11‏/6‏/2009

كله عادي


كل شئ بقى عادي
زعلانين..عادي
قلوبنا مكسوره..عادي
حياتنا مش عارفين نعمل فيها ايه ..عادي
كل حاجه بقت عادي عارف ليه لاننا اتعودنا على كل ده
اتعودنا ان مافيش فرح اتعودنا على الالم
بس عارف ايه اصعب شئ
ان احنا بقينا بعاد قوي
ان بقى الصمت هو لغتنا سوا
ان انا ماعونتش بشوفك ولا بتشوفني
ان كل حاجه في نفس الوقت بايظه
ان كلمه بحبك منك ساعات بحسها واجب بتقوله

اني بحس ان القدر بيبعدنا بعيد قوي

اني اكلمك وانت تكون في عالم تاني
ان حبنا بقى اقل بكتير من العادي
------------------------------------

الكلام المكتوب ده انا كتبته كده من غير تفكير ولا تنظيم ولا اي حاجه يمكن مش هتفهموني لانكم ماتعرفوش الظروف الي بمر بيها بس انا كتبته وانا في اسؤ الظروف بجد يمكن الوحيده الي تعرفها اينو بس يا اينو كل حاجه كل مادى بتبوظ

المهم انا بعتزر ان انا مابدخلش اي مدونات خالص مع انكم واحشني جدا بس مش قادره وبصراحه ماليش نفس لاي شئ اصلا


بعتذر جدا لشمس النهار انها بتقول ان كل الي بكتبه نكد بس صدقيني المدونه دي الحاجه الوحيده الي بكلمها كاني بكلم نفسي فانا اسفه ليكي بس مش قادره اتحرم من ده كمان

عارفه ان اغلب الي بكتبه نكد زي ماقولتي بس والله غصب عني ماتزعليش مني

وكلكم انا اسفه ان كلامي كده بس انا هنا بكلم مع نفسي


هناك 28 تعليقًا:

عاشقه الرومانسيه يقول...

حبيبتى انتى تتكلمى براحتك
وتفضفضى براحتك
واحنا نخفف عنك ونقف جنبك
الى ان يتغير العادى لشئ مش عادى ابدااااا
عارفه الاحساس ده ومقدراه
لانى عيشته فتره كبيره
ربنا يعطيكى احساس فووووق العادى بمراحل
ربنا يسعد قلبك
وتعيشى وتفضفضى وسط اخواتك واهلك المدونين ياستى

قوليلى بقى الصوره دى كنتى حطاها فى بوست وكاتبه عليه اللى بينا نص حاله نص للحب اللى يمكن نصها التانى استحاله
(اغنيه اصاله)
هو انتى مفيش عندك صور؟
تعالى على الميل وايعت لك صور بالهبل
(باهزر )
روق بقى ياجميل
والله ماحد يستحق لحظه حزن منك
يابنتى العمر قصير عيشى حياتك قبل الزمن ما يسرقها منك

بحبك ياعقل الكمبيوتر
هاتى بوسه وحضن بقى
اموووووووووه

adel يقول...

لا مش كل ده عادي
ولا لو عادي مكنتش قلتي كده لانك هتبقي خلاص اتعودتي

و محدش قالك اكتتبي علي مزاجنا
المدونات دي في الاساس زي المذكرات الشحصية بس ميزتها ان الناس بتشوفها
انتي تكتبي اللي يعجبك و احنا هنقرا هنقرا

و بالنسية للصمت اللي بقي بينكم
اعتقد في اسباب دوري عليها و هتفهمي و بس

سلام عشان عندي امتحان :):)

حواء يقول...

مالك بس
بقالك فتره كبيره وانتي في هم ونكد
اللي فهته من كلامك حله حاجه واحده
تعرفي انتي عايزه ايه بالضبط
وتتكلمي مع خطيبك في احساسك ده
علشان مترجعيش تندمي بعد كده

انا راي ان الجواز يعني اكون بحب جوزي وجوزي يكون بيحبني اكتر بكتير جدا من مأنا بحبه


صدقيني لو في حب حقيقي بينكم عمره مهيفكر يزعلك وكل همه هيبقي رضاكي وبس
وهيحاول ياقلم نفسه علي اختلاف الطبع اللي بينكم
وانتي برده هتعملي نفس الموضوع لو بتحبيه

لكن يبقي من اولها كده احساس باللي قولتيه في البوست ده ؟؟؟؟

ربنا يفك كربك يارب

Foxology يقول...

معلش ربنا يصلح الحال

حاولو التجديد والتغيير

تحياتى :)

Eno يقول...

