7‏/9‏/2008

هو وهي


الساعه 10 بليل مكالمه بين هو وهي

وكانت هي بتحاول تقنعه بموضوع وهو مش موافق عليه خالص انها تعمله

هي: انت مش موافق ليه انا نفسي اعرف ايه المانع يعني او الغلط ؟

هو: انا خايف عليكي ومش موافق تروحي لاني قلقان عليكي من الطريق والسفر

هي: انا مخنوقه وعايزه اغير جو فيها ايه يعني

هو: انا خايف عليكي وعلى انكم تتاخروا

هي: يوه بقى انت كل حاجه مش بتوافق عليها كده انا اتخنقت

هو: انا مش بوافق على كل حاجه وبخنقك ده الحق عليا اني بخاف عليكي

هي: طيب انا بقى عايزه اروح

هو: ماشي روحي بس انا من جوايا مش موافق وقلقان بس روحي علشانك

هي: انت ليه بتصدر قرارات وبتطلب مني انفذها من غير نقاش

هو: لا انا بناقشك اهو وبقولك اني خايف عليكي ده مش معناه اني بخنقك

هي: انا هسالك سؤال

هو: اتفضلي اسالي

هي: لو اختلفنا في موضوع وماحدش اقنع التاني برايه راي مين الي هيحصل

هو: رايي طبعا

هي: ليه بقى ؟

هو: لان انا هكون جوزك ولازم تسمعي كلامي وتحترميني

هي : يا سلام اسمعه كده هي اوامر بتديهالي وانا المفروض اسمعها ولا ايه

هو: لا مش اوامر بس احنا بنتناقش الاول ومش وصلنا لقرار يبقى رايي الي يمشي لاني الراجل

هي: ليه بقى وانت ماتعملش حاجه انا عايزاها وانت مش موافق عليها علشان خاطري حتى

هو: لا هعمل واهو وافقت على السفر مع اني مش راضي عنه بس واقفت علشانك

هي: سيبك من الموضوع ده انا بكلم عموما يعني لازم اعمل رايك لو اختلفنا ومش وصلنا لراي واحد صح

هو: اه لازم لاني الراجل ولازم كلامي يسمع وتحترميه



ولسه النقاش مستمر عن الموضوع ده ياترى هي تسمع كلامه لو هي حتى مش موافقه تعمله ولا كل واحد يعمله الي في دماغه وعايزه ؟

هناك 36 تعليقًا:

Unknown يقول...

امممممم
تسمع كلامه
طاعة الزوج من طاعة الرب
خصوصا لو عارفه انه بيحبها وعاوز مصلحت بيتهم اللي فوق اي مصلحه

كلام حسام يقول...

لو كل واحد مش بدماغه الدنيا هتخرب
هي فيه كام دماغ سليمة في الدنيا !!!!!

Mona Shereif يقول...

بصى يا جميل
لما محمد بيصر على حاجه ويعند فيها انا طبعا بسمع كلامه من غير نقاش
هو اه بكون متضااااااااايقه اد ما تقولى قولى.. بس بجد بفرح اوى لما بلاقينى بقوله حاضر
احساس تانى برضه يا قمر
ربنا يوفقكم يارب

هوندا يقول...

بصى يابنتى الرجل طفل كبيييييييييير ساايسيه وانت هتعملى الى انتى عيزاه
حاولى تقرى كتاب الرجال من المرخ والنساء من الزهرة

شمس النهار يقول...

الموضوع ده لويبان بسيط هو كبير جدا ومهم جدا
ليه
لآن نسبت الطلاق ارتفعت جدا
مع ان الزوج كويس والزوجه كويسه
بس الكبر والعند ومين يمشي كلامه علي مين بتكبر القصه
بس كل واحد منهم لما بيتجوز تاني بيكون استفاد من الاخطاء
فبينجح
طب ليه ماكان منالاول
والحب الاول اوله

مصري بالغربة يقول...

