17‏/2‏/2009

جوزك على ماتعوديه


المكان بيت هي
الزمن حوالي الساعه 9 بليل كان موجود هي واختها وقريبتهم

قريبتهم: هو انتي لازم قبل ماتنزلي تقولي لخطيبك

اختها: ايوه يابنتي لازم تقوله يعملها تصريح هههههههه

هي : انا مش باخد اذن انا مجرد اني بقوله اني نازله المكان الفلاني يعني علشان يعرف انا فين

قريبتهم: ويعرف ليه اصلا انتي لسه خطيبته بس مش مراته

هي : يعني دي حاجه بتريحه علشان يكون عارف انا فين وكمان مش بتزعجني يعني عادي

اختها : ده كمان لازم تيجي في معاد ماتتاخرش عنه

هي : والله المواعيد الي متفقين عليها مناسباني وانا كمان مابحبش اتاخر بره البيت ولو اتاخرت بكلمه اقوله اني هتاخر

قريبتهم : بس انا مش معاكي في كده هو اولا لسه مالوش كلمه عليكي ثانيا مش تعوديه على كده لما تجوزي هتزهقي كل حته تروحيها لازم تقوليله

هي : حاسه ان لازم اقوله وبعدين هو مش بيمنعني من الخروج هو كل طلبه اني اعرفه قبل ما اخرج

قريبتها : انتي حره بس لازم مش تعوديه على كده يا بنتي جوزك على ماتعوديه

(قريبتها خرجت من الاوضه)
هي لاختها: هو انا غلطانه في كده ولازم اعوده على اني اخرج من غير ما اقوله ولا انا صح

اختها : مش عارفه لما اتخطب يمكن اعرف

ياترى انتم رأيكم ايه تقوله ولا ؟ وهل مقوله جوزك على ماتعوديه دي صح ولا ؟

هناك 47 تعليقًا:

mohammed alsha3r يقول...

أولا سرد المشكله باسلوب الحوار جميله جدا مشكوره عليه

ثانياً
من وجه نطري
في مرحله الخطوبه لما يحصل كدا بيكون دا احترام وزيادة الثقه فيكى عند خطيبك وزيادة رصيد الحب بينكم

في مرحله الزواج
دا واجب عليكى ان زوجك يعرف انتى فين ورايحه امتي وراجعه امتي ودا شى ء طبيعى اتعلمناه من اسلمنا

ومشكورين على البوستات اللى بتحرك عقل القارىء

Teawater يقول...

انا شايفه ان ده حلو اوي وكويس

Eng. Ahmed Abo El-Ella يقول...

أولا متزعليش مني
بس انا شايف ان الناس اللي بتتكلم من بره دول كلامهم مش بيكون صح واحنا بنسميهم شعلة بتجاز

يعني ايه جوزك على متعوديه ديه ان شاء الله؟
انتم متفقين على حاجه معينه, مادمتم انت الاتنين موافقين عليها يبقى مفيش حد تالت له رأي وكمان مفيش حاجه اسمها الاتفاق ده صح ولا غلط
المهم انكم تكونوا مرتاحين

وبعدين الراجل مطلبش حاجه حرام يعني ولا حاجه

كل اللي طلبه انه يعرف انتي فين
عايز يطمن عليكي
ايه بأه موضوع اذن ومش اذن ده ان شاء الله؟

خلي بالك وخدي نصيحة مجرب بجد
متسمعيش لاراء ناس بره الموضوع كتير لأن ده أكتر حاجه بتخنق وقليل لما يكون هدفها صح

اللي تتفقوا عليه هو ده نظام حياتكم

واطفي شعلة الوتجاز لتولع الدنيا

أحــوال الهـوي يقول...

جوزك علي ما تحترميه

و تاكدي في نفسه الثقة و علو الشان

لكن اللي بتقول انا حرة و هو مالوش كلمة علي .... بتعطي لجوز المستقبل اشارة سلبيه هي في غني عنها و لمل تبقي في بيته هتحتاج سنين لتثبيت الثقه و الاخترام اللي اكتسبتهم بمنتهي السهوله بتصرف بسيط زى ده

التصرف سليم و اظن انه في المقابل بعمل نفس الشئ

تحياتي

ستيته حسب الله الحمش يقول...

