29‏/2‏/2008

حاله حنين


حاله حنين

حاله جميله افتكر انها دايما معانا كلنا بنحن للحظه جميله عشناها او ذكرى جميله او اشخاص ماجمعتناش بيهم الايام من سنين او اشخاص غابوا عن عالمنا

وهي حاله يمكن لما بنكون فيها بنسرح لبعيد بنسيب المكان والزمان الي احنا فيه ونرجع للماضي بتحس فيها بسكون غريب جوانا وابتسامه مرسومه على شفايفنا
ساعات بتكون الذكرى حتى صعبه ومؤلمه مثلا انك تفقد حد عزيز عليك في الدنيا دي بس وقتها انا مابفتكرش اللحظه دي انا بفتكر لما كنت معاه وبفتكر الايام والسنين معاه مابحبش افتكر لحظه فراقنا ورحيلهم بحب دايما احول اي ذكرى مؤلمه لذكرى جميله علشان دايما ابتسم لما افتكرها
عارفين انا حتى عندي ذكريات المفروض انها صعبه مثلا خيانه من حد او اي موقف اتعرضت ليه من حد كان المفروض اني فاكراه عزيز عليا مش عارفه ليه مش بحب افتكر الموقف ده لما افتكر الشخصيه دي برضو بحب افتكر الايام الحلوه لينا سوا وبرضو ببتسم
في رايي ياريت نحاول نفتكر الايام الحلوه وبس الي قضينا مع كل الناس حتى لو بعض الناس دول ضربوك من ظهرك هما كده كده بقوا ذكرى جوايا بس لما بفتكرهم بفتكرلهم ايامنا الحلوه لمجرد اني عايزه ابتسم لما اكون في لحظه حنين

هناك 8 تعليقات:

غير معرف يقول...

اول واحدة بعلق
هيييييييييييييييييييي

حلو ان الواحد يسترجع ذكرياته و سنين حياته الي فاتت و يحن ليها بس .. يا ريت انها تعود الايام الحلوة تاني
في اغلب الاحيان
اقول يا رب تكون ذكرياتنا و حاضرنا و مستقبلنا تكون كلها ايام حلوة

Foxology يقول...

اولا .. بوست جميلة جدا وفكرتنى فعلا بصديق عزيز عليا اوى وبالصدفة اول حاجة لما قمت من النوم عملتها انى رنتله لأنه برة مصر حاليا ...

ثانيا .. المدونة جميلة وياريت تستمرى على نفس النمط اسلوب تناول المواضيع جميل

ثالثا .. ان شاء الله هتتخرجى وتبقى حاسوباتية قد الدنيا ولا تزعلى نفسك المهم بس تبقى مستعدة لمرحلة ما بعد التخرج واسأل مجرب ولا تسأل طبيب :)

غير معرف يقول...

بجد كلام اكتر من رائع
وانا كنت بقرايه الكلام افتكرت احلي لحظات عدت عليا كانت ذكريات جميله فيه منها اللي كان مؤلم وكان فيه منها حبيت افتكرة
لان الانسان بطبعه بيحب يعيش علي ذكرياته الجميله وبرضه المؤلم منها
بحييكي علي الكلام اللي اكتر من رائع
وامنالك دوام التوفيق والرقي في حياتك واستمرى في الكتابه لفان طريقه كتابتك جميله ومشوقه

سيكولوبيا *حكايات من العيادة النفسية يقول...

جميلة جدا لحظات الحنين
وجميلة جدا طبيعتك المتسامحه
كن جميلا ترى الوجود جميلا

تحياتى حبيبتى

fatma يقول...

مثلا خيانه من حد او اي موقف اتعرضت ليه من حد كان المفروض اني فاكراه عزيز عليا مش عارفه ليه مش بحب افتكر الموقف ده لما افتكر الشخصيه دي برضو بحب افتكر الايام الحلوه لينا سوا وبرضو ببتسم

ازيك يا سوسو (اتفقنا انها دلع حاسوباتيه بقى )

انتى متأكده انك مش أنا ؟؟؟

امممم اصلى انا كده

فعلا لما البنى ادم بيقرر انه يفضل يحب حد حتى لو خانه بيفتكر له اجمل ايام واحلى لحظات عاشها معاه

ولو قرر انه ينسى ويكره مش هيطيق البنى ادم ده وهينسى له حاجات كتير جدا جميلة كانت فى يوم بينهم

جو أون يا هندسة
دى حاسبات دافنة حاجات كتير
طلعى طلعى واسمعى نصيحتى

وياريت تشيلى الوورد فريفيكشن علشان متعبه شويه

وكل حالة حنين وانتى طيبة وبخير

baneadmaya_21 يقول...

جميييييييييل جدا بجد كلامك زي العسل وكمان انتي لمستي حاجات كتير فيا وكنت ببتسم وانا بقرأ الحاله دي لانها فكرتني بذكريات كتير منها الى كنت فاكراها ومنها الى كنت نسياها بس احيانا في ذكريات بتألم بس برضو بنبتسم وشكرا ليكي لانك رجعتيني لزمان جميل من عمري
ومبرووووووووووووووك على البلوج الجميل دا

حاسوباتيه يقول...

ميرسي جدا ليكم كلكم ويارب دايما كده تشرفوني بزيارتكم على طول وان شاء الله الي جاي ينال اعجابكم ميرسي ليكم كلكم

marool يقول...

اول مره ازور مدونتك..ولقيتك بتتكلمى عن موضوع فعلا كان فبالى الذكريات اوقات بتكون طيف جميل فحياتنا..واوقات بيكون ظل ثقيل بيالمناويجرحنا لما يخبط على شباكنا من وقت للتانى..للامام كلماتك رقيقه ومعبره وانتظر زيارتك http://www.black-roses-candles.blogspot.com/