9‏/10‏/2009

للمتجوزين


تعريفي للجواز هو شر لابد منه

طبعا انا ما اجوزتش لسه بس جبت التعريف ده من كل المجوزين بصراحه ماشفتيش حد بيشكر فيه فانا طول عمري اسال ليه هو وحش قوي كده؟ ومالقتش اجابات وافيه بصراحه فقررت اسال كل المجوزين والي لسه الحظ معاهم وماجوزوش تعالوا نعرف ليه هو كده لاني بصراحه بقى عندي رعب من كلمه

1- ايه هو تعريفكم للجواز بعد ما عرفتوه وعاشرتوه ماحدش لو سمحتم يقول انه تكوين بيت وعيله انا عايزه اجابه غير تقليديه اجابه افهمها واقتنع بيها

2- هل فعلا الحب بعد الجواز اقوى؟ طيب ازاى وكل المجوزين شغالين خناق علطول ياترى الحب بيختفي ليه؟3- ايه احلى حاجه في الجواز غير الاولاد والارتباط بلي بنحبهم قولولي حاجات حلوه تانيه لعل وعسى اقدر اتقبل فكره الجواز

4- ايه اسؤ حاجه في الجواز غير المسؤوليه طبعا هو ليه سيئات كتير لازم نعرفها منكم

5- ليه نسب الطلاق كترت كده مع ان اغلبم كانوا بيحبوا بعض وعاشوا قصص حب فظيعه ليه النهايه دي بتحصل؟

6- ليه دايما اسمع الكلمه دي ان الجواز حاجه تانيه خالص ؟ يعني هو الي انا مخطوباله بيتحول لشخص تاني بعد الجواز بتخطب لاحمد يطلع تامر مثلا ولا ايه الي بيحصل

7- ليه دايما اول سنه جواز هي اصعب سنه وفيها كل الخلافات وازاى نعديها وتخلص على خير بدون خساير

8- في فتره الخطوبه كل حد يعمل ايه علشان يعرف الشخص الي هيجوزه ده كويس ويعرف طباعه؟

9- نصيحه كل مجوز يقدمها لكل الي مجوزوش غير طبعا انكم تنصحونا اننا مانعملهاش لان هو شر لابد منه يعني لازم يحصل


اخيرا هقول كلمه قراتها قبل كده وهي يارب كل الي مجوزوش يجوزا ويارب كل الي اجوزا مايحقدوش على الي ماجوزوش

هناك 41 تعليقًا:

أحمـــــــــــــد أبو العلا يقول...

انا معاكي ان معظم الكلام عن الجواز كلام سلبي

بس في كلام ايجابي كتير وحقيقي

زوري مثلا الكتوره ستيته وانتي تقري هناك حاجه تانيه خالص عن الجواز

في سؤال واحد بس ينفع اني اجاوب عليه, الحب بيختفي بعد الجواز وبيجي مكانه خلافات, بصي في نوع من الحب بيختفي وبيجي مكانه نوع تاني

يعني عندك بعد الجواز مهما كانت الخلافات محدش من الزوجين يطيق أي اذى للطرف التاني رغم الخناقات والمشاكل

محدش من الزوجين يقدر يستغنى بسهوله عن التاني لانه بقى جزء من حياته

بيكون في حب جديد بس للأسف من غير كلام جميل زي فتره الخطوبه وبيكون في عشره وبيفهموا بعض اكتر من أي حد تاني

هوا ده اللي ربنا قال عليه "سكن"
قال تعالى
"وجعلنا لكم من ازواجكم سكنا لك"

ماء تشرين يقول...

بصي ياحسبويات انا راى انو محدش عجبه حاله لا ده مبسوط ولا ده مبسوط بس لانهم فقدو احساس الرضا ياعنى ربنا ادهم او حرمهم برضو مش راضيين ده راى اما بالنسبه للمجوزين البيقولو الكلام ده عن الجواز فااعتقد انو كل واحد منهم بعد ما يقول الكلمتين دول بيروح وينام في حضن زوجها او زوجته الزواج هو السكن والموده بس احنا فقدنا قيم كبيره في حياتنا وقيمه الزواج من اهم القيم الفقدت

بوست متميز
تقبلى مرورى

ahmedmisry يقول...

تفائلوا بالخير تجدوه

ادم المصرى يقول...

ستيته هانم

السلام عليكم

تعرفى فى كام حاله من الطلاق فى مصر

كل سنه عشر اللف حاله طلاق بسبب خلفه البنت فقط

دى شيئ من عدم الرضى

تانى حاجه الحب الى بعد الجواز او الى قبل الجواز الاثنين بينضمو لبعض بيطلع شيئ

جميل ذى مثلا الشيئ العلاقه الى بنا وبين امهاتنا

بتكون حميمه جدا هيه دى الى بتكون بنهم

انا وزوجتى مثلا نعرف بعض قبل الجواز

بأربع ثنين كنا بنحب بعض جدا بطريقه جمده مووت

كنا متقربين من بعض اكننا مجوزين بظبط

بعد الجواز انا شايف انى مفيش شيئ بنا اختلف بنحب بعض بنفس المقضار

وممكن اكتر من الاول

بنختلف احيانا وممكن نشد فى الكلام

مع بعض ولكن بنلحق نفسنا لئما هيه تهدى شويه لئما انا اهدى كل واحد بيرخى الحبل للى متنرفز لئن لو كلنا اتنرفزنا البيت هيولع بينا

BoBo يقول...

