23‏/12‏/2008

نوم وفراغ وقعده البيت


احلى 3 حاجات ممتعه في الدنيا النوم والفراغ وقعده البيت
ياسلام بعشق ال3 حاجات دول خصوصا اني اول مره اجربهم السنادي لاني طبعا لسه اول سنه اخلص من الدراسه وهمها بما اني كنت فاشله جدا وبكره الدراسه والامتحانات والكليه والدوشه دي جدا وكنت واخده الكليه من منازلهم مع ان كليتي عمليه بس ماكنتش بروح وبنجح بالزق وبدعاوي الوالدين كل ترم وكنت لازم اشيل في الاخر مابطلعش صافي كده ابدا

فالسنادي بقى خلصت من الدوشه دي ودوشه التعليم ده كله منه لله قاسم امين الي كان السبب الي نادى بتعليم المراه وكل الي بينادوا بتعليمها ماله البيت بلا تعليم ووجع دماغ ماكفايه قوي نكتب ونقرا كفايه كده قوي بجد طول عمري بابا يقولي بادام تعبانه قوي كده سيبي التعليم يا حبيبتي هو انا غاصبك عليه بس نعمل ايه بقى مش معقوله كل اهلي متعلمين وانا اطلع جاهله البرستيج برضو بتاعي مايسلمحليش فاطريت اتعلم المهم انه خلص

فبقى السنادي بالنسبالي سنه ممتعه جدا بنام براحتي وبصحى براحتي دماغي رايق من موضوع التعليم ده والامتحانات صحيح ماما كل يوم تزعق اني بصحى متاخر بس بقولها سيبيني ارتاح من عناء 16 سنه صحيان بدري علشان المدارس والكليه وبعدين خلاص هجوز واصحى غصب عني وهيكون ورايا مسؤوليه سيبوني ارتاح بقى واخد راحتي

كمان انا عاشقه للبيت وقعدت البيت وفرجه التلفزيون كده ياسلام
فعلا النوم والفراغ والبيت ممتعين جدا بالنسبالي

هناك 49 تعليقًا:

blue-wave يقول...

ههههههههههههههههههههههه
عموما
ربنل يدمها عليكى نعمه ويمنعها من الزوال:))

Ahmed يقول...

اسمعي كلام مجرب

اتمتعي على قد ماتقدري في المرحلة ديه
بعد كده هتشتغلي وهتكوني حاجه من اتنين:
موظف بيصحى الساعه 7:00 صباحا بالجزمه وبينام الساعه 10:00 مساءا

أو

موظف بيصحى الساعه 12:00 ظهرا (برده بالجزمه) وبينام الساعه 3:00 الفجر

اتمتعي على قد متقدري
اليوم اللي بيعدي في المرحلة ديه مبيرجعش تانييييييييييييي

وكفايه بأه عشان قربيت احسدك

أحــوال الهـوي يقول...

تمتعي لفترة
ثم يأتي الفراغ الممل
و كل اقرانك و اصدقائك منشغلون
صمت رهيب
وحدة قاتلة
تنفجر طاقتك و تشتاقين لنسيم الانطلاق و الحرية
و احذري من النوم الطويل فنحن لم نخلق لهذا
اشغلي نفسك حتي بالعمل بالبيت لتحقيق ذاتك ووجودك في الحياة

فاستمتعي الي حين

تحياتي

غير معرف يقول...

بكره تتجوز و تخلف و تترحم على الايام الجميله دى

Eno يقول...

ههههههههههههههههههه

كنت زيك كده وفاكره اني لما اخلص دراسه هرتاح بأه والدنيا هتبقي بمبي

بس خلي بالك الفراغ وحش اوي لما بيزيد عن حده بجد وخصوصا بأه لو معاه وحده بيكونو حاجه مميته بجد

ربنا يديم عليكي السعاده :)
تحياتي:)

منى يقول...

ربنا يمتعك بالخير كله
فكرتينى بايام الفرااااغ
هه كانت ايام
انا سعيده اوى انى جت هنا
تحياتى

AHMED SAMIR يقول...

هاتاخدي كفايتك منهم
وهتزهقي
وبدل ما هيبقوا دول مصدر سعادتك
هيتحولوا لمصدر تعاسة وملل
تحياتي

Kiara يقول...

ياسلااااااااام

يابختك ياقمر لا بتصحي الساعه 5 الصبح ولا حاجه

بس علي فكرا شويه وهتزهقي اوي

Unknown يقول...

