10‏/4‏/2009

جاي في السريع


جاي في السريع ده اسم فيلم ناقش الموضوع الي عايزه اناقشه انهارده والي بسميه الجواز على الطاير الموضوع ان بيكون واحد مسافر بره ينزل اجازه يخطب واحده ويسافر وينزل مره تانيه يجوزها او ينزل مره واحده بسرعه يخطب ويجوز
ماقدرش اقول ان الجواز بالطريقه دي غلط بس انا بستغرب هل الي بتتخطب كده بتتعرف على خطيبها ازاى بتتعرف على طباعه ازاى ؟ يعني مثلا لو واحده مخطوبه وخطيبها حتى بيجيلها مره كل شهر او مره كل اسبوعين فهي بتعاملها معاه وجها لوجه بتعرف حاجات عنه سواء بقى حاجات سلبيه او ايجابيه لايمكن كانت تعرفها من مجرد كلامهم في التلفون مثلا لا دي بتعرفها من تعاملاتهم سوا وجها لوجه
هل فعلا ممكن تعرفي ولو الطباع الاساسيه فيه من مجرد مكالمات تلفون ؟
في رايي لو كان اتقدملي حد كده ماكنتش هوافق لان هكون صعب عليا اني اتعامل مع صوت بس وفجاه الصوت ده يجي ويكون جوزي
طبعا مع احترامي لكل الي عملوا كده لان طبعا دي ظروف لكن انا مجرد بناقش فكره عندي وحبيت اعرضها للنقاش

هناك 38 تعليقًا:

MǿиY El-Shreef يقول...

الاولىىىىىىىى انهارده مش عادي

بصي يا جميل

البنات الي بيوافقوا بكده غالبا .. اما بيكون الشخص ده قريبها وعرفاه كويس وعارفه طباعه

يا اما بنت من الي عايزين يتجوزوا وخلاااص

يا اما جوزا صالونات وهيوافقوا غصب عنهم

انما البنات الي بتوافق غير كده وبرضاها قليله جدا

تصدقي الموضوع ده زاد

البنات بتوافق وبتخاف تعنس وبيقولوا اهو شغال بره يعني معاه فلوس

كل حاجه حوالينا بتأثر ع تفكيرهم

موضوع حلو اوي ع فكره

زيك ياقمره

احساس طفلة محبة للرومانسية بس واقعية يقول...

مونى لا النهاردة صح مش طبيعى
انتى قاعدة على باب المدونات كلها ولا اية ؟
:)

حاسوباتية
انا شفت الفيلم دا
وعجبنى اوى فكرتة وتنفيذة

الموضوع بيبقى لية جانبين
شخصية البنت ودا هى نفسها تكون الحكاية مش فرقة معاها وهى تفكيرها ايجابى وموافقة على الاسلوب دا فى الحياة كلها مش زواج بي
احنا ممكن نختلف مع تفكيرها ويكون لينا رأي معارض بس دا ميمنعش ان فعلا فى بنات كدا

ثانيا ممكن تكون الظروف زى خوفها من العنوسة وان سنها كبير شوية او هى كانت تعرف الشخص دا قبل كدا
او كان فى اعجاب بينهم وقبول وهى على الاساس دا قررت

فى كل الاحوال انا مع فترة خطوبة كبيرة
لان ساعات بيكون فى فترة خطوبة وبتحصل مشاكل وبيكون الزوجين مش عارفين بعض فما بالك بأنعدمها وكمان هيتجوزا ويسافروا يعنى متغربين ودا يزيد الامور تعقيد

لا طبعا اعارض وبشدة الطريقة دى رغم انها واقع وبتحصل

تقبلى مرورى

ريمان يقول...

السلام عليكم

ازيك يا قمر

بصراحه انا معاكى

لان المفروض يكون فى شىء من التعارف العميق بين المخطوبين قبل الجواز ويكون فيه تفاهم وكل واحد يعرف طباع التانى عاشن كل واحد يقدريتكيف مع التانى ويا اما يحصل توافق او لاء

لان غالبا اللى مش بيعمل كده بعد الجواز بيتصدموا جامد

وبتحصل مشاكل

وبالنسبه لموضوع التليفون هو طبعا وسيله للتصال والمناقشه والتعارف بس برضه مش زى المقابله وجهه لوجه لانها بتغير حاجات كتير


تحياتى ليكى يا سكر

adel يقول...

