27‏/4‏/2009

فضفضه


بقالي كام يوم بفكر اكتب عن ايه اكتب بوست اقول فيه ايه يعني بس لقيت ماليش نفس ماليش نفس لاي حاجه حاسه ان قلبي حزين يائس حاسه ان في كتله هم وحزن كبيره قوي جوايا قعدت افكر في عام 2008 لقيت اني فقدت فيه ناس كتير عزيزه عليا وورا بعض ولما جه 2009 قولت اكيد هيكون احسن بس للاسف لقيته اسؤ حاسه ان كل الي حواليا مخنوقين وزعلانين ماما حاسه في عينها حزن كبير حاسه ان ملامحها كبرت فجاه من التعب على اخواتي الاتنين الي كانت بتعمل عمليه والي دخلت المستشفى ولسه تعبانه طول عمري اسمعها بتقول تحصل اي حاجه الا ولادي يكونوا بس كويسين واهو الحمد لله على كل شئ

ولا خطيبي الي كل ما اكلمه الاقي دايما صوته زعلان او مخنوق او مضايق لان حصل ظروف وكل حاجه كان مخططنها باظت وكل ماتكون في فرصه تروح غصب عنه هو كمان متحمل كتير وانا عارفه بس انا تعبت من انه ماعاتش بيتحمل كلمه وان لازم اتحمل كل شئ

نفسي اصرخ انا تعبت بجد تعبت ماليش نفس لاي حاجه نفسي اجري كتير اصرخ بصوت كبير اعيط قوي يمكن ارتاح

عموما انا قولت افضفض وخلاص وان شاء الله استعيد توازني الداخلي مع نفسي بس بجد الوقت ده اصعب وقت قضيته في حياتي والحمد لله على كل شئ يارب

هناك 44 تعليقًا:

GiGi يقول...

ياحبيبتى اهى شويه وربنا كريم
وبصى لنعم كتير فى ايدك
قولى الحمد لله ان اختك خرجت من السمستشفى ان فى كل حياتك ربنا بيلطف
يارب تكون بخير دايما يارب

adel يقول...

مش عارف ؟؟ دي حالة عامة شكلها ؟؟
كلنا كده ولا ايه

بس عموما
كلما ضاقت و استحكمت حلاقتها فرجت

ربنا موجود دايما

MaNoOoSh يقول...

صدقينى ربنا ما بيضيقها على حد الا ويرزقة بالبراح يبعد كدة
"ضاقت ولما استحكمت حلقاتها فرجت وكنت اظنها لا تفرج"
ان شاء الله الحال يتعدل وربنا يشفى اخواتك ويهدى خطيبك ويصلح حالة.. ومعلش استحمليه وحاولى تخففى عنة وتبينيلة انك انتى كمان محتاجة اللى يخفف عنك شوية.
وربنا يرزقكوا صلاح الحال

MǿиY El-Shreef يقول...

ياحبيبة قلبي ان بعد العسر يسرا ان شاء الله

فوضي امورك كلها لربنا وصدقيني مافيش احن منه علينا

ربنا معاكي ياقمر

خدي بالك منك

فنون للديكور يقول...

بجد انا استفت واستمتعت بمدونتك جدا

الشاعر الحزين يقول...

صدقينى ده اختبار من ربنا
وأنتى لازم تصبرى
وربنا لازم هيكافئك على صبرك
وعلى فكره مكنش لازم تقولى أنا عايزه أجرى وأصرخ وكده لالا

المفروض تقولى أنا عايزه أجرى وأصلى علشان ربنا يفك كربى ويفرج همى

استعينى بالله واصبرى

ان الله مع الصابرين اذا صبروا


اصبرى

صوت من مصر يقول...

انا ايضا كد حسيت ان عام 2009 هو الاسؤ بين جميع اعوامى كلها لكن لو انتى مش هتستحملى خطيبك مين الى هيستحمله
وللاسف انى خسرت عمرى بسبب انى فشلت
ارجو ان تكونى صرختى صرخه من داخل قلبك وتقولى تعبتى لانها تريحك

mahasen saber يقول...

