7‏/1‏/2009

هي وصاحبتها


هي: ازيك عامله ايه واحشاني

صاحبتها: الحمد لله كويسه انتي واحشاني اكتر ازيك وازي خطيبك

هي : الحمد لله كويسين اهو ادعيلي بس

صاحبتها: خير مالك شكلك مضايقه

هي: يعني لسه مالقيتش الشقه وبضور عليها ربنا يسهل

صاحبتها: لا مش معقول هو ماعندوش شقه

هي: اه ماعندوش لسه هنجيبها

صاحبتها : غريبه وباباكي موافق على كده

هي: بابا وافق خلاص احنا مخطوبين يا بنتي وبعدين فيها ايه يعني لما مايكونش عنده شقه مااحنا بنضور عليها اهو وربنا يسهلها

ده الحوار الي كان بين هي وصاحبتها وانا هقول رايي فيه وعايزه رايكم كمان معايا

رايي ان ليه في بنات بتفكر كده ماهو علشان التفكير ده بتزداد تأخر الجواز انا بصراحه مش فاهمه فيها ايه بما اي اتنين يبدؤوا مع بعض من الاول وبحاجات بسيطه واساسيات البيت مش لازم يعني فرش البيت من الالف للياء لان بجد بتكون في حاجات كتير جدا نقدر نستغنى عنها وحرام نجيبها واحنا مش قادرين نجيبها او نداين علشان نجيبها
يعني بالعقل احنا اتنين لسه بنقول يا هادي نبقى مداينين لا وغير كده حاجات كتير مش بنستخدمها اصلا ليه كل ده علشان الناس يعني معلش مش مهم الناس في رايي لان رايهم مش هو الي هيوفرلي السعاده الي عايزاها في بيتي وانا مش بقول الكلام ده من الخيال انا شفت تجارب كده كتير قدامي وكبروا سوا وبقى عندهم بدل الشقه الصغيره الي جابوها في الاول شقه اكبر ومكان احسن وعفش كامل مش ناقصه حاجه


يبقى ليه احمل العريس فوق طاقته في ناس رايها انه لو دفع اكتر هيحافظ عليا اكتر وهيكون كده تعب بقى فيا والكلام ده انا عايزه اقولهم ان غلاوت اي بنت عند جوزها مش بالفلوس غلاوتها في حبه ليها وافتكر كلنا بنشوف حالات الطلاق الي بتكون الست فيها عايزه تعمل اي حاجه بس تخلص من الشخص ده ساعتها فادتها الفلوس الي هو دفعها في ايه بقى

كمان الاهل لازم يعزروا ويقدورا ويعرفوا ان بادام الشخص كويس يبقى خلاص يسهلوا الموضوع ومايطلبوش حاجات فوق طاقته لانه حتى كده حرام الرسول صلى الله عليه وسلم قال من ترضون دينه ماقالش ماله او شقته

المختصر المفيد ان بلاش نجيب حاجات مستغنيين عنها وبلاش نغالي قوي في الافراح والشقق كده مش مهم تبقى البدايه صعبه شويه نقدر نستحمل سوا المهم انه يكون انسان طموح يبقى بكره معاه احسن واجمل من انهارده
ومعلش نستحمل سوا شويه ونستغنى عن حاجات في العفش ونجيب شقه صغيره في الاول وربنا يسهلها للكل يارب

هناك 38 تعليقًا:

عاشقه وغلبانه يقول...

واحده زيك بتقول الرأي ده وعشره بيخالفوه
والناس كل واحد عقله مريحه
وهي لا بالشقق ولا بالفلوس ولا بالنيله السوده علي دماغهم
كلها ايام بتعدي

lonely يقول...

