12‏/3‏/2009

قرار صعب وصح (جزء الاول)


البوست ده طويل قوي فهقسمه على جزئين هي تعتبر موقف او ممكن تقولوا عليها موضوع في احاسيس كتيره بتحصل لكتير مننا وعايزه رايكم فيها نبدا بالجزء الاول وللعلم انا حاولت اختصر كتير من التفاصيل الي اعتبرتها مش مهمه بسم الله
--------------------------------------------------------
اتصال هاتفي وترد هي

هي: اهلا ازيك عامله ايه

صاحبتها: الحمد لله على كل شئ

هي: عملتي ايه؟

صاحبتها: عملت الي قولتك عليه سيبته

صمت من هي وصاحبتها لمده ثواني

هي: وانتي عامله ايه دلوقتي؟

صاحبتها: حاسه بوحده بحزن ايدي كل شويه بتمسك الموبايل نفسي اكلمه اسمع صوته

هي: ده كان قرارك

صاحبتها: كان قرار عقلي وكان القرار الصح للاسف انتي عارفه كويس كانت كل حاجه بينا مختلفه حياتنا مستوانا كل حاجه كانت كل حاجه بتقولي انه هيكون جواز فاشل حاولت حاولت كتير اني اقول لنفسي هقدر لكن ماقدرتش وماعرفتش

هي: ايوه عارفه صعب اننا نضحك على نفسنا ونقول هنقدر وبنحب بعض الجواز مش حب وبس الجواز حياه الجواز عيلتين بيدخلوا في بعض لازم يكونوا قريبين من بعض

صاحبتها: حتى لما ماما شافتني كده على طول بفكر سالتني وقولتها قالتلي طبعا ماينفعش هو صحيح مستقبله كويس بس هتعرفي تعيشي حياته هتعرفي تعيشي في الارياف وانتي الي عمرك ماروحتيها هتعرفي تعيشي في بيت عيله عايشين كلهم سوا وانتي الي طول عمرك بتحبي الاستقلال والخصوصيه في حياتك ؟ بينا وبينهم اختلافات كتير ممكن لعلمك يكون مافيش اخلاف مادي بينا كبير بس بكلم عن الاجتماعي وده الاهم وده الي هتعيشي معاه

هي: انتي قولتلها ايه؟

صاحبتها: فكرت في كلامها ولقيت اني مش هعرف اهون عليا انه يكون ذكرى حلوه في حياتي عن انه يبقى قرار جواز خاطئ اخدته اندم عليه العمر كله

هي: يبقى قرارك كان صح يا حبيبتي وماتزعليش الزمن بيداوي كل حاجه

صاحبتها: حبيته قوي اول انسان دخل قلبي لما حبيته الدنيا كلها كانت حلوه ليه بس ليه ماقدرتش اقول لقلبي لا ليه

هي: لان قلوبنا مانعر فش نتحكم ومش كل حاجه بتمناها بنلقاها ان شاء الله ربنا يجعلك نصيب احسن

صاحبتها(وكانت صوتها كله دموع): تعبانه قوي خايفه اضعف بس علشانه وعلشاني سيبته وانا بحبه

السؤال هنا ياترى قرار صاحبتها كان صح ولا غلط وهل لو وافقت كانت هتكون فعلا جوازه فاشله ؟ مع العلم ان الشخص ده كمستوى علمي هو زيها وهيكون اعلى بس كمستوى اجتماعي لا




هناك 39 تعليقًا:

عاشقه وغلبانه يقول...

اهئ اهئ
عااااااااااااااا

مش بحب الحاجات المأساويه دي

بكره تلاقي نصيبها
بس زمانها موجوعه اوي
ربنا يصبرها
اهئ اهئ

عاشقه وغلبانه يقول...

كنت معاكم
اول تعليق

عاشقه
ورومانسيه
وركبي بتوجعني

اهئ اهئ

احساس طفلة محبة للرومانسية بس واقعية يقول...