لا لا لا انا عاوزة اتكلم.. الجواز مش شر ولا حاجة.. الناس بغبائها هي اللي بتخليه شر وتدي عنه فكرة غلط.. انا متجوزة من 3 سنين وعندي طفل عمره قرب على السنتين.. قبل الجواز كنت بحب جوزي وهو كمان كان بيحبني.. كنت شايفة وقتها ان حبي ليه هو اكبر حب في الدنيا ومفيش بعده .. بس بعد الجواز لقيت انه كل ما يعدي يوم بحبه فيه اكتر بكتير من قبل الجواز.. ليه ؟ لان العشرة حاجة تانية خالص.. بتخليكي تشوفي الطرف التاني بكل تفاصيله اللي غالبا محدش غيرك بيشوفها وطبعا لو الطرف التاني دا انسان كويس بتكون تفاصيله الصغيرة دي جميلة وتحبيه اكتر واكتر
اجابة اسئلتك يا ستي كالاتي:
1 - تعريفي للجواز انه بجد سكن ومودة ورحمة.. استقرار واطمئنان وامان للست وللراجل مش للست بس.. بتبقي عارفة ان عندك ضهر جامد يستحملك ويشيلك لو لزم الامر
2 - طبعا الحب بعد الجواز اقوى بس زي ما قلت دا لو الطرفين كويسين وبيراعوا ربنا.. يعني لو طرف طلع مش كويس اكيد مش هتحبيه اكتر ومش كل المتجوزين شغالين خناق على طول.. طبعا اي بيت فيه خلافات حتى لو كان الطرفين بيحبوا بعض.. بس الفرق ان خلافاتهم بتكون محترمة ومفيهاش تجريح ولا حد يدوس على كرامة حد
3 - احلى حاجة في الجواز الدفا والامان.. الامان المعنوي هو اللي بتكلم عليه.. الونس والكلمة الحلوة اللي لما تسمعيها من جوزك تحسي انك ملكتي الدنيا.. كلمة تسلم ايدك بعد ما تكون طلعت عينك في المطبخ فتنسي كل التعب وتفتكري بس ان جوزك عجبه اكلك وتفضلك كلمته وابتسامة عينيه.. صحيانك الصبح على كلمة حلوة وحضن دافي.. الايد الحنينة اللي تطبطب عليكي لما تحسي انك مخنوقة والدنيا كلها عليكي.. اقولك ايه ولا ايه بس؟ مش عاوزة اطول اكتر من كدة
4 - اسوا حاجة في الجواز؟ ممممممممممممم والله مش عارفة.. والله العظيم مش هزار بس بجد مش عارفة.. هسيب الاجابة لحد غيري
5 - لاسباب كتير منها ان طرف كان بيمثل على التاني او طرف منهم - او هما الاتنين - مش بالنضج الكافي اللي يخليهم يقدروا يمشوا مركب الجواز او ان طرف - او الطرفين - اناني لدرجة انه مش قادر ييجي على نفسه او يضحي او يتنازل عشان الطرف التاني.. يعني.. الاسباب كتير بس الجواز نفسه بريء منها
6 - الجواز فعلا حاجة تانية خالص لانه زي مقلتلك بيوريكي التفاصيل الصغننة اوي اللي متبانش غير بالعشرة بس مش بالضرورة دا معناه ان الجواز اسوا.. انا بالنسبة لي الجواز طلع اجمل بكتير من الخطوبة اللي كنت فكراها اجمل شيء في الدنيا
7 - اول سنة هي فعلا اصعب سنة لان كل طرف بيكون لسه مش متعود على طباع الطرف التاني وكانهم بالظبط طفل صغير بيتعلم المشي.. لازم في الاول يتكعبل ويقع بس لو خاف هيفضل طول عمره ميعرفش يمشي انما لو اصر على المشي هيبقى بيعرف يجري كمان ، والطريقة الوحيدة اللي نعدي بيها اول سنة اننا نعقل ونركز ونتنازل شوية لحد ما نتعود على الحياة المشتركة
8- كل طرف يخلي باله في غترة الخطوبة من التصرفات اللي بتبين اللي كل طرف ممكن يحاول يخبيه.. يعني مش هوصي البنات بقى تعرف ازاي اذا كان بخيل ولا لا.. تعالي مثلا وهو بيتفرج على الماتش وعدي من قدامه ولا اقفي قدام التليفزيون وشوفيه هينسى نفسه ويتعصب عليكي ولا لا.. يعني الحركات دي
9 - اخيرا نصيحة لكل اللي متجوزوش.. لو لقيتو حد يحبكو بجد وعنده اخلاق وبيراعي ربنا امسكوا فيه بايديكم وسنانكم واتجوزوا بسرعة عشان تعرفوا معنى السعادة لكن لو ملقتوش متستعجلوش لان المثل بيقول قعدة الخزانة ولا جوازة الندامة
تحياتي

فاتيما يقول...

يا لهووووووووى
دا سؤال تاريخى يا بنتى
عاوزنا نجاوب فى تعليق و لا بوست و لا مدونة بحالها ؟
ميكفيييييشس يا حاسبوتى
بصى انا انصحك زى ما انكتب ف تعليقات ابو العلا العزيز ...
روحى عند ستيتة و عند بوبو
تلاقى الجواز الصح كما يجب أن يكون
و الكلام السخيف الكتير اللى بيتقال أغلبه حقيقى فعلا و واقعى
لأن الجواز فى بلادى
مش إتنين بيحبوا بعض و استطلفوا بعض و قرروا يعملوا عيلة
لااااااااااا
الدنيا مش باللطافة دى
الجواز اهله و اهلها و المجتمع اللى حواليهم و الضغوط و المسئوليات
و محاولة التهرب منها و التملص
و حشرية الناس و الأصدقاء و الأسرة
و أنانية تطفو على السطح
و عناد رهيب فى عدم تخلى كل طرف عن جزء من كيانه عشان يدوب فى الكيان الاكبر و بتبقى المسألة نظام سيب و انا اسيب و مين اللى هيجيب التانى لمس اكتاف عشان يحس إنه انتصر و سيطر على الدفة و ممشى المركب زى ما هوه عاوز
ما زلت عند رأيى بعد جواز و طلاق و بهدلة و فرجة على التجارب المماثلة و الغير مماثلة ..اقدر اقولك عن ثقة
كل تجربة جواز نموذج نسيج وحده و لا يتشابه مع غيره
كل اتنين فى إيديهم ينجحوا علاقتهم او يسيبوها لصقور الجوارح تنهش فيها و تتركها جثة هامدة
الرك على الزوج و الزوجة
و استعداداهم لبذل الجهد و التنازل و الحنان و التسامح و تكبير الدماغ
و بدعى معاكى ربنا يسعد كل المتجوزين و يجوز اللى لسه متجوزوش
أصله شر لابد منه برضو

شاب فقرى يقول...