ههههههههههههه
انا نفسى افضالك واعرف اخبارك بجد
كلها عشرين يوم يا هندسة وافضالك خالص

انا كمان زيك كده والحمد لله اهلى متفاهمين جدا والله لدرجة ان ماما مستعده تجيب للعريس العروسة وفوقها الشقه
ههههههههههههه
بس يتدبس هو ومالوش دعوه بالباقى

كلامك ده بيفكرنى بماما وبابا فى اول حياتهم جابوا شقه صغنونه خالص ودلوقتى ماشاء الله يعنى جابوا مكان اوسع وبردو البيت مش ناقصه حاجة الحمد لله

انا كمان عايزه واحد عصامى وعايزه نتبهدل احنا الاتنين كده علشان لما نكبر فى السن تبقى روحنا واحده زى ما بدانا زى ما ها ننتهى مع بعض
والله ما بتفرق معايا ماديات خالص
المهم ان يكون معانا اللى يكفينا والباقى ده على ربنا
انا اعرف ناس بردو بعد الجواز خدوا النقطة وسددوا بيها الديون ولسه التقسيط ومعرفش ايه
من وجهه نظرى انهم يجيبوا الاساسيات والباقى ده يبقى بعد الجواز
علشان تقوله هى هات وهو يدفع
هههههههههههههه
لا فعلا لازم من البداية تكون ايديهم مع بعض فى كل حاجة
انتى كده شطورة يا هجوره
وربنا يسعدك ويهنيكى يا جميل
والى لقاء اخر ان شاء الله

أحــوال الهـوي يقول...

الكلام جميل و لكن ساعة التنفيذ انت عارفه
كتبت موضوع اسمه صك الملكيه عندي في المدونه 3 اجزاء بتناقش الوضع نفسه بسخريه المهم مش الموضوع لكن الردود من الجنس ال يا لطيف ... قطعوني

تحياتي

Ahmed يقول...

كلامك عسل وتنفيذه صعب جدا

اسألي أي شاب كده يفكر يتقدم لوحده
الأول الأهل كويسين جدا وطيبين خالص
لغاية متبدأ التفاصيل

لازم كؤخر زي أختها
لازم عفش زي بنت عمها
لازم مهر زي بنت البواب

على فكره, الكلام ده مش هزار
الكلام ده همس داخل البيوت بيحصل يوميا بدون أدنى مبالغة

ولو مش موجود, مكنش موضوع الجواز يبأه صعب قوي كده

princess يقول...

معاكى حق
انا مش بقتنع بنظرية السخيفة اللى بتقول كل ما يدفع معناها انه يحافظ عليكى
يا سلام
يا ما ناس ادفعلها مهر فظيع وحاجات كده وفى الاخر بيسبيها او بيعاملها وحش
انا رايى ان اللى قدامك لو متدين وحنين يبقى ايه المشكلة تبدوا مع بعض
الحب بيعمل طموح على فكرة هو من نفسه هيحاول يبقى احسن واحسن طالما شريكته معاه
تحياتى:) اخبار النوم ايه صحيح؟ههههههه

بنت الغربة يقول...

بصى ياحاسوباتيه
انا هاقولك على تجربتى
انا والباشا كنا بنحب بعض - وظروفنا الماديه كانت مرتاحه على الاخر والحمد لله
بس طبعالولا فلوس ابوه وابويا ماكنش اتجوزنا من اصله
لانه كان لسه فى بداية حياته وانا كنت لسه فى الجامعه
مش معنى كده اننا مرتاحين مع بعض ومش ناقصنا حاجه
او كنا مبسوطين قوى فى اول الجواز ومافيش خناقات
لالالالالالالالالالالالالالالالالالالالالالا
الحياة الزوجيه مش بالفلوس خالص والله
صدقينى عمر كتر الفلوس ماهيسعدك
قد ايه تبقى الورده احلى من اى حاجه غاليه لو حسيتى انها من واحد بيحبك بجد مش منظرة
تحياتى ليك
ويارب ماكونش عقدتك

حروف يقول...

