4‏/8‏/2009

دعوه للتسامح


طبعا البوست ده تحت رعايه البنوته المشمشيه الجميله وانا بعتذر اني اتأخرت عليكي بس بسبب ظروف والله


المهم اليوم الي قالتي عليه مشمشيه عن الموضوع ده كلمتني واحد صاحبتي لسه مجوزه بقالها 4 شهور وصاحبتي دي ليها حكايه مؤلمه شويه حابه اقولها حيت انها ليها علاقه قوي بموضوع التسامح ده او حتى اكبر بكتير من مجرد تسامح


صاحبتي دي كانت بتحب جوزها ده جدا بس كان باباها معترض عليه لان هو معاه دبلوم بس هي مصممه عليه وكان باباها ومامتها مطلقين من زمان من وهي صغيره وهي كانت معتبره حبيبها ده كل حاجه


المهم باباها اعترض وهي صممت فالعند خلى مامتها تروح تاخدها من بيت باباها وتخليها عندها وتجوزها هي من غير موافقه باباها وانا بدقق هنا على العند ده جدا لان مامتها عملت كده لمجرد العند في باباها بس لا اكتر ولا اقل


المهم هي اجوزت من 4 شهور كلمتها وقتها ونصحتها كتير ان ظهر البنت في الدنيا هو باباها وقولتها كتير انها تكلمه تقوله حتى على معاد الفرح خافت ومارضيتش (مع العلم ان باباها هو الي رباها ومامتها ماكنتش بتشوفها اصلا خالص )


هي دلوقتي الحمد لله كويسه ومبسوطه وحامل كمان فرحت جدا ليها وبرضو قولتها كلميه حرام عليكي قوليله حتى انك حامل وهو هيفرح وينسى كل حاجه تقولي برضو خايفه وتتحجج باي حجج اقولها يا بنتي رمضان جاي اهو ومناسبه حلوه يعني عاجبك كده انك دايما تروحي لاهل جوزك بس وبيت ابوكي موجود وماتعرفيش تروحيله تقولي هفكر وتقولي ان انا الوحيده الي بجبلها سيره باباها وبنصحها تقولي اصل لو كلمته هيقفل السكه في وشي قولتها ده يقفلها مره وميت مره كمان ده انتي تروحي تبوسي رجليه والتراب الي يمشي عليه وتستسمحيه كمان وهو هيرضى بس طبعا بترفض


طبعا هي صعبانه عليا جدا وبجد مهما كان الزوج كويس الا ان الواحد مايعرفش الزمن فيه ايه وظهر البنت في الدنيا هو باباها واكيد عايزاه

الزوج ممكن يتعوض لكن الاب مش هيتعوض ولا هيعوضني عنه ميت راجل تاني


يعني انا جت في بالي القصه دي وحبيت اقولها اقول ان لازم نسامح بعض خصوصا لو كانوا اهل يا بنات ماحدش بيحل مكان حد يعني الاب اب والزوج زوج والام ام ماينفعش اعتبرجوزي بابايا ولا ينفع اعتبرحماتي امي ولا حتى بحب اني انادي حماتي بماما ولا انادي حمايا بابا لان الحمد لله كل واحد له ام واب وهي كمان بتنادي حماتها ماما


ربنا يهديكي يا صاحبتي يارب وقلبك يحن وتسامحي

هناك 21 تعليقًا:

أحــوال الهـوي يقول...

انت محقه

لابد لها ان تكلم ابوها و تسترضيه

و مهما تمنع في البديه سوف يكلمها و يحتضنها مرة اخري و من حقه عليها انها ترد له اعتبارة و مكانته امام زوجها و اهله
و السعي لابد ان يكون منها و من زوجها

وخليها تتحمل شويه ثورة غضبه لكنه في النهايه لن يترك ابنته

تحياتي

adel يقول...

