8‏/3‏/2009

ااه من تعب القلب


وانا صغيره لما كانت ماما او بابا بيتعبوا لاقدر الله كنت مابرضاش ابدا ادخل الاوضه الي بيكون الشخص التعبان فيهم فيها ابدا كانوا ينادوني ويتحايلوا عليا ادخل ولو دخلت ببص كده عليهم ومابكونش مستوعبه ان ماما مثلا تعبانه كنت بعد اشدها اقولها قومي فاكره زمان كان بابا عمل عمليه وفعلا طول ما انا كنت معاه في الاوضه ماكنتش بكلم ولا حتى كنت بقوله سلامتك كنت بعد ابصله بصمت كنت بعد اسال نفسي يعني ايه عيان ويعني ايه تعبان وليه مش عارف يقوم ويمشي كان عقلي صغير انه يستوعب يعني ايه تعب


وكبرت وبدات افهم يعني ايه تعب ومرض بس ماقدرتش اتخلص من عادتي القديمه في اني مابقدرش اشوف حد من عيلتي تعبان او مريض بعد برضو ابصله بصمت غريب واضح ان عقلي لسه رافض يستوعب

دلوقتي وانا بكتب البوست ده انا في اشد حزني لان اختي تعبانه قوي وعملت عمليه قدامي من غير بنج عيطت صوتت اتألمت كنت معاها وماسكاها كنت حاسه ان قلبي هيقف
الغريب ان انا كمان عملت عمليه قبل كده من غير بنج وبرضو اتألمت وصوتت وعيطت بس الي اكتشفته ان الألم الي بيحس بيه المريض اخف بكتير من ألم قلبي على اختي الي حساه دلوقتي والي بحسه في كل يوم بروح معاكي يا حبيبتي المستشفى بغيرلك على الجرح وانتي بتتألمي وبتمسكي في ايدي جامد وانا بكون هموت

مش هقول غير الحمد لله يارب على كل شئ واحنا احسن من غيرنا بكتير ويارب اشفيكي يا اختي قريب ويارب اشفي كل مريض يارب وياريت يا جماعه تدعولها معايا

هناك 45 تعليقًا:

عاشقه الرومانسيه يقول...

اووووووووووول تعليق
هيييييه
احجز وارجع

عاشقه الرومانسيه يقول...

زعلت علشان اختك قوى
):

الف سلامه عليها
وربنا يقومها بالسلامه وابقى طمنينا عليها
انا كمان مريت بمواقف زى دى كتير
وبابا الله يرحمه ويعافيكى انتى واهلك
دخل مره يعمل عمليه وفضل فى اوضة العمليات من الساعه 9 صباحا لحد الساعه3 مساء وانا وماما واخويا واقفين على رجلينا

فعلا المريض بيكون المه احف كتير من الم اهله

ربنا يشفيها ياااااااارب

عاشقه وغلبانه يقول...

مين بقي اللي قاعد علي باب المدونه ياعاشقه الرومانسيه...؟؟
انتي هاتفضلي اول رد كده كتير
اهئ اهئ



الف سلامه علي اختك ياحاسوباتيه
بس عمليات ايه اللي من غير بنج دي ياختي ...؟؟
دي لو بتشيل سنط هاتخد بنج موضعي
هههههههههههههههههههه

الف الف سلامه عليها
ويارب ماتشوف شر تاني

حاسوباتيه يقول...

عاشقه الرومانسيه
شكرا ليكي جدا وفعلا احنا الي بتعب قوي

حاسوباتيه يقول...

عاشقه وغلبانه

هي فعلا خدت بنج موضعي بس كمان تعبت قوي وحست بألم كبير شكرا ليكي جدا

احساس طفلة محبة للرومانسية بس واقعية يقول...

حاسوباتيه الف سلامة على اختك
ربنا يتم شفائها على خير

انا عارفة ان فى عمليات بدون بنج بس دا برة الدول العربية كلها
يعنى لو العملية بسيطة والانسان يقدر يستملها مش بيدولوا بينج وبيحاولوا ميدهوش ادوية كتير

بس جوة مصر لا اول مرة اسمع عن عمليات بدون بنج
بجد اكيد حاجة مؤلمة ليها وليكى
ربنا يخفف عنكم

تقبلى مرورى

حسام غانم يقول...

ألف سلامة على أختك

ربنا يشفيها ويشفي جميع مرضى المسلمين

الشموع البيضاء يقول...

شفاها الله وعافاها
انا بردو كده بيتوجع قلبى على اى حد بيحس بتعب ومرض سبحان الله
الالم والمرض ده اكتر حاله بيكون الواحد فيها ضعييييييف
اسال الله ان يشفيها شفاء لا يغادر سقما
يشفيها ويعفوا عنها وسلامنا ليها

القدر و انا يقول...

