10‏/7‏/2009

ممكن اجوز عليكي؟..حقك يا حبيبي


هو: عايز اسألك سؤال بجد وتجاوبي بصراحه

هي : اتفضل

هو: لو اجوزت عليكي هتعملي ايه؟

هي(وحاجب طالع والتاني نازل): حقك يا حبيبي

هو: نعم بجد بتكلمي بجد مش هتطلبي الطلاق ؟

هي: ههههههههه طلاق ليه عبيطه اسيبك انت وهي وتمشوني

هو: يعني ايه؟

هي(مطلعه العين الحمرا): بص انا ماعنديش مانع تجوز بس شرطي الوحيد انك تيجي تقولي انا هجوز مش تعملها من ورايا لان موتي وسمي انك تخبي عليا حاجه وهقولك حقك اجوز

هو: ياسلام بس؟

هي: بص انت عارفني لما احب انكد عليك بنكد من غير سبب لما تطق في نفوخي انكد بنكد عليك ايامك كلها بتكون سودا صح ولا يا نور عيني انت؟

هو: صح انتي هتقوليلي

هي: خلاص وانت حقك تجوز عليا عادي بس انا كمان حقي اخلي ايامك سودا ابقى بقى قابلني لو يوم واحد عشته كويس معاها او حتى معايا ولو قولت انك هتخبي فانت برضو عارف اني هعرف وبرضو هنكد عليك فابقى اعملها ماشي يا حبيبي

هو: اعوز بالله منك ده انتي مفتريه ده كان مجرد سؤال تقولي كل ده هو الي يجوز مره يبقى مجنون لو فكر تاني خصوصا لو مراته انتي

هي: ايه قولت ايه يا حبيبي ماسمعتش

هو: ولا حاجه ياستي هو انا نطقت

هي: اه بحسب

هناك 51 تعليقًا:

mohamed يقول...

فى متهى الذكاء, وأيضا فى منتهى خفة الدم
لنكات مدوناتى
ttp://kalamfekalamm-mohamed.blogspot.com/
http://informationtoknow-mohamed.blogspot.com
http://kalamfekalamm.blogspot.com
http://comentonnews.blogspot.com

adel يقول...

هههههههههههههههه

دي احد اسباب رافضي للجواز و ان العزوبية كنز لايفني

ههههههههههه

بس بجد لذيذة

ستيته حسب الله الحمش يقول...

ملعوبة حقيقي
بس سمعتها كتييييييييييييييييير سابقا
ده الحوار التقليدي بين اي راجل اهبل داخل يجس نبض مراته في موضوع ازالة حقول الألغام من الصحراء الغربية وبين ست بتفكر وناوية تدي له خريطة الألغام غلط علشان يفرقع ويخلصها
ههههههههههههههههههههه

أحــوال الهـوي يقول...

انه كيد النسا
اسمعي قصة الزواج الثاني لصديقي الطبيب مناصحا اياي يقول حينما تعرف الاول انك تزوجت هتهد الدنيا و تذهب لبيت ابوها و دي فرصه تقضي شهر العسل و بعدين تبدا الرسايل البت عيانه الواد طفش و انت ما تسالش لحد ما تجدها جايه البيت لوحدها و تستمر الحياة

بصراحه لم اتصور ان الموضوع بسهولة ما فعل و يمكن لانه سعودي لكن عندنا المصريه مفتريه

خلينا ماشيين حنب الحيط
تحياتي

مامة مازن يقول...