أنتي صح
وانا معاكي انها تكلم باباها و هو اكيد هيسامح مع الوقت
عشان كده كده لازم تصالحه هي مش هتعيش من غير وجوده
لانها متعودة عليه

ستيته حسب الله الحمش يقول...

انا ها أبدأ من الآخر للأول

انا لي تلات مامات
اه والله
امي
وام امي الله يرحمها واللي كنت بقول لها ماما
وحماتي اللي هي ماما بلا ادنى ريب وحنية قلبها علي وتجاوزها عن جهلي المبدأي والنهائي خلى بيتي يعمر سنين طويلة

وبنتي لها أمين
وبكره يكون لها واحدة تالتة كمان

قول ماما وبابا للحمى والحماة مش نفاق ده نوع من التقرب والتحبب وخاصة لو كانوا شخصيات عسولة ولذيذة وكمان خاصة لو كانت العروسة بنت برئية مش حاطة حماتها في مقام ماري منيب الله يرحمها
وبرضه مش شرط يتقال ماما وبابا حسب احساس الإنسان بأهل شريك حياته بس برضه لا يلغي الإحتمالية دي ولا يقولها بناءا على طلب الولية حماته منه كده
لازم هو اللي يحس كده

اما صحبتك فدي مسكينة واللي هي فيه غلطة آباء يتحملها وبشكل متكرر الأبناء والحقيقة يا حسحس "دلع حاسوباتية" لازم حد كبير يدخل يصالحهم على بعض لأن البنت خايفة منه يعني هو ممكن يكون بابا عنيف والا حاجة فياريت حد من الأهل او الجيران الطيبين او شيخ الجامع مثلا يحاولوا يروحوا مع البنت وجوزها وهي تتنيل وتستحمل شوية
مش كفاية انها اتجوزت من غير ولي امرها اللي ربى وكبر كأنه بيربي فرخة
والله الفرخة ابرك كمان وبعشرين جنية

زهور الامل يقول...

السلام عليكم

ازيك يا حاسوباتية
بصي
صاحبتك دي في الاول والاخر غلطانة لانها خالفت والدها وكدة تعتبر بتعصيه
والمفروض لو ضربها سوري بالجزمة برضو تروح توطي على رجله تبوسها لان الاب عمره ما هيتعوض ابدا واحنا في زمن مالوش امان ومحدش عارف الايام مخبية ايه
وكمان صاحبتك دي قلبها جامد ومقدرش اقول انها بتحب ابوها اللي رباها وعلمها بيخاف عليها وكان رايد ليها الافضل
لان اهالينا دائما عايزين يشوفونا في احسن حال وفي اعلى المراتب والمناصب

لكن بالنسبة لموضوع انك تقولي لحماتك يا ماما او حماكي يا بابا انا مش شايفه فيها مشكلة
فيها ايه لما تقربي من حماتك وتعتبريها في منزلة والدتك واهو بدل ام يكون ليكي امين وابين كمان

ربنا يحنن قلب صاحبتك على باباها ويحنن قلبه عليها ويسامحها

تحياتي

طوبة ذهب وطوبة فضة يقول...

rbna yhdeha flayam el mftraga de welm shamlha 3la babaha wefr7o beha wtfdal ganbo fa7sn 7al

princess يقول...

ادعيلها ربنا يلين قلبها شوية لاحسن الا الوالدين بجد
وحشانى كتييييييير

ريمان يقول...

صح معاكى حق

الزوج ممكن يتعوض


لكن الاهل لاء

موناليزا يقول...

عجبنى رايك جدا

شمس النهار يقول...

ازيك
وحشاني
البوست جميل والام غلطانه
والا تنكح الحره الا بولي
بس اللي حصل حصل
ولازم تزني عليها لحد ماتصالح ابوها
انا معاكي في كله
الا اننا ماننديش الحما بماما
صدقيني ماحدش بيحل محل حد بس الكلمه دي حلوه وبتقرب القلوب من بعض وتحننها
وفي النهايه هي برضه ام

الشعب لابد له من حكومه تشكمه يقول...

