الاكتئاب... و دي حاله مرت بينا كلنا
و ان شاء الله سوف تستمرالحياة و نرجع لحالتنا الطبيعيه تاني

و احلي حاجه النكت من اصحابنا
انا مش شاطر في النكت

بدوي تزوج بدوية كتب الخيمة بإسمها

فرخة اتجوزت فيل ..جابوا تـشكـِن فيليه

صاحب شركة كادليز دخل فى قضيه خرجوه بكافوله

مرة فار سكران على الاخر شافة قط جعان قعد يجرى وراة فعدت عربية بسرعة
فرمت القط.. والفار اغمى علية ولما فاق وشاف القط مفروم قال (يووة هو انا كل
ما اسكر اعملى مصيبة)

واحد سباك نفسه اتسدت غرقت الشقة

واحد صعيدى راح لواحد بياع تيليفزيونات بيسأله عندك تيليفزيونات ملونة البياع قال له ايوه راح الصعيدى قايله ادينى واحد أخضر
مرة ضابط مصري وضابط اسرائيلي دار بينهم هذا الحوارالاسرائيلي: الا قوللي يا انتم بتاكلوا ايه ع الفطار؟؟
المصري: فول بالزيت.
الاسرائيلي: طب بتاكلوا ايه ع الغدا؟؟؟
المصري: فول بالطماطم.
الاسرائيلي: أمال بتاكلوا ايه بقى ع العشا؟؟
المصري: فول بالبيض.
الاسرائيلي (بتريقة): أمال ايه الفرق بينكم وبين البهايم؟؟
المصري: سيناء

تلاته خرجوا في رحلة سفاري..واحد مصري والتاني صومالي والتالت أمريكاني..دخلوا كهف وناموا..وصحيوا بعد 300سنة!..كل واحد فيهم قام رجع بلدة..
الصومالي شغل الراديو سمع: (الصومال لن تتنازل أبدا عن حقها الشرعي والتاريخي في ولاية نيوجيرسي)
الأمريكي شغل الراديو سمع: (سيدافع الجيش الأمريكي عن البلاد لآخر جندي!)
المصري شغل الراديو سمع: (إخترناه..وبايعناه...وعشان كده احنا اخترناااااااااااااااااااه!)


تلاتة ركبوا طيارة ...واحد صعيدي و واحد فرنساوي و واحد امريكاني
جت المضيفة :"تشرب ايه يا فندم" رد الامريكاني قالها اشرب مانجة يا مانجا
و رد الافرنساوي اشرب فراولة يا فراولة
و رد الصعيدي اشرب لبن يا داموسة!!!!!!

مرة ممثل كبير جاله دور برد , رفضه !!

كفايه و الا عايزة تاني

تحياتي

lonely يقول...

خدى دى
ابراهيم وحفصه فرحهم 7/2
عقبالك

بنوتة يقول...

معلش هو فعلا حال معظمنا
"واستعينوا بالصبر والصلاة"

Migo Mishmish يقول...

اول زياره عندك وان شالله مش هتكون الاخيرة
الاكتئاب ده عادي. دانا لما بقوم من النوم مزاجي رايق والاقي الدنيا ماشيه كويس اقول خير الله ماجعله خير
انا مش عارفه انتي اشتغلتي ولا لسه بس عايزة اقولك اني ليا اخت زميله مهندسه برضه بس كهرباء. بس هي اتخرجت من سنتين والدنيا فضلت متلخبطة معاها شوية لكن ربنا سهل واشتغلت في مكان حلو قوي وبرضه هي كانت متخيله انها مش هتشتغل ابداً
المهم بخصوص النكته في نكته بايخه اخر حاجة كان ليا واحد زميلي بيقولهالي كل اما يشوف وشي وكنت بضحك عليها كل مرة
بيقولك يا ستي:
مرة واحد بيسأل واحد الساعه كام قام التاني مزعقله وقاله انت فاكرني جزرة راح قافل الحنفيه وراح ماشي
اضحكي بقه. حتى ولو علشان غلاستها
Love,
MishMish

Eno يقول...

