21‏/7‏/2009

بنت ومخطوبه ومجوزه


المخطوبه(جايه بعد مكالمه مع خطيبها): اووووووف الرجاله دول عالم خنيقه بجد

البنت: ليه بس ؟ عملك ايه؟

المخطوبه: تأخير بره البيت عن الساعه 10 ونص ممنوع اروح سينما مع صحباتي ممنوع زمايل اولاد اكلمهم في حاجه في الشغل ممنوع كله ممنوعات وانا مش متعوده على الخنقه دي بصراحه

المجوزه: يابنتي عامل نفسه بقى راجل عليكي ولسه بيغير وكده حركات مخطوبين يعني

البنت: ياه احلى حاجه الغيره دي ماعرفش خنكاقي ليه ده انا نفسي احب واتحب ويغير عليا

المخطوبه: يا اختشي كنت فاكره الخطوبه دي هتكون اسعد الاوقات لكن الي يقول كده يبقى غلطان لان برضو فيها مشاكل انا كنت مالي ياربي بس ومال الجواز وقرفه ماكنت بحريتي ملكه نفسي اعمل الي عايزاه ومدلعه اخر دلع

المجوزه: ومال لما تجوزي هتقولي ايه ؟ مسؤوليه بقى وعيال وبس يابت وبس ياواد وهو ولا هنا فالح بس يقولي سكتي العيال تقولش عيالي لوحدي والله مافيش احلى من ايام زمان فين دلع البيت اصحى براحتي وانام براحتي مافيش زن ولا مسؤوليه يارب يوم بس من ايام زمان

البنت: انتم عقدتوني يعني افضل ما اجوزش خالص ولا اعمل ايه؟ انا كنت بحلم احلام كتير في الخطوبه والجواز انتم مدمرين كل الاحلام

المخطوبه: بصي يا حبيبتي الجواز شر لابد منه يعني لازم نجوز ونعمل بيت وعيله سنه الحياه بقى بس يعني نصيحه بلاش تعيشي نفسك الوهم وتعدي تحلمي كتير لان في الواقع مافيش الاحلام الوردي دي قوي

المجوزه: اهي زي ما قالتك كده ماهو لو كنا بنتناسل ذاتيا ماكوناش احتاجنا نجوز هي بس الامومه احلى مافي الجواز

ال3 في صوت واحد هههههههههههههههههههه

المخطوبه : عندك حق والله بس نفسي ومنى عيني خطيبي يبطل خنقته عليا دي انا مش متعوده على كده

المجوزه: وانا نفسي جوزي يحس اني بجد بتعب ويتمل معايا التعب ده

البنت: وانا نفسي........ هههههههههههه هو انتم خليتوا نفسي في حاجه بعد كلامكم ده عقدتوني هههههههههههه
لا المجوزه مرتاحه ولا المخطوبه ولا الي لسه
-------------------------------------------------------------

كل واحده منهم عندها مشاكلها ياترى ايه رايكم في مشاكلهم وتتحل ازاى وافتكر الامثال دي موجوده كتير

هناك 32 تعليقًا:

MǿиY El-Shreef يقول...

والله الموضوع ده بقى يحصل مع حتى الي مش مخطوبين

اي اتنين مرتبطيييين بعلاقه تلاقي الراجل عامل نفسه فيها بقى البيه سي السيد ويفرض تحكماته وكده

مع ان مش من حقه حتى لو خطيبها يعمل كده

انا عن نفسي بحب الغيره اه بس مش التحكم الزايد والغاء شخصيتي انا

بجد حاجه تحير والله

ربنا ييسر بقى :D

mwaaah

MaNoOoSh يقول...

تصدقى فعلا ان محدش فيهم مرتاح

علشان كده الواحد بيقول ان التفاهم بين الراجل والست هو اهم حاجة

علشان اى مشاكل يقدروا يعدوها ويحتوا بعض

أبو كريم يقول...

