6‏/5‏/2008

حاله خوف


في عز فرحتنا دايما نلاقي الخوف واقف في سكتنا مشتاق لينا وملهوف كاننا واحشينه مع اننا عايشينه خوف خلانا واحنا مغمضين بنشوف .....
ياما حاولنا وكان نفسنا ننسى روحنا نسيب نفسنا بس تملي بيفوقنا شعور بالخوف......

الكلمات دي من اغنيه هدى عمار اسمها خوف في فيلم قص ولزق وحبيت ابدأ بيهم الحاله دي
حاله الخوف الرهيبه الي بقت ماليه حياتنا بقينا خايفين من كل حاجه خايفين من بكره ومن انهارده ومن الناس ومن الوقت وبقينا من كتر الخوف بنعمل حساب لكل حاجه بشكل مرعب
بشكل خلانا كل واحد عايش في دوامه من الخوف بقينا حتى بنخاف من نفسنا ساعات وبنعملها حساب وبنخاف منها بنخاف لحسن تقولنا انها نفسها تتحرر من الخوف ده نفسها تطير وتطلع وتخرج من الدايره دي نفسها تنطلق وتجري براحتها نفسها ماتعملش لكل خطوه حساب نفسها تقول الي هي عايزاه وبس ومش مهم الي هيحصل بعد كده
نفسها مش كل حاجه تخاف منها وتفكر فيها قوي كده نفسها لما تحب تقول انا بحبك ونفسها لما تتعب تقول انا تعبانه ونفسها لما تفرح تقول انا فرحانه
ليه بقينا بنخاف كده ليه بقينا من كتر خوفنا بنخبي مشاعرنا كده ونقول اصله بنخاف اصل خايفين اصل قلقانين
وبعدها نرجع نندم ونقول ياريت كنا قولنا وباعلى صوتنا
تعبت من الخوف الي جوايا ده تعبت من انه دايما معايا بقينا لما بنزعل بنخاف ولما بنفرح بقينا بنخاف لدرجه بتخلينا نستنى ونقول اصل ده فرح مؤقت وهيروح وده برضو من خوفنا مش بيكون عندنا فرحه كامله ابدا من كتر خوفنا
الخوف بيخلينا ساعات نخسر ناس كتير حوالينا لمجرد اننا خايفين نقرب منهم قوي خايفين نقرب منهم وبعدين الزمن يفرقنا فبنقول بلاش نقرب احسن احنا خايفين
فعلا نفسنا نسيب نفسنا نسيبها براحتها تعمل الي هي عايزاها والي نفسها فيه من غير خوف وتفكير وترتيب
ياريت نقدر نعيش من غير خوف ياريت

هناك 25 تعليقًا:

قلم رصاص يقول...

الحمدلله لحقت أول تعليق

ما شاء الله أختنا حاسابوتية بوست جميل جدا

وفعلا لما بنندم بنرجع ياريت نكون قولنا وبعلو الصوت

ما شاء الله

كلمات جميلة وطيبة

روحي ذاكري بقي وانقذي ما يمكن انقاذه

تحياتي
قلم رصاص

Eno يقول...

بوست جامد ياحاسوباتيه فعلا

انا حسيت قبل كده الخوف لما كنت خايفه اقول علي حاجه جوايا تزعل اللي قدامي خايفه لما اقول الحد اللي بكلمه يزعل مني

وفعلا الخوف بيخليني اسكت متكلمش مع اني السكوت حسيت انه مؤلم جدا عن الاحسااس بالخوف

بس الحمد لله قدرت وبحاول اتغلب علي ده جدا المهم الحد اللي بتتكلمي معاه اللي هو محور الكلام يعني هيقبل ولا هيزعل زي ماانتي خايفه ؟!

تحياتي ليكي :)

ميرا ( وومن ) يقول...

دائما ما يخرج من قلوبنا يصل إلي قلوب الاخرين
أسعدتني زيارة مدونتك ولمست كلماتك وترا داخلي فنحن دائما ما نختبئ خلف هذا الخوف حتي نصبح أشخاصا لا نعرفهم غريبون عنا ياليتنا لدينا الشجاعه الكافية لطرح هذا الخوف لكنه موروث ننقلة جيل بعد جيل ولا تنسي الحكمة الشعبية ( من خاف سلم ) حكمة مصرية صميمة
تحياتي ومودتي

"النجم القادم" يقول...