ايه ياقمر سلامتك
ده احنا كنا بندخل عندك نستمد منك الامل من جديد وبنتفائل خير في الحياه

ادعي ربنا يفرج كربك وهمك ربنا يستجيب ان شاء الله ويهديلك الحال يارب :)

تحياتي :)

طوبه فضه وطوبه دهب يقول...

يابنتى انا قلت دا فيرس فى الجو وصاب ناس كتير ياريت اللى لسه ماجالهوش يستخبى عشان كفايه اوى اكتئاب كده الف سلامه عليكى ياجميله

حروف يقول...

ههههههههههه تعالي في رابطة بتاعتنا مكتئبين ومش واخدين بالنا دعوة للمشاركة متكتئبش لوحدك ههههههههه
لاحول ولا قوة الا بالله

هوندا يقول...

تفائلو بالخير تجدوه

يابنتى انا مش بحط صور عندى فى المدونة يعنى مش كل الناس بتحط
:]

اقلك ع حاجة حلوة

اتفرجى ع سيد ابو حفيظة
:D
here

princess يقول...

والله يا بنتى نفسى اقولك حاجة تخليكى متفائلة بس مبعرفش اكدب هههههه
لا بجد فى جو من الكابة مش طبيعى
بش اقولك اضحكى برده
طلعى لسانك للدنيا واضحكى:)
تحياتى

adel يقول...

ههههههههه

زي ما قالت حروف كده ... ادخلي معانا الرابطة ..... احنا بنشجع الشباب اللي زيك كده....

اللي لسه في اول طريق الاكتئاب

بـسـمـــة صـــــلاح يقول...

السلام عليكم
انتي عامله زيي بالزبط والله
ايه الحكايه دي
مالنا بئينا كدا ليه
بقولك لما تكتأبي صليلك ركعتين واقري شوية قران
واقولك نكت ياستي:

واحد محشش رجع البيت متأخر اخته فتحتله الباب
لطشها كف وقالها انتي لسا رجعه يا قليلة الأدب
.......
ناس بيبعتوا الحمام الزاجل فاضي ليه؟؟؟
.
.
.
.
ببيبعتوا كلمني شكرا
~~~~
واحد بيقول لصحبه لو قمت من النوم لقيت نفسك ميت تعمل ايه؟؟
قالوا والله اتهبل
.....
مرة ديك واقف يأزن فوق الشجرة
جاله الثعلب قالوا: ماتنزل نصلي جماعه
ههههههههههههههههههه
~~~~~~~~~~
نكت بايخه مش كدا
ربنا يفك اكتئابك واكتئابي وكل المكتئبين
~~~~~~~~~~~~
دمت بكل ود
تحيـــــــــاتي(:

AHMED SAMIR يقول...

اديكي فزورة كدة على السريع؟
فكري فيها شوية وهارجع اكتب لك الحل بتاعها النهاردة او بكرة ان شاء الله؟


ليه الفيل دايما بيلبس شرابات خضرا؟

ادم المصرى يقول...

سلام عليكم

عمتا الكئابه شيئ مش وحش بلعكس ليها فيدا

ولكن حسب سبب الكئابه ولو ملهاش سبب

تبقه سببها الوحيد البعد عن الله ومن ابعد عن ذكرى فلهو معيشه ضنكا

تفائلى ولا تتيئسى هذه هى حال الدنيا فنااااااااء الا ذكر الله

hager يقول...

مش عارفه اقولك ايه بس اكيد في حاجه حلوه هنا ولا هنا دوري انتي كويس
ولا اقولك حاجه تعالي انزلي في يوم الجامعه انا مبضحكش غير هناك
تعالي كده اعدي قدام مبني حاسبات المبجل
وانتي هتفرفشي خاالص :D

عاشقه وغلبانه يقول...

بصي يا حاسوباتيه السنه دي من قبل ماتبتدي وانا كل اسبوع مشكله جديده
واجمد من اللي قبلها

مشكلتك مالهاش دوا عندي

غير معرف يقول...

انتي معاكي حق للأسف :(
وكلنا المود دا صايبنا..
بس في اللي بيفضل معيش نفسه في النكد
وفي اللي بيحاول يضحك ويقول للدنيالأ انتي مش هتكسريني..
يارب تبقي أحسن قريب
وترجعيلنا ببوستاتك الجميله
وكمان ليكي عندي تاج ماليش دعوه بقي لازم تجاوبيه
:)
خدي بالك من نفسك

تحياتي

غير معرف يقول...

لأ بقي مش عايزه اشوفك كداااااااااا
ماليش دعوه
عاااااااااااا

اوك

هنفذ الخطه

انا هقتل الاكتئاب



نبدأ:


ليه السمك بيخاف من اتصالات؟
علشان أقوى شبكة.....


- طب ليه عملاء موبينيل هيدخلو الجنة؟
علشان هما أحسن ناس.....ـ


و ليه القطنه هتدخل معاهم؟
عشان مدام نظيفه قالت القطنه متكدبش....


- طب ليه عملاء فودافون ما بيبردوش؟
علشان فودافون أقوى تغطية.....


_ امتى السما يبقى لونها بتنجانى
لما الدنيا تبقى مسقعه.....


ليه القطر مهم
...... عشان تحتيه خطين


ليه سندوتشات الكفته والبطاطس بتجري
...... عشان وجبات سريعه


ليه اليابان معندهاش حنان
........... عشان ف قاره آسيا )


ليه البرازيل معندهمش تين
............ .عشان ف امريكا اللاتينيه )


ليه الفيل بينزل البحر بالشورت الاحمر .
.......... عشان الشورت الاخضر مش نضيف


ليه الصعيدي بيحط جنبه منبهين
............ . عشان واحد يضرب والتاني يحوش


عكس نجيب محفوظ ؟؟ .
....... نودي محفوظ


واحد بلدياتنا ماشي تحت الكوبري و رافع ايده ليه ؟
......... عشان الكوربري مسلح


ليه الكلب بيهوهو
.......... عشان القطه بتنونو


عسكرى زهق من البندقيه عمل ايه
جاب حمصية.....

طماطمية عطست قالت
.... كا كا كاتشبب


حاجه بتجري وعندها راسين و 8 رجول
....... كلبين بيجروا جنب بعض


ليه القرد سريع
....... عشان القرد في عين امه غزال


اول مخلوق ظهر عالارض هو الحمار الوحشي ليه ؟؟