موضوع جميل وقريت تعليقاتة كمان اولا الف مبروك قريت عند الجواز وسنينة ان فرحك قرب الف الف مبروك ياحببتي كلامك صح جدا بس عايزة اقوللك ان اهل كتير دلوقتي بئامتفاهمين بسبب مشكلة الجوازفي البلدوبستغرب ازاي بيوافقوا علي طالب ومعندهوش امكانيات ناس كتير بيقولوا اهيتبئا مخطوبةومحجوزة اةوالله كانها بضاعة وبتتحجز هما مش غلط ومش صح بس الظروفبقت وحشة انا عن نفسي نفسي يكبر وانا معاة يبئا احسن واحد وانا جمبة ومعاة متهيئلي حبة ليا حيزيدومش بسهولةيفرط فيا الشبكة والشقةمش هما اللي حيخلوة يفرطوا في العروسة انتيعارفة بقول لماما يعني الشبكة والحاجات الزيادة دية هي اللي حتضمنلي السعادة لا طبعا ربنا يوفقك يارب ويكرمك
دمتي بالف خير

الجواز و سنينه يقول...

و الله يابنتى عايزه اقولك ان الكلام سهل و حلو بس التطبيق صعب حبتين إلا ما ندر
المهم سيبك انتى الف مبروك و حياه سعيده ان شاء الله السعاده مش بالفلوس
بالتعاون و مراعاه الاخر و لاهتمام به
خليه بس يدخل عندى و انا اظبتهولك
هههههههههههه
بس اكيد هو متظبط ده معاه احلى حاسوباتيه
ما تنسيش تدعينى على الفرح
ازعل
هههههههههههه
لاء كفايه اشوف الصور حتى على الميل
بعد اسبوع العسل اصلهم بطلوا حكايه شهر دى

Che يقول...

انا بيتهايئلى الموضوع ده معتمد على 3 حاجات
اول حاجه ان الشاب يكون صريح و مايحملش نفسه ولا يتورط فى وعود ما يقدرش يوفى بيها
تانى حاجه ان البنت اى كانت تعرف الولد قبل الخطوبه او لا لازم تثق فيه و تحاول تساعده بالكلام و ده اقل القليل
تالت حاجه انه اهل البنت يكونوا فعلا عايزين يجوزوا بنتهم مش بيتعاملوا على انها بيعه و شروه
و اخر حاجه احب اقولك انه اللى بيقولوا الكلام ده بنات كتير بس اللى بينفذوه يمكن اقل من 5% منهم

Mona Shereif يقول...

اللى عمله باباكى عين العقل
ربنا يجمعكم على خير يارب
وعندك حق فى كل كلمة قولتيها
الشباب بيبقوا خايفين جدا بس والله انا اعرف اهالى كتير مبيحطوش التعقيدات دى كلها وبيصبروا جدا على الشاب

ستيتة يقول...

عقل الكمبيوتر السليم جدا
احب احكي ليكي حكايتي الواقعية جدا
شفت سي السيد لقيت راجل ولا كل الرجااااالة دماغ وشخصية ودين
هب قلت للبابا والماما انسوا هذا الرجل احبه هذا الرجل اريده
اتجوزته في شقة ايجار في منطقة شعبية وانا متربية في الدقي
دخلنا بأساسيات الأساسيات وشرطت عليه ديون او اقساط نو كل ما يبقى معانا نكمل
تحبي تعرفي بيتي بقى ايه
اولا فضل طول عمره يقول لي لن انسى وقفتك معايا "ماهو طالما خدتي ابن اصل تبقى كسبتي"
ثانيا جاب لي شقتين مش واحده على النيل
اول عربية ركبتها بأسمي هدية حبيب العمر بدل الشبكة اللي رفضت انه يدبس نفسه فيها رفض بات رغم انف الأهل اللي كانوا ها يفطسوا "ولاد خالاتك كلهم جايلهم الماظ وانتي ولا حته دهب يابلهاء"
رزقني الله منه بنت زي القمر ادب وعقلية علمية معملية فذة معجبة بتجربتنا وشكلها ناوية عليها "المهم الراجل يا ماما الواحده مش بتتجوز شقة" ده كلام مانوسة النانوسة وكمان جالي الولد
عشت في اسعد بيت عمر ما حد سمع صوت الناس اللي جواه ولا عرف حاجة عن مشاكلهم
انا يا قمر بشكر ربنا انه وفقني لهذا وما كنت لأوفق الا بقدرة الله
الفين مبروك وأءدم الله ذات بينكما

دمتي لي صديقة عسولة مش فاشلة ولا عاطلة

غير معرف يقول...