انا اعترض اعترض اعترض

يعنى هو مكنش فى امل خالص
انهم يمشوا حياتهم مع بعض

لو الاختلاف اجتماعيا كبير يبقى اكيد قرارها صح وكان لازم عقلها يتدخل ودا هو الوقت المناسب للقرار دا

لكن لو الاختلاف بسيط ويقتصر على العيش فى الارياف يبقى لا دى متستهلش فراق لانها تقدر تعيش معاه بعيد ويبقوا يزوروا اهله على فترات

متابعة معاكى الجزء التانى
تقبلى مرورى

princess يقول...

انا اعترض بشدة
يا جماعة الفلوس والكلام ده ولا حاجة
المستوى العلمى واحد يبقى كويس اوى اوى
وبعدين مالهم الارياف
اعترض اعترض

ELMASRYA - MOSLEMA LELLAH يقول...

غريبه جدا

طيب بصي يا حاسوباتية

طالما متساويين في المستوى العلمي والمادي والفرق الوحيد ان اهله من الريف

ليه ماتبقاش ليهم هما حياتهم في المدينة عادي

ماهو أكيد شافها وارتبط بيها في المدينة وفرص العمل في المدينة متاحه طبعا وفيالريف منعدمه

يبقى ليه ياخدها بيت عيله في ريف ؟

بس للأسف رغم كل الحب ده والتوافق ده لازم تسيبه لأنها هتتعب جدا في عيشتها مع اهله

وبعدين الحب بيكون في الأول جمرته مشتعله بعد الجواز حياة عادية بقى

يبقى هتقلاقي نفسها عايشه عيشه صعبه ومرفوضه وجوزها في الوقت ده هتلاقيه جزء من هذه المنظومه التي ترفضها

في انتظار الجزء المتبقي

دمتي سالمة

simply me يقول...

للاسف الحب لوحده مش كفايه

والاختلاف فى المستوى الاجتماعى ده صعب اوى
لانه بيبقى اختلاف فى العادات والتفكير والاسلوب فى التعامل
واكيد كان صعب جدا ومستحيل انهها هتعيش معاه فى الريف مع اهله

يمكن لو كان استقر فى المدينه كان ممكن

ربنا يصبرها واكيد هتتعب كتير وتزعل كتير
بس القرار ده كان صح

عمرو يقول...

ممكن نقول اٍن القرار صح نوعا ما
الحب لوحده مش كفايه و لا المستوى المادى و لا التكافؤ العلمى و الثقافى
فيه كان مش المستوى الاٍجتماعى و لكن مدى تلائم مستوى الطرفين الاٍجتماعى مع بعض لأن اللى بيتجوز مش بيتجوز الطرف الآخر لوحده و لكن بيتجوزه هو و عائلته و أهله و بيئته اللى نشأ فيها و اللى أكيد حتكون مؤثره على حياتهم فيما بعد
فى رأيى اٍن التكافؤ بين الطرفين مطلوب فى كل شىء و لو بنسبه معقوله يعنى مش لازم مائه فى المائه
و بعدين الحياه فى الأرياف مش عيب و لا حاجه لكن فعلا صعب على اللى نشأت فى المدينه أن تتوافق مع حياة الريف و مع طبائع أهلها اللى أكيد حتكون مختلفه عما تعودت عليه
لأ أنا شايف اٍن القرار صح

شيماء جمال(شيمو القمر) يقول...

كل شئ فى الدنيا يكون قدراً
هى ما تفعله أن تصلى لله صلاة استخاره وتطلب من ربنا لو لهما نصيب سويا أن يقتربا أو لو ام يكن لهما نصيب أن يبرد قلبها وتبدأ حياتها من أول وجديد وتبدأ فى تحديد مستقبلها .

أدعو لها بالارتياح وأن يبرد الله قلبها والسعادة

تحياتى
شيمو القمر

Eno يقول...