. ........ عشان ابيض واسود


و اخر مخلوق ظهر القنفد ليه ؟؟
عشان لسه بشوكه......


حاجه ليها اربع رجلين وطايره في الهوا.
....... قطه مضروبه بالشلوت


عاوزين نطير كلب نعمل ايه
.......... نضرب في ( 1\كلب )الكلب يطير مع الكلب


ليه النمل مش بترضي تركب الفيل قدامها عالعجله
........ عشان بيلعب في الجرس


فرخه معلقه سلسله فيها صوره بيضه ليه ؟؟
............ صورتها و هي صغيره


فرخه معلقه سلسله وفيها صوره طبق بيض اومليت ليه ؟؟
........... صوره اخوها الشهيد


ليه المنبه بيرن
....... عشان مش معاه رصيد يتصل



ليه الصيدلي بيبني عماره_
........ عشان يسكن الآلم


طب وليه العماره وقعت
......... عشان بنااادول إكسترا )


ليه القطه بتخربش
............ . عشان نفسها تكسب


ليه الأهرامات تلاته بس
.......... عشان الشلن مش هايكفى نحط واحد كمان


ليه السائح بيتصور جنب الاهرامات
.......... عشان يطلع في الشلن


ليه الام مدرسه
........ عشان بتذاكر لولادها


عكس بالونه ايه ؟؟ .
........ نشفونا


ليه الفيل بيلبش شرابات خضرا
........ عشان خضرا بتلبس شراباته


عاوزين نحط فيلين في برطمان من غير ما يلمسوا بعض نعمل ايه ؟؟ ......
نحط فيل ما بينهم و نحطهم في البرطمان


عاوزين نركب 4 افيال على عجله نعمل ايه ؟؟
........... نركب فيل و نديله البرطمان يمسكه في ايده


خمسه صعايده قاعدين في اوضه كل يوم يخرج واحد ليه
...... بيلعبوا ستار ميكر


قطر ماشي بسرعة 60 كلم في الساعة فكم عصفورة في الشجرة اذا كان الببسي ب75 قرش؟


ايه وجه الشبه بين البطيخ و الشمام
....... الاتنين اجازه الحلاقين


حاجه صغيره و لونها احمر و بتاكل الزلط
......... بنت الحاجه الكبيره اللي لونها احمر و بتاكل الزلط


طب حاجه لونها اسود و بتاكل الزلط.
........ ظل الحاجه الصغيره اللي لونها احمر وبتاكل الزلط


ليه الفراعنه ريحه بقهم حلوه
......... عشان كان عندهم ابو الهولز


طب عندنا ازازه حاجه ساقعه و فيها طوبه .. عاوزين نطلعها من غير مانكسر الازازه ؟
........ نجيب الحاجه الحمرا الصغيره اللي بتاكل الزلط و نحطها في الازازه


ليه الفراعنه كانوا عيال
........... عشان كانوا بيرسموا عالحيطه


طب ليه ابو الهول كان وشه اصفر
......... من خوفو


طب اتنين فراعنه قعدوا عالفهوه هايطلبوا ايه ؟؟
...... اتنين اااااامون و حجر رشيد لايت


واحد ماشي في الشارع و لابس كوتشي ابيض ليه ؟؟
........... عشان ماشي مع الطقم


واحد بلديتنا واقف قدام المرايا و مغمض عنيه ليه ؟؟
............ ......... .... بيشوف شكله و هو نايم


مهندس كمبيوتر، حلل دمه، طلعت فصيلته

.......... HP

لية السمك بيخاف من الجنية....؟!
علشان الجنية فية 100 قرش.........


فيزيا بقه

واحد تايه في الصحرا ومعاه مسطره حرف تي ..يعمل ايه ؟؟ .......... يسمك المسطره ويقيس مسافه ... يكاملها تبقى سرعه ...
يكاملها تاني تبقى عجله ... يركب العجله


ليه اللبن جايب ( ض.ج ) في الرسم ؟؟
............ .. عشان لما بيقطع مش بيهشّر


ليه اللبن جايب ( ض.ج ) في الرياضه ؟؟
............ .. عشان لما بيــ( كامل الدسم ) بينسى يحط الثابت



القاضيه بقى