ههههههههه

لأ قاعدة البيت مش مثاليه اوي كده
لو طولت هتزهقي منها اوي علي فكره

محمد يقول...

أولا اسلوبك ظريف وممتع وتلقائى
ثانبا دوام الحال من المحال
ثالثافى أنتظار زياره
محمد
مشاعر وأفكار
شوية كلام

صوت من مصر يقول...

يا بختك قاعده قدام التليفزيون صح وماسكه مج شاى او نسكافيه وبتتفرجى على بانوراما الدراما وبعيد عن الساقعه صح وفى ناس تروح الشغل ومن الشغل للمعهد ايه القرف ده
بحسدك ؟
بوست ممتع

رؤية يقول...

بجد بجد
انتى دماااااغ

نامى على قد ما تقدرى
بكرة تضطرى تصحى بدرى من جديد

تحياتى لك

كراكيب يقول...

طب النوم ماااااااااشي
واحنا في الشتا بقى والبطاطين بقى عاملة شغل كسل فظيع
فرجة على التليفزيون وقعدة نت طيييييييييب
بس قعدة بيت بقى
وقومي وضبي اغسلي المواعين طبقي الغسيل خلي بالك من الاكل اللي ع النار
لالالالالا تبقى الكلية على قلبي عاااااسااااال

اول مرة اجي هنا.. بلوجك عسولة على فكرة
;)

miro el niro kwaniro

lonely يقول...

معرفش ليه كنت فكراكى هاتشتكى من الملل
كلامك ده خلانى عامله زى الواحد اللى عنده سخونيه وخد دش ميه متلجة على دماغه

ناس ترتاح وتنام وناس مش لاقيه وقت تزاكر من هبل المشاريع
وطبعا انتى مجربه الهم وفهمانى .. تيجى فى اليومين دول بالذات وتجبيلى سيره النوم والفراغ
انا عندى امتحان يوم السبت وحسه انى فى متاهه
هى دى المشاركة الوجدانية يا هاجر :(
ربنا يسامحك يااااااارب

عاشقه وغلبانه يقول...

ياحبيبتي ياحاسوباتيه
قاعده بيت ايه بس اللي تخنق دي
هو صحيح النوم وحشني اوي بس برضو قاعده البيت ممله
عموما كل سنه وانتي طيبه
تحياتي

مصطفى محمود يقول...

غريبة قوي

أول مرة أشوف حد فرحان بعد ما اتخرج بالذات من اللي قاعدين في البيت :D

وكمان ايه الجديد يعني
مش بتقولي كنتي واخداها من منازلهم
منتي في منازلهم من بتاع 5 سنين أهو :D

متقوليش بقى الاحساس بالمسئولية لان المفروض عند البشر الطبيعين المسئولية بتزيد بعد التخرج :D

أنا لا سامح الله مش بدعو للأي حاجة
بس دي شوية ملاحظات بس

وربنا يفرحك كمان وكمان

دامت أيامك مليئة بالفرحة ,,,, و الفراغ (افتكري انها نعمة مغبونة فيها :) )

سلام

المستنصر بالله يقول...

فعلا عندك حق احسن مكان للمراه هو بيتها
ربنا يديم عليك نعمه الراحه

تحياتى لحضرتك

ليكوريكا يقول...

مبنحدسش ولا بنقر

الواحد بيدور علي ساعه ينامها

او حتي يقعدها في البيت

بس ليكي يوم

اما ابنك الغير باذن الله يصحيكي من عز النوم

وهترجعي تذاكري من اول وجديد 16 سنه معاهم

استغلي النعمه اللي فايدك

الوقت بيجري :)

شمس النهار يقول...

ياصباح الانتخه
ازيك عامله ايه
واضح طبعا عامله ايه النوم والكسل احلا من العسل يابختك انا مااعرفش اعمل زيك كده ماهي قدراة
انا حبيت اسلم عليكي
كل سنه وانت انتوخه

غير معرف يقول...

بجد مكنتش اتخيل اني ممكن اشوف البوست دة من حد خريج حاسبات و معلومات هو في ناس كتير في الكلية مكبرة دمغها و مش نوين علي حاجة اصلا بعد الكلية انما نوم و فراغ و قعدة البيت :d تحفة بجد , علي فكرة انا طالب في حاسبات و معلومات انا كمان
بس بجد بوست دماغ
:)

ريمان يقول...