لا اله الا الله
لا حول ولاا قوة الا بالله مالك بس روقى كده

اولا مرض اخواتك ده اكيد خير ربنا بيدى البلاء للانسان اليى بيحبه اكيد

وربنا هيعافيهم ان شاء الله ومامتك ربنا هيكرمها فيكوا يأذنه سبحانه وتعالى

وخطيبك معلش ظروف الحياه صعبه وانتى نفسك بتقولى من الفرص اليى بتروح منه الراجل بالنسبه ليه الضعف والفشل شئ بيهدد كرامته وبيعكنن عليه فأعذريه

ربنا يريح قلبك وباللك ويطمنك على كل من تحبيين

روقى كده وكل شئ هيتحل بأذن الله يا حاسوبه يا جميله

biberss222 يقول...

و اصبر على ما اصابك ان ذلك من عزم الامور

فين الصبر يا بنتى

ان مع العسر يسر ان مع العسر سير

استشرى خير ان شاء الله

mohamed ghalia يقول...

دايما بنمر فى حياتنا بصدمات
المهم نقوم منها وإحنا أقوى من الأول
إن شاء الله فرج ربنا قريب
ربنا يسعدك دايما

عاشقه الرومانسيه يقول...

اقولك على حته هترتاحى فيها قووووووووى؟
اه والله بس اسمعى كلامى
فى التلت الاخير من الليل اقفى بين ايدى الله وصلى ركعتين وادعيه وفضفضى له من غير صيغه دعاء بقى ولا حاجه اتكلمى كده عادى
وهو هيحس بيكى وهيريح قلبك قوى وهتتيسر لك كل امورك
طيب جربى كده
واسئل مجرب
وربنا يفك كربك ان شاء الله

لجين أبو الدهب يقول...

حبيبتى حاسوباتية ..

كلنا مرنا بالفترة دى ..

وصدقنى ما يتضيق اوى اوى كده الا لما تلاقى انها فرجت والله اعظم فرج ..

كل ما تتضيق اعرفى ان الفرج جاى اكيد ..

ومرض اخواتك ان شاء الله يكن فى ميزان حسناتهم وتكفير سيئات عنهم ..

ومامتك هاترجع تانى زى ما كانت بس هى خايفة على اخواتك وان شاء الله لما يخفوا هاترجع تانى واحسن ..

اما بالنسبة لخطيبك .. بصى لازم لازم تمر الفترة دى على كل المخطوبيين ..

الزهق والضيق ومش عارفين يعملوا ايه وهو يبقى مخنوق وتعصب وله حق طبعا لان عليه مسئولية ومش بيلاقى حد اوادمه غيرك وانتى بتستحملى علشان بتحبيه ..

بس فى لحظة والله هاتلاقى كل حاجة فرجت واتسهلت واتيسرت جا لدرجة انك تكونى متفاجأة منها ..

ربنا ييسر لك امرك ويعجلك من كل عسرا يسرا ..

احساس طفلة محبة للرومانسية بس واقعية يقول...

ربنا رحيم بعبادة يا حاسوباتية
خليكى متأكدة انها هتفرج مهما ضاقت اوى

وبعدين بصى فى الدنيا حوليكى هتلاقى ان الحمد لله احنا احسن من غيرنا بكتير مهما ضاقت علينا

ربنا يفك كربك ويهون همك
تقبلى مرورى

حواء يقول...

للأسف معظمنا بقي كده
بس لو استعنا بالله وتاكدنا ان كل اللي بيحصل ومزعلنا ده خير
ولو حصل اللي احنا كنا عاوزينه وربنا مقدروش يبقي ده شر لينا
لان ربنا هو اللي خلقنا وهو اللي عرفنا اكتر من نفسنا
قولي لخطيبك ميزعلش ودايما لما حاجه تبعد عنه او فرصه شغل تروح منه
يدعي ويقول ( اللهم اجرني في مصيبتي واخلفني خيرا منها )
وفهميه ان اللي حصل ده احسن حاجه حصلتله لان هو ده الخير الوحيد ليه



اما لو انتي حسه بضيق استغفري كتير قلبك هينشرح ان شاء الله
تحياتي

momken يقول...