انا فعلا عايز حد يرد على كل دا

متابع معاكى البوست


ربنا يبعت الاجابه

تحياتى على كل الاسئلة اللى ملهاض جواب دى

شاب فقرى

Foxology يقول...

محدش هيرد :)))

بس اظن ان الموضوع نسبى بيختلف منشخص للتانى

تحياتى :)

زهور الامل يقول...

والله انا كمان زيك محتارة ومش عارفة اخد قرار
اتجوز ولا ما اتجوزش؟
من الحالات الل شوفتها قدامي للمتجوزين اتعقدت وكرهته
وخايفة موت
وبترعب كل لما بيتقدملي عريس
بحس اني داخلة النار

اعرفي وقوليلي

تحياتي

romansy يقول...

بما انى متجوزتش بردو
بس اقدر اقولك ان زمايلى واصدقائى المتجوزين
كل واحد فيهم مخللى المدام تبعه فاهمه كويس
عارفه هو عاوز ايه
وهو عارف هيه عاوزه ايه
طالما فيه تفاهم بينهم الامور بتمشى كتير
بس المشكله بقى لما تكون المدام تقليديه
بقى الواحد جاى زهقان من الشغل وهى عندها لامبالاه مثلا
دا اللى بيعمل المشاكل
والخلاف
لما مش بتحس جوزها ولا جوزها يحس بيها دا اللى بيعمل الخلاف
الجواز فى حد ذاته استقرار بشرط
اننا نتبع قول الله تعالى
وجعلنا بينكم موده ورحمه
صدق الله العظيم

إسكندرانية يقول...

انا كمان في انتظار اجابة لية نسب الطلاق ارتفعت برغم ان كان بينهم حب

هل جواز الصلونات ولا جواز عن حب

؟؟؟
الواحد يحتار اية
فيانتظار رد علي سؤال

دمتي سعيدة

عمرو يقول...

هو مبدئيا كده الجواز مش شر و لا حاجه لكن كل شىء فى الحياه له وجهين و اٍستخدامين و اٍنطباعين و نتيجتين اٍما خير و اٍما شر ..
و بأستئذنك اٍنى حأتابع معاكى التعليقات لعلى برضو أوصل لاٍجابات منطقيه عن تساؤلاتك للى هى بالتأكيد تساؤلات مرت على أذهاننا جميعا و ماوصلناش لحاجه ..
تقبلى تحياتى ..

الشعب لابد له من حكومه تشكمه يقول...

هتقولى شر مش شر برضه هنتجوز:)

طبعا انا مش متجوزه بس اييييييييييه ياماشاء الله كل محد من اصحابى المتجوزين يشوفونى يقولوا:
ياااااااااابختك يابنتى انتى لو تعرفى النعمه اللى انتى فيها..بلا جواز بلا خيبه انا عارفه كنت هموت واتحوز ليه؟؟؟؟؟؟؟؟؟؟

وتصدقينى لو قلتلك انى مش بصدق ولا كلمه من كلامهم ده...اه مش بصدقهم لانهم لو بعدوا عن بيتهم وجوزهم يوم واحد بيكونوا هيموتوا..

المشكله ان اللى سعيد فى الجواز تلاقيه خايف من الحسد ومش بيتكلم وساكت وممكن كمان يدعى انه مش سعيد...
علشان كده تلاقى دايما الوحش هو اللى ظاهر لكن الناس المبسوطه بيداروا ...

حاجه كمان من وجهة نظرى بتبوظ الجوازه من اولها وهى التوقعات العاليه يعنى مثلا البنات متخيلين انهم داخلين عش وردى وكل شويه حب فى حب ويصبحنى بورده ويمسينى بفله..مااشى الحب موجود بس كمان فى مسؤليه فى بيت فى واحد ممكن يرجع من شغله قرفان ,فى اختلافات فى طريقه التربيه والتفكير,كل ده لازم هيحصل مشكله بس العاقل اللى يتحتوى ويعدى المشاكل دى...ونفس الحكايه لشاب اللى متخيل ان الجواز حاجه تانيه برضه.

كمان من الاسباب البايخه فى نظرى الند بالند..ايوه لازم البنت تفهم ان مهما اتعلمت واشتغلت الرااااجل هو الرااااااااااجل وانها ست فى الاخر مينفعش تتعامل على انها القائد وانها اللى بتاخد القرارات(ملحوظه بينى وبينك كده فى ستات كتير جدااا هم اللى بيمشوا بيوتهم بس ذكيه بمعنى انها مش بتحسس جوزها كده وبتحسسه ان مفيش عقل فى حكمته)

كمان لازم الاتنين يدوا مساحه لبعض.تلاقى الست فوق دماغ جوزها عاوزه تعرف كل التفاااااااااصيل والراجل بطبعه مش بيحكى التفاصيل فبطلى زن باه..