فعلا الكلام ده بيتقال مش بس من النساء بل ايضا من الرجال المتزوجون والخاطبون والعذاب لكن يا سيدتى لقد خلق الله الرجل للكد والتعب والسعى على الرزق لذلك قد يطيق العمل فى أكثر من وظيفه ولا يطيق الجلوس فى دوشه الأولاد لنصف ساعه ولذلك قال الله (فقلنا يا أدم إن هذا عدو لك ولزوجك فلا يخرجنكما من الجنة فتشقى )نلاحظ أن الخطاب موجه لأدم وحواء ولكن وجه الله الخطاب لأدم وحده فى الشقاء لان عزه المرأه فى وقارها فى بيتها ( وقرن فى بيوتكن)والمرأه هى التى تتحكم فى بيتها بمعنى ان الرجل رجل حتى عتبه باب بيته وكل المتزوجين يعرفون ذلك (لو حبها فى يوم من الأيام) لانه لو ذهب الحب تبقى الموده والرحمه.. فقد يكون الزواج شرا لابد منه ولكن عسى أن تكرهوا شيئا ويجعل الله فيه خيرا كثيرا


تقبلى تعليقى المتواضع

hasona يقول...

السلام عليكم

الحياة متنوعة ( بعضها مشاكل وبعضها حلول لهذه المشاكل) بعضها حلو وبعضها مر

هكذا تجري الحياة
لكن المشكلة ان لكل منا رؤية مستقلة ومختلفة حتي لو في موقف واحد
ستجدي من تحب انه يغير عليها وأخري لأ
ومن تحب أن يتركها علي كيفها واخري تعتبرها مش رجولة
وأخري تريده خشن معها وأخري تريده يدلعها
وهكذا

و كما قيل- لولا اختلاف الاذواق000000

التفاهم مطلوب بين الزوجين وهما يسعون الي وضع أسس هذا التفاهم في مرحلة الخطوبة

ليصلا الي قمة التفاهم والتناغم ليكونا أسرة سعيدة

adel يقول...

هو اولا في فرق بين الهبل و الغيرة
الغيرة اني اخاف عليها و احبها تكون ليا لوحدي
لكن مش ااقواها متكلميش مثلا اقريبك الولاد ولا زمايلك في الشغل عشان رجالة
دي مش غيرة ده هبل رسمي

وبعدين خروجاتها مع صخابتها لو هو واثق فيها و في دماغها و في انها تعرف تتصرف خلاص

اما المتجوزة دي مشكلتها هي و جوزها لو في تفاهم و احساس من الطرفين الموضوع هيمشي حلو

د.خالدأمين يقول...

افتكر المخطوبه مش بتبقي كدا


انا شوفت بنات مخطوبه الشباب اللي خاطبينهم مطلعين عينهم وبلمحج دايما نظره الفرح في عيون البنات



يمكن ده اللي بيسموه العذاب اللذيذ

✿مَرْسَى الحُب✿ يقول...

فعلاااااااا حوار حقيقي جدااااا
ومحدش عاجبه حاله

أتكلم بالنسبه لنقطة الغيره في فترة الخطوبه فياليت الشباب يخفوا الموضوع شويه لأن بجد بتوصل لحاله من الخنقه لازم يعملوا مساحة حرية وبدون فروض
يعني كل واحد يوصل إللي بيضايقه بصوره كويسه بس بلاش فرضيات وأوامر ويقولها براحتك يا حبيبتي وهو مخبي حبل مشنقه ورا ظهره

بالنسبه لبعد الزواج فكفايه على كل واحد همومه الزوجه همها البيت وتلحق تقوم بكل واجباتها بدون تقصير من طبخ وتنظيف واهتمام بنفسها واهتمام بزوجها وكل ده لازم تقوم عليه بأكمل وجه وملهاش في يوم تعتذر أو تقول أنا تعبانه يا ترى ده في شرع مين !! هي مش إنسانه ولا ايه ؟؟
وهو يقول أنا بشتغل زي ال ..... عشان مين ما هو عشانكم وعشان أجيبلكم مم ونااااسي خالص إن له واجبات أخرى غير البنك إللي هو بيجمع فيه عشان يكفي مصاريف البيت ..
وكفايه عليه يرجع من الشغل زي القتيل ويترمي على السرير وخلاص على كده أدى مهماته ..