قطه بنت عم قطه تانيه ... وقطه تالته بنت عم التانيه ... و قطه رابعه تبقى بنت اخت التالته ...... و قطه خامسه تبقى عمه الرابعه ... وقطه سادسه تبقى بنت خاله مراة عمه الخامسه ...
تبقى القطه الاولى تقول القطه السادسه يا ..... ايه ؟؟
تقولها ناو ناو

بنت الغربة يقول...

حبيبتى ياحاسوباتيه
ليه ياحبيبتى النكد والاستكئاب ده؟؟
علشان متخانقه؟؟ او مخنوقه من الدنيا واللى فيها؟؟
عادى ياماما ..امال انت عايزة الدنيا تبقى بمبى بمبى ولا ايه ؟؟؟
ده حتى اللون البمبى بقه بيئه اليومين دول
والاحمر الدموى هو اللى موضه..
ده غير البتنجانى اللى كلنا عايشين فيه..
يابنتى قومى اضربى الدنيا زى حلاتى
واديها استمارة 6..
انا مش باعرف ااقول غير نكت ابيحه
بس بلاش انت لسه انسه محترمه..
بس دى سمعتها وعجبتنى...
بيقولك ان الباشا الكبير بتاع مصر(عارفاه طبعا)
حس ان اخرته قربت..فجاب شيخ وقاله - انا عايز اطمن من حاجه لانى حاسس ان اخرتى قربت..
الشيخ : خير يافندم
سيادته: انا عايز اعرف فى اسكواش فوق ولا لأ؟؟دى حاجه قلقانى جدا..
الشيخ:يافندم طب دى انا هاعرفها ازاى؟
سيادته: اتصرف امال شيخ على ايه ؟؟
مشى الشيخ ورجعله بعد 3 ايام..
سيادته : ها سألت ؟
الشيخ : ايوة - فى خبرين واحد وحش ..وواحد حلو .
سيادته : قول الحلو الاول
الشيخ :الحمد لله فى اسكواش هناك
سيادته: كويس ..امال ايه الخبر الوحش
الشيخ : سيادتك عندك ماتش الاسبوع الجاى........هههههههههههه
يارب تكون ضحكتك..
وتكونى فوقتى شويه
تحياتى ياقمر

شمس النهار يقول...

عندك حق كله كله عنده اكتأب
بس صدقيني اول مايخلص يناير الدنيا هتتعدل خالص
هو يناير كده مصفه لحزن السنه اللي قبلها

همس يقول...

يادى ام الاكتئاب اللى صابنا يا ختى

بس بصراحه انا ضحكت على نكت احوال الهوا


ما علينا


انا هضحك باه اصلى عايزة احلص الغم اللى عندى باه

زهقت

الفقيرة إلى الله أم البنات يقول...

الحقيقه مش لاقيه حاجه افضل من انك تذكرى الله وتقولى دائما
لا إله إلا الله
وبعدين اخواتك فى الله ضحكوكى وضحكونا معاهم
ربنا يحفظكم جميعا"

ELMASRYA يقول...

السلام عليكم

ايه ده بقى يا آنسة؟

لا لا لا أوعي تستسلمي للإكئاب

أعوذ بالله منه

إنتي لسه صغيره على الهم ده

وبعدين نصيحة لوجه الله ماتتفرجيش على نشرات الأخبار لأنها كلها مآسي

واوعي تتفرجي على قناة موجه للكوميديا لأنك مش هتضحكي إنما هتتغظي

النصيحه الفظيعه بقى إنك تعلقي على الحاجات المزعجة في حياتك تعليقات ساخرة

خليكي باردة

وصدقيني هتلاقي كله بيعدي

واستغفري ربنا كتير قوي وصلي نوافل هتشعري براحه نفسيه

يارب الروشته بتاعتي تنفع أحسن أنا اتضايقت لما لقيت بنوتة صغنتوتة زيك كده جواها الحزن ده كله

بالنسبة للنكت روحي على مدونتي ساعة لقلبك واوعدك انك هتضحكي أو على الأقل هتبتسمي

إضحكي للدنيا تضحكلك صدقيني

أصل احنا لو كشرنا واكتئبنا أو ضحكنا اللي مكتوب هو اللي هنشوفه

يبقى نضحك أحسن

خالص مودتي

و...تــحــيــاتـــي

منى يقول...

ربنا يهون وحاله الاكتئاب دى تروح بسرعه
انا حاليه مكتئبه فمش عارفه اقولك حاجه هتدور واجى تانى

ريمان يقول...

حبيبتى


هونى على نفسك


مش انتى لوحدك والله


كلنا مكتءبين وعندنا حاله ملل وزهق وقرف

معلش يا قمر