اعلق ربنا يعيني بقى .. اصل الموضوع طويل

لي رأي مفاده أن الراجل أو الست نيفر بوتيتا ياخدوا رأي اصحاب في شريك حياتهم .. وده ليه ياستوتة؟ سألتيني لازمن اجاوب

اولا اللي مش متجوزين كتهم خيبة ولا بيفهموا حاجة عن الحياة الواقعية اللي لسه مختبروهاش خالص مالص .. والمجربين تجاربهم تختلف عنا كاختلاف بصمات اصابعنا فرأيهم اللي ينفع جوا بيوتهم ميركبش مع بيت تاني

ثانيا الخير اللي بيني وبين شريك عمري محدش شافه فأزاي يحكم على واحد لا يعلم عنه إلا ما اقصه عليه .. وطبيعي مش كل شيء بيتقال .. وعليه هو بيحكم على أنسان لا يعرفه ولا يعرف طباعه ولا يعرف حبه وتضحياته علشاني

ثالثا كل من الزوج والزوجة بيتعودوا على عادات بعضهم بعد الزواج و"بيطبعوا" على بعض "زي تيل الفرامل الجديد يا جميل" وكل منهم ها يتنازل عن اشياء لعيون شريكه وإلا أخرتهم محكمة الأسرة أو ينضموا لجمعية "صامتون وصامدون تحت الزواج"

يعني مثلا يا عقل الكمبيوتر انا والأفندي عمرنا ما قلنا لبعض رايحين فين بتاتا البتة مطلقا ابسلوتلي .. بس مثلا واحد فينا ها يتأخر عن ميعاد التاني مستنيه فيه تلاقي على طول تليفون ودلع وهيء وميء وشخاليل لتسجيد الطرف الآخر .. اللي بس كان ها يقلق على حبيبه

بيوت تانية مينفعش كده .. الراجل يحب يعرف موقع المدام فين من الخريطة بالضبط .. بيوت تانية لا يمكن تخطي الخريطة الا بعد إذن .. بيوت تالتة متخطيش الخريطة اطلاقا

فيه ستات تتجنن لو مكانتش متابعة سبعها خطوة بخطوة .. ستات تانية لأ انا بقلق فابقى عرفني لله "من حبها" .. ستات ثالثة ولا يفرق معاها هي عارفة انها خدت التقي اللي بيعامل ربنا مش بيعاملها فدي مستنياه في بيت العدل وربنا يعينه على شغله ومشاغله

مفيش نموذج نمشي عليه ونبقى احنا اللي صح واللي حوالينا وحشين .. لأ احنا نشوف ايه اللي يريح بيوتنا وحبايبنا ونعمله علشان ناخد بونطات بعد كده

كتبت ليكي بوست بس فاضل كلمة
فيه بنت عسولة سألتني "وهي عروسة على فكرة" انا جوزي مش بيحبني زي أخته مثلا أللي بيحكي ليها ويضحك معاها وانا حاسة أني مش غالية عنده؟
قلت لها أنتي بلهاء يا أمورة .. الست بتغلى عند جوزها شوية شوية .. يعني الأول هي حب وغرام وانتقام .. بعد شوية عمالة تعمر بيته وتضحي علشانه وعلشان ولاده فيقول الحمد لله وتبقى عنده اغلى من عيلته "مع احتفاظ كل واحد بقدره في القلب" بعد كتير بتكون دي اللي شالته وشالت مشاكله وازماته "وعليه تلاقي الناس الكبيرة في السن .. ولاد الأصل طبعا .. مراته في كفة والدنيا وما عليها في كفة .. هي ما جبتش غلاوتها دي من فراغ .. ده حب وتحمل عمر بطوله

طولت عليكي قوي .. انتي اللي فتحتيني اعملك ايه

وفقك الله وكملك بعقلك يارب

blue-wave يقول...

اهى قريبتهم دى مثال للى بتسعى فى الخراب:)
وفيها ايه لما تقوله علشان يكون مطمن عليها؟
طالما انه مش تحكم ولا حاجه دا مجرد اطمئنان يبقى مافيهوش حاجه طبعا

SemSem يقول...

انا شايف ان موضوع المعرفة مش بالامر بقدر ماهو الاحترام فقط ليس اكثر

ومرحلة الاحترام لو استكملت بشكل جيد فى الزواج هتكون الحياة سعيدة وجميلة جداااا

مشكورة على البوست وعلى وضعك لنقطة بسيطة ولكنها مهمة فى العلاقة بين المخطوبين

دمتى على خير

BAsMA يقول...