حاسبوتية
اول مرة ازورك الاقى اختك تعبانة
الف سلامة عليها....
بس لازم تعرفى ان التعب ده اختبار من ربنا لعباده المؤمنين..
ويثابوا عنه يوم العرض عليه..
فلا تزعلى واعلمى ان
لكل شيئ ............
حتى المرض
جانب مضيئ .........
تحياتى

حواء يقول...

الف سلامه علي اختك
شفاها الله وعافاها
ربنا يقومها بالسلامه

رؤية يقول...

الف سلامة عليها
وان شاء الله طهور
وربنا يشفيها باذنه تعالى

تحياتى

adel يقول...

تص
قي انا كده مبحسش لما بتعب بس لما حد قريب يتعب بحس اني مكانه و اكتر

ربنا يقوم اختك بالسلامه

بسمة انور يقول...

الف سلامة عليها

انتى فعلا حد رقيق اوى

صوت من مصر يقول...

اولا الف سلامه لاختك وربنا يشفيها
بس الاهم من كده انها تخف لانها لو خفت مش هتحس بوجع نهائى

Eno يقول...

ربنا يشفيها ويقومها ليكي بالسلامه

ابقي طمنيني باه عليها

ويارب مايتكرر وجع القلب ده ولا عليها ولا علي حد عزيز عليكي

دمتي بكل خير :)

دعاء العطار يقول...

ربنا يشفيها يارب ويقومها بالسلامه

على فكره انا زيك بالظبط

مش بستحمل اشوف حد تعبان

وببقى نفسى اخفف التعب ده

بس طبعا مش بايدى

Kiara يقول...

ربنا يشفيها يارب ويعافيها

الشاعر الحزين يقول...

حاسوباتيه

أول تعليق ليا فى مدونتكوان شاء الله مش الاخير
ويــــــــارب يشفى أختك بسرعه قوى قوى ويشفى كل مرضى المسلمين جميعا وتقبلى مرورى المتواضع جدا تحياتى

أبو العريف يقول...

الف سلامه عليها
معاكي حق
التعب اللي الانسان بيشوفه لما حد قريب منه يتعب
اكتر من لو هو اللي تعبان
ربنا يطمنك عليها

موناليزا يقول...

ياحبيبتى ربنا يشفيها ويقومها بالسلامة ويطمنك عليها

شيماء جمال(شيمو القمر) يقول...

ألف مليون سلامة على أختك يا جميلة
قلبك رقيق قوى وحساس جدا علشان كده مش مستحملة ده وأنا برده أكتر حاجة بكرها إنى أشوف حد عيان عامة ، وبابا وماما الاتنين تعبوا مع بعض أعدت جمبهم أعيط ، يمكن حسيت إنهم ممكن يبعدوا عنى أو إنهم ظهرى .لا عليك

تحياتى يا عثل
شيمو القمر

ELMASRYA - MOSLEMA LELLAH يقول...

اللهم رب الناس اذهب البأس اشفي وانت الشافي

شفاها الله وعافاها يا حاسوباتية

ربنا يطمن قلبك على أختك ويقومها بالسلامه وتسترد صحتها وسلامتها اللهم آمين

بنوتة يقول...

السلام عليكم
ربنا يا رب يعجل من شفاها ويتم شفاها على خير
ويجعل مرضها في ميزان حسناتها
تحياتى ليكى
وسلام

GiGi world يقول...

ربنا يشفيها ويارب يكون معاكى ياصاحبه القلب الرقيق ده
بجد يارب يشفيها
اسال الله رب العرش العظيم ان يشفيها يارب

غير معرف يقول...

الف الف سلامه يا حاسوبه
اللهم اشفيها و اشفينا و اشفى مرضى المسلمين

الالم نعمه من نعم ربنا علينا حتى نتذكره و نشعر بقربه و رحمته بنا
و نستلذ بالدعاء و التضرع له

دوووا مرضاكم بالصدقه صدق سول الله صلى الله عليه وسلم

ريمان يقول...

السلام عليكم


يا حبيبتى

هونى على نفسك يا حبيبتى

اسال الله العظيم رب العرش العظيم ان يشفى اختك


وان يتم شفاؤها على خير

باذن الله

وابقى طمنينا عليها

princess يقول...

ربنا يشفيها يارب
ولازم تحاول تتماسكى شوية على الاقل عشان خاطرها
انا عارفة انه صعب بس حاولى بجد

*البت المشمشية *حلوة بس شقية * يقول...

ألأف سلامة يا جميل
وربنا يبعد عنكو اى شر

شمس النهار يقول...

سلامتها الف سلامه
انت عارفه ان الم الانسان علي الالم حبيبه بتكون اضعاف المتألم نفسه
ربنا يخليكم لبعض

زهرة الياسمين يقول...

الله يشفيها يارب

و تؤجر على كل آلامها ان شا الله

و الله يخليكم لبعض و يزيد من المحبه و الألفه بينكم ^.^

...