بصى الكلام دا كله انا شفته مع صاحباتى ..
بس عموما لما اطبقه ان شاء الله هباه ارد عيكى:)
وفى انتظار كلام المتجوزين..خليهم يعقدونا كمان كل واحده او واحد يقولوا جواز ايه بلا هم..
الله طب سؤال انتو كان حد اجبركوا تتجوزوا؟ مش اتجوزتوا بكامل ارداتكو ولا حد شربكوا حاجه اصفرا؟ انتو اخدتوا قرار التجربه يباه خلاااااااااااص سيبونا احنا كمان ناخد قرار التجربه بدون محد يقعد يدينا صوره سودا ويعقدنا...

اقولك حاجه من سنه كنت داخله اعمل عملية الزايده وربنا يسامحها باه واحده قعدت تحكيلى على الالام والوجع اللى هشوفه وانها صعبه موت كنت همووووووووووووووت من الرعب من كلامها لما عملتها ملقتش كل اللى حكت عليه..
وقتها فهمت ان فعلا كل واحد وشخصيته وتحمله وقدراته..

ستيته حسب الله الحمش يقول...

كاتبة بوست وعاوزة رده معلقة من معلقات الكعبة؟
اسئلتك اجابتها كتاب
ويمكن يكون الكتاب ينفع ناس ومينفعش ناس تانين

بس المؤكد ان الاجابة متنفعش في تعليق

عاشقه الرومانسيه يقول...

انا هقعد جنبك اتفرج على الردود
واتعقد اكتر واكتر
ولما ابقى اتجوز اكيد هبقى ارد عليكى


سلام لحد ما ارجع لك بعريس فى ايدى
ههههههههههه

موناليزا يقول...

الزواج هو حياة بما تحويه الكلمة من معنى
حياة جديدة بتسيبى بيت الاهل لبيت انتى وحدك سيدته
بتكونى مسئولة عن البيت واللى فيه
لو عندك شغل او هوايات نظمى وقتك كويس عشان البيت أهم اولوياتك
بعد ما كنتى لوحدك هيكون ليكِ ونيس وشريك لحياتك

الاختلاف فى فترة الخطوبة والزواج
فى الخطوبة بتتجملوا لبعض
فى الزواج كل واحد بيظهر على طبيعته
ده غير ان المسئولية بتبدأ بعد الزواج لكلا الطرفين

ليه بقى بيحصل المشاكل
المشاكل موجوده دايما بين جميع الافراد وعلى اختلاف علاقاتهم يعنى الاصحاب والاخوات والجيران مش الزوجين بس
لكن بتفرق فى كيفية التعامل مع المشكلة

واخيرا العلاج المناسب هو تقوى الله
لو الزوج او الزوجة عرف ان الزواج ده عبادة بيتقرب بها لربنا
واتقى الله فى شريك حياته
الحياة هيبقى لونها وردى:)

صبرني يارب يقول...

انا عشان ارد عليكى عايزالي اربع خمس صفحات

ولكن بالنسبه للنصيحه الى اقدمهالك

وده بعد ما اتجوزت وعيد جوازي العاشر بعد عشر ايام

اقولك اتجوزي طبعااااااااااا

وتعملوا ايه عشان تنجحوا الجواز ده

تتقوا الله تعالى

كتاب ربنا بينك وبينه امشي عليه

بالظظظظظظبط
كتاب ربنا

مش كتاب الشيخ الشريب على راي استاذ هانيء

فاهمه كلامي ؟

اتجوزوا بس وانتم مخطوبين بلاش الاقنعه والرسم والمظهره والكذب على بعض

اتجوزوا بس كل واحد فيكم يقدم التاني دايما بس كمان ما يتنزلش عن حقه

اتجوزوا وحبوا بعض وارتبطوا ببعض بس ما تخنقوش بعض

مش من وانتم مخطوبين كل ما واحد يروح الحمام يتصل على ا لتاني يقوله انا رايح الحمام


راعوا ربنا ينااااااااااس

اتقوا الله وراعوا ربنا

وتوبوا واستغفروا ربنا كل يوم ميت مره زي ما كان الرسول بيعمل

ولو ان احنا المفروض نتوب ونستغفر مليون مره

ليه ؟
ايه جاب التوبه فى الموضوع ؟؟

توبوا عشان ما يبقاش جوازكم تخليص ذنوب .

ايه تاني مش فاكره

انا متجوزه يا جميل بقالي عشر سنين وقبلها 3 سنين خطوبه

اتخطبت لرضا واتجوزت رضا
بس هو كمان خطب صبرني واتجوز صبرني

لا اترسمنا ولا كذبنا ولا انانيين ولا حد فينا فرط فى حقه وقبل كل حاجه حفظنا حق ربنا

كفايه عليكى كده اصل تقولي عليا رغايه
هههههههههه

القدر و انا يقول...

حاسبوتية
ازيك يا اجمل بنوته
ايه الاسئلة العويصة دى
الجواز هو شركة يتحمل نجاحها وتقدمها الطرفين فلا بد ان يكونا على قدر كبير من المسئولية
2- كل مازاد اهتمام كل طرف بالاخر واحترم حقوقه زاد الحب وتعمق
3-احلى ما فى الجواز هو نجاح هذه الشركة وكم انجازاتها على مر الايام .. هو ترابط افرادها فى السراء والضراء
هو خوف كل طرف على الاخر حبه له
4- اسوأ شيئ هو تسلط احد الطرفين أو استبداده وايثاره لنفسه
5- ارتفاع نسبة الطلاق ناتج عن حاجات كتير اهمها عدم تحمل المسئولية
عدم معرفة كل شخص ما عليه
التربية الخاطئة والنماذج الخادعة
تدخل اخرين
6-فى فترة الخطوبة كل واحد يكون نفسه ويشوف اللى معاه بعقله قبل ما يحسه بقلبه ..
ويارب نشوفك أحلى عروسة وأسعد زوجة

احساس طفلة محبة للرومانسية بس واقعية يقول...