طبعا الصراحه مطلوبة دائما
وطالما هما مخطوبين يبقى حياتهم ارتبطت ببعض
يبقى مينفعش يبقى فى لف ودوران او حتى انها تخبى عليه حاجة
علشان يبدئوا حياتهم بصراحه وتفاهم

romansy يقول...

عارفه انها تقوله بكل حركه تعملها دا مش عيب طالما هى راضيه وهو راضى اصل صعب قوى اننا نلاقى انسان بيحبنا قوى
وطالما هو مش بيمانع
يبقى بقى فيه ايه

A.SAMIR يقول...

لازم تبلغه طبعا انها نازلة
مافيهاش حاجة خالص
وهي بتعمل حاجة غلط؟
وبعدين طالما هو عايز كدة وهي مش معترضة يبقى خلاص مفيش مشكلة
قريبتها دي محراك شر
عارف النوعية دي.....موجود منهن كتير

صوت من مصر يقول...

لازم تقوله
لان الصراحه حلوه ؟
ثانيا افضل من الشك

lonely يقول...

أهى قريبتها دى جاية مخصوص علشان تهدى النفوس

لجين أبو الدهب يقول...

لازم البنت تفرق بين حياتها قبل ما تتخطب وبعد ما تتخطب ..

لما تتخطب تعرف انها هاترتبط بانسان له طباع وعادات وومكن يكون متربى فى بيئة غير بيئتها وواخد على حاجات هى مش واخدها عليها ..
وبيرفض حاجات هى واخدة عليها ..
ولو وافقت عليه من الاول وحصل القبول يبقى لازم اول مبدأ يتحط عندها احترامه ..
وفى نوعيات مختلفة من البشر زى الحبيبة ستيتة ما ذكرت ..
ولو هو من النوع اللى بيحب يعرف خطوات الانسانة اللى مرتبط بيها خطوة بخطوة .. يبقى لازم تحترمه وتعرفه ..
واراجل لو فيه الطبع ده يصعب يتغير ..
يعينى مش تقول هاعوده من دلوقتى ان مالوش فيه ..
لان مش هايتعود على كده وهايكون ده ضرر عليها عاجلا او آجلا ..
سواء ان قلبه يتغير من ناحيتها .. ومرة تحصل مشكلة ويتعكر الجو .. وهكذا ..
اذكر فى النهاية قصة لواحدة صاحبتى زى اللى فى القصة ..
لغاية ما صحابتها قومها فى دماغها برده ان مالهوش عليكى ..
واتصل بيه مرة قالها انتى فين قالت له فى الحتة الفلانية قالها وما قلتليش ليه قالت له انت مالكش عليا من دلوقتى طبعا الشاب دمه اتحرق وقفل معاها وبعت مامته والمشكلة ان لما جت مامته قالت لها نفس الكلام .. هو زعلان ليه هو مالهوش عليا وانا لسه فى بيت اهلى ..
الاسبوع اللى وراه راح لباباها وفسخ الخطوبة ..
معلش انا طولت عليكِ ..
أتمنى ان اكون افدت ..
دُمتِ بخير ..

شمس النهار يقول...

لو بيحبوا بعض صح جدا
ماحدش فيهم ممكن يعمل حاجه من غير مايقول للتاني
ومش هتعدي ساعه من غير مايكلموا بعض ويعرفوا عن بعض كل حاجه
ليه ناخده انه تحكم وبعدين هي اللي تقدر تحدد ده تحكم والاحب
وكل حاجه بالود والحب والتفاهم بتتحل

princess يقول...

انا شايفة انه الطبيعى تقوله وشايفة ان قريبتها تقعد ساكتة احسن ههههههه
لا بجد انا شايفة ان دى حاجة حلوة اوى منها هيا انها فيها نوع من الاحترام والحب ومنه هو كنوع من الحب والحماية والاطمئنان
تحياتى:)))

MaNoO يقول...

انا شايف ان قريبتها ملهاش دور فى الموضوع وياريت تروح ومتطولش هنا كتير بس بجد هوا الموضوع بييجى كدا عادى يعنى زى مااتعودوا مع بعض وزى مابيرتاحوا واكييد هوا يعنى مش هيبقى متعمد انها متخرجش ولا هيا هتتعمد انها تضايقه سيبوها لله وقتها بيبقى فى حسابات تانية وكل واحد ودماغه بقى

*البت المشمشية *حلوة بس شقية * يقول...