البنت بقى أو الولد قبل الارتباط سواء بخطوبه أو زواج بيشوفوا كل حاجه بوجه خيالي فشايفين كل حاجه وردي وراسمين لوحه جميله قوي للحياة بعد الارتباط وبعد كده هووووب تيجي الصدمه لما يتحطوا في الواقع ويلاقوا نفسهم مش قادرين يحققوا أي حاجه من الأحلام إللي كانوا بيحلموها ويخططوها سوا إلا لو كانت أحلامهم مبنيه على واقع ففي الحاله دي بإذن الله مفيش صدمات كبيره ..


معذرة على الرغي :)

غير معرف يقول...

آه و الله محدش عجبه حاله

مش عارفة الواحد يعمل إيه عشان يبقى راضى عن الوضع اللى هو فيه..بس اى حاجة فيها الحلو و فيها الوحش بس دايما الناس بتبص للجانب المظلم و بتبقى واقفة محلك سر و عماله تندب حظها...الواحد بأيده و بتفكيره يقدر يخلى حياته جحيم أو يخليها جنه بس فيها مشاكل لابد منها

عاشقه الرومانسيه يقول...

فعلا محدش عاجبه حاله

البنت بكامل حريتها
والمفروض تكمل على كده
ولا جواز ولا وجع قلب

المخطوبه انا عذراها لانها بتتكلم بلسانى

المتجوزه دى بقى الله يرحمها كانت طيبه
اه ما هو الجواز بمسئوليته موت


والله انا ما عارفه هتجوز ازاى؟
(:

طول عمرى باشوف الجواز سجن
لكن القلب لما يدق
محدش يقدر يقف قدامه


سنة الحياه يااوختشى

اخر يوم فالجنه يقول...

فعلا محدش عاجبه حاله خالص

بس لما حد تكون تجربته مش ناجحه او فيها مشاكل غلط انه يعرضها على حد لسه داخل فتجربه

كل تجربه مختلفه عن التانيه وكل شخص وله شخصيته

بس اللى لازم كلنا نعرفه ان محدش مننا ملاك
والمفروض لو فى عيب شايفه فاللى انا ارتبط بيه انى ابص لمميزاته قدام العيب ده

ده فى حاله لو انا عايز اكمل مع الشخص ده
......................... حوده

ريمان يقول...

بصى يا قمر


محدش مرتاح خااااااالص


هههههههههههههه


هى دى الحياه

سبحان الله

AHMED SAMIR يقول...

كل واحد له مشاكله اللي بيتوقع انها اكبر مشكلة في الحياة
اللي مش مخطوبة بتبقى نفسها تتخطب علشان تهيش اللحظة و اغاني الحب و الرومانسية و كلام الافلام دة
و لما تتخطب بتفاجأ ان الحياة مش كدة و ان خطيبها مش رومانسي و ان كلمات الاغاني مكانها الوحيد هو التليفزيون و السينما
و بتبقى عايزة تتجوز بقى و تدخل دنيا
و لما بتتجوز بتفاجأ بالمأساة الكبرى و هموم الحياة و مسئولياتها الجسيمة و الماديات و الذي منه
و بتقول ياريتني....ياريتني عمري ما حبيت

أحــوال الهـوي يقول...

تعب كلها الحياة

و العقاد قال
صغير ود لو كبر كبير ود لو صغر
و خال يشهي عملا و ذي عمل به ضجر

يعني ما فيش حد مبسوط باللي فيه

تحياتي

عمرو يقول...