انا راي في اي موضوع

انه لازم نشوف ديننا ورسولنا بيقول لنا ايه

مع احترامي لاراء بعض الناس بالنسبة لكتاب المريخ والزهرة وعطارد

وباقي الكواكب

الرسول ( ص ) معنى الحديث :

لو امرت احدا بأن يسجد لغير الله لامرت الزوجة ان تسجد لزوجها

وحديث اخر

من باتت وزوجها عليها غضبان , لعنتها الملائكة حتى تصبح

وكلكم راع وكلكم مسئول عن رعيته

والاسرة رعية صغيرة

والمسئول عن هذه الرعية الرجل

يا ريت كلنا نرجع لديننا شوية مش حنلاقي اي مشاكل ولو فيه مشاكل ففي ديننا وسنتنا حل لجميع المشاكل

وبلاش الستات بالذات في الوقت ده اللي بيقولوا مساواة والكلام ده للاسف بينسوا تماما فضل الزوج ومسئوليته عن الاسرة

اسف للاطالة

مهندس / محمود مرسي

Unknown يقول...

امممممممممممممممم دة موضوع شائك انا رايى كل واحد يقرر فى اللى يخصه يعنى هى اللى رايحة يبقى هى اللى تقرر تروح او لا اكيد هى بتخاف على نفسها بردو وهكذا يعنى

Eno يقول...

عارفه كلمة حاضر بتريح اووووي واسأل مجرب وحطي في دماغ حاجه انه لو بيحبك عمره ماهيقولك علي حاجه لا لمجرد انه عاوز يكون ديكتاتور عليكي
ابدا عشان بيحبك وعشان انتي اغلي حاجه في حياته هيخاف عليكي من الهوا
وابسط حاجه تردي بيها علي خوفه ده واهتمامه ده وحبه ده حاجه بسيطه اوووووووووي انك تقولي حاضر

انا اتكلمت عنك انتي بصفه شخصيه لاني مش عارفه الكلام ده عليكي انتي ولا علي شخصيات وانتي مؤلفة الحوارلاني عارفه انك كاتبه رائعه لمثل هذه الاشياء :)

تحياتي ليكي يااجمل حاسوباتيه :)

Mona Shereif يقول...

اجمل حاسوباتيه
ليكى تاج عندى يا قمر
ياريت تنورينى وتقبليه

غير معرف يقول...

رمضان كريم عليكى يا حاسوبه انتى وكل من تحبين..
اما رايى فى الموضوع ده قبل الجواز هاتى كتب السيره النبويه اليى كانت بتتناول وبتعرض جوانب من نقاش الرسول سواء مع زوجاته او الصحابه اعتقد جدا ان الموضوع ده هيفيد وهيحدث فرق فى مخ الراجل..
وبعدين قوليله الرسول صلى الله عليه وسلم السيده ام سلمه اشارت عليه بامر الحلق فسمع كلامها ومقلش لا انا الراجل ..ربنا يهدى والراجل يعرف ان ليه قدوه حسنه يقتدى بيها ..الرسول الكريم..ويعرف ان الراجل مش بس بتشبسه برايه الراجل باحترامه لزوجته ومراعاة وجهة نظرها...
انتى نورتينى بزيارتك النهارده يا قمر ورمضانكريم عليكى ان شاء الله..

blue-wave يقول...

نفس الموضوع اللى بين اى اتنين
صراع الحب والكرامه
لو بتحبه هاتسمع كلامه
ولو بيحبها هايتنازل شويه علشانها
بس

محمد يقول...

الحقوق والواجبات فى الاسلام متوازنه
بين الرجل والمرأه
التصرف والموقف الصح هو الى يمشى
المرجعيه هنا للصح والغلط والى يرضى ربنا وما يتفق مع الصالح
رأى مين الى يمشى؟
أذا كان نتيجة التصرف ستؤثر على الاثنين يبقى لازم التوافق
أذا كانت هتأثر على شخص واحد منهم وهو بس الى هيتحمل النتيجه يبقى يتصرف ويتحمل النتيجه
مفيش دكتاتوريه فى الاسلام
الرجل لابد أن يكون ذو تفكير عميق
وينظر لما هو أبعد من قدميه
تفهم نفسية الشريك مهمه

أنا يقول...

أظن أن البوست ديه متصلة بشكل أو بأخر للبوست بتاعى عن حقوق المرأة و المجتمع الذكورى

و متفقة جدا مع رأى محمد ..الشرع هو الحكم

مدونتك عسولة :)
تحياتى

صوت من مصر يقول...

طب هو اسمه ايه وهى كمان عشان نعرف ؟
بوست هايل وكلامك جميل جدا؟

غير معرف يقول...