ان بعد العسر يسرا..ان بعد العسر يسرا

افرحى بان الفرج قريب جداً

لانها لا تتحتكم هكذا الا ويكون الفرج قريب جداً جداً

هذا وعد الله

اسال الله سبحانه ان يفرج همك
اما موضوع خطيبك فدى بايدك انتى بقى فرفشيه وطلعيه من الى هو فيه
ابسامتك كفيله بقتل اى بؤس وبانهاء اى خنقه


تحياتى

رؤية يقول...

وان النصر مع الصبر وان مع العسر يسرا

ضاقت فلما استحكمت حلقاتها فرجت وكنت اظنها لا تفرج


صبرا.. قريبا ياتى الفرج
وربنا معاكى وعليكى بالدعاء

ستيته حسب الله الحمش يقول...

سبحان الله
ربنا يا قمر قال فإن مع العسر يسرا ولم يقل فإن بعد العسر يسرا
لأنه معاه ماسك كده فيه بس صبرا جميلا علشان تاخدوا جزاء الصابرين

طيب نيجي للشق التاني خطيبك
ومال لما تستحملي شوية
مساكين الرجالة دلوقتي سككهم بتتقفل زي الدومينو وكل ما يفتكروا ان الحلم قرب وها يتحقق الدنيا تشوطه زي الكورة

وبعدين ليه مش بينكم كلمة تفك الكرب وفي نفس الوقت تقرب النفوس والقلوب من بعض

يعني مثلا تقرأي جزئية نونو في كتاب لا تحزن للشيخ عائض القرني ثم تحكيها له بأسلوبك .. ها تفاجئي باللي ها يصبح بينكم
طب جربي كده كلام سوتيتة .. كلمة نونو مش وعظ طويل على جزاء الشاكرين الراضين بقسمة الله
على صبر الصحابة والتابعين
عن اسباب تفريج الكروب
وبعدين لازم تحكي لي حصل ايه مش عاوزة شغل الحاسوباتية ده تاخد الكلام ومتردش جواب

ربنا يفرح قلبك بتمام شفاء اختك
ولا يري والدتك سوء فيكن ابدا
ويتم لك جوازك على خير من حيث لا تحتسبي ولا تدري

بحبك

Eno يقول...

حاسه بيكي اوي وبكل كلمه كتبتيها ويمكن دموعي نزلت من كتر ماانا حاسه احساسك حاسه اني جوايا احساس مكتوم ومش عارفه اوصفه لحد مش عاوزه ازودها علي حد
وفكرت في موضوع الصراخ ده يمكن يخرج مابداخلي لكن مظنش اللي جوانا ده محتاج الاول ترتيب وبعد كده يخرج ان شاء الله يخرج للهوا مش لحد المهم انه يخرج

بس تعرفي انا مجرد التفكير في اللخبطه اللي جوايا بس بيرعبني اني اكمل تفكير فيها وارتبها !!

حاولي تدخلي اونلاين ونتكلم شويه لو حابيتي :)
هستنا ردك :)
واسفه للتطويل :)
تحياتي

شيماء جمال(شيمو القمر) يقول...

ربنا معاكم كلكم
يا حبيبتى ده ابتلاءات وتدل على إنكم ناس مؤمنين بالله لأنه بيبتليكم ويختبركم إيمانكم وكمان ماضاقت إلا ما فرجت

ربنا معاكم وأكيد إن شاء الله أسمع خبر كويس عنك قريب

تحياتى
شيمو القمر

غير معرف يقول...

ول تعليق ولكن ليس اول مرور
انا عاوزاك يابنتى تتوجهى الى الله بالصلاة وتصبرى فهو القائل واستعينوا بالصبر والصلاة وهى وصفة ربناية
عند البلاء والمحن
باذن الله ماما تطمن على اخواتك وترجع الفرحة والبسمة تانى للوجوه
بالنسبة للخطيب ربنا يفتحها عليكم يارب
وتتيسر الامورلكم ومعلش ياحاسوباتية
استحملى انتى شوية بل اكثر منه وتعدى الفترة ديه على خير
لن انساكى من الدعاء حبيبتى

ام مالك

أمبارح كان عمرى عشرين يقول...