لالالالالالالالالالالالالالالالالالالالالا

اختنا حاسوباتية عيب تخافى واحنا هنا

تصدقى بالله طلع كلامى إوعى تخاف إوعى تخاف

هجس وطلع الكل بيخاف اولهم انا ههههههههههه

ربنا يباركلك اختنا الفاضلة

الطائر الحزين يقول...

الخوف حالة صحية

لكن لما يكون ممن يستحق أن نخاف منه فقط

samourai 4 ever يقول...

الله الله
انى احنى قبعتى لكى احتراما
على كلامك الجميل
و اسلوبك الحسن
الخوف دة شىء موجود داخل الانسان
و دة شى طبيعى
بس مع سرعه الحياه من حوالينا
بقه الخوف موجود كل لحظه و كل ثانيه
و الناس بقه تقدروه اوى
اكتر مبتقدر نفسها او غيرها
بس المطلوب مش ان احنا نسيب نفسنا اوى
بس راحه مع مسؤليه
و الا اختفى الخوف
و بقه مكانه
الهمجيه
ولا ايه؟

و دمتــــــــــــــــــــم

الميكروباص يقول...

ليس الخوف وحده
فهناك القلق
والتردد
دي بقت أمراض

غير معرف يقول...

جيتى على الجرح

الخوف كان ممكن فعلا معايا يدمر حياتى
لكن الخوف برضه هو اللى خلانى اتماسك


طبعا مش حتاجة اقولك انه بوست جميل قوى

توكلى على الله وسيبك من الخوف

تعالى زورينى

بطوط حبوب يقول...

لازم نقاوم خوفنا
بس برضه لازم نستسلم له احيانا
بوست هايل
دعواتك الامتحانات بدأت

Ahmed Emara يقول...

لا اعرف معنا للخوف الا في هذا القول
الخوف من الجليل والعمل بالتنذيل والاستعداد ليوم الرحيل
هذه هي التقوي
ايضا في هذا القول
ولمن خاف مقام ربه جنتان
وليست جنه واحده

أما الخوف الذي نتحدث عنه انما هو جبن وضعف ايمان وثقة بالله
قل لإن اجتمعت الانس والجن علي ان يضروك بشئ لن يضروك بشئ الا قد كتبه الله عليك رفعت الاقلام وجفت الصحف

basma saghir يقول...

كان نفسي ياجوجو ابقى اول تعليق..بس انتي عارفة بقى ظروفي وجواباتي فا مش مهم...بيقولوا انك لما توصلي متأخر احسن انك متوصليش خالص
بس تعرفي الفهم المتأخر والوصول المتأخر حاجة صعبة قوي..خصوصا لما يبقى كل ده بسبب الخوف..لأن الخوف فعلا شبح
الخوف بيضيع مننا حاجات حلوة كتير علشان خايفين حتى نعيش السعادة..او بنستخسر السعادة في نفسنا والله يا بنتي مش عارفة بس اكيد الموضوع محتاج دكتور نفسي او اننا نحب نفسنا شوية ونتمى لها السعادة

شعور الخوف مكلبش فينا ومش راضي يسيبنا...صحيح كلامك لما قلتي اننا خايفين لما نحب نقول اننا بنحب..وبنخاف لما نحب اننا منبقاش سعداء..بنخاف من الحب او بنخاف من السعادة..برضو مش عارفة زي ما قلتلك أكيد الموضوع محتاج تحليل نفسي

زيزي يقول...

اه من الخوف ومن الي بيجرالنا بسبب الخوف...كأنك جبتي اصل كل المشاكل وكشفتي عنه الستار

حسيت الخوف قبل كدة كأنه وحش ماسك رقبتي ومش راضي يسيبها..حسيت انه بيشل الانسان..وبيخوفه حتى من اقرب الناس ليه

Unknown يقول...