يااااااااااااه كل دا
بصى وهحاول اقول باختصار عن تجربة 4 سنين

الجواز مش شر ابدا خالص هو بس احيانا اخلاق الناس بيكون عليها قناع ومش دائما نقدر نكشفها ودا بيكون دور الاهل اكتر من دور الطرفين يعنى الحب لازم يكون حب عقلانى داخل فية عقل الاهل مش بتدخل فى حياتنا بس لمراجعة قرارتنا للنصح لبصيرتهم اللى اكيد اكتر مننا
دا فى البداية

بعد كدا خطوبة وزواج لازم ميكونش فى فرق بينهم يعنى من البداية بحب كذا وبكره كذا من ابسط شئ لاكبر شئ بصراحة وبدون تزيف اللى فى القلب لازم يوصل للطرف التانى اصل كدا كدا الحقيقة هتبان لو هى سيئة واحنا حاولنا نداريها احنا اول ناس هيرجع عليها الضرر بحياة سيئة ومشاكل وغيرة

لكن وضوح وصراحة وحب وتفاهم واخلاق والتزام بشرع ربنا يبقى الزواج نعمة من نعم الحياه حتى لو قابلنا 100 عيب فى كل طرف من الطرفين و500 مشكلة كله هيتحل وكله هيرجع تانى كويس

والحب بعد الزواج مش بيموت بالعكس بيزيد ترابط وقوة يمكن دا بيمنع الحب الرومانسى من الظهور بوضوح زى ايام الخطوبة مثلا
بس بيكون فى مفهوم تانى للحب بيضاف اكيد مش بينقص من الحب قبل الزواج

دمتى بكل خير
تقبلى مرورى

غير معرف يقول...

انصحك تتزوجى و بأقصى سرعه
حتى تتعرفى بنفسك على الهنا اللى الناس عايشه فيه
لان كل الاجابات اللى هاتجيلك بتوصف مشاعر شخصيه بحته و كل واحد و بخته و تجربته الخاصه
يعنى انتى و بختك و نصيبك
و التجربه بتصقل الواحد
اقتحمى المجهول و اشربى كأس السعاده الزوجيه الحلو ةالتى لا تخلو من المراره

مامة مازن يقول...

شوفى يا باشمهندسة لازم تهندسى فى جوازك اه يعنى تهندسى فى بيتك وتراعى مصالحه على اكمل وجه تهندسى نفسك وتخليكى فى صورة حلوة قلبا وقالبا تهندسى كلامك وخليكى حبوبة هندسى كل حاجة ما انتى مهندسة بقى ههههههههههه


شوفى يا ستى هكمل ان شاء الله 9 سنين جواز ومرت عليا فيهم ظروف كتير قوى انسانية ومادية وصحية مرت علينا خلطة من الظروف الصعبة لكن عديناها بفضل الله مش بسبب اننا بنحب بعض من قبل ما نتجوز ب5 سنين بس لا وكمان علشان حاسين المسئوليه صح يعنى لازم شركتنا دى تنجح باى شكل لازم ننجح لازم بيتنا يستمر وحياتنا تستمر مش اى حاجة هتكسر الرباط اللى بينا ابدا

مفيش اتنين مش هيختلفوا عادى الفرق بقى فى ايه فى الاحترام والرقى فى التعامل
الست والراجل سوا يفهموا فكرة القوامة فى الاسلام يفهموها صح
هتتحل مشاكل كتير

اتكلى على الله يا اختى واتجوزى متخافيش كل اتنين حالة بحد ذاتها مش مقياس ابدا فشل حد فنعممه على الجواز كله مينفعش

Eno يقول...

ازيك ياقمر عامله ايه :)

عارفه قريت الموضوع بتاعك وملحتش ارد كان عندي مشوار بس عاوزه اقولك انه كان مقعدني وسط الناس بنص دماغ والنص التاني مع البوست الرائع ده

انا زيك بالظبط لسه الموضوع بالنسبالي شكل من بره مش خطيت في غير خطوات قليله
لكن الحمد لله متفائله خير

رغم والله ياحاسوباتيه انا كل اللي حوليا مخوفني جدا وكلامهم بجد يرعب وكلهم اصحابي وقريبي
واقرابهم قربتي اللي لسه جايه من عندها طبعا انا لا املك اني احكي اللي شوفته بعيني

لكن اقدر احكي احساسي مبدأيا في المعامله المتبادله بينهم مش ولا بد مع انهم بقالهم بالظبط 10 شهور متجوزين
لما شوفت بجد مش هنكر احساسي اني خوفت من الخطوه دي اوي لكن وانا قاعده قولت في عقلي ايه اللي يخليني اتخيل اني الفيلم الرعب ده يحصل في بيتي كل اتنين وليهم شخصيتهم وليهم اسلوب تعامل

وكل لما حد يحاول يتكلم معايا كده احاول ابعد عن تفكيري انا اي حاجه وحشه ممكن انها تحصل معايا والا مش كان عمري ماهيكون مكتوب كتابي دلوقتي


فا نصيحتي ليكي من واحده واقفه في نفس مكانك وشايفه بعينهاومن حوليها كتير زيك
اقفلي عنيكي عن اي حاجه ممكن تخوفك من اللي جاي لانه من ابسط حقوقك انك تخوضي التجربه وتحكمي عليها بنفسك

انا متابعه ردود الناس معاكي ياقمر لانه فعلا الموضوع يهمني للغايه :)

تحياتي ليكي:)

حاسوباتيه يقول...