بعد العسر يسر
واعملى الحاجات الاقولتى عليها ليه لا
يعنى عيطى وصرخى واعملى كل الحاجات دى علشان تحسى با الراحه بعدها بجد
ربنا معاكى وان شاء الله 2009 تكون اسعد واجمل فى كل شى

أنا إللى أستاهل يقول...

والله يانسة حاسوباتية انا عايز اقولك ان كلنا بتمر بينا ظروف صعبة جداااااا وفينا إلى بيمر بظروف أسوء من ظروفك وفينا إلى مر فعلا بظروف اصعب وأسواء من ظروفك بصى على النصف المليان من الكوب عشان تقدرى تتحملى الظروف بتاعتك ولو ياستى الصريخ والصوت العالى هيريحك ممكن ببساطة تروحى اى نادى باليل او تدخل الحمام زاى حالتى كده وتقعدى تعملى كل إلى نفسك فيه زعيق عياط صريخ اى حاجة عايزة تعمليها وهتحسى انها هتريحك اعمليها
مع تحياتى وإمنياتى بأن بكرة بتاعك يوكن احسن بكتير من إلى فات
أخوكى انا إلى أستاهل

dodoo يقول...

ساعات الانسان بيحس ان الدنيا كلها عليه

وان كل حاجه فى حياته بايظه ومفيش حاجه بتتصلح

بس ده كله بيكون ابتلاء من عند ربنا

وافتكرى دايماً ان المؤمن مصاب

وافتكرى برضه الحديث ده دايماً لما تحزنى

" عجباً لأمر المسلم أمره كله له خير إن أصابته سراء فشكر فكان خيراً له وان اصابته ضراءفصبر فكان خيراً له "

اصبرى وصدقينى ان بعد العسر يسرا

romansy يقول...

ربنامعاكى
انا مريت بالخله دى
حسيت انى مخنوق قوى
حسيت بكميه قلق رهيبه
قلقان من كل شئ وعلى كل شئ
ظروف وربنا معانا وتعدى
اصبرى
ان الله مع الصابرين

hager يقول...

مممممممممممممممم
وااضح انها عدوه في الجو
بصي هقولك حااجه دايما بقولها لنفسي قبل غيري .. ربنا بيمتحنا عشان يشوف قوه ايمانا واي مشكله بتحصل بدل ما هيا مكسرتكيش يبقي بتقويكي
وبما ان ربنا بيحبنا وعمره ما هيكسرنا يبقي بيقوينا
ربنا ان شااء الله هيخفف عنك ويزيل همك ويحل كل المشااكل
ربنا معاااكي :)

ومتنسيش دعاء الهم والحزن :)

الشموع البيضاء يقول...

كتيييير اوى بيحصل ده من وقت للتانى فى حياة كل واحد لازم تمر فتره صعبه وصعبه اوى بيكون ابتلاء وصبر وبعدها بيجى الفرج يقينا ده كلام ربنا ووعدنا بيه يعنى لازم هيتحقق
انا عارفه انك مقدرة ظروف خطيبك بس فنفس الووقت محتاجه حد يطبطب عليكى لظروف اخواتك بس خليكى انتى الفراشه الجميله بين مامتك واخواتك وخطيبك ونور فقلوبهم الامل والرضا والصبر
وصدقينى يقينا الفرحه والامل جااااى وبكره تتفكرى الايام دى وتقولى كانت فترة صعبه بس الحمد الله ربنا اكرمنى وعدت
ربنا يفقك وييسرلك كل امورك يارب

Butterfly يقول...

الناس كلها بتمر بالظروف دى
أنا مريت بزيها كده
واكتر منها السنه اللى فاتت
بس الحمد لله بعدها ربنا فتحها عليا ومعتش من النوع اللى مكتئب على طووول ده
بس انت متستسلميش وقربى من ربنا أكتر
وهو مش هيتخلى عنك ان شاء الله :)

أحمـــــــــــــد أبو العلا يقول...

امتى تفرج؟
لما تتضيق وتزيد في ضيقها وتستحكم
تلاقي الفرج جه من عند ربنا

قال تعالى "إن مع العسر يسر"

يعني مفيش عسر من غير يسر
ارمي تكالك على الله
وفضفضي براحتك كلنا هنا عشان نسمعك

ঔღঔ نـــوارة ঔღঔ يقول...

