7‏/3‏/2008

حاله طيران



وانا صغيره افتكر مش انا بس ده كلنا حلمنا اننا بنطير حلمت اني بفرد ايدي وبطير في السما ماكانش في حاجه تمنعني عن الحلم ده ماكونتش لسه عارفه انه مش بيتحقق وانه مجرد حلم بحلم بيه كنت فاكره انه هيجي وقت فعلا هطير فيه زي العصافير والمس السحاب بايدي
وكل ما كنت اكبر اعرف اكتر انه مجرد حلم
ومع مرور الزمن حتى الحلم ماعونتش بحلم بيه لان واحنا صغيرين كانت احلامنا مالهاش دعوه بالواقع والمنطق
لكن لما بنكبر مشاكلنا والواقع وعقلنا بيدخل في احلامنا علشان كده مابنعرفش نحلم بشئ مش ممكن منطقيا انه يحصل
حتى لما ركبت الطياره اول مره كنت فاكره ان انا خلاص بقى هو ده الطيران والحلم اتحقق لقيتني برضو مش انا الي بطير ومش عارفه افرد ايديا ومش عارفه المس السحاب
بس عارفين ساعات بنحتاج اننا نخلق حلم نعمله بنفسنا نهرب بيه شويه من الواقع حتى لو كان حلم يقظه او حلم غير منطقي
علشان كده انا لسه بحلم اني بطير برغم انه حلم بخلقه بنفسي بس بيديني امل في بكره وبيقولي انه هيكون احلى
ببص للعصافير وبحلم اني بطير وبكره يكون احلى................

هناك 17 تعليقًا:

هاني النجار يقول...

لفتت نظري جملة (رأي العسولين)
ينفع رأي العواجيز ؟؟
إذا كان ينفع فصدقنيني كلنا حلمنا بالطيران واحنا صغيرين
ولما كبرنا برضه لسه نفس الحلم موجود
يمكن بيستخبى شوية لكنه موجود
هو دا حال الإنسان
ديماً يدور على الشيء المستحيل ويحلم بيه

تحياتي

Unknown يقول...

مش هعرف ارد غير باغنيه :
نحلم علي كيفنا نغلب عذاب خوفنانرسم علي كفوفنا قلبين وسهم اترمي
ميهمناش الليل ولا الف جرح وويل
طول ما الحياه بتميل نعدلهه واحنا سوا
كل الجراح بتعدي والعمر راجع وردي
نفسي احلم علي قدي ويكون لحلمي حدود
**********************************
واغنيه تانيه بتقول
احلو ويحلي لي احلم وانا مالي الي هيحصل ايه
راضي انا بحالي راضي وبعيش حالي بالي بيحصل فيه
***********************
نصيحه لله احلمي حتي لو متحققش

بطوط حبوب يقول...

لا دلوقتى بقينا نقول
يا طير يا طاير فى السما طز فيك
هههههههههههههههه
اسهل من اننا نحلم اننا نطير صح؟


------------------------
طلب لو ممكن بدل ما نقعد نكتب الحروف الغبيه دى تدخلى customize (تخصيص) ------- setting (ضبط) ------تعليقات ) comments---------Show word verification for comments اختارى نو

lonely يقول...

حلم يقظة
ياسلام عليكى
دنا على طول طايرة بقى
لما فعلا بعيش الدور والاقينى بطير
بحس انى مش فى الدنيا
فى مكان كله ابيض فى ابيض
خير اللهم اجعله خير
ولا لما بكون مروحه وبسرح بقى فى السما من شباك العربيه
ملكوت تانى
انا بحب احلم واطير كتير زى العصافير
ونطير ونطير ونطييييييييييير زى العصافيييييييييييييير

خمسة فضفضة يقول...

السلام عليكمم ورحمة الله وبركاته

كلنا كان نفسنا نطير ونحلق عاليا في السماء ، نرافق العصافير ونعيش فوق السحاب

من فتره كتبت بوست بنفس المعني اسمه كنا صغار


تحياتي

Foxology يقول...

مين مكنش نفسه يطير ؟ انا عن نفسى دلوقتى لسه بحلم انى اطير بس بحلم انى اطير على بيتنا وانا مروح من الشغل كل يوم بدل بهدلة المواصلات وزحمة الشوارع الخانقة دى ...

بوست جميلة :)

SKOBL- Little Lazy Me يقول...