انا بشكركم كلكم على ردودكم بجد استفدت من كل رد

بس مش عارفه برضو لسه في حاجه مش عارفه ايه هي بس برضو خايفه وقلقانه كمان انا نفسي تقولوا مواقف يعني صبرني قالت حاجه مافهمتهاش او ممكن توضحيها يا صبرني وهي الجمله دي

اتجوزوا بس كل واحد فيكم يقدم التاني دايما بس كمان ما يتنزلش عن حقه

هو ايه اصلا حقوق كل واحد وازاى في نفس الوقت اتنازل عن حاجات؟. وايه الي اتنازل عنه؟

كمان انتي قولتي موضوع الاستغفار ده جميل جدا بس يعني ايه يبقى جوازنا تخليص ذنوب مافي ناس معلش بيكونوا سيئين جدا وبيجوزا ناس كويسين جدا والعكس برضو بيحصل يبقى ازاى؟

كمان في حاجه دلوقتي لما يكون اتنين مخطوبين والحمد لله مش بيلبسوا قناع لبعض ولا حاجه بس برضو في اختلافات بينهم الي اي حد الاختلافات تكون في المعقول وممكن تمشي بيها الحياه كمان واحده صاحبتي مجوزه قالتلي كلمه برضو مافهمتهاش قوي انها بتقولي ان الاختلافات الي كانت في الخطوبه بتروح بعد الجواز لانكم بتكونوا مع بعض دايما

طيب هو ايه الي بيقل بعد الجواز وايه الي بيطلع الغيره مثلا بتقل ولا بتزيد

طيب الاحترام مثلا يكون ازاى؟

يا جماعه بجد انا يمكن تقولوا عليا محبكاها قوي او معقداها بس الحياه بقى فيها متناقضات كتير مخوفاني الي بيحبوا بعض بيطلقوا وناس تانيه تقول ان جوازهم مليون في الميه هينجح وبعدين ماينجحش

طيب ازاى اعود خطيبي واتعود على طباعه واعرفها ازاى اصلا؟

اسئله كتييييييييييير قوي ياريت تفيدونا كلنا لان فعلا في ناس اهو كاتبين انهم كمان خايفين من الفكره اصلا وشكرا ليكم كلكم وياريت نكمل نقاش كلنا

بحبكم قوي

فكرة من الزمن ده يقول...

هههههههه
في البداية انت جايبة صورة
تسد النفس
يعني لو حد نفسه مفتوحة للجواز يشوفها يعمل اضراب
تاني حاجة ان الجواز مين قال انه شر هو صحيح في بعض الاحيان شر
نتيجة سوء الاختيار وعدم التكافؤ في الطباع والمستويات
لكن في النهاية احساسي ان النظرة التشاؤمية للزواج ما هي الا ترويج من ميديا معينة هدفها اننا نكون عكس الفطرة اللي خلقها ربنا نكره الجواز ونعيش حرية مطلقة واحنا من غير ما نحس بنتبرمج ونردد ونحقق اهداف مش عارفينها
ده رأيي
تحياتي

صوت من مصر يقول...

ايه حكايات الجواز والطلاق والذى منه فى المدونات

شيماء جمال(شيمو القمر) يقول...

كل اللى اتعلمته من الدنيا ان فى ايدك تنجحى العلاقة ده وفى ايدك تفشليها
لو انسان كويس تغاضى عن بعض العيوب لان مافيش انسان كامل

وبعد الجواز بايدك كل حاجة جوزك على ما تعوديه

ربنا معاكى
وفى الاخر ده نصيب

تحياتى لك
شيمو القمر

BoBo يقول...

عاوزة اقول حاجتين
اولا شكرا لفاتيما الجميلة المجاملة دايما واللي لسانها بينقط سكر مكرر زي ما بيقولوا
ثانيا واضح ان محدش بيقرا تعليق حد كل اللي بيدخل بيرمي الكلمتين بتوعه وخلاص
ثالثا: انا قلت حاجتين بس ميجراش حاجة لما يبقوا تلاتة: انتي نفسك حاطة الفكرة في دماغك ومش شايفة ان فيه ناس من اللي علقت ردت على اسئلتك ردود لطيفة وكلها تفاؤل وامل
رابعا: عادي برضو لما الاتنين يقوا اربعة.. انا ف رايي ان كل البنات اللي بتقول عن الجواز شر لابد منه دول اصلا مش لاقيين جواز - مع احترامي ليكي والله- وعند اول عريس يخبط بابهم يكون ابن ناس - يعني اخلاقه كويسة ومش بالضرورة معاه فلوس - هيرموا الكلام دا كله ورا ضهرهم ويتجوزوا
تحياتي

ريمان يقول...

حاسوباتيه


اما اجرب ابقى اقولك بقى



او اقولك انتى اما تجوزى قريب بقى ابقى قوليلنا وجاوبى على كل الاسئله دى



تحياتى يا قمر

فاتيما يقول...