ربنا معاكي ياحبيبتي ويكون بعونك

ماتستسلمي للحزن والضيق خليكي قوية وخلي املك بربنا كبير

انت هيك بتزودي آلام الي حواليكي

وكان الله بعون خطيبك هو بحاجتك جنمبه المفروض تخففي عنه وتصبريه على الحياة

ان شاء الله امورك هتتعدل

ربنا يشفي اخواتك ويوفقك مع خطيبك

دمتِ بالف خير

موناليزا يقول...

كلما ضاقت حلقاتها فرجت وكنت أظنها لا تفرج
عليكِ بالدعاء وان شاء الله الفرج قادم
ربنا ييسرلكم جميع اموركم ويشفى اخواتك ويباركلك فى خطيبك ومامتك

فكرة من الزمن ده يقول...

ياحبيبتي والله لمستي قلبي
فضفضي امال احنا لزمتنا ايه في العالم التدويني ده علشان نسمع بعض
ربما يفك كربك ويسير لك امرك ويبدل حزنك سعادة
تحياتي

شمس النهار يقول...

مش هقول لفضفضتك دي غير
لو سمحتي قولي يارب اوي من قلبك

بسنت صلاح الدين يقول...

روقى كده يا جميل على فكره موضوع خطيبك ده كلنا بنمر بيه معلش استحملى شويه و هاتعدى و عن تجربه والله صلى و ادعى ربنا هايفرجها بشكل مش ممكن تتخيليه ربنا كريم و مش بينسى حد بس انتى ادعى و قلبك هايرتاح و ان شاء الله ربنا يطمن مامتك عليكوا و يخليكوا ليها ، ده امتحان من ربنا و فتره و هاتروح لحالها

Soul.o0o.Whisper يقول...

السلام عليكم و رحمة الله و بركاته

حقيقى مش عارفة اقولك ايه
هى صحيح كل نفس لها قدرة على تحمل الاحزان

لكن بردوا فى نفس الوقت لازم تفرغ من الجانب الاخر

لأن الحياة مش بتخلص
ولو فضلنا نراكم نراكم .. يبئا هنتعب اوى
و هنحمل نفسنا فوق طاقتها

طب ازاى نشيل عننا كم الهموم دا

أولا بالاستعانة بربنا
لما نقعد كدا و نقول يارب ضاقت بيا اوى ماعدتش قادرة استحمل
و ابكى بين ايديه
يااااااه على الراحة اللى بتحسى بيها

كمان قولى دعاء الهم و الحزن
صدقينى بيفرج اوى
اللى هو " اللهم انى عبد ابن عبدك ابن امتك ناصيتى بيدك ماض فى حكمك عدل فى قضاؤك اسألك بكل اسم هو لك سميت به نفسك او انزلته فى كتابك او علمته احد من خلقك او استأثرت به فى علم الغيب عندك ان تجعل القرىن الكريم ربيع قلبى و نور بصرى و ذهاب همى و جلاء حزنى"

كمان حبيبتى التفكر فى حال الناس التانية
صدقينى هتلاقيكى فى نعمة كبيرة


عارفة انى طولت عليكى
بس آخر حاجة عاوزة أقولهالك
ان ربنا بيبتلينا عشان يربينا
مش عشان يعذبنا

فحاولى شوفى خرجتى من همومك و احزانك دى بايه
و صدقينى هتلاقيكى اتعلمتى كتير


و تحياتى لكى

princess يقول...

بصى بجد دى كلها اختبارات من ربنا
والدنيا لما بتبوظ كده تاكدى هتضحك قريب ان شاء الله

تامر علي يقول...

الحل الأكيد في الاستعانة بالله والصبر ... طبعاً هو حل عاوز مجاهدة كبيرة لكن حصاده المؤكد هو السعادة القريبة ان شاء الله
جعل الله لكم من كل هم فرجاً
تحياتي

نهــــــــــار يقول...