عايزه المره الجايه ازورك وانتى مبسوطه ومفرفشه

صوت من مصر يقول...

مش عارف اقول بس الاكتئاب لف كل مدونه واحده واحده لدرجه انه خلاص بقى شىء من الضروره ؟
للاسف ده احنا

ريمان يقول...

ايه يا قمر

اخبارك ايه الوقتى

يا رب تكونى احسن حبيبتى


انا والله بفكر فيكى من ساعه ما شوفت البوست وبدعيلك

خلى بالك من نفسك

من بعد اذنك انا ضيفت مدونتك لقايمه المدونات المفضله عندى

رؤية يقول...

مرة واحد بكررش قابل واحد بكرش قاله معاك قرش قاله ما افتكرش...!!

ايه...؟
دمها تقيل...!!

طيب ياستى الله يسامحك
انا كنت بس عاوزة اضحكك

بس اقولك ايه
هى الدنيا كدا
ساعات منحناها فووووووووق
وساعات منحناها تحتتتتتت

عموما...
ان بعد العسر يسرا

وتذكرى قول الشافعى..

ضاقت فلما استحكمت حلقاتها فرجت..
زكنت اظظنها لا تفرج...

بس لما تفرج قليلنا علشان ما نفضلش قلقانين عليكى

تحياتى

غير معرف يقول...

يا رب تكونى احسن دلوقتى
طمنينا عليكى
تحياتى وحبى
منى

احاسيس

emey يقول...

انتى مش لوحدك كل الناس عندها شاكل ربنا عالم بالناس ربنا يفرح ايامك وتكونى فى سعادة علطول

تحياتى

msafa يقول...

يعنى اخرجى اتفسحى اعملى اى حاجه بس فعلا الاكتأب صعب انا مجربه بس حاولى ولو تعملى اى حاجه او تمسكى ورقه حتى وتشخبطى المهم تخرجى من الحاله ومش تستسلمى

حاسوباتيه يقول...

شكرا ليكم كلكم جدا بجد انتم كلكم احسن ناس ربنا يخليكم ليا وادعولي انا الحمد لله بقيت احسن الحمد لله وشكرا على النكت الجميله الي بجد ضحكتني شكرا جدا ليكم

ستيتة يقول...

لألألألألألألألألألألألألألألألأ
زودتيها وتخنتيها وطولتيها وضخمتيها
انتي فين ياعقل الكمبيوتر
احنا ياماما حجزنا ليكي مكان مفتخر معانا
وعلشان مناخيرك تطول زي وتحبي تعرفي حجزنالك معانا فين؟
زوريني تجدي ما يسر قلبك
ستيتة سينيما مش ها تقدري تقفلي اللينك

hasona يقول...

المشاكل لا تنتهي والالام لا تنتهي
ويمكن الحياة بدون ذلك لن يكون لها معني

hasona يقول...

آخر نكتة سمعتها على زيارة الريس للهند .. بتقول ان الريس وقف قدام قبر غاندي
.. قام لقى كلام كتير قوي مكتوب على شاهد القبر .. راح مميل عالمترجم وسألو
الريس : اليافطة دي مكتوب عليها ايه ؟؟
المترجم : دي مكتوب عليها الخطايا السبعة من وجهة نظر غاندي .. سياسة بدون مبادئ , ثرثرة بدون عمل , متعة بدون ضمير , معرفة بدون شخصية , تجارة بدون أخلاق , علم بدون إنسانية , عبادة بدون تضحية
!!! الريس : هممم .. ابقى فكّرني نقفش غاندي .. ونقرره مين اللي قالّو اني جاي النهارده

Kiara يقول...

مااااااااااااااااااالك طمنيني عليكي في ايه

ربنا كبير قربيله وهترتاحي

عاشقه الرومانسيه يقول...

الف سلامه عليكى من الاكتئاب ياقمر
تعالى احكيلى
ونعيط سوى
ارمى يابنتى ورا ظهرك الدنيا ما تستاهلش عيشيها زى ماهى
يوم حلو ويوم مر

تحياتى ياقمر

الجواز و سنينه يقول...

يابنتى فكيها
مسيرها تروق و تحلى
و بكره تقولى دودو قالت
دودو دى انا على فكره
اقولك نكته
مره واحد جمع ولاده علشان يعلهم ان القوه فى الجماعه
جاب حطب و ادى لاصغر واحد فيهم و قاله اكسرها فاكسرها
جاب شويه صغيرين كده و قاله اكسرهم فاكسرهم
كتر الحطب و قاله اكسرهم فاكسرهم
بصلهم و قالهم بدام معاكم البغل ده ما تخافوش