حاسوبة يا حبيبتى
الاول عاوزة اشكر بوبو على رقتها
و اصلاً اصلا
انا بقول الحقيقة
إنتى يا بوبو و وليد
( ربنا يخليكم لبعض و لعمر و لينا بصراحة ) نموذج هايل يحتذى بيه
و يشجع على خوض التجربة الزوجية بمنتهى التفاؤل ...
فنا مش بجامل يا حبيبتى
انا أكول الحكيكة ....
ثانيا يا حاسوبتى تعالى هنا
مين بيقولك متتجوزيش دا ؟
لأ .... إتجوزى يا ماما
و افرحى
و خدى نصيبك من الدنيا
الناس اللى بتقولك بلاش دى اصلها
مرت بخوف و فشل و اخفاقات مكنتش قادرة تصلحها و لا تتجاوزها
زى حالاتى كدا
بس دا لا يمنع
إنى لو كنت فى حال احسن شوية
كنت اكيد اقدمت على تجربة الزواج للمرة التانية
لو بس كنت لقيت البنى آدم اللى يشجعنى على خوض غمار هذا البحر من تانى دون ان اخشى الغرق ...
بقول لو ظروفى كانت احسن
و انا الحمدلله كويسة
إنتى أحسن منى ميت مرة
و من حقك تفرحى
بس زى ما قالت بوبو و صبرنى
و أى حد عاقل هنا
اختارى صح الشخص المناسب لأنى انا اسأت الاختيار و لهذا فشلت
احسنى الإختيار
و أى سخافات زوجية بعد كدا
صدقينى هتعدى و تتنسى
بمجرد ما تبصى فى وش عيالك
او تقعدوا إنتى و جوزك تسهروا قصاد التلفزيون تتفرجوا على مسرحية و تضحكوا من قلبكم ....
الأعياد و المناسبات و كل حاجة حلوة هتغلوش على الوحش و البايخ
مهما كان ثقله على القلب ...
إتجوزى يا بنتى و لا يهمك
إشمعنى هتسمعى كلام الناس
اللى جربت و فشلت
و متسمعيش كلام الناس
اللى جربت و نجحت ؟؟
بكرة تكونى من الناجحين دول
و انا اول واحدة هتهنيكى يا حبيبتى
بس ييجى النص المناسب إن شاء الله
خالص ودى ليكى

بسنت صلاح الدين يقول...

انا متجوزتش بس عاوزه اقول كلمه بسيطه اوى رغم كل كلام المتجوزين عن المشاكل و عن الهم و عن ان القعده من غير جواز اريح الا انهم ساعه ما يغيب عنهم شريك حياتهم او تحصل اى زعله بسيطه تلاقيهم مش عارفين يعيشوا من غيره و يتمنوله الرضا يرضى كله بيشتكى بس محدش يقدر يستغنى عن مراته وبيته او واحده تقدر تستغنى عن جوزها و بيتها

محمد يقول...

الارتباط
ليس فقط عقد زواج
انه عمل متصل ودائم
لكى يبقى ويكبر وتتعمق احاسيسه
اما ما يفعله اغلب الناس
فهو كمن اشترى سيارة
وتركها اسفل منزله
وكل يوم يفتح بابها ثم يغلقه

نهــــــــــار يقول...

السلام عليكم....
بصي كل المتزوجين بيقولو شر لابد منه
طيب بعد وقوعهم بالشر ده ماهربوووش لييييه ...
....
لا هو الوضع يختلف من زوج إلى الآخر ...
والله يهدي المتزوجين ويسخرهم لبعض
ويزوج العزبين ويعفهم ...
.....
ما تتعقديش يا بنتي ....
...
في أمان الله

سجود يقول...

بالنسبالي انا اكيد مش هعرف اجاوبك عن رايي لانها تجربه ليسا ماخوضتهاش
الحمد لله يعني ليسا بعقلي
وانا غبت عنك فتره طويله بس قريت المواضيع اللي كتبتيها
وجزاكم الله خير

momken يقول...

شوفى ياستى انا ليا رائى ولازم ادلى دلوى فى الموضوع ده

انا شايف ان الى اخترع مقوله ان الجواز قسمه ونصيب ده حد سورى فى اللفظ حمار كبير

لان الجواز مش قسمه ونصيب خالص خالص مالص

الجواز ببساطه اختيار

والى يختار صح هيعيش صح والى يختار غلط ويتسرع يستاهل الى يجراله

البوست جميل وفتح موضوع اول مره اقرا فيه
تسلم ايدك


تحياتى

هيثــم رمضـــان يقول...

أول زيارة لمدونتك الجميلة وبجد الموضوع رائع جداً والرد عليه عاوز كتاب علشان يكفي بس نحاول نختصر علي أد ما نقدر.
1-تعريف الجواز هو الانتقال من مرحلة المسئولية عن النفس فقط إلي المسئولية عن الغير لكنها مسئولية لذيذة إذا كان الجواز ناجح ومستقر.

2- أيوه الحب أقوي بعد الجواز لانهم بيبقوا أقرب أتنين لبعض والعشره والمعامله الحسنه بتزود الحب وبيبقي حب حقيقي مش بالمعني السطحي اللي معظم الشباب عارفينه. وبالنسبه للخناق ده طبيعي لكن مش خناق خناق يعني لكن أختلاف في وجهات النظر والحب لو موجود عمره ما بيختفي وهو اللي بيخليهم يتصلحوا علي طول.

3- من مميزات الجواز غير الاولاد وكده هو الاستقرار والسعاده اللي بتحسها الزوجه وهي بتقوم بوجبها نحو أسرتها وكمان الراجل بيحس بالسعادة والاستقرار والطمأنينه في وسط أسرته لان الزوجه هي سكن للرجل.

4- الجواز ممكن يكون كله سيئات أو كله حسنات وده يرجع للأشخاص لكن المشكلة المتكرر هي الروتين وده يمكن التغلب عليه بشوية تفكير ونشاط ورغبه في تغيير رتم الحياة كل فترة.

5- زيادة نسب الطلاق وده أهم سؤال من وجهة نظري السبب هو عدم النضوج العقلي والسطحية وعدم تحمل المواقف الحقيقية والمشاكل اللي بيتعرض ليها الاتنين وطبعاً عدم تحمل المسؤلية وقصور في النواحي الدينية من ناحية الحقوق والواجبات ,أما إنهم كانو بيحبوا بعض "حب فظيع" هو أصلاً لا هو حب ولا فظيع هما بيقولوا عليه حب لانهم مش عارفين يعني إيه حب..الحب مش كلمتين حلوين ومكالمه بالليل وأتنين لمون في الكافيه..الحب عطاء وتضحيه من أجل الحبيب ويبقي الهدف الأول لكل واحد إنه إزاي يسعد التاني ومعاني جميله تانيه كتير قوي.