اممممممممممم
جواز تانى هههههههههههههه
ولا ينفع ولا ياكل معايا ابدا
طب ده ربنا سبحانه وتعالى قال (ولن تعدلوا)
يعنى رغم اباحة وانه حلال يتجوز تانى الا ان ربنا حذر من ان ميبقاش فى عدل
فانا استحمل بقى واقف جمبه واستحمل وابنى الحياة والبيت وبعدين يروح يتجوز يا نهار موف لا نو ابسلوتلى ابدا مش موافقة لو صمصم بقى يبقى بيحب جديد بقى يبقى انا باى ولو بيدافع عن حقه طب ما انا اتنازلت كتير زمان علشان حياتنا يبقى برضه باى كل واحد من طريق
ويبقى هو كسب دعا الناس عليه وانا البت الطيبة اللى اتغدر بيها نيهاهاهاها
شوفى اللى فات ده احتمال واحتمال انى ادس له السم فى العسل بجد واكله بايدى وهى قبله وبرضه نيهاهاهاها
يعنى الثابت ضحكات شريرة متواصله هتطلع منى لو فكر بس
هقولك حاجة ربنا يجمعك بخطيبك على خير وتعيشوا احسن حياة وبعد الجواز بفترة كده ابقى نزلى البوست ده تانى واكيد هلاقيكى عاملة تحديث جامد لانك ساعتها هتبقى حاسة حاجات محستيهاش ابدا قبل كده
سلام بقى اصل انا رغيت قوى

أحمـــــــــــــد أبو العلا يقول...

هههههههههه

السؤال ده دايما بيتسأل
بس بيكون بهدف استفزازي مش حقيقي

وربنا يستر من الست لما تقرر النكد

عمرو يقول...

طيب عادى ما ده الحوار اللى بيحصل كل يوم بس مش دايما بيخلص كده :))
بجد بوست حلو أوى :)
تقبلى تحياتى يا حاسوباتيه و تقديرى ..

esraa يقول...

ههههههههههه
جميله اوي

انا مش عارفه الرجاله ليه معتقدين ان الجواز التاني ده حاجه سهله

دي حاجه ليها شروط وضوابط
الموضوع مش سايب كده

عاشقة القمر يقول...

مفيش مراءه ترضي بااجواز تاني مهم قالت ليك مش مشكله من قلبها اكيد مش بترضي لانها بتغير عندك السيدة عائشه بتغير
عندكي النساء ربنا مش اعتطهم عيال بتروح بتقول لي زواجها روح زواج عشان مش تحس بظلم
سبحانه انا عندي ملاحظه بشوفها كثيرررررررر انو احد لو اجوز تاني وثالث اوالرابع في نهاية برجع لي اولي

norahaty يقول...

عـــارفة
ما انسانش
مرة اتفرجت
على مسلسل مكسيكى
(خلى بالك مكسيكى!!!)
الست زهقت من خيانة زوجها :(
عملت حاجة واحدة بس:بعتت العيال
لها وله فى (عش الحب تباعهم)وعينك ما
تشوف الا النوررررر انقلب عش الحب
الى عش الدبابيرررررررررررررر:)

romansy يقول...

يا خوفى
دا اصلا مش هيفكر فى الجواز تانى

الله يكون فى عونك يا جوز الهنا

ههههههه

حــــــــــواء يقول...

بجد بجد
ملعوبه


زي متكون شوطه في الرجاله

باين حد بخ في هوا مصر المحروسه تشويش للمخ علشان يحببه في انه يتجوز تاني علي مراته
بصرف النظر مريحاه ولا لا
حسبي الله ونعم الوكيل

الشاعر الحزين يقول...

احلى حاجه فى الموضوع خفة دمك

لكن بما انى راجل

فأنا لا أحترم أمثال شخصية هذا الرجل

لكن انتى طبعا بما انك أنثى أكيد بتحترمى شخصية المرأه دى جدا

صح ؟؟

دمتى بالخير

ابو على يقول...

طيب نتجوز الاول واحده وبعدين نفكر ف التانيه

الشعب لابد له من حكومه تشكمه يقول...

جواز تانى؟؟؟؟؟؟
دا تباه الست الوالده دعت عليه وقت الفجر وكانت ابواب السما مفتوحه وقالتله روح يابنى الهى يرزقك بواحده تخليك تكره نفسك وتكره الدنيا وبعدين تولع فى نفسك:)
ال يتجوز تانى ال.هازولت اومال السكاكين والاكياس فين اخترعوهم ليه يعنى؟

موناليزا يقول...