بصي ظروف مش ظروف
انا ضد الجواز ده
ده كأنه يبنزل يشتري كيس شيبسي و يرجع
ازاي واحدة تقبل علي نفسها ده ؟؟؟؟
و اساسا 90% من الجوازات دي بتفشل و النسبة يمكن كمان اكتر من كده

صوت من مصر يقول...

دف فيلم مش هقول فاشل وفكرته كمان فاشله ؟؟؟؟؟؟؟؟؟؟؟؟؟؟؟؟؟
مفيش جواز من غير حب ؟

أهلاويه طحن من يوم ماقولت وااااا يقول...

انا بقتبس adel
_____________
زى ما قال مفيش ظروف تجبر بنت على جوازة زى كده
مع ان الضغط اوقات بيكون كبير علينا وطبعا انتى عارفه الكلمتين المحفوظين بتوع شوفى مش عارفة مين عنست وقاعده لوحدها والكلام ده بيرعبنى

أمبارح كان عمرى عشرين يقول...

ده كله بيرجع لعقليه البنت وهى بتفكر بعقل كويس ولا خايفه تقول لا على حاجه بشوفها ظلم كبير اوى لها
فيه بنات ما بتصدق حد يقول خطوبه وتنخطب من غير حتى ما تعرفه ولا تشوفه المهم تنخطب والسلام
وانا معاكى فى رفضك طبعا :D

تقبلى تحياتى
سلام

الشاعر الحزين يقول...

للأسف الموضوع ده انتشر قوى دلوقتى
وفعلا موضوع يستحق النقاش
لأن فى النهايه أكيد بيكون ده سبب كبير فى فشل العلاقه الزوجيه

لأن لازم أعرف مين اللى هتشاركنى حياتى
ولازم أعرف عنها كل حاجه

وهى برده لازم تعرف مين اللى هيشاركها حياتها ولازم تعرف كل حاجه عنه

عشان تكون راضيه وقابلاه على وضعه


على العموم الموضوع بجد مهم جدا
لكن للأسف فى الأول وفى الاخر احنا مجرد فئه بسيطه جدا من الناس اللى بناقش الموضوع ده
وأتمنى ان الناس كلها فى مصر وفى الوطن العربى والاسلامى تترجم النقاش فى الموضوع ده لفعل مش كلام وبس

وأشكرك جدا جدا على التفكير فى نقاش هذا لموضوع المهم جدا

لكى خالص تحياتى

A.SAMIR يقول...

تأخر سن الزواج نتيجة للظروف الاقتصادية...اظهر انواع من الزواج لم تكن موجودة من قبل
كل بنت بتلاقي اول عريس مناسب يتقدم لها هي فرصة حياتها واهلها بيعتقدوا انه مش هييجي لها حد تاني
وبالتالي بيوافقوا فورااا
مش بعيد بعد شوية يظهر الزواج عن بعد...العريس يكسل ينزل من برة ويبعتوهاله هم
تحياااتي

أحمـــــــــــــد أبو العلا يقول...

سعات بيكون فيه ظروف تانيه يتحكم الموضوع ده

يعني مثلا واحده موضوع الجواز بالنسبه ليها شئ بيضغط على أعصابها واتقدمت في السن

أو بتكون الظروف الماديه هيا اللي بتحكم الجوازه ديه

انا مش بقول ان ده دايما وحش, لكن ممكن يحصل وبرده ممكن ينجح

صبرني يارب يقول...

على فكره هو انتى عندك حق فعلا

انا بقى وافقت على ابو رياض وكان قاعد فى مصر وبيقول كلا البت مش هسافر تاني

وبعدين اضطر للسفر تاني وجه الموضوع فجأه لدرجة اننا سرعنا بالخطوبه وسافر بعد الخطوبه باربع ايام اه والله يا اختي كده

وقعد سنتين بره

لكن وبكل امانه التقدم فى العلاقه ما بينا كان بيتوقف بمجرد سفره
والتليفونات كانت فعلا يادوب مسكنات لا بتقرب بعيد ولا لها اي اثر

خصوصا ما كانش فى نت ولا كلام من ده ايامها

لكن برضه يا جميل احب اقولك ان فى ناس بتتخطب سنين ويفضلوا برضه مرسومين على بعض ومخبيين الحقيقه على بعض ولما يتجوزوا تسقط الاقنعه

ممكن شهر يكون كفايه اوي مع ناس صادقين مع نفسهم ومع شركائهم ويكونوا بيتعاملوا بطبيعيه وصدق فعلاااا


والظروف يا بنتى عادت بتحكم الناس اساساااا وخنقاهم


وارجع واقول اي حاجه ممكن تعرفيها عن جوزك قبل الجواز
مش زي ابدا ما هاتشوفيها بعينك انتى وانتم تحت سقف واحد

تحياتي ليكى يا قمر

فتافيت يقول...

