3‏/3‏/2008

دموع مستخبيه


دموع مستخبيه

ان من اعظم التحدي ان تضحك والدموع تزرف من عينيك.......

كلمات جميله بحبها جدا الكلمات دي يمكن لانها فعلا بتلمس كتير مننا كتير بل كلنا ساعات بيمر علينا اوقات بيكون نفسنا نبكي نبكي جامد من غير ما حد يسالنا فيه ايه؟ بتعيطي ليه؟
نفسي ابكي من غير ما اكلم واحكي واقول لان بيكون صعب نحكي وقتها
نفسي الاقي حد يفهم من غير حتى دموع ان في دموع مستخبيه في عنيا
نفسي لما اكون محتاجه للدموع الاقيها لانها ساعات كتير بتهرب مني
يمكن عزه نفس بتمنع دموعي تنزل
يمكن لاني دايما بتفاخر اني مش ببكي
مع اني كتير ببكي لوحدي
ليه لما دموعي تخوني وتنزل بلاقي مليون حد بيسال ياه هي بتعيط؟ ياه هي بتعرف تعيط ؟ليه بتعيط ليه؟
هو انا للدرجادي ببان جامده
يمكن لان لما اكون عايزه ابكي كتير بقاوم اكتر واضحك اكتر واكتر علشان ماحدش يكشفني
بعترف اني ضعيفه من جوا وبعترف اني عايزه اعيط ايه يعني الناس هتقول ضعيفه قدام المشاكل ماتقول ما انا ياما كنت قويه وياما شلت جوايا لوحدي وماكونتش بحسس الي حواليا بحاجه
بس لا ماعرفش اعمل كده خليني كده احسن وخلي دموعي مستخبيه خليها غاليه لغايه لما الاقي الي يستحق تنزل دموعي قدامه................................

هناك 9 تعليقات:

حقوق مسلم يقول...

يسعدن أن أكون أول واحد يرد وما شاء الله عليكي يا حاسوباتيه في تعبيرك عن الاحساس اللي جواكي والكلام متناسق مع بعضه إلي الأمام دائما فانتظار كل ما هو جديد

fatma يقول...


يمكن عزه نفس بتمنع دموعي تنزل
يمكن لاني دايما بتفاخر اني مش ببكي
مع اني كتير ببكي لوحدي



لتانى مرة بسألك يا سوسو
انتى متأكده ان انتى مش أنا ؟؟

كلام مفيش بعد كده بصراحة
زى ما انتى قولتى بيمس كتير مننا
اقولك على حاجة
عيطى وسيبى كل حاجة تخرج بره
هترتااااااااااحى
او كلمى حد بتثقى فيه جدا واحكيله على اللى مضايقك
هو انتى لسه هاتستنى اللى يستحق دموعك تنزل قدامه
يعنى انتى ناوياله على العياط من دلوقتى
لا عيطى علشان تلاقى اللى يستحق انك تضحكى وتبتسمى قدامه

صدقينى هيبقى احسن

ويااااريت تشيلى الوورد فريفكشن علشان فعلا فعلا متعبة

جو أون يا هندسة

semsem يقول...

واووووووووووو
بجد البوست ده ملوش حل
احساسك عالى جدا يا (سوسو)
سمعتهم بيقولولك كده
:)
عموما الى الامام دائما
اختك سمسم

Foxology يقول...

موضوع الدموع ده وكون انها مستخبية او حتى باينة فكرنى بكلام للمفكر والكاتب (ادوار الخراط)بيقول :

"كم من البكّائين! البكاؤن كثر فما قيمة ذلك ؟ ما معناه حتى ؟
لا تعتذر أبدا عن الدموع. ليس للدموع ثمن لكثرتها بخس أو غال !! "

متخبيش ولا تكتمى دموعك ولا تحوشيها لحد يستاهل انها تنزل قدامه لأن الدموع مهما كان معناها فهى فى الآخر بدون ثمن !

حاسوباتيه يقول...

مبسوطه جدا ان البوست ده عجبكم حقوق المسلم شكرا جدا ويارب دايما تنورني وشكرا لكلامتك الرقيقه دي

فطومه حبيبتي انا نفسي اشوفك عيب نكون في كليه واحده وجامعه واحده وماشوفكيش وحاولت اكلمك كتير على الماسنجر انتي عارفه انا بس مستنياه وهو زنبه على جنبه يستحمل بقى عياط وصويت وخناق ههههههههههه وكل الي عايزاه هطلعه ههههه ولعلمك انا اقصد هنا اي حد يكون قريب ويستحق فعلا


سمسم انتي عسوله خالص ودايما نورنيني وشكرا لكلامتك الرقيقه


فوكس شكرا جدا لكلامتك صحيح الدموع مالهاش ثمن بس غاليه وعزيز عليا ويارب دايما منورني

Bongo يقول...

تدوينة جمييييلة ما شاء الله

اول زيارة لمدونتك و ان شاء الله مش الأخيرة

تحياتي

بيسوو يقول...

تصدقي انا كمان كتير بيبقى نفسي اعيط من غير سبب..وكمان في الفترة الاخيرة دي بقى عندي حساسية مفرطة بقت اي حاجة ممكن تخلي دمعوي تنزل

لدرجة اني بدأت اعتقد اني انسانة نكدية

SKOBL- Little Lazy Me يقول...

كوني اضحك لا يعني سعادتي و كوني لاأبكي لا ينفي حزني .. بجد كلنا كده .. دايما الناس بتلوم على غيرها الدموع .. ساعات بنحس اننا عايزين نبكي و نبكي و ما حدش يشوف دموعنا .. ساعات بنعوز نبكي و نلاقي حد يمسح دمعتنا .. ساعات بتعوز نبكي و ما نقدرش .. ساعات الدموع بتمتنع رغم اننا نفسنا نبكي بحر دموع ..لكن في النهاية .. مجرد ما الدمعة تترقرق جوه عينينا بنستريح .. لو حسيتي انك عايزة تبكي ابكي .. على الاقل البكا و الدموع بتطهر العين .. شكرا على زيارتك و فعلا البلوج بتاعتك حلوة

الدائخ يقول...

أكتر لحظة صعبة ف حياتي بقابلها لما بابقي عايز أعيط بس مش عارف، مش لعزة النفس ولا لأي حاجة .. أنا بكل بساطة نسيت أزاي أعيط ..

من كتر م الواحد بيكتم جواه و يجبس المشاعر ف قلبه بينسي البكا و إزاي

ببقي عاوز أعيط علي نفسي و اللي أنا فيه بس ما بقدرش، و لأني ما بقدرش بابقي عايز أعيط أكتر