ههههههههههههه

بصى انا ساعات اما بتعب برا البيت واتعب من الكليه اقول فينك يا سريرى يا حبيبى وحشتنى

بس اما بقعد فى البيت فى الاجازات وةكده بحس انى هموت من الخنقه والفراغ

بس مادام انتى مبسوطه كده ربنا يسعدك يا قمر

مدونتك حلوه اوى على فكره

سلسبيل يقول...

والله عندك حق
خاصه لما تبقي قاعده ف البيت مش بتفكري ف حاجه معينه عايزة تعمليها
ومش ملتزمة بمعاد صحيان محدد
ولا خروج
ولا اي حاجه
واحشني الاحساس ده
وبعدين ابهاتنا غالبا متفقين انهم مش عايزينا نتعلم
اصل بابا كل مايشوفني زهقانه م الدراسه
يقوللي طظ ياحبيبتي
بلا كليات بلا هم
سيبيها ههههههههههه
يلا بقي
الله يسامحك ياعم قاسم امين
انت السبب
بقوللك ايه
روحي نامي شويه بالنيابه عني بقي
احسن خلاص حاسه اني هقع ع الكيبورد

hager يقول...

ياااااه عارفه انا نفسي بجد في تلك المومنت في التلات حاجات دوول اصلنا دلوقتي بنستعد للامتحانات وعملي بقي وشفهي :D ووجع دماغ من ده
بصي من الاخر انا بحقد عليكي :d
هههههههههههههههه
هزار والله ربنا يديمها عليكي نعمه

Misrdream يقول...

ربنا يكرمك بشغل كويس وخصوصا انتى مجالك رائع بس عاوز تدريب ودورات زياده متعدميش على الكليه بس
ربنا يوفقك

بنت الغربة يقول...

يااااااااااااابختك
انا بصراحه اتخنقت - ايه الدلع ده كله -انا عمرى ماعملتها -حتى فى اجازات الكليه كنت باصحى بدرى علشان اوضب البيت واغسل الاطباق وارتب حاجات الغداا لغاية لما ماما ترجع من الشغل.....ولما اتجوزت قعدت اسبوعين عسل بس لانى مكنتش خلصت الكليه لسه-وطبعاكليتى عملى زى سيادتك -وبعدين جبت عيال مابينيمونيش الليل - ده غير ابوهم -
كفايه بقى كده انا هاحقد عليك
تمتعى بالكسل الجميييييييييييييل ده
بكره ماتلاقيهوش
تحياتى وخنقتى ليك ياجميل

مطلق يقول...

لازم ابخرك من كل الي بيحسدوكي دول يا بنتي والله

وانت لازم تعكنني علينا ربنا يستر عليكي اليومين الي جايين

الحرامي يقول...

بيا ن رقم 1
بيان تأسيس العصابة
يشرفني انا الاستاذ / حرامي لص نشال

ان اعلن لكم عن تأسيس اول عصابة لسرقة المدونين

واحب اعرفكم اني خلاص بقي عندي عصابتي
واسلحتي ومفاتيحي وطفاشتي واعلن لكم جميعا عن ميثاق الشرف لتأسيس هذه العصابه

ويتضمن المواد الدستوريه التالية
1- ان لا يتم سرقة الا ما هو نفيس وغالي وعلي المدونين اللي أي كلام انهم يتطمنوا لاني مش هقرب ناحيتهم
اما المدونين المتميزين فيعرفو اني هسرقهم هسرقهم
2- اي عملية سرقة او سطو مسلح لن تتم الا بعد التهديد والوعيد يعني هبعت رساله للزبون اقوله اني نويت اسرقه
3- يتم ترك بصمات(تعليق ) علي كل مدونه تمت سرقتها عشان تعرف انها اتسرقت


4- يتم عمل نقطة بوليس (عندي في المدونه ) لتلقي البلاغات والشكاوي والتعليقات

5- لن يتم نشر اي موضوع الا اذا كان مسرووووق يعني انا مش هكتب حاجه من عندي

6- ان جيت في يوم واتقفشت فسوف اعلن توبتي وابطل سرقه واحل العصابه
وعشان تقفشني لازم تعرف اسم المدونة الاصليه بتاعتي اللي هيه مش سرقه يعني
- يتم نشر هذا البيان علي اكبر عدد ممكن من المدونات للعلم فقط
اعلانات مبوبه
اعلان لكل الجرايد الرسميه والغير رسميه
مطلوب مساعدين لحرامي.... علي ان يكونوا خبره لا تقل عن عام في السرقه والنصب والتدوين وعلي من يرغب في التقدم للوظيفه ارسال cv وصورتين او تعليقين
امضاء
الحرامي الكبير

الحرامي يقول...