ايه اللى دخل البت قريبتها فى الموزضوع اساسا
ايه الرخامة دى

*البت المشمشية *حلوة بس شقية * يقول...

ملحوظة صغيرة المدونة بتاعتى طارت اللى انا دخلت بيه ده مدونة جديدة بس بنفس الاسم زيها بلظبط ياريت تضيفه لينك المدونة الجديدة عندك وياريت تعملى تنويه بكدة دى خدمة منك يعنىhttp://o0mshmsh0o.blogspot.com/

*البت المشمشية *حلوة بس شقية * يقول...

بصى هو اسم المدونة هو هو عشان متستغربيش
ونفس النظام بس اللينك اتغير
ضيف الجديد بقه عندك
اشطة

ريمان يقول...

السلام عليكم

بصى

الموضوع مش موضوع جوزك على ما تعوديه

لكن الموضوع ان كل واحد يعرف حدوده وحقوقه

ازاى؟

دلوقتى الواحده اما تكون مخطوبه مش من حق خطيبها انه يعرف كل صغيره وكل كبيره بتعملها ومن من حقه انها تاخد منه الاذن او التصريح او حتى تعرفه انها خارجه فى المكان الفلانى

حتى لو مكتوب كتابك

برضه مش من حقه

لانك انتى لسه فى بيت اهلك واهلك هما اللى بيصرفوا عليكى مش هو

انما فى الزواج طبعا امر تانى مش ينفع حتى تصومى النافله الا اما تاخدى اذنه

وبعدين الواحده اما تبقى مخطوبه او مكتوب كتابها وتعطى ليه حقوق مش حقوقه ده غلط كبير جدا لانه ممكن يطمع او يتمرد عليها وساعتها بقه هيطلب حقوق تانيه مش من حقه

اكيد فاهمانى

ريمان يقول...

على فكره

كل الرجاله اكيد هيقولولك انها صح ولازم تقوله قبل ما تخرج فى حته

بس انا
قولتلك راى الشرع

مالوش حق والله فى كده

Eno يقول...

ازيك ياحاسوباتيه

عامله ايه ياقمر :)
موضوعك كالعاده رائع وفي نقطه مهمه للنقاش

وفيها ايه لما تقوله انها نازله من ناحيته هو بيكون عاوز يطمن عليها وان دل علي شئ يدل انها حاجه غاليه في حياته بيحبها وبيحافظ عليها !

ومن ناحيتها بتقوي بينها وبينه كذا جسر للود
اولهم الاحترام بينهم
والتاني الثقه لنفسها وليه
ثالثا بتكون لافته حلوه اوي منها انها بتقول زي ماانا عندك اغلي حاجه في حياتك
انت عندي اهم حاجه في الدنيا :)
والله السؤال ده اتسألني بعد الخطوبه
انتي بتقولي لخطيبك وانتي خارجه ؟؟
قولت ايوه طبعا من باب احترامي ليه
عيب اوي لما يكون هو نازل يكلمني ويقولي انا رايح في الحته الفلانيه
واجي انا وانا نازله اخد في وشي واخرج من غير ولا كلمه
لقيت اللي سألني اتكسف من نفسه انه يكون اكبر مني وكلامي اعقل منه :)

تحياتي ليكي :)

أختكم فى الله يقول...

السلام عليكم

ازيك يا جميل اسفة على التاخير فى متابعة مدونتك الجميلة بس لظروف والله

انا بقى رأيي ان دى حاجة جميلة جدا وفيها ايه مدام هى مش بتتخنق وحتى لو هو فيه حد يزعل لما يلاقى حد بيحبه مهتم بيه وبشؤنه

الجواز و سنينه يقول...

طبعا جوزك على ما تعوديه
و هو كمان على ما يعودك
بس انا معاكى انها لازم تقوله مدام كل اللى هو عايزه انه يتطمن عليها و ده طبيعى لانه هو كمان لو خرج هيه كمان هاتحب تطمن عليه
التفاهم عامتا حلو
و ماتسمعيش لحد اوى دى امور فى الغالب بيتفاهم عليها الاتنين
و كل واحد و ظروف حياته

كفايـة طيبـة يقول...