ازيك يا قمر

بصراحة انا ماقدرتش اعملها خالص

مش هاعرف ابقى كده.. اصلا ايام الخطوبة احلى ذكرى

فجأة وبقدرة قادر تبقى مجرد مسدات وايميلات وشوية اتصالات..؟؟

لا مش هاقدر خالص بصراحة رغم ان النوعية دية موجودة كتير جدا وجالي منها بتاع 4 او 5 عرسان

بس صعب اوي اتجوز واحد ما عرفتهوش كويس

ده الواحدة بتعرف الراجل وتتجوزه وتقول ده انا اكتشفت فيه حاجات بعد الجواز اتجوز انا بقى على عمايه؟؟!!!!!!!!!

عمرو يقول...

يمكن تستغربى من رأيى ..
بصراحه شايف أن فى هذا الزمن الصعب و الظروف اللى ما يعلم بها اٍلا المولى فأى شىء ممكن أنه يسهل عملية الزواج و الاٍرتباط بشكل صحيح فلا بأس بها حتى لو كان الزواج سيتم بالوكاله زى ما ناس كتير بيعملوا ..
الحقيقه طالما أنه مش عيب و مش حرام يبقى ليه حنصعب المسائل على البنت ؟؟ ليه ؟؟
الزمن بقى صعب أوى أوى يا باشمهندسه و فرص الزواج حقيقى بتقل بجد يوم بعد يوم يبقى التيسير مطلوب و ده مش عيب ..
تقبلى تحياتى و تقديرى ..

الشموع البيضاء يقول...

انا رايى ان الموضوع ده داخل فيه عوامل كتيره الشخصين نفسهم والوقت وشكل العلاقه لكن مايمنعش انى فعلا شايفه ان البعد والسفر فى الخطوبه والزواج صعب جدا ومش صح وممكن ميبينش الشخصيات لبعضها كويس
لكن كل حاجه ولها استثناءات ممكن تحصل بس عموما انا مش بشجع المووضع ده رغم مرورى بشبهه

ستيته حسب الله الحمش يقول...

الجواز التلغرافي ده كان ليه فرص عادية جدا جدا زمان
ايام ما اغلب الذكور كانوا بيطلعوا عادي جدا رجالة ولاد رجالة
واغلب الاناث كانوا متربيات على الصلاح والرضا والصبر

دلوقتي في زمن العجائب لا الذكور بشكل اساسي بيشبهوا آباءهم
ولا الاناث يتمتعوا بالتواضع والرضا وتمشية المراكب

وعليه الزواج التلغرافي غير ناجح على حد رأي دلوقت
تحياتي

MaNoOoSh يقول...

الموضوع بيعتمد فعلا على مدى صدق الطرفين فى معاملتهم
بس فى الغالب الجواز دة مش بينجح لانة بيفتقد عامل الصدق فى معاملة الطرفين

mohra يقول...

عمرى ما قدرت اعمل كده لكن برضه ما قدرش احكم على النوع ده من الزواج..احياناينجح اكتر من زواج الحب ..الجواز ده اصله نصيب

أنا إللى أستاهل يقول...

http://hasobatiya.blogspot.com/

أنا إللى أستاهل يقول...

والله موضوع جامد موووووووووووت ياريت الواحد يلاقى واحدة بس تكون جاى على نفاثة كمان

رؤية يقول...

هو اانتى عندك حق فى ان من الصعب التعرف على طبعه وحقيقته عن طريق الاتصال ودا بتجربة الجميع
وان كان احيانا الناس ما بتتوقفش امام العقبة دى عند معرفة الاساسيات المهمة زى الاصل والاخلاق بشهادة الجميع
عموما
دوما دوما بيكون هناك اشياء غير ظاهرة بتظهر مع العشرة
وماحدش يفتكر انه مهما اتكلموا مع بعض انهم عرفوا بعض

تحياتى لك

لجين أبو الدهب يقول...

اممممممم

هو طبعا حكاية الرؤيا بتفرق ..

بس عادى والله ياحاسوباتيه ..

عندى صحابات كتير كده وخلانى كمان كده .. وما شاء الله كلهم ناجحين وبيحبوا بعض ..