عارفه انا ليه واحده قريبه مني اوي
ظروفها زي صحبتك بس صحبتي دي قررت انها تنسا حياتها وتبعد عن اهلها وتنسا كل حاجه في سبيل انها تفضل جمب الشخص اللي بتحبه وعملت كل اللي في وسعها عشان موضوعها يتم واهو تم الحمد لله

اتمني انها تعيش في سعاده فعلا والجو اللي انتي بتوصفيه الارياف وبيت العيله مش يكونو عائق ليها في اي حاجه مع انها كانت لما تتكلم معايا في اللي بتحلم ترتبط بيه انه يعيشها في مستوي كويس وتسكن في حي راقي !!

قرار صحبتك ده من عقلها واخطاء العقل في الموضيع دي قليلا لما بتكون خطاء

تحياتي مستنيه الجزء التاني مش تتأخر باه :)

حواء يقول...

انا معرفش بصراحه
بس هي عليها وعلي الاستخاره
لكن راي المتواضع عن تجربه
لو تقدر تنعزل لوحدها
يبقي احسن وبكده تقدر تحسن المستوي الاجتماعي بتاع جوزها
لكن لو مش هتقدر يبقي انصحها بلاش
بس تستخير احسن

صوت من مصر يقول...

صح هى صح
وكل واحده بتفكر فى مستقبلها صح والى بيحب بيبقى مجروح دائما ؟؟؟؟؟؟؟

الشموع البيضاء يقول...

للاسف الموضوع بيكون صعب خاصة انك تاثرى على القلب وتمشيه بالعقل
بس بجد عن تجربه الجواز مش حب بس دى حاجات كتير مع بعض بس ممكن يكون فى حل من ناحية حاجه انه هو كمان يقدر يتنازل شويه عشان بيحبها ليه ميعيش فى المدينه ومستقبله هيكون كويس مش لازم يكون انانى هيا تغير كل حياتها عشان بتحبه طيب هو عاوزها وعاوز اهله وحياته طيب هو ضحى بايه؟
بصى انا اتحطيت فى الموقف ده قبل كده وكان نفس القصه نفس المستوى العلمى والمادى بس الاجتماعى واهله فى مكان تانى وكانوا متمسكين بوجوده معاهم هناك جدااا المهم حصلى زى صاحبتك وقلبى وجعنى وفضلنا نحارب ونحارب والنصيب غلب ومكملناش وبعد مرور السنين ودلوقتى اتجوزت لقيت اننا فعلا مكناش هنبقا سعدا وان دى كانت ثورة عاطفه وكان ممكن نكرة بعض بعد كده او نندم
فى رايى زى ماقلت يا يوصلوا لحل وسط ويقدر انها عايشه حياة بشكل معين ويضحوا سوا او ان النصيب جاى فى السكه ربنا كاتبه فوقته ومعاده لعلنا نكرة شىء ونشوفه شر وهو خير ربنا كاتبهولنا عشان مش عارفين الخير فين

adel يقول...

مممممم

بصي لو مستقبله كويس و مضمون و بيحبوا بعض بجد ترجعله و اي مشكلة سوا هيحلوها و لازم تتعب معاه شوية لحد ما يعيشها زي ما تحب

غير كده يسيبوا بعض احسن

شمس النهار يقول...

طبعا قرار صح الجواز اصلا نقله اجتماعيه وتغيير لنمط الحياه اللي الواحده عاشت عليه في بيت اهلها
عشان شخصيتين بيندمجوا مع بعض ويعملوا حياه وشخصيه جديده ونمط جديد يجمع بينهم ويكون مريحهم
فاكمان مايبقاش تغيير جزري كده تماما
اهل الريف لما بيتجوزوا في مصر واولادهم بيعيشوا في مصر بيكون من الصعب الابناء دول يرجعوا لعيشة الريف اللي هي اصلا بتاعة اهلهم
يبقا ازاي بتاعت مصر اصلا هتعيش في الريف وكمان بيت عيله
قرار سليم

romansy يقول...