أول اطلاله لي هنا ^.*

Unknown يقول...

السلام عليكم ورحمة
الله تعالى وبركاته
اسأل الله العظيم
رب العرش العظيم
أن يشفى اختك وجميع
مرضى المسلمين اجمعين
شفاءاً تاما لا يغادر
سقما .اللهم امين.
دعواتى لها بالشفاء
العاجل إن شاء الله.

لجين أبو الدهب يقول...

شفاهاالله وعفاها وشفى جميع المسلمين ..

انا برده كنت زى حالاتك كده وانا صغيرة ..

بس بعد ما كبرت بقيت العكس ..

بقيت احاول اضحك معاهم اخفف عنهم .. ولا عينين اوى ممكن فعلا اعيط وافضل تحت رجلهم لغاية ما يخفوا ..

ما تحزنيش لعله تكفير ذنوب لها ان شاء الله ..

ربنا يشفيها ويعفو عنها ..

وربنا يبعد عنكم كل سوء ..

سلوى يقول...

ربنا يشفيها ويعافيها يارب

ويخليكوا لبعض

ألف سلامه لها .. خدي بالك منها
هي أختك أكبر ولا أصغر ؟

ربنا يحفظكم
اللهم آمين

hasona يقول...

السلام عليكم

ألف سلامة
ربنا يشفي أختك
ويعافيها
وتعود الي حضنك بألف سلامة

ويساعدك علي تقبل ذلك الوضع علي الاقل بعقلك ان لم يكن بقلبك

وفعلا أحنا أحسن من غيرنا

ستيتة يقول...

النهارده كنت على سفر
وربنا ذكرني بيكي واختك
دعيت لكم علها تكون ساعة اجابة

شفاكم الله وعافاكم ولا اراكم الا ما يسر قلوبكم

ستيتة يقول...

النهارده كنت على سفر
وربنا ذكرني بيكي واختك
دعيت لكم علها تكون ساعة اجابة

شفاكم الله وعافاكم ولا اراكم الا ما يسر قلوبكم

اقصوصه يقول...

الله يشفتي اختك

ويعافيها يا رب

اللهم امين :)

wafaa يقول...

ربنا يعافيها ويعفو عنها يارب
ويجعل صبرك والمك فى ميزان حسناتك
تحياتى للقلب الطيب

سمكه واحده يقول...

اللهم اشفيها واشفي مرضانا وامراض المسلمين
ربنا يقومها بالسلامه ان شاء الله
الف سلامه لاختك يا حسوباتيه
ان شاء الله خير اصبروا وان شاء الله ربنا يقومها بالسلامه وميحرمكوش من بعض
انتي هتقوليلي علي وجع القلب
اخاصا لما يبقي حد غالي عليكي اغلي من نفسك
ربنا ميحمرش اي حد من حد بيحبه ويخليلك اختك ويخليلي اختي يارب
اللهم امين ويشفيها هي كمان
شفاها الله وعافاه
ادعلها كتير وانتي في المستشفي الملائكه بتكون عند المريض والدعاء ان شاء الله مستجاب ربنا يخفف الامها

عمرو يقول...

ربنا يشفى كل مريض و يقوم أختك بالسلامه يا رب عن قريب اٍن شاء الله
فعلا الواحد بيتألم و بيحزن للمريض أكتر ما بيتألم على نفسه و دى كانت عن تجربه شخصيه مرت بى
ربنا يقويكى و يكتب الصحه و السلامه للجميع

romansy يقول...

الف الف سلامه عليكى وعلى اختك
مش مهم نتالم المهم يكون فيه حد جنبنا يطمنا ويطمن علينا

فكرة من الزمن ده يقول...

الف سلامة عليها وربنايشفيها ويشفي كل مريض
لما تدخلي عليها حطي ايدك عليها وقولي اسال الله العظيم رب العرش العظيم ان يشفيك 7 مرات وده حديث عن الرسول عليه الصلاة والسلام انه ضمن انه ربنا يشفي المريض باذن الله
تحياتي عر مشاعرك الرقيقة وربنا يخليكو لبعض

Bongo يقول...

ألف سلامة علي اختك و ان شاء الله تخف و تقوم بالسلامة

اللهم اشفها شفاء لا يغادره سقما

اللهم آمين

dreem يقول...

سلامة اختك وسلامة قلبك وما تقلقيش ان شاء الله هتبقى كويسة وانتى حاولى تجمدى قلبك شوية
ربنا يكمل شفاها على خير

غير معرف يقول...

الف سلامة عليها وربنا يشفيها

مؤلم اووي انك تشوفي حد غالي عليكي مريض

ربنا يقويكِ ويصبرك

وابقي طمنينا عليها

ربنا يشفيها ويشفي جميع مرضى المسلمين

تحياتي