لو في حب
يبدأو من الصفر ويكافحوا سوا

شمس النهار يقول...

بصراحه انا مبسوطه ان بنوته في الزمن ده بتقول كده
ربنا يبارك فيكي
وعلي فكره اللي بيبتدوا صغيرين ويكبروا مع بعض بيكون النجاح له طعم تاني
ولما يكبروا ويفتكروا بيكون له وقع جميل عليهم

mostafa rayan يقول...

فل
طبعا موافقك جدا
بس تفتكري ان الكلام دةوفت الجدهيتنفذ
دة السؤال يا عزيزتي
لك كل التحية والود

dr. Ahmed Sakr يقول...

الجواز عمره ما كان بالفلوس أو باختيار الأسرة

ولكن الوفاق بين الزوجين يجعلهم متماسكين وأيضاً متفاهمين

ولو قدر يملك قلبها هتعيش معاه باى شئ ما فيه مشكلة

ربنا يبارك فيكى يا ست الكل ودائماً تكون أفكارك رائعة

رئـــــيسـة حزب الأحلام يقول...

بجد كلام فى الجون
عارفة بجد لو دة تفكير اسرنا صدقينى مافيش ولا بنت تقعد القعدة السودة اللى قاعدينا
وربنا يوفق الجميع يارب للخير

صوت من مصر يقول...

يا ستى
كله على الله ؟
ولا ايه ؟

hager يقول...

والله حاجه جميله ان الاتنين يبدأوا مع بعض من الصفر
ويبقي الطلبات في حدود الامكانيات بس
يا ريت برده هوه يقدر ده
وربنا يوفق المسلمين والمسلمات اللي ما يحبه ويرضاااه

رؤية يقول...

عندك حق
دا تفكير سليم

مش ضرورى البداية تكون كبيرة وكاملة
طالما هو انسان طوح وهايحافظ عليها
دى اهم حاجة

تحياتى

غير معرف يقول...

اهم حاجه النيه
لو نيته سليمه وبيجوز علشان يغف نفسه
ربنا هايساعده و هايرزقه من حيث يحتسب و من حيث لا يحتسب
المسئله فى منتهى السهوله
و ده كلام رسول الله صلى الله عليه و سلم
ثلاثه حق على الله ان يساعدهم
من ضمنهم شاب يريد العفاف

Kiara يقول...

اوافقكك الراي ومعكي قلبا وقالبا

********

علي فكره كل الحوارات دي هبل الاهم الانسان واخلاقه الفلوس بتروح وتيجي ناس بتبقي غنيه وبتروح فلوسها ناس ربنا بيبارك في رزقها

مهرة سالم يقول...

السلام عليكم ...
ما شاء الله أنا وإنتي متفقين بأغلب الآراء...
......
أنا حتكلم عن الخليج...
نحن عندنا مهم جدا أن يكون لزوجين سكن وفي الآونه الأخيره سكن مستقل...
بس الأغلب...
يكون لزوجين جناح في منزل أهل العريس لغاية مايضبط هو أموره ويبدأ يبني ...
سواء بنفس الأرض بتاعت أهله أو بمنطقه أخرى..
وده شيئ مسهل أمور الزواج عندنا ...
والحمدلله...
وما عندناش إن البنت تقول حماتي وحمايه والحاجات دي...
....
دمتي بخير...

طوبه فضه وطوبه دهب يقول...

اولا الف مبروك ياقمر ويارب تتجوزى قريب وتنورى القاهره كلها ثانيا بصى يا حبيبتى جواز من غير اساس يبقى تهريج واقصد الاساس دا مش شبكه وعفش اخر صيحه وشقه من الالف للياء انما على الاقل شقه مناسبه حتى لو صغيره لان الشقه دلوقتى بقت سبب فشل معظم الجوازات وبجد ربنا يهدى الكل ومبروك تانى ياقمر

SemSem يقول...