لو كل واحده ساكنه فى مدينه فكرت كده يبقى بقى اللى فى الارياف يتجوزوا مين وغير كده بتحبه وبيحبها
والمستوى العلمى والمادى واحد
ياستى دلوقتى اسكنى مع اهله وبعدين قررى الحياه الجديده وبعدين ممكن تقتعيه بعد كده انه ياخد شقه فى المدينه او غيره على حسب ما تقنعيه وانتى مش عارفه الظروف

Ahmed يقول...

معلش بأه انا فعلا متغاظ
هو كويس ومستواه كويس ومخه شغال وهيا بتحبه
يبقى ايه المشكله؟

ليه مش هيقدروا؟!!!!!!!!!!!!

وبعدين لو فعلا هيا معندهاش استعداد انها تعيش معاه بعيد, طب ليه بدأت الموضوع من الأول؟ يعني هيا مكنتش تعرف أنه من بعيد؟

الواضح من الكلام انها ربطته معاها لفتره. والربط ده يعني ادته أمل, وبعد كده تقول مش هقدر

طب ماكان من الأول ولو يعني لازم نربطه كده على الفاضي؟

أم فريده يقول...

انا هرد عليكى من واقع تجربة انا شيفاها قدامى

انا عندى صديقة كانت بتحي زميلها وهو بالفعل كان فى فرق فى المستوى الاجتماعى

بالرغم من اهلة واهلها ساكنين فى منطقة واحدة الا ان اهلة ساكنين فى بيت قديم من ثلاث ادوار واخدين شقة ايجار

واهلها فى عمارة جديدة كلها بتاعتهم

وقاعدين فى شقتين الشقة الواحدة فى دور لوحدة
يعنى دورين

واتجوزوا مسمعتش كلام حد الا قلبها
وهى دلوقتى متجوزاه وجابت منة اولاد
وهما عايشين فى شقة ايجار جديد ومديونين
وتعبانة اوى اوى

لية نجيب التعب لقلوبنا بأدينا
مع كترت التعب هتحس ان الحب ضاع ومستحيل انها تجوزة وتبعد عنهم لان دول اهلة
وخدى بالك هو طبعة زيهم بالضبط مها لف وراح واخد احسن الشهادات عمره ما هيغير جلده

هى بس مش شايفة حقيقته عشان هى شيفاه من برة

لو راحت عاشت وسطيهم وشافتهم مع بعض اكيد هتغير رأيها

ربنا معها

Rosa يقول...

قرارها كان صح لان الاختلاف الاجتماعي ده عليه عامل كبير قوي قوي مش ممكن تجاهله بالذات في الجواز... الي بيحصل ان الناس بتحبط من بعض قوي بعد كده لما كل واحد ليه سلوكياته و عاداته و بيئته المختلفه فيتصدموا في بعض و يضيع الحب او على الاقل يعانوا ده بيحصل للناس الي في نفس المستوى الاجتماعي ما بالك بالناس المختلفه.. كمان البيعيش في المدينه صعب عليه قوي يعيش في الارياف يمكن العكس مش مشكله.. و في حديث فيما معناه ان بنت المدينه ماتتجوزش في الارياف
هيا هتتعب شويه بس احسن لمستقبلهم .. يمكن لو هو جه و عاش في المدينه يمشي الحال شويه لكن العكس صعب
في انتظار الجزء التاني :)

MǿиY El-Shreef يقول...

اولا ازيك (:

ثانيا صاحبتك صح اوي

في حجات كتييير لازم نراعيها قبل الجواز ..نصيحه اقري البوست الاخير بتاع خيخة وهتعرفي والله ان قرارها صح .. اه الفراق بيوجع خصوصا لما يكونوا اتنين بيحبوا بعض بس ان شاء الله مستقبلا هتعرف انه صح

مستنيه الباقي ,,

موني

الشاعر الحزين يقول...

الجواب فى كلمتين

احنا مين ؟ وليه ؟ وفين ؟

احنا بشر مش ملايكه

والخطأ وارد

لكن الألم أصعب

وهو ملوش ذنب

وهى أخطأت وتعبت وهتندم

أرجو أن أكون أفدت

تحياتى لكى

maioya يقول...