أجمل شيء أيام الطفولة و أحلامها .. جايز ما حلمتش اني أطير .. بس كنت دايما باحلم أبقى خارق زي أبطال الأفلام و الأنمي .. المضحك اني حتى الان ساعات باحلم بكده .. جايز ده عشان شعوري بأني مش قادر أحل مشاكلي .. ودايما البطل بيحل جميع المشاكل بنهاية الفيلم أو المسلسل .. بس الممتع اني في أحلك أوقلت الضيق .. لما بأشوف فيلم في بطل يعجبني .. يرجع جوايا الطفل اللي نفسه يبقى زيه .. بأكون فرحان و بأنسى ولو لحظيا حزني ..

Bongo يقول...

تدوينة جميلة

و مفيش حد محلمش انه يطير ,
بس الفرق ان في ناس فقدت الأمل في حلمها و اقنعت نفسها انه مستحيل
في ناس لسه بتحلم و عارفه انها في يوم من الأيام هتعرف تطير :)

تحياتي

غير معرف يقول...

السلام عليكم ورحمة الله وبركاته
الطيران دة شئ عظيم كفاية الاحساس بالراحة والجو العظيم يااااااه شئ رائع فعلا

Mona Shereif يقول...

يا سلام


انا بطير ازاى بقى
ابقى راكبه المواصلات
قولى مثلا اتوبيس وابقى قاعده كده اقوم رافعه رجليا بس سنه صغيره من على الارض ، ساعتها احس فعلا انى بطير
هههههههههههههههههههههههههه

مدونتك جميله يا حاسوباتيه
انتى عملتى اللى انا معملتوش اللى هو اسم مدونتى اصلا ساعات ساعات
هههههههههههههههههههههههههه

عسوله
واسلوبك جميل جداااااااااا

قلب أبيــض يقول...

الحلم شئ جميل جدا

والاجمل منة مدونتك
بجد كلمات بسيطة جدا
بس جميلة جدا

وربنا يكرمك وطيرى وتلمسى السحاب بايدك


اول زيارة
ومش هتكون الاخيرة ان شاء الله

حاسوباتيه يقول...

يا جماعه انا مبسوطه جدا جدا ان البلوج بقى الناس بتدخله وبتعلق وان كلامي الصغنن ده عاجبكم بجد شكرا جدا ومدوناتكم كلها رائعه بجد ويارب تنوروني كده دايما يارب

رئـــــيسـة حزب الأحلام يقول...

السلام عليكم
اسلوبك جميل اوى وكلنا نفسنا نرجع نحلم تانى بس باين الحكومة غلت الاحلام هى كمان

صوت فيروز يقول...

يااااه يا بنت يا حسوباتيه انتي,,فكرتيني لما كنت بحلم حلم اتكرر كتير و انا صغيره,,كنت بحلم ان عندي شجرة ليها باب بدخل جواها و بطلع علي فروعها حاجه كده زي اليس في بلاد العجائب
بس بالنسبه بقي لموضوع ان احلامنا مش بتتحقق و اننا لازم نفرد ادينا و نطير
فانا شايفه اننا نستغل رجلينا احسن
يعني نحلم باننا بنجري لان ده المستطاع
نجري بقوة اكبر من فوتنا
فهماني و لا نقول كمااااااان
سلام يا قمر

Soooo يقول...

قدرة الانسان على الحلم في حد ذاتها متعه
لما الواحد مننا بيحلم انه يطير ولا بيحلم انه يبقى لاعب كورة او نجم مشهور او مليونير او اي حلم حتى .. سواءا كان حلم مشروع او غير مشروع .. بيفتح جوانا باب الامل
باب احنا محتاجينه اكتر من احتياجنا لاي حاجه في الدنيا

احلمي انك تطيري زي مانتي عايزه
واحنا كمان هنحلم معاكي




سلاموووووووووووز

غير معرف يقول...

مدونة جميلة وفيه فكرة كويسه
وحقائق اليوم هى احلام الأمس
وأحلام اليوم هيا حقائق الغد إن شاء الله
أدعوكى لزيارة مدونتى آفاق الإسلام
http://islamic-horizon.blogspot.com/
على فكرة انا زميل مهنة بردوا
تقبلى تحياتى

ღϠ₡ღأمير الهدوءღϠ₡ღ يقول...

صحيح يمكن كان حلمي انا كمان

بس في اللحظه دي محتاج الحلم ده اوي

وبعيشه كل لحظه

!!
:)
تحياتي