يمكن دا برضوا هو الكلام اللى المفروض يحصل
لكن واقعيا وعمليا مش بيحصل
لو الاباء وضعوا فى مخيلتهم ان الموضوع مش موضوع شرا وبيع اعتقد الامور هتتحل بسهولة
اما لو اتكلمنا عن العادات والتقاليد فحدث ولا حرج

اشكرك على الزيارة
تحياتى

Rosa يقول...

كلام في منتهى الصحه بس مين الي بيفكر كده
سبحان الله الناس بتعرف ازاي تصعب على نفسها حياتها
ربنا يهدي الجميع
معحبه جدا بأسلوبك و تفكيرك :)
تحياتي

د. إيمان مكاوي يقول...

كلامك صحيح
بس المهم الناس إللي تنفذ

تحياتي لك

Mafrousa يقول...

و الله يا حاسوبتية يا اختي
انا رأي كده من رأيك
بس الصراحة الشقة لازم
لازم تتواجد
اما الفرش فممكن يفرشوا على مهلهم اوي
و ساعتها بيتهم حيكون اجمل و احلى لانهم بيعملوه على هدوء
تحياتي

mahasen saber يقول...

حاسوبه الجميله الله ينور عليكى يا بنتى كلامك مضبوط
بس للاسف بنات كتير بتفكر بمنطق جواز الدلفرى يعنى يبقى العريس جاهز من كله وبعد كده تيجى الانسانيات والمشاعر براحتها

عارفه اجمل شئ فى الحياه الزوجيه انكوا تبتدوا مع بعض وتبنوا العش ده من جهدكوا انتوا عشان الجوازات اليى كده بتعمر فعلا وانا شفت حالات كتير كده
اما الجوازات اليى جات بمساعدة الاهل وبدون ما يتكلف الزوج فيها ادنى مسئوليه فى الغالب الغالب بتبؤء بالفشل

ربنا يسعد الجميع
ويسعدك يا حاسوبه يا جميله
وموضوعك فى منتهى الاهميه
بس لليى يستوعب ويفهم

ربنا يكرمك ويسعدك يا حبيبتى بالزوج الصالح والحياه السعيده
يا قمر انتى تستاهلى كل خير

ريمان يقول...

السلام عليكم

ازيك يا قمر

وحشانى والله

واسفه بجد ع التاخير

بصى يا عثل

انا معاكى فى كل كلمه انتى قولتيها والله

بس تعالى نبص للموضوع من جهه تانيه

ان لو مثلا واحد اتخطبت لوحد مش عنده شقه وبيدورا لسه عليها كده فتره الخطوبه بتطكول اوى على المعتاد وبتحصل مشاكل كتير اوى فى الفتره دى وبيقولوا ان حل مشاكل الخطوبه الجواز


طب ما فيش شقه


يبقى هيجوزوا ازاى

عاشن كده كتير اوى مش بيوافقوا بكده لانهم مش بيحبوا ان فتره الخطوبه تطول

بس انتى كلامك صح طبعا وانا معاكى فيه ووجهه نظرك سليمه بس انا بقولك على زاويه تانيه فى الموضوع ده

تحياتى ليكى يا قمر

romansy يقول...

ومين اللى يسمع بس


ياريت يسمعموا
مكنش يبقى فيه

غير الحب بس

Hanan Elshafey يقول...

الصراحه عندك حق
بس ساعات الناس بتبالغ في طلباتها اوي
لكن معلش يعني
الا الشقه طب هيعيشو فين
اي حاجه تانيه تعدي مش كده ولا ايه
مدونتك لذيذه ومش رغايه ولا حاجه
دمتي عسوله

emey يقول...

حمله المقاطعه
لا تستطيع ان تجاهد
لاتستطيع ان تتظاهر
لا تستطيع ان تتبرع بالمال
اذن قاطع وادعو غيرك للمقاطعه
منتجات كل من يدعم العدو
**** هل تعلم أن:-
1- شركه ستار بوكس(للكافيهات والقهوة) تدعم العدو ب 2 مليار سنويا من ارباحها
2- شركة فليب موريس (مارلبورو & مريت ) تدعم العدو وتدفع بصفة يومية ما مقدارة 12% من ارباحها.وعليه فإن مدخني العالم الإسلامي فقط يدفعون كل صباح 12 مليون دولار اي ما قيمته طائرة اف-16 كل اربعة ايام .