يعينى بيكون فقاعد شهرين وتقريبا بيزورها كير الفترة دى ويسافر بعدها وبيكون تليفونات ونت طبعا وبعدين بينزل يتزوج ..وناجحين فى حياتهم ما شاء الله وبيحبوا بعض ..

والله فى كتير منهم ناجح اكتر من الخطوبات اللى كان العريس على طول عند العروسة ..

والقبول لو حصل من ناحية البنت وبتقع لشوشتها من اول قاعدة بتبقى مش فارقة معاها وبتكون بس زعلانة على سفره ..

وعلى فكرة اللى عايز يدارى حاجة هايدريها حتى لو بيزورهم كل يوم ..

واكتر الزيجات دلوقتى بتم بالشكل ده ..

*البت المشمشية *حلوة بس شقية * يقول...

]بنتى هو فيه اساسا حد عارف يجوز ولا فى السريع ولا فى البطئ
الدنيا بقت مولعه

شمس النهار يقول...

شوفي ليه واحده اعرفها سنها صغير اتعرض عليها عريس كده قعدت معاه مرتين ووافقت مره كمان اشتروا الشبكه مره كمان يوم الشبكه واسبوع قبل مايسافر
يعني الموضوع كله كان 30 يوم
وسافر العريس وادوها تليفونات وشات وميلات ورسايل محمول واللذي منه
المهم ماعرفوش يتفقوا فسخوا الخطوبه ويادار مادخلك شر
بصراحه دي طريقه فاشله فشل زريع

ELMASRYA - MRS WRITER يقول...

طبعا التعارف لفترة مهم جدا جدا

لكن في بعض الحالات بيكون الجواز بالطريقة دي ناجح لو توافرت فيه الأشياء الأساسية المطلوبة في كل منهم

وبيكون النوع ده مقبول لبنات متأخرات في سن الزواج لأن من جواهم بيكونوا على استعداد لإنجاح زواجهم بأي شكل علشان مايبقوش قضوا فترة عنوسة وبعد كده يصبحوا مطلقات لذلك بيتصرفوا بكل طريقة ممكنة لإنجاح زيجاتهم تلك

التعارف عن طريق التليفون والخطابات ممكن لأنه بينقل فكر الإنسان وبيعرف على شخصيته من خلال المناقشات المختلفة وده طبعا يتوقف على ثقافة كلا الطرفين ونجاحه في إدارة دفة الحديث

ويظل دائما على السطح القول المأثور إن الجواز قسمة ونصيب وإنه زي البطيخه مش معروف هيكون ناجح أم فاشل إلا بخوض التجربة

موضوعاتك جميلة دائما وتخاطب العقل

دمتي سالمة

فكرة من الزمن ده يقول...

معاكي مليون بالمية
مهما حاول الاتنين يكونوا على طبيعتهم زي ما بيقولو مش حايقدرو
ولا حايعرفو
ولازم التعامل المباشر في مواقف الحياة لانها الوحيدة باظهار البلاوي المتدارية
وازيدك من الشعر بيت
ان في كمان جوازات دليفري
اي نعم دلفري ماتستغربيش

الاب او الاخ يتعمل له توكيل
ويكتب الكتاب على العروسة
وتتبعت له في طرد اقصد على اول طيارة وناس بتكون فرحانه بالحكاية دي
اهو توفير احسن ما العريس ينزل ويرجع مصاريف وابوري رايح وابوري جاي
لا الحرص واجب بقى والقرش الابيض ينفع في اليوم الالوان

تحياتي ياحاسوباتية على النقاش الجامد دع

yomna يقول...

عايزه اقولك حاجه مهمه
فيه بنات ما بتصدق تلاقي عريس اصلا من النوع ده
وفيه بنات تانيه بيقعدوا يقولوا اهو عريس والسلام ما انا مش لاقيه اتجوز
بس ممكن نقول مثلا ان لو هما فعلا الاتنين صادقين مع نفسهم اوي اوي وكل واحد صادق مع التاني ممكن اقولك انو ينفع... بس للاسف الموضوع ده قليل لان كل واحد بيبقي عايز يبين انو الاحسن وانو مفيهوش عيوب
تحياتي ليكي

بسنت صلاح الدين يقول...

صعبه اوى الطريقه دى طول عمرى رافضاها ،صحيح الجواز بقى صعب الايام دى بس برضه الصوت مش كفايه عشان نحكم على اللى هانعيش معاه العمر كله،،،و كله فى السريع كده بعدين نتكعبل ...