مالك ياقمر الف سلامه عليكي


حاولي تتمسكي بكل الخيوط اللي تملكيها في ايدك معلش انا عارفه احساسك انك ماسكه جمر نار باايدك مش خيوط بس صدقيني الانسان اللي انتي مرتبطه بيه اكيد يستاهل كل خير عشان اختارك :)
هيجي اليوم وكل حاجه تتصلح وترجع مكنها وتفتكري انتي وهو سوا الايام دي

ربنا يفرجها عليكي يااااااااااارب ويهونها كمان :)

طمنيني عملتي ايه في المنحه

احساس طفلة محبة للرومانسية بس واقعية يقول...

حاسوباتيه ازيك يا قمر ؟
بصى المدونة مدونتك تفضفضى فيها
تكتبى كلام حزين تكتبة ساخر تكتبى اللى انتى عايزاه دى صفحتك
بس المهم فى حياتك متكونيش على طول
حزينة وعلى طول المود دا معاكى

بعدين هو مفيش حاجة عادى من دول
احنا اللى بنقنع نفسنا بكدا بس
عشان منواجهش نفسنا ونشوف احنا عايزين اية والمشكلة فين وحتى لو وجهنا ممكن نقول كدا عشان مش لاقين حل او لان الحل مش راضينا

ربنا يقويكى ويعينك
تقبلى مرورى

قلب ارهقته الاحلام يقول...

عيطي وسرخي براحتك :)

عادي كلنا بنعمل كده

ساعات الفرح اصلا تتعد ع الصوابع

بس ال اقدر اقوله انه مفيش حاجه تستاهل

بس ياريتني اقتنع زي ما انا عاوزة اقنعك:)

دمتي بألف خيرر

لاسع افندى يقول...
أزال المؤلف هذا التعليق.
لاسع افندى يقول...

اعتقد ان المشكله الرئيسيه اللى بتمرى بيها هيا فترة ما بعد الدراسه وقبل الحصول على فرصة عمل مناسبه ...كلنا مرينا بايام زى دى بس الحمد لله عدت اتمنالك التوفيق

تحياتى

مامة مازن يقول...

اختى الباشمهندسة
فاهمين كلامك جدا لان كلنا اكيد مرينا بوقت زى كده
مدونتك حبيبتى مكانك الحر شباك بتتنفسى منه لما حد بيقولك بتكتبى نكد بيبقى خايف عليكى من احساس الحزن بيبقى عايز ياخد بايدك ومش عارف
اعتبرى اننا كلنا قاعدين معاكى فى قعده واحده بتحكيلنا وبنحكيلك اعتبرى كلامى ليكى ده طبطبة وضمة من اختك الكبيرة(مش كبيرة قوى يعنى هههههه)
حبيبتى اللى بتمر بفترة حزن واشتياق متقلقيش هو بس واحشك تبقى معاه

صمت المشاعر يقول...

ربنا يارب يصلح امورك عن قريب ويبعد عنك الحزن

دمتي بكل خير وسعاده

Sweet Violet يقول...

لو عادى ماكنش انكتب من الاساس

ان شاء الله تخرجى ن الفترة دى فى اسرع وقت و ترجعى تانى

و تملى المدونة فرح مش حزن ^_^

و ياستى نكدى براحتك المهم انك ترتاحى

ربنا معاك ^_^

شيماء جمال(شيمو القمر) يقول...

حاسوباتية الجميلة
كلامك مع معناه الذى فى باطن الشاعر كما يقولون الا انه مفعم بالألم
حاولى الخروج من هذه الدائرة والا ستظلى بها طيلة حياتك
أنت من كلامك السابق دليل بأنك قوية وتستطعين الصمود
حاولى الصمود وتخطى الحزن الذى يحيطك

ربنا معاك
بالتوفيق
تحياتى لك
شيمو القمر

عمرو يقول...

ربنا معاكى و مع كل من فى كرب و هو وحده قادر على لم شمل الناس و النفوس ..
أتمنى لك كل سعاده و تقبلى تحياتى ..

غير معرف يقول...

ايه بس المود ده :((

حاولي تخرجي من الحزن وربنا معاكي يا رب

غير معرف يقول...

ربنا يفك كربك

mohra يقول...

اظن انك عاطفيه و حنينه قوى
يعنى لما تحبى ..تحبى بجد و بزياده و اكيد اللى قصادك هيحس بده و للاسف ممكن بعض الناس تتعود على انك دايما تدى و انك دايما تعبرى عن حبك و هما ساكتين
ويمكن هى مجرد خلافات بسيطه بس انتى اللى حساسه شويه

اجمدى كده

ميرا ( وومن ) يقول...

ازيك يا قمر عاملة ايه وحشاني بجد مع اني عارفة إني مقصرة معاكي بس انا كمان كنت بمر بظروف صعبة وإمتحانات

كلامك يمكن مش مبهج صحيح بس الأفضل انك تعبري عن اللي جواكي وتفضفضي وكلة بيعدي ومش بيفضلنا غير الذكري

اللهم هيئ لها من أمرها رشداً

اللهم آمين
اللهم آمين
اللهم آمين

MaNoOoSh يقول...