والله مش عارفه اقول هيا صح ولاغلط
هيا ادري بظروفها
ولو اني ممكن اكون مش موافقه اوي
علي القرار اللي هيا اخدته
كان ممكن يبقي في شويه امل
ان الموضوع يتم ويبقي كويس
وجايز تقدر تعيش معاه طالما حباه
وجايز هوا اللي يبدل ويطلع
للمستوي بتاعها
والله اعلم بردو
لو ليها نصيب فيه
مهما عملت هايجيلها تاني

عاشقه الرومانسيه يقول...

اكيد طبعا قرارها كان صح
ولو على حبها هيجى يوم عليه وقلبها يهدى
وهيكون جواها له ذكريات حلوه كتير

وده من وجهة نظرى افضل من ان جوازها يفشل وفى النهايه ترجع ومعاها طفل منه

يعنى تخرج بطولها وترجع شايله وساحبه

قرار الجواز بيكون قرار مصيرى
لان الانسان ده اللى هتكمل معاه الباقى من عمرها
يعنى مش عشرة يوم ولا اتنين وخلاص


ربنا يرزقها باللى يعوض لها حبها اللى راح

هوندا يقول...

الحب وحده لا يكفى

بس هيا مفكرتش فى حاجة زى كده م الاول ازاى؟؟؟

بنت الغربة يقول...

حبيبتى ياحاسوباتيه
صعب قوى حد يحكم على الموضوع ده ....
لان ماحدش عارف اللى فى القلوب...
وماحدش طبعا يعرف الغيب..
ياما فى جوازات من نفس المستوى الاجتماعى ...وفشلت فشل ذرييييع...
وياما فى جوازات واحد بيضحى برفاهيته علشان التانى ....وبتنجح...
المهم هل الحب قوى كفايه علشان يستحمل المطبات اللى فى الدنيا...
ليس كل مايلمع ذهب..ده حقيقى..
يعنى تفتكرى لما المستوى الاجتماعى يكون زى بعضه او احسن ...كده يبقى هى ضمنت انها هتبقى سعيده ومبسوطه طول عمرها....لالالالالالالالالالا
كل اللى هتكسبه هو نظرة الناس ليها انها اخدت واحد مستواه الاجتماعى راقى او لأ....
صدقينى هى دى الحقيقه....
ماحدش بياخد كل حاجه فى الدنيا ...
المهم ان الانسان اللى معاها يكون بيحبها حقيقى ومستعد يتغير علشانها ..ويكافح علشان يحسن مستوى المعيشه بعد كده ...وطظظظظظظ فى كلام الناس ورأيهم ...الف طظ..
تحياتى ليك ياجميل ومعلش للتطويل..

elsha3er يقول...

السلام عليكم

انا بعتقد اللى عملته صح لان حسب القصة هى مدنية وهو ريفى وبكدة يبقى فى فرق كبير جدا تقاليد وطباع وخصوصا زى ما قولتى لما حد بيتعود على الخصوصية صعب جدا يخلى اى حد يتدخل فى حياته مش حنقول كلام افلام وبدل انتى بتحبيه حتكملى وتستحملى كل دة بينهار مع اول مشكلة

تحياتى


لقلمك

احمد الشاعر

*البت المشمشية *حلوة بس شقية * يقول...

وايه يعنى
الحب لازم يبقا فيه تنازلات بس مش الكرامة
لو بتحبو وهو بيحبو
خلاص وايه المشكلة

DoNyA يقول...

قرار صعب اوي اوي
وصعب ان اي حد يقرره لازم يكون شخص قوي
وبجد اللي ايده في المايه مش زي اللي ايده في النار
مينفعش اقول رأي وانا باصه من بره الشيش
لاني لايمكن هقدر اعيش الانفعالات ولا المشاعر الحقيقيه بينهم

ربنا معاها
انا بجد حاسه بيها جدا

رئـــــيسـة حزب الأحلام يقول...