وادي بيان تاني
انا هسرقك
هه بس

الحرامي يقول...

نسيت اقولك ان التهديد اللي فات دا اتبعت لخمسه غيرك وانا هسرق واحد بس

بسبوسة يقول...

ههههههههههههه
ما ااحلى النوووووووووووووووم
والفرجة على الافلام والاكل يووووووووووووووو حاجات تانية كتير
بس على فكرة بعد فترة هتزهقى**

Unknown يقول...

سلام الله عليكم ورحمته وبركاته
هي القعدة في البيت حاجة مقرفة جدا فعلا وانا مبحبهاش تماماواتعقد انك بعد فترة هتزهقي
بس الشغل شيء بشع جدا فالبيت بالنسبة ليه جنة , فمش عارف اعمل ايه لابحب البيت ولا الشغل انا اروح اشوف كوكب تاني احسن
--
علي العموم ربنا ييسر لكم كل امر ويجعلكم كما يحب ويرضي
وجزاكم الله خير

Unknown يقول...

الف مبروك .. انك اتخرجتي بالسلامة وعلي خير

يا تري مش عاوزة تشتغلي ؟؟ لحد ما ييجي صاحب النصيب ؟؟

يللا .. عموما ربنا يوفقك

أ / أحمد عبد المنعم يقول...

بسم الله الرحمن الرحيم
الأخت الفاضلة / حاسوباتية
الحياة الحقيقية فى أن يرى الإنسان نفسه ذا قيمة لنفسه نافعا لغيره قادرا على الكسب بغض النظر عن احتياجاته الماديه أو رغباته الشخصية , فالنفس بطبيعتها تميل إلى الكسل والخمول والدعة والسكون لكن الإنسان منا إذا أدرك هذه الحقيقة وأدرك معها أن الحياة تعب ونصب استطاع أن يعيد حسابات نفسه وأن يعمل على تغيير عادات النفس فيجعل الهمة مكان الدعة الإرادة مكان الخمول والعمل مكان الكسل
ولأدرك أن قيمة ما تعلمه من علم فى أن يحيله إلى عمل وإنتاج حقيقى , وأنت إنسانة ذكية وأصبحت صاحبة علم لذا فأنت قادرة على النفع ما رأيك فى أن أشاركك فى مشروعات علمية مفيدة ونجعلها هبة لمن يحتاجها أو نجعل مكسبها لفقراء مجتمعنا وما أحوجهم لذلك

اسمحى لى أن أقول لك
( لقد أفنيت ساعات وشهورا وطبعا أموالا من أجل أن أعرف شيئا ضئيلا مما تعرفين من علم حتى أستطيع أن أقدمه لتلامذتى فى عرضى للدروس )
قصدت أن أقول لك إنك تحملين علما نافعا حاولى أن تقدميه للمجتمع فتكونين كالنحلة التى حصلت على الرحيق وأهدته للناس عسلا .

ولد مصري يقول...

عين العقل

ربنا يكملك بعقلك كمان وكمان

حد برضه يروح لوجع القلب برجليه

يا مين يلايمني أنا بس على معاش مبكر واعمل اللي انتي بتعمليه

متسمعيش كلام المغرضين اللي بيقولولك ملل وتضيع وقت والكلام الفارغ ده دول بيحقدوا عليكي ونفسهم يعملوا زيك بس مش قادرين

انا طول عمري بقول إن البنت مالهاش غير بيتها وجوزها يلاقيها مستنياه كل يوم وهو راجع من الشغل وتقله إنت جيت يا سي محمد :) ويا سلام كمان لو تنقعله رجليه في شو مية دافين وتنقع رجليها معاه في نفس الطشت

أدي العيشة ولا بلاش

تحياتي

فارس القمر يقول...

هههههههههههههههههههه
ربنا يسهلك الحال ويديكى على قد نيتك

وسع يابنى انت وهو ماسكين فيها ليه

روحى نامى شوى علشان وراكى شويه فراغ تبقى فاضيلهم

basma saghir يقول...

:):)

يالهوي عليكي ياهاجر وعلى كلامك اللي هيرجعنا 100 سنة لورا..هو احنا ناقصين يابت

يابت انزلي اشتغلي ولا اعملي اي حاجة مفيدة حتى حللي ال16 سنة دراسة اللي بتقولي عليهم دول

اااااه منك انتي اه :):)

momken يقول...