معلش يا حاسوباتية
احساس ان الدنيا كلها بقت ماسخة دة احساس كلنا بنمر بيه

وعلى قد ما هو مر.. على قد ما لازم تتاكدي ان دوام الحال من المحال

فضفضي براحتك
وان كانت شموسة تقصد انها تتمني ان مودك نفسة يتغير ويشع بالسعادة


ربنا ان شاء الله يوفقك للسعادة والخير

شمس النهار يقول...

حبيبتي انا مش زعلانه انك بتكتبي نكد ابدا
انا زعلانه ن كل الهم ده جواكي وماحدش قادر يعمل لك حاجه والا حتي يسمعك
والا يشاركك حزنك

اكتبي زي ماانت عايزه طالما انت قادره تنفسي عن اللي جواكي بالكتابه هقول يابختك
في ناس حتي التنفيس بالكتابه مش بيقدروا عليه
مابيعرفوش والا عندهم اوبشن اخراج همهم وحزنهم لبره
بيكتموه جواهم

اكتبي والا يهمك وانا لااملك لكي الا الدعاء الخالص من قلبي
ربنا يريح قلبك ويرضيكي

(حلـم) يقول...

اول مرور حبيت اقولك اتمني ان لايكون عادي دمتي بخير

Kiara يقول...

تصدقى موش قادره او مش عارفه اقولك ايه بصي ادعي ربنا اوي

ومش مهم تكتبي نكد اولا لا المهم انك بتخرجي كل اللي جواكي طلعيه كله عشان تواجهي كل شي وانتي ابييض من جواو عارفه تفكري وتتصرفي صح

الجواز و سنينه يقول...

بصى يا جميل
لازم تعرفى ان لو انتى حاسه ان اللى انتى بتحبيه مش حاسس بيكى او ان فيه فجوه بينك و بينه فأدمك انك يا تسدى الفجوه دى يا اما ماتكمليش
ليييييييييييه
لان الخساره القريبه احسن من البعيده
انا مش مع التنازل بسهوله عن الحب
انا مع الاستمااااااته حتى آخر رمق
على انك تكونى جربتى كل الطرق معاه
يعنى فيه ناس بتحب التقل
و فيه ناس تحب الاهتمام
و فيه ناس تحب اهتمامك بأهله
و ناس اهتمامك بنفسك
شوفى هو بيحب ايه و انتى كمان لازم تعرفيه ايه اللى انتى بتحبيه و اوصلوا لحل وسط
لو مانفعش يبقى ما ترهقيش نفسك و اعصابك اكتر من كده و ان شاء الله ربنا هايعوض عليكى باللى يريحك
و اعرفى ان مش بالحب وحده يحييى الانسان
يعنى زى ما لقيتيه هاتلاقى غيره
و لو مافيش الحب ده يبقى هاتكملى علشان ايه؟
معلش انى اتدخلت بس انتى كلامك مبهم و ده اللى قدرت افهمه و ارد على اده
فضفضى براحتك و لا يهمك
امووووووووه

بسنت صلاح الدين يقول...

لا مش عادى يا حبيبتى انك تقضى اجمل ايامك فى حزن بالشكل ده اتكلمى و اصرخى و قولى مش عادى و اتفاهمى مع من يهمه الامر و اوصلى لحد و لحل للوضع ده

blue-wave يقول...

مش عاجبنى مودك
ربنا معاكى وتفائلى بقى كدا
والله هازعل
وانتى مايرضكيش زعل واحد اسمه عمرو ولا ايه؟؟؟:))

Eno يقول...

ليكي تاج عندي ياقمر تعالي خديه يمكن يخليكي احسن شويه وينسيكي التعب شويه :)

اتمني تكون بالف خير :)

تحياتي :)

أحــوال الهـوي يقول...

ازيك
انقطعت عن التدوين فترة و لقيتك قد تغيرت كثير لن اسال عن السبب و لكني و اثق انها كبوة و سوف تفيقين منها


تحياتيى

hasona يقول...

السلام عليكم

كلماتك لها معاني
تتحدث عن مشاكلنا
عن وحدتنا رغم من حوالنا
عن انطوائنا رغم حداثة عصرنا

وهذا يساهم ان يكون الحب مجرد حالة
شئ بيجمع لا يرتقي الي احساس
أيام تمر كيف ومتي وما استفادنا منها
جروح ونزيف ألم
كيف نحولها الي فرحة وجمال وراحة
،،،،
ربنا يعينك ويفوقك
ويهديك الي ما فيه الخير لك وللجميع
ويهون عليك كل عسير

تحياتي