هتندم بعد كده:(

بسنت صلاح الدين يقول...

طبعا لازم تراضى والدها و ينسوا اللى حصل و يبدأوا صفحه جديده، الايام دى كريمه و ربنا يهدى فيها النفوس مينفعش تعيش من غير والدها ومهما كان الزوج طيب و حنين برضه مالهاش غنى عن والدها، الدنيا مش بتفضل على حالها يعنى لا قدر الله لو حصل بينهم مشكله مش هاتلاقى غير باباها اللى يقف جمبها و ياخد حقها، لازم يروحوا له و يصالحوه و تقوله على الحفيد اللى جاى ان شاء الله فى الطريق يمكن قلبه يحن و اهل الخير يتدخلوا فى الموضوع ده،وربنا يهدى الجميع

مصري بالغربة يقول...

بصراحه مدونتك رائعه انا اول مره اجي عندك

المفروض انها تبلغ والدها طبعا وباقصى سرعه
يا جماعة فضل الوالدين لا يقدر بثممن
ورضاهم بردوا
وطاعتهم من طاعة الرحمن

الجواز و سنينه يقول...

طبعا هاتندم
ده اسمه عقوق
و ده من الكبائر
قوليلها عمر ما الاب قلبه بيقصى على الابناء
دول حته منهم و و فى الاخر ما كانش عايز غير مصلحتها
خليها تفضل وراه لغايه ما يسامح بدل ما يفوت الاوان و مش هاينفعها الندم

blue-wave يقول...

صح جدا
تحياتى

أختكم فى الله يقول...

ربنا يهدينا جميعا

قيس بن الملووووح يقول...

من اجل الصالح العام يجب ان يكون هناك تنازلات

عمرو يقول...

طبعا لازم تكلم باباها و هو اللى المفروض يسامحها مش هى اللى تسامحه ..
ربنا سبحانه و تعالى أوصانا بمصاحبة الأبوين بالمعروف حتى لو لا قدر الله جاهدا لنشرك بالله حاشا لله طبعا ..
و لكنه مثل ربانى ضربه الله لتبيان قيمة الآباء و الأمهات اللى لا تقدر بقيمه ..
نسأل الله الهدايه للآباء و الأمهات برضو لأن الحقيقه الواحد بيسمع اليومين دول حكايات لها العجب العجاب عن بعضهم ..
تقبلى تحياتى و تقديرى ..

سمكه واحده يقول...

عامله ايه؟
كل سنه وانتي طيبه
حبيت اسلم واقلك كل سنه وانتي بخير
سمكه

عندما تكون ميمى وحاجات كتير مع بعضها كده يقول...

بصى ياسيتى انا اول مره ادخل المدونة عندك وانا حاسوبتية زيك بالظيط عجبتنى اوى المدونه بتعاتك رغم ان فيها افكار انا يمكن مش اثدر انفذها بس بجد كلامك من القلب اوى

ahmedmisry يقول...

حقيقة أنا مصدوم من زميلتك

تجردت من كل مشاعر الرحمة وأخفت زواجها عن والدها وتستمر

حسبي الله ، والدها هذا الذي رباها وسهر عليها وشقى في دنيته ليراها سنداً له أو حتى عروسه جميلة أتت من ضلعه وهي أغتصبت هذا الحق وتركت أبيها هكذا ... لا حول ولا قوة إلا بالله العلي العظيم

حسبي الله فيها على جحودها وقسوتها

عفواً إن كنت قاسي لكن الموضوع مؤلم والله

ahmedmisry يقول...

بالطبع أنا مقدر لحجم المشكلة النفسية التي تعيشها بانفصال والدها عن أمها لكنه ليس مبرر أبداً لكي تعلم والدها بزواجها وتوده وتصل رحمه