بصى والله انا صعبان عليا الحب وبالذات الحب دة حاجة غاليه اوى صعب اوى الانسان يفرط فيه بس اكيد فى حاجة غلط ربنا يوفقها يارب ويسعدها
تحياتى لكى

حاجــ عيال ــات يقول...

آه من الحكايات المأسوية دي
ربنا يسعد كل البنات يارب

موناليزا يقول...

فيه مثل بيقول "وجع ساعة ولا وجع كل ساعة"
هى اه هتتعب دلؤتى لان الفراق طبيعى صعب لكن بعد كده هتنسى
وهى فعلا عرفت تقرر لان صعب مايكونش فيه تكافؤ اجتماعى بينهم
وربنا يسعد الجميع

تامر علي يقول...

عبيطه .... كانت هاتروح الأرياف تاكل بط ووز وحمام محشي بالفريك وملوخية بالانارب وتركب الحمار وتشوف الجاموسة رأي العين مش في التليفزيون .... وكمان هاتشوف الترعة وتشملها نفسين مليانين اوكسجين .... وممكن تعزق الارض وتاخد المنديل وتروح لجوزها بالغدا زي نجوى ابراهيم في فيلم الارض لو عطشانه نرويها بدمانا .... ضيعت نفسها بتسرعها ده ... يالا مش مهم ...تشوف واحد تاني وخلاص .... الرجاله كتير برضو :)

سلوى يقول...

لو هو شخص بينهم حب فعلا
وهو دينيا .. إنسان يعرف ربه صح يعني مش هيظلمها
وكل شئ تمام بينهم ما عدا الظروف الإجتماعيه
وهو من الأرياف وهي من الحضر

فأعتقد إنها مكنش لازم تاخد قرار البعد ده

لكن كل إنسان أعلم بقدراته
وإيه هيتحمله وإيه لأ
والله لا يكلف نفس إلا وسعها
وطالما هي شايفه إنها كانت هتكون جوازه فاشله بسبب طبعا إنها متعوده على حياه معينه ومش هتقدر تتخلي عنها
فهي أعلم بقدراتها
ويبقى قرارها قرار صائب بالنسبه لها

لكن عايزة أسألها سؤال

إفرضى إنك إتقدم لك واحد في نفس الظروف الإجتماعيه وهيعيشك عيشه مستقله
لكن إكتشفتي بعد كده إن أخلاقه زفت
هل هتكوني مرتاحه ؟؟؟

طيب بلاش ده
هل لو ارتبطي بإنسان كويس ومناسب لكن مش قادره تحبيه أو تتفاهمي معاه

هل هتكوني مرتاحه؟؟

طيب سؤال تاني
هل هتقدري تنسي الشخص اللى سيبتيه ده
ولا هتفضلي طول عمرك فاكراه ؟؟

شوفي عزيزتي وكلامي طبعا لصاحبه المشكله

مفيش حد كامل
أي حد هيتقدم لك هيكون فيه شئ ناقص
لو وجدتي المال مش هتلاقي الحب مثلا
ولو لقيتي الحب مش هتلاقي المستوى الإجتماعي المناسب

يبقى إيه ؟؟
لازم تشوفي إنتي ممكن تتنازلي عن إيه في سبيل إيه

وفي كل الأحوال زي ما قلت قبل كده
كل واحد أعلم بقدراته
وإيه يقدر يتحمله وإيه لأ

أتمنى ربنا يهديك للصواب
وياريت في أمر زي كده
تصلي استخاره
فالله أعلم بالخير
وسيهديكي له

GiGi world يقول...

كلام صح
بس بجد هو قرار صعب
بس صح

Sweet Violet يقول...