ههههههههه
بكره تزهق ياجميل
دى بالنسبه لقاعده البيت

اما بالنسبه للجواز فى تعليق تانى خالص

بكره تندم يا جميل


بهزر

استمتعى ياستى بالكسل خصوصا فى الشتا ده
انا كل يوم بروح الشركه اكنى رايح الكلاس ومش عامل الهوم ورك

البوست دمه عسل

تحياتى

أحــوال الهـوي يقول...

حاسوباتيه

نفس منطق زوجتي ..... لا تفهم ما اكتب و لكن حينما اشرح لها المعني تقول الله حلوة قوي

شرحت القصيدة في ردي علي صفاء و ماما اموله برجاء قراتها ثم قراة القصيدة و ان شاء الله تعجبك و اسمع رايك تاني

تحياتي

zainab يقول...

حاسوباتيه

احساس جميل فعلا انك تنامى مايكنش وراكى حاجه
بس خدى بالك من الفراغ ده اصل مشكله صعبه حاولى تستغليه يا قمر

تحياتى

رئـــــيسـة حزب الأحلام يقول...

يابختك انك بتطيقى قاعدة البيت ياقمر
انا بقى ماطقتش قاعدة البيت ولا ثانية
ربنا يسعدك ياقمر

princess يقول...

ههههههههههه
ايه يا بنتى ده
بس صدقينى هتزهقى بعد فترة
وبكرة تقولى برنسيس قالت:)
تحياتى

غير معرف يقول...

اصحى شويه و روحى خدى اللوحه بتاعتك من عندى ف المدونه

مهرة سالم يقول...

السلام عليكم...
إنتــي عســـــــــــــــل ...
ههههههههه
والله أنا كده بحب النوم والبيت والفراغ ...
وماما زي مامتك كده..
بـــس
بفتقد الفراغ اليومين دول...
.......
ربنا يوفقك يارب ونشوفك عروسه منوره الكوشه..
.......
وشكرا عزيزتي لسؤالك عني ..
الله مايحرمني منك ..
.........
دمتي بألف خير..

حزينه يقول...

النوم احلى حاجه فيهم
بالذات لما الدنيا تكون برد

حزينه

AhMeD RaDy يقول...

مع غزة .. ولو باضعف الايمان

بسم الله الرحمن الرحيم

شارك

بدعاء واحد

فى

صلاة الفجر ليوم الاربعاء القادم

31-12-2008

وصيام الخميس تطوعا

1-1-2009

و القادم....أجمل يقول...

زيي بالظبط
:D
أنا بعشق البيت
مبخرجش إلا مضطرة يعني
هههههههههههههه

هاف فن يا بنتي
البهدلة جاية جاية
:(

طوبه فضه وطوبه دهب يقول...

انتى بتقولى كده عشان لسه مخلصه بكره لما يعدى عليكى شهرين تلاته وياسلام بقى لو وصلوا لسنه هتشدى فى شعرك من الزهق دا الواحد بيقلب فى التليفزيون ستين مره وبيفتحه ويقفله خمس مرات لو قاعد يوم واحد اجازه وبيبقى هيموت من الزهق ولسه لما تتجوزى هتعيطى من الملل على العموم كل واحد ليه حاجه بتريحه بس بكره تملى بما فيه الكفايه

Mohamed Hamada يقول...

امال كل البنات بقولوا انهم عيزين يشتغلوا وعملين يطلبوه بالمساواه ووجعين دمغنا يا رتهم كانوا كلهم ذيك كدا
اول مره اشوف بنت كدا بصراحه تكون معترفه انها فشله(انا اسف يعني ) ومبسوطه بكده كمان
بس عايز اعلق علي حاجه هو ممكن تكون الراحه حلوه
بس قريب جدا هتزهقي منها وهتبقي عايزه يكون ليكي حاجه تعمليه دا من وجه نظري الله واعلم بشخصيتك

ELMASRYA يقول...

أهلا بيكي

تعالي جنبي في نادي الكسالى

لعلمك أنا زيك كنت بكره المدرسه ومن بعدها الجامعة

وأجمل يوم في عمري لما خلصت اختبار آخر مادة في البكالوريوس

ياسلاااااااااام جميل جدا

وفعلا بقى نامي براحتك قوي لأن الجواز مسئولية وقرف وخدمة لبيت وراجل وأولاد

تصبحي على خير