بوست ممتاز يا حسوبيه
وجي في وقته لسه كنت بكلم حد عن موضوع الخوق والاقلق من الجي واني اشوف الوحش واخاف منه لحاجه وانسي ان في حاجه حلوه ممكن تحصل
للامام دائما يا حسوبيه ومتنيين اللقب رسمي ربنا يوفقك في امتحاناتك
واحد من الناس

Foxology يقول...

اللى ميخافش ميبقاش كائن حى !

المهم اننا نتحكم فى خوفنا مش نسيبه هو اللى يتحكم فينا

تحياتى :)

Ahmed Emara يقول...

أشكرك علي زيارة بلوجي
وقد تم حزف verfication
علشان العيون وكده

momken يقول...

البوست رائع
بس الحقيقه خايف اعلق عليه

ماهو مليان خوف وعفريت ورعب

وحجات كده

بس فى حاجه
الندم مختلف عن العوده للحق
يعنى فى ندم وفى رجوع لحق وترك باطل
انا مش بفضل استخدام كلمه ندم
وبحب اوى استخدام كلمه توبه او انابه

البوست بتاعك جميل جدا
والقضضيه دى شغلانا كلنا

تحياتى

رئـــــيسـة حزب الأحلام يقول...

خوف ساكن داخلى خوف من الحياة خوف من الناس خوف




من الأوهام والأحزان .




لماذا الحزن وانت تنامين مع الأوهام.




لماذا الأحلام لا تتحقق إلا فى دنيا الأوهام.




حيرانة أنت ولماذا الحيرة والكل من حولك حيران.




عاشقة أنت للأحزان والأوهام
تحياتى لكى

موناليزا يقول...

الا بذكر الله تطمئن القلوب

صوت فيروز يقول...

اااااااااااه يا حسوباتيه جيتي علي الجرح يا اختشي ،،بس للعلم الخوف هو الرادع لنا من حجات كتير ممكن يكون زيادة بس وجوده ضروري برده ،،،اا كونا خيفين من ابسط الامور فدي مصيبة و تبقي عيشة صعبة ،،مقدمة البوست جميلة و متوظفة اوي مع البوست
تحياتي

3omda يقول...

انا اعتقد ان الخوف ده دايماً راجع لعدم الثقه(في كل حاجه) وضيفي عليه ان الانسان بقي بيحمل نفسه اكثر من طاقتها..طب دانا حتي ساعات من كتر التفكير ببقي نفسي الاقي زر shutdown لمخي علشان اريحه شويه........

mohra يقول...

سهٌير ليالى و ياما لفٌيت و طُفت
و ف ليله راجع فى الضلام قمت شُفت
الخوف ...كأنه كلب سدٌ الطريق
و كنت عاوز أقتله ..بس خُفت
عجبى
صلاح جاهين

دكتورة سنان يقول...

متفكرنيش بالخوف بقى :(
الامتحانات قربت وانا فى حالة رعب مش خوف بس :)
هو اهم حاجه الواحد يعرف يسيطر على خوفه ويهدى
وانا مبعرفش اعمل كده للاسف:))

Mona Shereif يقول...

طيب تعملى ايه فى اللى بتتصرف من غير ما تخاف وترجع تندم بقى على التصرف بتاعها ده، وبجد حطنى فى مواقف وحششششه جداااا

هو مش على طول طبعا، لانى خوافة جدا برضه ( انسانه متناقضة اعمل ايه بقى)
وساعات كتير الخوف بيلجمنى ويقيدنى

ايييييييييييه دنيا ما علينا دلوقتى من الكلام ده خلينا فى مذاكرتنا دلوقتى
الا من الحق انتى اخبارك ايه فى المذاكرة يا بنيتى؟؟؟؟؟
اتمنى بجد تكونى بتذاكرى
واشوفك على خير يارب ان شاء الله
سلاااااااام

funckydoctor يقول...

صعب نعيش من غير خوف للأسف مزروع جوانا

المـــفـــــــقــــــــوعـــــة مــرارتـهــا يقول...

طوووول مااحنا عايشين هايفضل الخير مالينا
اخبار الإمتحانات أيه ؟؟؟
وهاتخلصي أمتي ؟؟؟ ربنا معاكي