بصي هو دة الراجل التحكم والغيرة
وكلامة لازم يمشي
بس انتى اكيد اكتر واحدة عارفاه وبتحسي بية اذا كان مجرد بيحكم رايةعلشان يحكم راية وخلاص
ولا فعلا بيحكم راية عشان اسباب تانية خوف عليكى
وفعلا هو صح ولا غلط
بس اكيد طاعة الزوج واجبة ودة كلام ربنا
بس لو هو غلط علطلول مش هينفع يصمم دايما كدة
ممكن تكلمية وقت اما تلاقية هادى وكويس معاكى وفهمية ان فعلا انك بتحبية وعمرك ماهتزعلية
بس انك بيضايقك حاجات منة
ولو صمم على كدة وطبعا فى امور مصيرية بتنرفز
يبقة لازم حد يكلمة
ثانيا من اسلوب كلامك فهمت ان بيتناقش معاكى على عكس كتير من الرجالة وباين علية طيب وبيحبك بجد
ودى حاجة نادرة فى الزمن دة
ويارب يوفقكم

غير معرف يقول...

بصى هى المفروض تسمع كلامه لأنه لو مشى بدماغه و هى مشيت بدماغها يبقى مش حيكونوا حياة مستقرة و ده إذا لحقوا يكملوها لازم كل واحد يسايس اللى قدامه خصوصا كمان إن طاعة الزوج واجب




وكل سنة و أنتى طيبة

lonely يقول...

بصى انا مجربتش
بس بتفرق لو كان خطيبها من جوزها
جوزها تسمع كلامه من غير مناقشه طبعا
او تحاول تقنعه
اما لو خطيبها فبصراحه مالوش كلمه عليها لغاية كتب الكتاب
افرضى انا عايزة اروح اصيف وهو مش راضى اقعد انا بقى دمى يتحرق علشان خاطره

مش فاهمة ايه ده ياختى

غير معرف يقول...
أزال المؤلف هذا التعليق.
غير معرف يقول...

السلام عليكم ورحمة الله وبركاته

كل سنة وانتى طيبة ورمضان كريم

بالنسبة للموضوع
المفروض الزوج والزوجة يبنوا بيتهم على اساس التفاهم والمودة والرحمة
والمناقشة عشان حياتهم تستمر
ويتناقشو فى كل الامور حتى يقتنع احدهم بوجهة نظر الاخر
انما لو فيه اختلاف فى الرأى المفروض الزوجة تطيع زوجها لان رسولنا الكريم امرنا بذلك ولان المرأة الذى يتحكم فيها هو عاطفتها او الرجل فيحكم عقله ولذلك قال الرسول عن النساء (ناقصات عقل ودين)

Foxology يقول...

اولا : كل سنة وانتو طيبين وان شاء الله رمضان اللى جاى فى بيتكم :)

ثانيا : اهم حاجة فى النقاش بين اى اتنين مرتبطين سواء بخطوبة او بزواج يبقى التفاهم والألتقاء فى نقطة وسط الطرفين موافقين عليها ومقتنعين بيها

ثالثا : المناقشة ومحاولة الأقناع والأقتناع دى لوحدها قمة الأيجابية والتفاهم بين اى اتنين ربنا اداهم عقل يفكرو بيه

رابعا : مش عاوز يفهم قصدى غلط او انى عنصرى فى تفكيرى او شرقى المزاج لما اجى اقول ان الراجل المفروض رأيه هو اللى يمشى فى حالة عدم الأقتناع وعدم جدوى المناقشة لسبب بسيط جدا وهو انه فى الغالب بيبقى شايف حاجة معينة وبناء عليها بياخد قراره ومفيش مانع ولا تحريم ان الزوجة تسمع كلام وتطيع زوجها خصوصا لو انهم فى الأصل ومن البداية متفاهمين وعارفين بعض كويس وبيثقو فى تفكير بعضهم

ده رأيى الشخصى واحتمال ناس تعارض واحتمال برضه ناس توافق ومش معنى انى بقول على حاجة لأ لزوجتى ابقى بقيدها وبفرض عليها شخصيتى :)

غير معرف يقول...

خاسوبتيه كل سنه وانت طيبه
مش عيب تبقى حاسوباتيه ومتشتركيش فى اول برنامج أذاعى عن الكمبيوتر والنت والمدونات فى التاريخ؟
عنوان مدونتنا وموقعنا ميتوهش
المدونه
http://netonradio.blogspot.com
الموقع
http://dear.to/cairo

ولد مصري يقول...