بصى ياقمر من واقع تجربتى انا

انا كنت مخطوبه لواحد مستوى التعليم و المستوى الاجتماعى كويس جدااا و مافيش فرق بينا لكن كان قاعد فى الصعيد .. بابا نصحنى و قالى انتى لما بتروحى البلد اى نعم بتكونى فرحانه و مرتاحه لكن مش هتقدر تقعدى هناك اكتر من اسبوع يبقى ازاى هتقدرى تعيشى عمر فى الصعيد مع عادات و تفكير مختلفه نهائى ؟؟

ماينفعش بنت اخدت على حياة المدينه تقعد غير فى مدينه و بالفعل طلع بابا عنده حق و ده اللى اكتشفته بعد كده و الحمدلله

معلش الحياة الزوجيه مش حب و بس الحب مجرد اساس فقط لكن فى حاجات تانيه لازم نفكر فيها

wafaa يقول...

باختلاف المستوى الاجتماعى هتلاقى اهله بيتدخلو فى حياتهم وهما شاشيفين ده عادى ومن حقهم لانهم عيلة واحدة وده حاجة اى بنت بتكرهها
مفيش امل غير انه يكون شخصية قوية ادام اى حد ويقدر يفرض عليهم حياته الخاصةويمنع تدخل اى حد
وبأمانة ده عن تجربة اعز اصحابى
عايشة مع جوزها لوحده مرتاحة بس تنزل لبيت اهله لا حول ولا قوة الا بالله
لحد ما يوم وقف ادام اهله وقال محدش يتدخل بينهم بدأت ملامح حياتهم تبقى احلى والحمد لله ربنا يهنيهم
قولى لصحبتك ما تقتلش حبها لو فى امل فى حياته صديقنى صعب اوى ومش بيموت ابدا بيفضل يعذبنا طول حياتنا

ستيتة يقول...

نفسي اسأل سؤال جوجل ده بيعمل معايا كده ليه

انا دخلت هنا وكنت في أوائل التعليقات كمان

تعليقي راح فين؟
عااااااااااااااااااااااااااااا

مش موافقة انا على الجوازة دي
يعني ايه مستقبله حلو؟ ها يبقى مقرش يعني
ومين قال ان السعادة الزوجية بكده

شوفي من خلال تجربة قوية لستيتة المفترية بنت المدينة استحالة تقدر تعيش او تعاشر او تفهم او تتفاهم مع الفلاحين

هم ناس زي الفل بس مش ها تعرف تتأقلم معاهم

مما يدعوا للدهشة ان البنت سابته من غير ولا كلمة وكانت فاهمة وعاقلة وكاملة .. متين علامة تعجب

قرار صحيح

وانا مزعلش منك ابدا ليه تفترضي كده
انا قرأت الموضوع من قرن فات وعندي اعتقاد جازم اني بصمت عليه

بحبك

momken يقول...

اوحش حاجه ان الماده تتحكم فى مصائر الناس
وهى الى تحدد مدى امتداد مشاعرهم

البوست صدمنى واحزنى جداً

انتى عملاه بحرفيه جميله
تحياتى

mohamed يقول...

شكرا على زبارتك
==============
بأختصار
ليس كل مانحبه يصلح لنا
والعكس
ليس كل ما بصلح لنا نحبه
لماذا؟؟؟؟؟؟؟؟؟؟
لان رأينا يدخل فيه الكثير من الهوى
والعقل والمبادىء اجدر بان تكون مقياس الحكم لآن لها صفة الثبات والاستمرار
عكس الهوى
لكى كل احترامى وتحياتى على زبارتك الكريمه

لجين أبو الدهب يقول...

انا من وجهة نظرى لازم الزواج يكون متوافق فى كل حاجة لان ده عمر وعيشة ..

لازم يكون توافق فكرى ودينى وعلمى ومادى واجتماعى ..

لان اكيد لو مافيش توافق فى حاجة معينة حتى لو عايشين حياة سعيدة هاتكون عدم التوافق فى نقطة معينة هى سبب تعكير حياتهم ..

انا شايفة انها كانت كلمته فى الموضوع ده انه ينقل معشته زهايكون الوضع افضل له ولها ولو هو ما وافقش اظن يبقى القرار اللى اخدته صح بإذن الله ..

ولو هو نصيبها والله لو ايه هايرجعوا لببعض تانى ..

اختك عملت ايه صحيح ؟؟

دمتِ بخير ..