♥♥♥♥♥ Jennifer™® ♥♥♥♥♥ يقول...
أزال أحد مشرفي المدونة هذا التعليق.
عاشقه الرومانسيه يقول...

والله هى الظروف بتختلف من شخص للتانى
والوضع ده لو بيريح ناس وبينجح معاهم فهو بيفشل فى حالات كتير
انا متفقه معاكى ان ده ما ينفعش معانا
لازم علشان اتجوز واحد اكون فهمته وفهمنى واتعرضنا احنا الاتنين لمواقف نتعرف بيها على شخصياتنا

من غير عنـــوان يقول...

لا تعذل المشتاق في أشواقه
حتى يكون حشاك في احشائه

بمعنى... مش عارف لو حد مسافر وعايز يتجوز من مصر... يعمل إيه

ياخد أجازه سنه
ولا ينزل في السريع

بجد مش عارف

إنما أقولك في الآخر
حيتجوز نصيبه

أمنياتي

Eno يقول...

صعب جدا موضوع الجواز السريع ده

لاني هاحط نفسي مكان اللي هتعمل كده هي ممكن بعد الجواز تشوف اللي هي مش كانت شايفه من مجرد صوت بيقول كلام معسول

وساعتها هتكون صدمه مابعدها صدمه

حاسه اني الاستثناء في القاعده دي هما اللي بيكونو نجاحين لكن صعب تكون القاعده كلها ناجحه

تحياتي :)

nona يقول...

على فكرة انا حصل معايا كدة
واتخطبت لواحد 10 ايام وسافر
مع انى من أشد الرافضين للفكرة دى
بس تقولى ايه النصيب بئا

المهم احب اقولك ان موضوع ان البنت والولد يدرسوا بعض دة بيتوقف على صراحنهم مع بعض

انا كنت فاكرة انى مش هعرفه ولا هفهمه والجوازة دى فاشلة

بس التليفونات والنت وقبل دة كله صراحته الشديدة وصراحتى معاه خلتنا نفهم بعض بسرعة

هى صحيح الجوازة مكملتش بس دة لسبب آخر

يعنى من الآخر دى حسب الصدق والصراحة

nona يقول...

وعلى فكرة كمان النصيب له دور كبير جدا فى حياتنا كلها

لان معظم البنات اللى بتقعد ترفض عرسان على الفاضى والمليان زى حالاتى
بيجيلها اكتر صفات كانت رفضاها

وبتقبل ومش عارفة ليه

مش موضوع بئا خايفة لتعنس ولا عايزة جوازة والسلام

لالالالا
دة اللى بيخاف من عفريت بيطلعله فعلاااااااااااااااااااااااااا

Foxology يقول...

الجواز اللى من النوع ده بيبقى كارثة ودى عن خبرات فعلا وحوادث حصلت وعاصرتها ... فى الغالب بيبقى الأنفصال هو النهاية سواء فى وجود اطفال او لأ

معرفش ازاى فعلا حد بيفكر بالأسلوب ده !

ازاى اتجوز ولا اخطب واطلع اجرى معرفش اى حاجة عن خطيبتى اللى هتبقى مراتى ولا هى تعرف حاجة عنى ؟؟ التليفون غير التعامل المباشر اكيد مفيش مقارنة اطلاقا

لكن ارجع اقول >> كل واحد دماغه مريحاه !!

موضوع جميل احييكى عليه :)

واحد من العمال يقول...

السلام عليكم

الزواج بهذه الطريقه التيك أواى
أصبح للأسف من مفردات العصر
عصر الحاسوب وعلى فكره فى حالات كتير ناجحه وهناك حالات أيضاً فشلت يعنى تقدرى تقولى القسمه والنصيب
ولى قريب خطب وسافر سنه وجاء لمده شهر وسافر وعاد وأتجوز وبعدين وكله تمام التمام يعنى مفيش مقياس
ومتقوليش لو لأن محدش يعرف النصيب فين

وتقبلى تحيتى ومرورى

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

بنوتة مصرية يقول...

مش فارقـــــــــــــــــــة

A.SAMIR يقول...

قررت اخرجك من المووود الرومانسي الخزعبلي دة
عليكي ان تتوجهي فورا لمدونتي المتواضعة وتجاوبي بلا قيد او شرط على التاج اللي فيها
يالا بسرعة
قبل الزحمة