يعني اول مرة اجي ازورك ارشق في موضوع بالشكل ده

ده حظ ايه اللي ما يعلم بيه الا ربنا ده

شوفي بقى يا ستي

طبعا نظرا لأن هرمونات الذكورة بتنأح عليا فهقول لازم ولابد وحتما تسمع كلامه ولاسيما إنه باين عليه ابن حلال وطيب وهادي وعمال بيكرر اللي بقاله ساعه يعيد ويزيد فيه "إنه بيخاف عليها"

طبعا ده مايمنعش إن ساعات وساعات قليلة جدا تكاد تكون منعدمة أو تؤول للصفر ان ممكن يكون عندها حق وفي الحالة دي تقدم طلب على عرضحال دمغة ويمضي عليه اتنين موظفين مايقلش راتبهم عن خماشر الف جنيه مصري (مش سوداني) إنها معاها حق وبالتالي يتم الموافقة على طلبها

ربنا يعينه

تحياتي

غير معرف يقول...

انا راجل وحقولك حاجة
انا كل يوم في الموقف دا
كل يوم

وبعدين
مش انا بس
عارفة فيلم تيمور وشفيقة

نفس الكلام
في النهاية تظل تلك المشكلات ولا تختفي

ولمني لا تتحجري

واسمحيللي كيف يمكنك ان تشعري بالسعادة من دونه

اظن انك

تتصلي الآن وتقوليلو انا مقتنعه ان اي لحظة في الحياة من غيرك بلا متعة او سعادة وانا قررت مسافرش بعد انت ماسمحت بكدا وحبيه بجد
هو اللي حيعزمك
وحيفكر يسعدك

بليز بلاش عند

النوعية دي من الرجالة مش بتيجي بالعند
خالص

تحياتي
وبتمني اسنع ردك واشوفك عملتي ايه

والنتائج المترتبة عن قرارك

دي دعوة لزيارة البلوج بتاعي

ليكوريكا يقول...

مش مسألة راي مين اللي هيمشي

مش لازم كل مره راي واحد فيهم اللي يمشي

المناقشه والاقتناع اهم شيء في القرارات

بس ده ميمنعش ان في حاجات لازم يكون للراجل راي فيها والقرار برضو يرجعله فيها

مهما كان الرجال قوامون علي النساء

اي قائمون علي رعايتهم

مش تحكيم راي زي منتو متخيلين

كل رمضان وانتي بخير

ليكوريكا

ShimaaMahdy يقول...

اممممم

رغم انها كلمه مش حلوة موضوع ان لازم رأيه هو اللى يمشى حتى لو مش اقتنعتى

لكن هاقولك لازم تسمع كلامه ليه لانه ممكن يكون عنده حق ..اما بقى موضوع ان الاطراف مش مقتنعه بحاجه و فى الاخر لازم كلامه اللى يمشى دا ممكن لكن لو الكلام صح

مش معقول كلام غلط ولازم برضه يمشى عشان هو الراجل


تحياتى

(:

ojg يقول...

:)

شوفي يا قمر
هي اختارته؟
هي مقتنعه بيه؟
هي موافقه تحط عمرها بين ايديه؟
ملحوظة
اجابة "هي" على الاسئلة السابقة تحدد اجابتي على سؤالك
:)

Mezo يقول...

عاجبني اوي الموضوع ده
بس نتكلم بالراحة

الفكرة اللي عايز أقولها ليه كل ما الراجل يقول رأيه في حاجة نطلع فيه ونقول ان نيته انه يتحكم ويمشي كلامه؟ عرفتي منين ان نيته كده

انا راجل وعن تجربة شخصية بقول ان الكلام ده غلط ، الدافع الوحيد ورا كده بيبقى فعلا فعلا انه خايف على البنت أو مش راضي عن ظروف السفر أو مكان السفر لأنه للمرة التانية خايف عليها..

طيب لما الاتنين يختلفو في الرأي بعد الجواز؟ هل الحل ان كل واحد يعمل اللي هو عايزه وخلاص؟ اكيد لأ

الحل يتناقشو بهدوء ويحاولو يوصلو لحل وسط يرضي الطرفين..