كل خناقاتى مع صحابي على النقطة دي

هم البنات صحابي زي مايكونوا بيحبوا جو الخضوع ده وتحس انها لازم تستأذن والحركات التعبانة دي وهو لسة خطيبها

انا معاها انها تقوله لما يتجوزوا

بس وهو لسة خطيبها بجد شيء مستفز جدا انها تستأذنه او تقوله قبل ماتنزل

يعني نازلة مع صحابي نتفسح هستاذنه ولا هقوله ليه
لو اتصل ساعتها بيا هقوله انا فى المكان الفلاني
لكن كون انه يحس انها بتقوله قبل ماتنزل
دة مبحبوش

طبعا دي وجهة نظرى
:)

عاشقه وغلبانه يقول...

اضحك عليا
جت عليا فتره اتخانقت معاه علشان عايزاه يسألني روحت فين وجيت امتي وعملت ايه ومع مين
نظريتي بقي انه لما مش بيسأل يعني مش مهتم
انا بحب اخد اذن
وهو مابيحبش
هههههههههههههههههههه
ههههههههههههههه
بقوله انا خارجه بكره رايحه المكان الفلاني
يقولي ماشي
بقوله ايه رأيك
يقولي في ايه
انتي عايزاني اقولك ماتخرجيش
ههههههههههههههههه

علي رأيه يا اوختي
البنات دول مابيعجبهمش حاااااجه

المهم تكوني مقتنعه بالوضع الحالي
مالكيش دعوه بحد
طالما مرتاحه ومريحاه استمري

نهــــــــــار يقول...

السلام عليكم ...
حاسوباتيه الجميله..
شوفي بالنسبه لأنها بتقوله هي خارجه فين وكده وهما لسه مخطوبين (رغم إن عندنا مافيش خطوبه كتب كتاب دايركت)
حاجه لابأس بها يعني هي حتحكيله هي راحت وجت وعملت فما مش مشكله تقوله هي رايحه فين بس هو مش يسوق فيها ويمنعها ..
بعد الزواج ...
بالعكس حيبقى أساسا واثق فيها ومش حيسألها وحيديها كامل الحريه ..
لأنها هي إتعودت تقوله فحتزن على دماغه هي حتروح فين وحتيجي مني ..
وحيطهق ويقول أنا إلي جبتو لنفسي ..
.....
دمتي بخير

Foxology يقول...

اولا : البوست جميلة جدا وسؤالك فى آخر البوست مهم جدا جدا

ثانيا : من وجهة نظرى الشخصية لما تيجى خطيبتى تقولى انا هنزل المكان الفلانى ولما ترجع تطمنى انها رجعت ده بيترجم عندى انه احترام لكيانى كشخص مسؤل عنها ولو مسؤلية صغيرة هتكبر وتبقى كاملة بعد الزواج ان شاء الله

ثالثا : لو خطيبتى معملتش كدة وانا طالبتها بيه يبقى لازم اطلبه باسلوب هادى ومهذب اوضح من خلاله النقطة اللى فاتت وهى الأحترام والرغبة منى انى ابقى مطمن عليها

انتى صح .. استفت قلبك وان افتوك :)

تحياتى :)

سلسبيل يقول...

علي فكره اسلوب البوست جميل اوي ولخص الفكره
بصي انا ليا وجهه نظر
اذا كانت وخطيبها متفقين علي كده وهي مش لاقيه مشكله ف الحكايه دي ومش مدايقاها يبقي مفيهاش حاجه انها تطمنه طالما انه مابيستغلش الموضوع ده ف انه يخنقها
لكن لو مكانش فيه اتفاق علي خروجها فانا شايفه انها مازالت تحت عصمه والدها..شرعا
يعني خطيبها حاليا مش وصي عليها وان القرار اولا واخيرا لوالدها طالما هي مخطوبه يعني مفيش داعي انها قبل كل حركه تعرف خطيبها طالما واخده الاذن من البيت
اما بعد الجواز طبعا حقه الشرعي انها تستأذنه قبل خروجها اي مكان مع معرفته بمعاد رجوعها ومكان ذهابها
وبالنسبه لمقولة "جوزك علي ماتعوديه" فانا شايفه انها ممكن تتطبق بس خارج الامور اللي الدين قال فيها كلمته بالفعل
يعني ..دي وجهه نظري..

غير معرف يقول...

