12‏/3‏/2008

حاله من جوا


انا اول مره اكتب حاجه زي كده واول واحده شافت الكلام ده هي بيسو وقولتها يا بيسو ده شويه كلام هبلولي كده قالتلي لا حلو ونزليه يعني لو وحش اتخانقوا معاها لو حلو قوليلي اسيبكم مع شويه الكلام

.............................................................................................................................


ازاى قدرت تقتحم عالمي كده
ازاى قدرت تدخل فيه كده
ده العالم الي ماقدرش حد يدخله قبل كده
ده العالم الي حطيت فيه اسوار وابواب كتيره علشان احمي نفسي فيه
ازاى دخلت وازاى اسواري ماحمتنيش منك
ازاى لقيتها بتنهار قدامك
ازاى باجي قدامك وبنسى كل كلامي
ازاى مش قادره اقاوم الاحساس ده
ازاى سيطر عليا كده
ازاي اسواري اتحولت لسجن سجنتي انت فيه

اول مره احاول اهرب من حد كده وافشل
اول مره احاول ابعد وافشل
اول مره يتهز كياني كده
اول مره قلبي يخرج من سيطرتي ويهزمني
اول مره احس اني مش عارفه اقول لا لقلبي
اول مره عقلي يقف عن التفكير في اي حاجه غيرك
اول مره وانا بكلم حد انسى افكر قبل ما اكلم
لان كلامي معاك من قلبي ليك وبس
اول مره احس اني من جوا قوي بتوجع
اول مره احس اني فرحانه وزعلانه ومبسوطه ومخنوقه وكل ده في وقت واحد
اول مره احس بدقات قلبي كده
اول مره احساس يهزمني كده
اول مره اسرح واتوه في حد
اول مره الاقيني بمشي في طريقك من غير ما احس
يمكن اشوفك
وبشوفك وبتشوفني
بس الفرق بينا انك بتشوفني بعينك بس لكن انا بشوفك بقلبي وعنيا

عارفه انك بالنسبالي المستحيل
عارفه اني بعيده قوي عنك


بس عارف
لا للاسف انت مش عارف ولا حاسس
انا اول مره احب .......وانت مش عارف

هناك 15 تعليقًا:

بطوط حبوب يقول...

اظن ان هذا قدر لابد ان تعيشه كل النساء
فهمن بنتظرن الحبيب بس انتى عارفه الولاد فهم بطئ شويه متخافيش هيفهم وهيجى
تحياتى

Wael يقول...

الله يسامحك يا بيسو D:

بس اجمل مافيها انها صادقة الى حد بعيد
بغض النظر عن اى نقد اخر .

lonely يقول...

ههههههههههههههه

على رأى بطوط يابنتى
الاولاد فهمهم بطئ نيييييييييييييييييييييلة

ولا فى دمغهم حاجة خالص

تعالى هنا بقى يا انسه
انتى ايه حكايتك
أنا شكه فيكى من فترة من ساعه الجملة اياها اللى لزقاها جنب اسمك على الماسنجر

بس قولت يابت اتقلى بكره كل شيئ يبان
وهاهو حصصصصصصصصصصصل

انا قولت حالة التوهان والطيران ومحشى البدنجان دى وراهم حاجة يا ناس

احساسى حبيبى ما بيخيبش أبدا
وتخمينى جه فى محله

بس ايه ياعم الكلام الشديد ده
تؤ تؤ انا مش قده خالص على فكره
ده كلام يزحلق الواحد من على الكرسى وهو بيقراه
حاجة تشيب الكتكوت يا جدعان

بس بجد بقى احساس فظييييييييع
ايه الرقه دى كلها

على فكرة بكره يفهم ويحس صدقينى
ونفرح فيكى قصدى بيكى قريب
وابقى اعزمينا بقى وبلاش بخل


وعلى رأى المثل الصينى اللى بيقول
توكيكى فانى جويينتشى بينههاهاى

SKOBL- Little Lazy Me يقول...

احم احم .. و الله أنا شايف ان الولاد بيفهموا بسرعة مش بطيء ولا حاجة .. أنا مش حادخل في نقد المشاعر و تبادلها بس أنا أول ما قريت قريتها بطريقة الشعر السطري ما حسيتش بيها ، لكن أما اتخيلتها كلام صادر من حد بيقوله كانت فعلا جميلة ، تهنئة

basma saghir يقول...

ماشي ياستي...انا مستعدة اتحمل اي حاجة..عادي يعني اصله مش هيحصلي حاجة
بصي..انا قلتلك قبل كدة اني بحب الكلام الطالع من القلب على طول من غير تفكير ولا تزويق
وعلى راي عبد الحليم...يلي نسيك الحب انساه وابعد عنه عشان تلاقاه
:)

shahy يقول...

صعب اقول على اي حاجة بحسها
مش معقول اوصف مشاعري دي كلها


انتي بقى شطورة عرفتي توصفي مشاعرك ووصفك دخل قلبي

ربنا يصبرك ويفهمة

تحياتي

إخوانى حتى النخاع يقول...

شكراااااااا ليكى .. مدونة رووووعة



أخوكم إخوانى حتى النخاع

http://ikhwangeeee.blogspot.com

عروسة ننوسة يقول...

تحياتى لكى

Eno يقول...

كلام حلواوووووي ياحاسوباتيه
احلي مافيه الاحساس الصادق

بوست جميله وصادقه فعلا :)

Foxology يقول...

كلام جميل جدا فيه احساس

تحياتى المتواضعة :)

رئـــــيسـة حزب الأحلام يقول...

السلام عليكم اية الجمال دة وانتى بردة مستنية زى يلا ربنا يسهل

Desert cat يقول...

اجمل حاجه الكلام الخارج من القلب علشان كدا بيوصل القلب بسرعه
تحياتى

ابو صهيب ( الجمعاوي الاصيل)سابقاً يقول...

السلام عليكم ورحمة الله وبركاته

رزقكك الله ماتريدين واراح بالك

momken يقول...

بوست حلو اوى
المدونه كمان رائعه
اول زياره ليا عندك
واستمتعت جدا

تحياتى

البنت الشلبية يقول...

ازيك يا حاسوباتية
مدونتك حلوة ومفيهاش كلاكيع
احلى حاجة انك تكتبى الى نفسك فيه باسلوبك بيوصلنا بسرعة

ياريت نفضل على اتصال دايما