سؤال بايخ من اى زوج وله بقى ان يتحمل رد الزوجات بجميع الاراء:)

nody يقول...

هى دى الستات الجدعه

علشان بعد كده يخاف يسرح بخياله

كيــــــــــــارا يقول...

ههههههههههههههههههههههههههههه

عثل ال يتجوز ال هزولللللللت

أبو العريف يقول...

صحيح هو اللي يتجوز مره يفكر يعملها تاني
دايبقي مجنون رسمي فهمي نظمي

MǿиY El-Shreef يقول...

ههههههههههههههههه

والله الست دي قدوه :D

mwah

زهور الامل يقول...

هما الرجالة كدة عايزين ان الواحدة لازم تكون باردة معاهم وتفرسهم كدة ببرود وبالراحة
قصة روعة ودمها خفيف
تقبلي مروري

ريمان يقول...

عجبنى اوى برودها فى رد فعلها معاه وردها على سؤاله

هو فعلا لازم كده لازم بروووووود


هو ده الاسلوب الصح فى التعامل مع الرجاله


تحياتى ليكى يا قمر

عاشقه الرومانسيه يقول...

لا فى طريقه تانيه
انا عن نفسى عرفتها له علشان يكون عامل حسابه عليها
يوم ما يفكر مجرد تفكير فى غيرى اسمه
اه اسمه لانى مش بحب منظر الدم
ومش من عشاق فيلم المرأه والساطور
انا هاحط الفلفل الاسمر مع السم وبالف هنا وبالسلامه
ويبقى قدامى حل من اتنين يااكل معاه واموت زيه ماانا مش هاشيل لقب ارمله بدرى بدرى
يااما
اشوف غيره واتجوز تانى
(وش مطلع لسانه)

رجاله ماتجيش غير بالعين الحمرا
هع هع هع هع هع

Foxology يقول...

العزوبية أرحم لو الجواز بالطريقة دى :)))))))

تحياتى :)

شمس النهار يقول...

بوست لطيف
ومضحك
وبعدين اللي اخدته القرعه تاخدوا ام الشعور
كان عندي داده دايما بتقول كده علي جوزها لما كان عايز يتجوز عليها

واحد يعرفك يقول...

انا نزلت بوست جديد محتاج رأيك

SimbaGirl يقول...

الست دى زيى بالظبط
مفتريه
ههههههههههههه
بجد بجد بوست جميييل
استمرى يا بنتى
ده انتاج حاسبااات
أصلى بجد

ملكة بحجابى يقول...

هههههههههههههههه
عثثثثثثثثثثثل
يحيا الحزب النسااائى
انا احب الست الشديدة دى ام حاجب طالع وحاجب نازل وعين حمرا وتبقى متدربة بوكسييير قبل الجواز لانه بينفع ساعة اللزوم
بوست دمه خفيف

:)

تقبلى مرورى
أميرة
(ملكة بحجابى )

*البت المشمشية *حلوة بس شقية * يقول...

هههههههههههههه
لاء ياستى
انا مستنيا العريس بفارغ الصبر

كاتب مصري يقول...

حلوة قوي ودمها خفيف بس ليه بأه الستات مش بترضى يا ترى غيرة ولا بيبحبوا بجد ومش عاوزين حد يشاركهم في الرالج ولا وجاهة ولا ملكية خاصة مينفعش تبقى لاتنين ولا ايه
أنا عن نفسي مش خوفا من مراتي الي هتكون في المستقبل لا لإني بحبها بس مش هجوز عليها عشان كده مش هجوز واحدة مبحبهاش
دمتي بخير

احساس طفلة محبة للرومانسية بس واقعية يقول...

دمها خفيف ومنطقية
بس مظنش كل السيدات يقدروا يعملوا كدا
اصلهم هيكونوا متنكدين كمان وبتهيألوا هم اول ناس مش هيستحملوا

بس ظريفة
تقبلى مرورى

كراكيب يقول...

نياااهاااهااااااا

قال يتجوز تاني
ده انا كنت بهدلته
طلعت عينيه وعينيها
خليت ايامه لونها كحلي منقطة ببني
:)

miro el niro kwaniro

Nora 7wades يقول...