تقريبا و مع اٍختلافات بسيطه نفس الكلام ده برضو بيدور بين الرجال المخطوبين و المتجوزين و اللى لسه لا كده و لا كده ..
هو زى ما أنتى قلتى هى سنة الحياه و حتفضل برضو المشكلات الصغيره دى بين كل أتنين بغض النظر عن شكل العلاقه بينهم و طبيعتها ..
بس المهم المشكلات دى ما تجرش وراها خلافات كبيره تؤثر و لو بشكل ما على الطرفين .. و بالحب و التفاهم و الهدوء كل الخلافات بتنحل و بتبقى الأمور طبيعيه و معتاده ..
نسأل الله الهدايه لكل couple و السعاده و الرضا ..
أهم شىء الرضا ..
تقبلى تحياتى و تقديرى ..

شيماء جمال(شيمو القمر) يقول...

انت عارفة ليه بيحصل كل ده

علشان مفيش حد عاجبه حاله
ولو واحده خطيبها عادى ومديها حريتها تفتكر انه مش بيحبها

احنا كده بنى البشر ما بيعجبناش العجب ومفيش حاجة بترضينا

احييه على الحوار اللذيذ ده

تحياتى لك
شيمو القمر

Ahmed يقول...

الحقيقه اكتر حاجه الواحد بيتعقد منها النوع ده من الكلام

وعلى فكره هوا موجود رجاله بأه ولا ستات مبتفرقش
نفس الكلام هوا هوا

النوع ده من الكلام محاوله لتصدير مشاكل فشل الطرفين في حلها
وعشان فشلهم بيصدروا المشاكل ديه عشان يوهموا الناس انها مشاكل عامه وفي كل مكان

ربنا يهدي كل المخطوبين والمتجوزين ويبعدهم عن الناس ديه ويكون صوتهم من عقولهم وقلوبهم

كيكى عوووووو يقول...

والله مش ليه حل!!!!
دوام الحال من المحال

بسنت صلاح الدين يقول...

مفيش حد مرتاح بس حقيقى شباب كتير خاطبين بيزودوها اوى فعلا لدرجه الخنقه، بس ده كله بعد الجواز بيتلاشى هههههه و تلاقيه يقولها روحى ماطرح ماتروحى،هى البنات صحيح بتحب الراجل الغيور بس مش لدرجه انه يخنقها و يحبسها

صوت من مصر يقول...

محدش عاجبه حاله

غير معرف يقول...

عارفه المشكله بجد في ايه

ان كل واحد مش عاجبه حاله

ستيتة يقول...

فيه بنت لما تسمع خنقة المخطوبة تنبسط وتتمنى تتخنق

اعرف واحدة شبه فاروق جعفر طول اليوم بتكلمك عن غيرة جوزها

تقريبا دي امنية مدفونة في العقل الباطن

الستات يا عزيزتي اجتهد الفلاسفة في فهمهن
فمات الفلاسفة وبقينا نحن بنات حواء بنفس غموضنا
ادامها الله علينا نعمة

زهور الامل يقول...

هههههههههههه عقدتيني يا حاسوبتية بالناس دي
بس فعلا محدش مرتاح لكن كل واحدة ليها نسبة
واكتر واحدة مرتاحة فيهم البنت
لا مشاكل ولا مسئوليات ولا عيال ولا راجل رخم يكرهها في عيشتها ولا حما مقرفة ولا اي حاجة
اه ممكن يكون اخواتها غلسين بس شوية لكن ارحم كتير من الارتباط وعيلة خطيبها او جوزها
عقبالك يا ستي لما تتجوزي وتتهني بس يكون واحد مقطوع من شجرة وطيب وامير والقطة بتاكل عشاه

تحياتي

غير معرف يقول...