وياتري هو لما بيخرج بيتصل قبلها يقولك انا خارج وهرجع الساعه كام وكان مع مين ؟!

علي فكرة تصرفك مدلوله انك بتحبيه وكمان رغبته لا تتعارض مع طباعك من هنا حصلت الطاعة وإن كانت غير واجبة لان شرعا الخطيب مالوش اي حقوق

لكن طالما رغبته مش مخالفة للشرع ولا معارضة لطباعك ولا مسببة لك مشكلة مفيش مانع تحققهالي بس خلي بالك يكون هو التاني بيعاملك بالمثل

esraa يقول...

هو فعلا جوزك علي ماتعوديه ولو اني مش متجوزه
(:

بس مفيش مشكله انها تقوله
طالما دي حاجه مش مضايقها وهو مش حاطط قيود تخنق

ليه نعمل مشكله من مفيش؟

عاشقه الرومانسيه يقول...

عايزه رأي باختصار؟
تقوله على مكانها
ماهو مش بيمنعها
هو بس عايز يطمئن عليها
وهتدارى عنه ليه وهى مش بتعمل حاجه غلط
اللى بيخاف من ربنا مش هيهمه بشر
لان كل تصرفاته هتكون صح
بس ياستى

انا عن نفسى باعمل كده مع حبيبى

انتى بقالك مده غايبه عنى ليه بقى؟

Punny_Punny يقول...

أنا رأيي أن الصح تقولي له حتي لو مخطوبين لأن في رأيي الفاتحة كتاب يعني طالما وافقتي علي الجواز منه يبقي تمهدي لقواعد الزواج السليمة و في رأيي أن الواحدة تقول لزوجها هي رايحة فين و جاية من فين ما فيهوش حاجة زي ما الواحدة قبل ما تخرج بتستأذن باباها و مامتها لأن هو ده الصح و المفروض برده الراجل يدي مراته علم بمكانه من غير تضييق الخناق عليه لأن الرجال لا يتحملون التضييق.
ربنا يكرمك و يوفقك

هوندا يقول...

انتى اصلا ليه تدخلى فى جدال مع اصحاب الثقافات دى اشترى دماغك ومتتحوريش معاه لان ده جدال لن ينتج عنه غير ضيقتك او فقعتك فقط

طوبة ذهب وطوبة فضة يقول...

بصى فى فتره الخطوبه لو هم متفاهمين على كده وهو بيريحه كده وهى ماعندهاش مشكله فى كده يبقى ايه المانع ان كل طرف يعمل اللى بيريح الطرف التانى مدام هو مش بيقيد حريتها اما فى الجواز اسمحى لى دا واجب ان لم يكن فرض انها تستئذنه قبل الخروج وتقوله لما تكون هتتاخر دا رئيى

اقصوصه يقول...

انا اعتقد ان قريبتهم هاي

صديقة سوووووء

لوووووووووووول

طبيعي انه تقولينله قبل ما تطلعين

مدام انتي مقتنعه باللي تسوينه

لا تخلين حد يأثر عليج

الناس ما تترك حد بحاله

وقريبتهم هاي لو انخطبت

بتسوي نفس ما انتي تسوين

يا رب اشوفج عروسه ع الكوشه :)

dodoo يقول...

من وجهة نظرى ومن وجهة نظر الدين

حرااااااااام جدا انك تخرجى من غير اذن جوزك

يعنى لازم ى مكان تروحيه يكون بموافقته

فبالتالى فى الجواز كده كده هتقوله

شاءت ام ابيت

لانها لو عصاته بكده هتكون بتعصى ربنا

فبما انها فى الجواز هتضطر تقوله

طب ليه ماتتعودش هى على النظام ده فى فترة الخطوبه

عشان بعد كده مش تحس انها مقيده
وتضايق من الجواز وسنينه وتبدا المشاكل بينهم

عشان كده انا شايفه انها صح جداااا

تتعود دلوقت احسن ما تتعود بعدين

Sweet Violet يقول...

مدام التصرف ده اساسه احترام الطرف الاخر يبقى مافيش اى مشكله طبعا

و كمان الصراحه المثل ده انا مابحبهوش .. لان مافيش حاجه اسمها تعود

الزوج ليه حقوق و الزوجه ليها حقوق و ماينفعش اننا نتعدها

اما بقى الخطوبه .. فاكيد انك تقولى بدافع الاحترام و الحب .. لكن لو ده من دافع التحكم منه هو يبقى لأ طبعا

تحياتى (:

تامر علي يقول...