طب لو مفيش حل وسط؟ يعني يا إما تسافر يا إما متسافرش
بعنب واحد بس هو اللي كلامه هيتنفذ..
يبقى هنا السؤال ، هل الاتنين بيحبو بعض لدرجة انهم مستعدين يضحو؟
حلو بيحبو بعض ، مين أسهل انه يتنازل عن رأيه عشان التاني؟

قصدي الراجل لو مش ممانع أوي خلاص ممكن يتنازل ، لكن افرضي الموضوع ده مضايقه فعلا وميقدرش يعديه؟

نيجي لبنت..أنهي اهم بئا السفر وللا ان الشخص اللي بتحبه يكون مبسوط؟ هل هي حبكت بئا السفرية دي والموضوع يستاهل انه يزعل؟

من الآخر أقصد اللي بيحب بيتنازل وبيحاول يمشي الموضوع عشان خاطر اللي بيحبه ، واللاك للاتنين كل واحد على قد ما يقدر مش لطرف واحد

آسف اني طولت بس الموضوع شدني
شكرا
معتز
http://mezoderm.blogspot.com

رامى اشرف يقول...

الموضوع موضوع مشورا ولازم الكلام بين الزوج والزوجه فى كل شىء ولازم الحوار مينتهيش بكلام مين الى هيمشى علشان مندخلش فى عناد والموضوع يكبر ويتحول لكبرياة لازم كل واحد ينزل للتانى شويه
حتى الراجل لازم ينزل لمراته فى حاجات وبحدود من الترفين والحب والتفاهم والمودة بتكون افضل شىء ولو كل واحد بيحب التانى هيعمل الى التانى يحبه من غير خلاف بالعكس دا ممكن توصل ان كل واحد يتمنى ان التانى يطلب منه حاجه ويقوله علشان خطرى

الـسـيـدة نـون يقول...

هاى حاسوباتية
رأيي هيكون عن تجربة شخصية

قبل ما اتجوز هاني
بصراحة مش هانكر انى عملتله من البحر طحينة
وأفتكر ان انا اللى قلتله
احنا لو اختلفنا على حاجة
رأيك إنت اللى هيمشي فى الأخر

واتجوزنا
وماختلفناش كتير فى الاول
لكن بعد فترة من الجوزا
فيه حاجات كدة فى شخصية جوزى ما اكتشفتهاش غير بعد الجواز
والحاجات دى
خلتنى بقيت اتمسك برأيي اكتر فى اى موضوع نختلف فيه
خصوصا ان موقف زي اللى انتي بتسرديه فى البوست ده
تقريبا حصل معايا م~ات المرات بلينى وبين جوزي
انا كنت برفض حجة انه خايف عليا
وعلشان كدة
هو مش عايزني اروح المشوار الفلانى
كنت بحس ان ده مش سبب مقنع علشان يرفض
فبالتالى كنت بحس انه بيرفض لمجرد الرفض
ولمجرد انه يثبت انه راجل وان كلمته هى اللى بتتسمع فى الاخر
وكنت دايما اقوله الكلمة الرخمة اللى مابيحبش يسمعها منى ابدا
وهى كلمة اشمعنى
اشمعنى انت ممكن تسافر وتروح المكان الفلاني مع اصحابك
اشمعنى انت ممكن تخرج
اشمعنى انت ممكن تعمل
ويجى يقولى الراجل غير الست
قلتله ايه اللى هيحصلي يعنى لو انا خرجت
وممكن مايحصلكش لو انت خرجت
باعتبار انك راجل
لو خايف التاكسى اللى هاركبه يعمل حادثة
طب ما هو انت لو خرجت ممكن تعمل حادثة بالعربية
وهكذا كنا بندخل فى نقاش وجدل عقيمين
والنتيجة ان اغلب المشاوير اللى بعوز اروحها كنت بروحها
بس كنت بروحها وهو زعلان مني ومش طايقني
والمشاوير اللى كنت بسمع كلامه فيها وماروحهاش
دى المشاوير اللى انا عارفة انى لو نشفت دماغى ورحتها
ممكن يحصل فيها طلاق
زي مشاوير يكون ليها علاقة بالسفر ولوحدي من غير وجوده معايا
فبالتالى كنت بكتفى باالمشاوير اللى اقدر اروحها
وماتمسكش اوى بالمشاوير اللى انا عارفة انها هتبقى كارثة لو رحتها

وكمان انا لئيمة
انا بعرف اختار المشاوير
اللى ما ينفعش اى حد انه يغلطني بتمسكي بانى اروحها
لكن المشاوير اللى انا اعرف ان لو الموضوع كبر والخناقة وسعت وتدخل فيها اطراف تانية
وعرفوا سبب الخناقة وانهم هيغلطوني انا
المشاوير دى ما بتمسكش بيها اوى
اصل انا ما بحبش اكون انا اللى غلطانة
فبالتالى مش هاسمح لحد انه يمسك عليا غلطة


انا طولت عليكى اوى

ويارب تكوني عرفتى تطلعى من كلامى ده بحاجة تفيدك

تحياتى ليكى
اختك خيخة

شمس النهار يقول...