السلام عليكم.....
كان الله في عونكم....
أختي ...
قيل كلما ضاقت حلقاتها فرجت....
تفائلي بالخير ولا تقنطي من رحمة الله...
......
من رحلوا عني أيضا بالعام الفائت كثر
أولهم والدي رحمه الله ...
ولكن هذه مشيئة الله اللهم لا إعتراض عليكِ بالدعاء ...
عل الله يهون عليكِ ..
...
في أمان الله...

بنت الغربة يقول...

حاسوباتيه حبيبتى
الف سلامه على اخواتك الاتنين ..والحمد لله ان اختك رجعت بالسلامه من المستشفى ..
بصى ياحبيبتى الدنيا عمرها مابتمشى زى الواحد ماهو مخطط لها ابدا ..
ساعات بتقابلك ظروووف وحشه قوى بتخليك تغير مسار حياتك ..وساعات بتقلب حياتك كلها بمفاجأت حلوة ..
ارمى همومك على ربنا وسيبها لربنا هو اللى هيفرجها بأذن الله تعالى ..
ولو الدنيا فى مصر مقفله قدام خطيبك ..خليه يجرب بره مصر ..
وربنا معاكم ..
تحياتى ياقمر يازعلان..

مامة مازن يقول...

اختى الباشمهندسة
السلام عليكم ورحمة الله وبركاته
ادعو لاخوتك ان يفرج عنهن ما هن فيه
وادعو لوالدتك ان يفرح المولى عز وجل قلبها بشفاء اخواتك
وادعو الله ان يفرج عن خطيبك ما هو فيه
ويرزقه الله من فضلك
وادعوكى للابتسام فى وجههم جميعا فانت الان مسئولة عنهم جميعهم كونى لهم القوة والسند كونى عودا صلبا يشتد به ظهر امك واخواتك وخطيبك
لا وقت الان للبكاء
البكاء بعد الازمة الكبيرة دى ما تعدى
ربنا معاكى اختى الصغيرة
ولينعم الله عليكم من فضله
بحوله وقوته
ولقد ذكرتينى بنفسى منذ عدة اشهر ولكن فرج الله قريب اقرب الينا من نور اعيننا
يا رب اقرا قريبا عندك خبر يفرح قلبى
دمتى بسلام اختى

رئـــــيسـة حزب الأحلام يقول...

اهدى كدة وروقى ياجميل بكرة تحلى
وربنا يهديلك الحال

ابو على يقول...

كويس انك بعد كل اللى حكتيه انك قولتى ف الاخر الحمد لله دى بكل شىء
ما بتديق الا اما تفرج يا بنتى
بدعى لاخواتك ان ربنا يعافيهم
سلام

Foxology يقول...

بالنسبة لحال والدتك فده شئ طبيعى اى ام فى الدنيا بتبقى كدة حزينة لحال ولادها ايا كان الحال ده وان شاء الله فترة وتعدى :)

بالنسبة لخطيبك اعذريه بجد احنا طالع عنينا فى اشغالنا وحالة البلد ما يعلم بيها الا ربنا وزميلك اللى معاكى فى الشغل اللى وشه ف وشك بالضحك طول اليوم نفسه تمشى علشان ياخد مكانك وفلوسك حرب نفسية وضغط عصبى كبير جدااااا معلش اعذريه وده عن تجربة شخصية لأنى زيه تمام والحمد لله تينو مستحملانى وربنا يكرمها على صبرها عليا ده :)

فرجه قريب

ان مع العسر يسرا

تحياتى :)

Sometimes يقول...

سيبيها على الله
ان شاء الله خير

انا عايزاكى تنطقى كلمة الله من قلبك كده
قوليها دلوقتى
انطقى بصوت عالى كده


قوليلى حاسه بإيه؟؟؟

ربنا يطمن قلبك وييسرلك الامور كلها يارب

ELMASRYA - MRS WRITER يقول...

ربنا يفك كربك ويزيل همك إنتي ووالدتك وخطيبك

اذكروا الله كثيرا

وتذكري دائما إن مع العسر يسرا

داومي على الدعاء وخصوصا دعاء فك الكرب

رددي الإستغفار والصلاة على الرسول وتسبيح ذو النون وهو في بطن الحوت

دعائي لكم بالخير والصحة والسعادة والستر وراحة البال اللهم آمين

دمتي سالمة بحفظ الرحمن