ما دام الموضوع خطوبه فقط يبقى ده في إطار التفاهم وليس الحق وده مش وحش إلا إذا كان الرجل له نزعة تحكمية هايكون ده سيء.
أما كزوج فطبعاً من حقه يعرف كل حاجه عن الدخول والخروج وغير كده يبقى تسيب وحرام إلا إذا كانت في ظروف ثابتة كعمل الزوجة مثلاً فمش لازم يعني تجدد التصريح بالخروج كل يوم:) ويكتفى بإنه عارف المواعيد

الخلاصة أهم حاجه أصلاً إنه يكون شخص سوى نفسياً علشان الراجل لو عنده نزعات (هوبا استنجلينا) البيت هيتحول لخرابه

mohra يقول...

لا تسألى الاخرين مادمتم انتم الاثنين متوافقين
ليس كل الناس متشابهين

يوميات نائمة في الأرياف يقول...

عزيزتي الحاسوبية
ازيك الاول
ده اول مرور ليا عندك وان شاء الله ميكونش الاخير
ثانيا: انا مش شايفه ان فيها حاجة لو كان الموضوع من باب العلم بالشئ
انما فرض بقى ورخامة ميمشيش معايا
لأني حرة.....وهو كمان لازم يقولي هو فين
تحياتي ليكي
رنا

SKOBL- Little Lazy Me يقول...

بصراحة أنا شكلي وصلت هنا متاخر كتير بس أنا عندي رأي .. ايه المشكلة لو اتعود ما تروحش غير باذنه ، بل بالعكس ده مطلوب ... المشكلة ان العلاقات الزوجية كانت زمان من خمسين سنه كده قائمة على كون كل حاجة تعملها الزوجة واجب عليها ، والنهارده اتحولنا للنقيض و ان كل حاجة بتعملها الزوجة تكرم منهها و تفضل .. و ده غلط ، العلاقة الزوجية فيها واجبات و اساسيات ( و عل حسب علمي ان استئذان الزوجة من زوجها في الخروج ده واجب عليها من الناحية الدينية ) و فيها النوع التاني من الافعال و هو اللي بنراعي فيه الطرف التاني ، مش بنتفضل عليه .. أما منطق أنا حر ، و أنا حره ، و هي/هو حيحاسبني .. و واحدة بواحده .. هي اللي بتخلي 90% من حالات الجواز دلوقتي بتنتهي بالفشل .. حتى لو ما كانش ده رأي الدين و كان هو لطبع فيه بيحب يعرف هي فين .. هي حاتخسر ايه لو قالتله ؟؟ .. حاتخسر ايه ؟؟ مش عارف .. بس أنا قلت رأيي .. من ناحية الدين واجب عليها بعد الجواز تستئذنه حتى لو رايحه لأهلها .. يبقى ليه ما " تعودش نفسها " من دلوقتي .. و من ناحية المنطق . هي خسرت ايه لما كسبت حبه و احترامه بانها ريحته بحاجة بسيطة زي كده ..

و لكم كل التحيات

°ˆ~*¤®§(*§ نـــوارة §*)§®¤*~ˆ° ° يقول...

مفيهاش حاجة خااالص

انا بفترة الخطوبة كنت بحب اقوله واعرفه خارجة فين عشان احسسه انه جوزي وراجلي
وبتقوي العلاقة بينا ودا حقه مفيهاش حاجة غلط من حقه يعرف كل حاجة عنها

طول ما هي و هو مرتاحين متخدش براي حد

بووست جميل تشكرين عليه

#أحلام# يقول...

اممم
باعتقادي يا أخت حاسوبية
إن الخطوبة مرحلة التعرف على شريك
او شريكة الحياة
فلازم تبدأ معاها مرحلة حاسمة
وتتصرف عادي جدا
بطباعها قدام خطيبها

وكلامك صح جدا من وجهة نظري
حتى لو مش مخطوبة
لازم بردو اهلك يعرفو

سلام يا قمر

عاشقة الشهاده يقول...

ههههههههههههههه

بجد شدنى العنوان
جوزك على ما تعوديه
هههههههههههه

بس الطريقه بتاعتك فى الكلام والسرد جميله جدا

تحياتى

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

غير معرف يقول...

أوكي. ههههههههههههههههً