ايه الحكايه المدونين كسلانين ليه
كل ماروح عند حد الاقيه ماكتبش حاجه جديده
طيب تعالي حلي الفزوره عندي
بلاش كسل

samourai 4 ever يقول...

بصى طالما الراجل بيناقش القرارات اللى بياخدها
يبقى ممكن تقدرى فى حالات كتيرة انك تقنعيه برائيك
مش معنى كدة انه مالوش رائى
بس هو لما يناقش معاكى قرار يبقى عاملك قيمه و بيبقى مهتم جدا برائيك
و مش حيبقى مجرد دور بيمثله و ينفذ اللى عايزوه فى الاخر
و طالما بيخاف عليها
و شكله بيحبها جدا جدا
و بعدين الحياه اخد و عطا
لو حصل و هو نفذ رائيه المرة دى
المره الجايه حيعمل اللى حتقول عليه
لمجرد انه يبقى عشانها
زى مهو حيسيبها تسافر عشانها
رغم انه خايف عليها

و دمتــــــــــــــــــــــــــــم

دعـاء عـلى يقول...

و الله ماى اوبنيان فى الموضوع ده ان مينفعش نتكلم عامه و نحط قاعده ممكن تنطبق على الكل
لأن الموضوع ده بيختلف بين كل اتنين باختلاف شخصياتهم و درجه التفاهم بينهم و كده يعنى
يعنى ممكن اتنين يقولوا نفس الكلام ده و اتنين تانيين يبقوا متفقين ان رأى الراجل هو اللى يمشى أو العكس
بس فيه حاجه اسمها عقل برضه يعنى الموضوع مش كلام راجل و كلام ست هو الكلام اللى مفروض يتعمل الأقرب للعقل و اللى يرضى كل او على الأقل معظم الأطراف
و سلامو عليكوا (:

Eno يقول...

كل سنه وانتي طيبه ياحاسوباتيه

عيد سعيد عليكي وعلي كل اللي بتحبيهم :)

تحياتي :)

ojg يقول...

انتي فين يا بنتي؟
كل سنة وانتي طيبة

سقراط يقول...

السلام عليكم
مع كامل احترامي لحاسوباتية
وللمهندس محمود مرسي
انا مش متفق معاك خالص
الحديث الشريف اللى حضرتك استشهدت بيه مش معناه كده خالص
الرسول عليه الصلاة والسلام مكانش بيفرق ما بين رأي الرجل ورأي المرأة
كان بيستشير اصحابه
وكان بيستشير زوجاته
معنى كلامك تهميش كامل لعقل الزوجة ورأيها وشخصيتها
وده بعيد تماما عن معنى الطاعة
الطعاة معناها انها ماتعصيش زوجها
لما يطلب منها حاجة
تعملها
لكن مش معناها انه يفرض رأيه عليها
وانا فى رأيي
لو حصل ورأيهم تعارض
وماحدش قدر يقنع التانى
واحد منهم يتنازل برضاه عن رأيه
ويقبل رأي التانى بحب
ولما يحصل والموقف ده يتكرر
يبقي الطرف التانى هو اللى يتنازل المرة دى
وبرضه برضا نفس وحب
وهكذا دواليك
اخيرا
شكرا لسعة صدركم
تقبلوا تحياتي

Ehab يقول...

لا طبعا تعمل اللي هو يقول عليه
علشان هي بتعاند وخلاص
وبعدين هي لو كانت صح تقنعه وهو هيقتنع بس بالحق
انما المشكله انكم بتعاندوا وتلفوا الحقايق
ودماغكم ناشفه قوي ومهما نجيبلكم وقائع وحقائق برده اللي في دماغكم هو هو مبيتغيرش
يبقى مينفعش معاكم غير كده رأينا هيمشي بالعافيه

سلااااااااااااااااااااااااام
ربنا يسعدكم مع بعض