انا داخلة اسلم واطمن عليكى
وعلى صحة اختك وحال مامتك
وعلى احوالك واقولك
انتى مخاصمنى ولا ايه
يارب اطمن عليكى بالف خير
وفعلا محدش عاجبه حاله
تحياتى

*** حور- نور*** يقول...

يابنتى مفيش احلى من الخنقه دى بتبقى حلوة اوى لو الطرف التانى بيحب بجد مش بيفرض سيطرته وبس احلى حاجه فى الدنيا الحب
تحياتى
صحافيه حرة

Kiara يقول...

عارفه لو المخطوبة مش خنق عليها وكدا هتقعد تقول هو مش بيسال ليه اه مش بيغير اه مش بيحيني ولو سال اه دا هيخنق عليا المهم ان كل حد منهم مش عاجبه حاله ربنا يرزقهم الرضااااااااااا

Unknown يقول...

والله الكلام ده بيحصل
بس خلي واحد أو واحدة متجوزة كده يغيب عنها جوزها أو مرالته
تلاقيه حيتعبط
فطرة وسنة زي ما قلتي

ويبقى التواصل

شريكة في المطعم يقول...

مفيش حد مرتاح ولا عاجبه حاله
بس محدش بيقدر النعمة الي هو فيها..غير لما تروح
يعني لو خطيبها سابها برده هتزعل ..
بس عامة في الخطوبة لازم يخنق عليها شوية ويحسسها بأهميته وانه راجل وله كلمته
اما المجوزة مهي دي سنة الحياة ..هنعمل ايه..لازم نتحمل المسئوولية

بوست جميل وحوار أجمل

كراكيب يقول...

يا ماشاء اللـــــــه
محدش عاجبه حااااااااااله
اهو احنا كدة علطول مش عاجبنا حالنا
بدون حلول ولا كلام من ده
هي دي الحياة وكل واحدة غصب عن عينيها بتتأقلم وتتعايش مع ظروفها

حاسوباتية... ازيك انتي بقى؟؟؟

miro el niro kwaniro

صوت فيروز يقول...

حاسوباتيه..... انا شايفه ان كل فترة لها طعم و لها مذاق حتي و لو كان فيه بعض المراره او حتي لو كان اغلبه مراره اكيد هيكون فيه فرحه و طعم ...الام ساعة الولاده بتحس باصعب ألم في الدنيا تفتكري هي قبل ما تيجي تخلف او تفكر في الموضوع ده ...ماكنتش تعرف ان فيه الم ..اكيد تعرف بس الفرحه اكبر...سعات في حاجات بتموت عشان حاجات تانيه تتولد ...يعني تموت فرحه من نوع و تيجي فرحه من نوع تاني ...مش كده و لا اييييييييه

مامة مازن يقول...

هو التفاهم المفتاح لكل الكلام ده
الخطوبة احلى ايام حتى مشاكلها دلع اما الجواز حياة وشركة لازم تنجح ولازم نحاول ونحاول علشان تنجح فالصبر والتفاهم هماللى بيحلوا الحياة الجواز مش مجرد وسيلة علشان نخلف وبقى عندنا عيال لا الجواز حب والفة وعشرة وانك تلاقى حد جمبك يحن عليكى لما تكبرى وتحنى عليه لما يكبر الجواز حب ومودة ورحمة

Eno يقول...

هههههههههههههههههههههههه

فكرتيني بوحده صحبتي متجوزه من يوم ماتجوزت وهي عماله تقولي خليكي زي ماانتي ولسه جايبه بيبي من اسبوع كل لما اتصل اطمن عليها وعلي النونو تقولي اوعي تكملي خليكي مكتوب كتابك كده لحد المرحله اللي انتي فيها كويس عيشي حياتك بلا جواز بلا وجع قلب
ههههههههههههههههه
اخر مره قولتلها حرام عليكي عقدتيني من حياتي يابنتي ادعيلي ربنا يكملي علي خير
موضوع حلو اوي :)

*البت المشمشية *حلوة بس شقية * يقول...

اهم حاجة الحب والتفاهم
ممكن يحل مشاكل كتير