ههههههههههههههههههه
ده لو اجوز عليها هاتبقى ايامه لون شعر راسه
ههههههههه

حزينه يقول...

حلوة
قالتله اللى فيها بصراحه
مش حيبقى عندة ولا يوم حلو
ولا معاها ولا مع التانيه

حزينه

عمادخلاف يقول...

مدونة رائعة ومتميزة
ارجو التواصل انا عمادخلاف عندي مدونتين ياريت يكون هناك تواصل
شكرا
والسلام عليكم ورحمة الله وبركاته

enjy يقول...

تحفة انتى

صوت من مصر يقول...

طب انا ناوى متجوزش خالص
انى عندى فكره حلوه بجد
ليه الى قادر يتجوز اربعه او اتين
ليه ميطلعش الفلوس بتاعت جوازته لحد قريبه مش لاقى يتجوز
او مش لاقى شقه
لكن نقول ايه بقى

"النجم القادم"رابطة مدونون من أجل فلسطين يقول...

===========================
جديد مدونة اوعى تخاف
رسالة من م . أسامة محمد سليمان
أحد المعتقلين على ذمة القضية المعروفة بقضية فارس بركات
الذى القي به ناجى الجمال ضابط أمن الدولة بدمنهور من الدور الرابع

فقط وحصريا على مدونة اوعى تخاف

من غير عنـــوان يقول...

حلوه
وذكيه


أمنياتي

يهمني رأيك في آخر بوست عندي

كلام فارغ اوى يقول...

منطق جميل جدا ومقنع جدا
وبرضه انتى قلتيله اتجوز
يعنى محدش يقدر يلومك
مدونه جميله وتقبلي مروري واتمنى زيارتك

معتز شاهين - باحث تربوي يقول...

ههههههههههههههههههه

هي دي الديمقراطية

ويبقى التواصل

بسنت صلاح الدين يقول...

جميله يا قمر و فعلا كل اللى ليه حق ياخده بقى هههههههه

akeed يقول...

ههههههههههههههههههه

هو فيه حد بيستأذن قبل ما يتجوز تانى

الجواز و سنينه يقول...

و جاتله الجرأه بقول الكلمه دى
ادى آخره التهور
شباب متهور فعلا
بس الصراحه اتظبط
براااااااااافو هيه دى البنات

واحد من العمال يقول...

هو فيه حد يقدر يفكر حتى فى الشروع
فى هذا الأمر
إن نكدهن عظيم
واللى يفكر بس يفكر سيعيش فى هم وغم وكرب عظيم
بس ديالوج خفيف الدم

تحياتى

نهــــــــــار يقول...

السلام عليكم.....
ههههههه
....
ودوما النساء ينهين جملهن أه بحسب ....
وهو يتحسب ....
...
دمتِ بخير

elsha3er يقول...

السلام عليكم

انا مش عارف لية الفكرة دى مرفوضة مع انها حق كل رجل قادر سيعدل بينهم

المفروض يكون عندنا سياسة التقبل

تحياتى

احمد الشاعر

أسماء علي يقول...

هههههههههه
هو فاكر انها بالساهل
و كمان هما قادرين على واحدة في ظل الظروف الاقتصادية المنيلة دي

ما يسكتوا بقى و يكفوا خيرهم شرهم

:)

عمك ياض يقول...

ان كيدهن عظيم :@
اعاننا الله عليكو :D

سبهللة يقول...

هههههههههههه
ممتازة

قال حقك قال
كسر حقه

أبو كريم يقول...

شفتى بقى كلام صح الراجل راجل حتى عتبه بيته لان الله جعل فى النساء سرا خفيا يستطعن به السيطره على الرجال قال رسول الله فيما معناه ( ما رأيت أسلب للب الرجل الحازم منكن) يعنى مش الراجل العادى ده وصفه بالحزم...كلامها مقنع وفى مثل إنجليزى بيقولone headache is enough

تقبلى مرورى