*** قائمة المقاطعة
ستار بوكس
ماكدونالدز
برجر كينج
كنتاكي
بيترا كينج
كوكاكولا
بيبسي
فردركرز
شيليز

لنوقف شراء البضائع الأمريكية والبريطانية لشهر واحد فقط

Unknown يقول...

بيكون في طلبات كتير اوي لازم شقه تمليك و جنب اهلها و كلو تمام و جاهز حتي الدي في دي مش عايزين يستحملوا بعض و يبدأوا سوا

مع ان المفروض ان الحياه الزوجيه مشاركه و الاتنين يساعدوا بعض و المهم انهم سوا

بس بردو انا عايزه شقه و يكبها باسمي يا كده يا مش هاتجوز

ادم المصرى يقول...

السلام عليكم

بوست جميل جدا ويستاهل نقاش سطور عديده ولكن نحاول نلخصها
اولا ...
البنت مهما كان نوعيه خطبها او حببها او مهما كان تقضر بعقلها وامكانيتها ان تتعرف على نقطه ضعفه وتحاول تفهمو وجهات نظرها وفى نفس الوقت تحبو وتخليه يحبها جدا ويصدق معاها فى كل شيئ وياريت البنت مترحش كل يوم وتعد ترغى مع امها على كل الى دار بنها وبين خطبها علشان دى بدايت النصايب تانى حاجه
؟؟؟؟؟؟؟؟
لو حسيتى ان الشاب ده مفيش فيه فيده وشكيتى انو بيحور وبتاع كلام وكذاب بجد لازم تبعدى عنوا فى الحال لئن مش هيكون فيه فيده وهيتعبك فيما بعد
؟؟......
ولكن لو تجاوب معاكى اكيد مش محتاجه اقولك ايه انا عارف ومتأكد انك هتعرفى تتعملى حسب الوضع الى انتى عليه ....
والسلام عليكم

تامر علي يقول...

في بلاد بره الخواجات بيبدأوا حياتهم في حاجه اسمها ستوديو عباره عن غرفة بمطبخ وحمام لحد ما الأمور تتحسن وبعيد تماماً عن دعم الأسرة ... أما في بلاد جوه فتلاقي واحدة شبة الديك الرومي أو واحد زي الدب القطبي وعمالين يتفلسفوا هم وأهاليهم علشان شروط العفش والقايمه ويفركشوا الجوازة علشان كبايه ولا شفشق ... حاجات عقيمة حاجة تكسف :)

ادم المصرى يقول...

مستنيكى تزورى مدونتى

الحرامي يقول...

ينصر دينك يا استاذ نفيسسسسسسسسسسسسسسسسسسسسسسسسسسسسسسه
والله معاكي كل الحق
يا مين يلايمني علي بنوته مقتنعة بكده فعلم وانا طبعم هجري واخطب ابوها علي طول
بس هسرقه الاول
اصلي مش بتاع جواز
حراااامي محدش يصدقني

ELMASRYA يقول...

امممممممممممم

بصي بقى

هو كلامك كويس في جزء منه

ماشي مانغاليش في طلب الشقه الفخمه والفرش الرهيب

لكن برضه فيه حد أدنى

وانتبهي انتي وكلللللل البنات

التساهل بزياده في أوقات كتير بيكون ليه ضرره على البنت

بلاش العواطف المشتعلة تصورلكم إن الحياة هتبقى وردية

إذا دخل الفقر من الباب هرب الحب من الشباك

وحكاية ان اللي بتتاخد بالغالي بيتحافظ عليها حقيقية

نادر قوي قصص الحب الوالوفاء والإخلاص

ربنا يوفقكم لرجال صالحين ويسعدكم ويرزقكم بالذرية الصالحة جميعا

تــحــيــاتـــي