6-الجواز حاجه تانيه لأن مع الأسف كل طرف في فترة الخطوبه بيظهر أحسن ما عنده ويحاول يخبي المساويء وده طبعاً خداع ولما ينكشف بعد الجواز تبدأ المشاكل لان التعامل إتغير.

7-أول سنه أصعب سنه لأن الاتنين كل واحد منهم من بيئه مختلفه وبيت مختلف وكل بيت له عاداته وأفكاره وأسلوب حياة ماشي عليه كل اللي في البيت ولازم يكون في أختلافات ولو في حاجات بسيطة والبسيطه بتكبر وتبقي مشكله وأحياناً طلاق والحل هو التفويت وإمتصاص غضب الأخر والعتاب في وقت الصفا ومع الايام هيتعودوا علي بعض وهيفهموا بعض ع الاخر.

8- علشان تعرفوا الشخص في فترة الخطوبه خدي بالك بيعامل والدته ووالده وأخواته إزاي أو حتي تعاملاته مع الناس اللي في الشارع والبياعين فيها أدب وكلامه حلو ولا.. وكما وهو سايق لو عنده عربيه شوفيه هيشتم كام شتمه في الدقيقة وده طبعاً غير رأي الناس فيه الجيران وزميله في الشغل والاهم من ده كله علاقته بربنا سبحانه وتعالي وحولي تتعرضوا لمواقف كتير مختلفه وشوفي رد فعله.

9- النصيحة هي التدقيق في الأختيار ويكون الاختيار علي أساس صحيح يعني البنات تختار من يرضونه ديناً وخلقاً. والشباب يظفر بذات الدين.
ودعوه من القلب ربنا يرزق كل بنات المسلمين بالزوج الصالح ويرزق كل شباب المسلمين الزوجه الصالحه ويكتب للجميع السعاده في الدنيا والاخره آمين.

طولت قوي بس موضوعك عايز كده

تقبلي تحياتي

اقصوصه يقول...

في اساله تبقى معلقه

بلا اجابه!

أحمد شريف يقول...

أختلف تماماً عمن يقول أن الزواج شر لابد منه .. فما من شيء فرضه الله علينا وقال عنه سيد الأنام من خرج عن ملتي فليس مني وكان هو واحداً من أربع أمور في حديثه الشريف صلوات الله وسلامه عليه فلابد أن يكون خير


ولكن من يقوم بتحويل دُفة الموضوع ونقله من دائرة التسامح والتواد والرحمة والتؤدة إلى دائرة الشك والبغض والضيق هو نحن ... إذن ليش هو الشر بل نحن من يوجد بنا الشر لذلك لنصلح ذات أنفسنا ونقومها ونحسن اختيار قسيم حياتنا ونبني الحياة في كافة مناحيها على الصدق والتواضع والتسامح وسنلقى عبير الحياة المُذكي بالعطر

انظري لقيمة التسامح تلك الموجودة هنا
http://ahmedsherif-eg.blogspot.com/2009/12/blog-post_20.html

أحمد شريف يقول...

بالمناسبة لست متزوج لكن حديثي هذا لا يقبل التجربة لأن هناك ثوابت وأسس موضوعية في الحياة وعليها تستقيم الأمور

ahmed Mohamed يقول...
أزال المؤلف هذا التعليق.
ahmed Mohamed يقول...


اكتشف خدمات اشهار المواقع والتسويق الالكتروني المبتكر من شركة داما السعودية
حتي تتمكن من رؤية مستوي تقدم خدمه التسويق الالكتروني الحديث
من خلال شركة داما ...
فاعلم انك متواجد بشكل قوي في محركات البحث المشهورة
ونشاطك او خدماتك في مستوي مرتفع

وكذلك خدمات استصافه المواقع وحجز الدومين

اطلع علي اخر واهم عروض شركة داما السعودية

عروض التسويق بالبريد الالكتروني
http://www.e-daama.com/mailmarketing-offer.php
عروض الرسائل القصيرة
http://www.e-daama.com/sms-offer.php
عروض تصميم المواقع
http://www.e-daama.com/webdesigen_offer.php

باقات التسويق الالكتروني وتقنيه السيو الحديثة
http://www.e-daama.com/em.php
.

للتواصل والاستفسار :::

info@e-daama.com
sales@e-daama.com
00966566341760

الموقع الرسمي
Web Site http://www.e-daama.com
المدونه الرسميه
Blogger http://www.e-daama.blogspot.com
صفحتنا علي الفيس بوك
Page Facebook http://www.facebook.com/edaamaa
صفجتنا علي لينكد ان
Linked IN http://www.linkedin.com/in/edaama
حساب تويتر الرسمي
Twitter http://www.twitter.com/E_Daama
قناه داما علي اليوتيوب
YouTube http://www.youtube.com/Edaama

E-DAAMA@2013
شركة تصميم مواقع| اشهار مواقع | استضافة مواقع|
شركة داما افضل شركة تصميم مواقع | شركة داما شركة سعودية |شركة تصميم مواقع في مكة | مكة | افضل شركة تصميم في مكة | تصميم مواقع في السعودية | تصميم مواقع مدرسة | تصميم مواقع شركات | تصميم صحيفة الكترونية إلكترونية | تصميم موقع احترافي | تصميمات جرافيك | تصميم تطبيقات ايفون| تصميم تطبيقات اندرويد| تسويق الكتروني | شركة تسويق إلكتروني | تسويق بواسطة الإيميلات| تسويق بواسطة رسائل الموبايل



Uouo Uo يقول...


thx

كشف تسربات المياة
غسيل خزانات
شركة نظافة عامة