11‏/8‏/2009

فضفضه


تعبت قوي تعبت من حاجات كتير
تعبت من انها لازم هي الي تستحمل
لازم تضغط على اعصابها
تعبت من سماع كلمات معلش واستحملي واصبري
تعبت من انها دايما لازم تتحمل وتصبر
نفسها مره هو يتحملها
نفسها مره تنفجر وتصرخ وهو يطبطب عليها ويهديها مش يزود احزانها
اه هو فعلا واقع في مصيبه كبيره مابتحصلش الا واحد في المليون
بس هي تعبت جايت اخرها بجد
بتحاول ترضيه بكل الطرق
لكن اغلب محاولتها بتفشل
حتى حاولت ترجعله ابتسامته لكن برضو فشلت
اتغير قوي قوي
بقى قاسي حتى عليها وعلى كل الي حواليه
ماكانش كده ابدا
مش هو ده الي اخترته
مش هو ده الي حلمت بيه
هي قسوه الزمن والظروف بتغير قوي كده؟
قالولها كتير اصبري بكره هيكون احسن
لكنها بتصحى كل يوم على الامل ده وتلاقي ان انهارده اسؤ من امبارح
لما بتمشي في الشارع وتشوف اي اتنين بيحبوا بعض بتكون مبسوطه خالص علشانهم
شكلهم بيبان عليهم عيونهم مليانه امل وفرحه
لكن هي نسيت كل ده معاه
بقوا بعاد قوي قوي عن بعض
مابقاش هو الحلم الي حلمته
علشانه جزأت حلمها ده لاجزاء كتير
وتنازلت عن اجزاء كتير فيه وقالت معلش
لكنه للاسف وصل لاجزاء مش هتعرف تتنازل عنها اكتر
هي مقدره كل الظروف
لكن هي بشر انسانه ليها قدره تتحمل بيها
حتى دموعها الي كان بينهار قدامها
ماعادتش بتهمه
بقى بينهم سد كبير
وهي قررت يا يشيل هو السد ده او على الاقل يحاول
يا يفضل موجود لغايه لما تكون ماتقدرش تشوفه تاني
وساعتها هي هتمشي في طريق تاني من غيره

هناك 43 تعليقًا:

صوت من مصر يقول...

ممكن اسميها هلوسه

احساس طفلة محبة للرومانسية بس واقعية يقول...

ممكن اسميها لحظة احباط وحزن جامدة مغطية كل العالم الجميل اللى هى بتحبة واللى اعتقد لسة موجود بس هى قسوة الحياة السبب وهى اكيد فترة هتعدى مادامت ظروف بس قدرتها على رؤية ما بعد وان كان سئ او لا وقدرتها على الصبر بالطبع هم المقياس بس المهم متكونش لحظات احباط بتأخد فيها قرارات مبنية على نفاذ صبر يترتب عليها اشياء تندم عليها فى المستقبل

تقبلى مرورى

ستيتة يقول...

فيه نقطتين مهمين في القصة

اولا لو قلبهما او قلب احدهما قسي من قسوة الظروف وهم لسه ع البر فده مؤشر بيقول شيء والإنسان ساعتها مش مضطر يستنى نهاية يكون مات فيها الإحترام مع الحب

النقطة التانية كل بني ادم فينا ليه نقطة صبر وميقدرش يقلد الناس التانية لمجرد ان حد يقول انه صبور وكل واحد فينا له متطلبات معينة تعتبر عنده نقطة حمراء غير مسموح المساس بيها وده برضه بنختلف فيه من بني ادم للتاني ومش مطلوب من حد يقلد حد علشان يتقال عليه متحمل او ياخد الكاس الذهبي للصبر والتحمل

هي اولويات في الحياة فيها فروق زي ما احنا كبني ادمين بينا فروق

وبسسسسسسسسسسسسسس
معرفش اقول شيء تاني في القصة الواردة دي

تحياتي

الـسـيـدة نـون يقول...

معرفش

مش عارفة اقول راي

مقدرش اقولها تستحمل ايه وماتستحملش ايه

هى ادرى بالى هتقدر انها تشيله

لو الحمولة تقيلة عليها بلاش تكسر ضهرها ونفسها

هى محتاجة ضهرها للايام الجاية

لو الحمولة تقيلة بس محتاجة شوية عزم منها
هاقولها ترتاح شوية وتاخد نفس كبير وتشيل حمولتها
لكن لازم تبقى عارفة هى هتسيب الحمولة امتى
لان ماينفعش الواحد يفضل شايل حمولة تقيلة على ضهره طول العمر
مسيره يوم يحطها على الارض ويرتاح شوية


ربنا يريح بالها ويسعدها
هى كمان محتاجة انها تفرح


سلام
اختك خيخة

Soma يقول...

انا مش هقولك انها تستحمل وتدوس علي نفسها اكتر
بس سؤال
هو اللي بيمر بيه ده يستاهل فعلا انه يقسي علي اقرب الناس ليه؟
يستاهل انه يحمل الانسانه اللي المفروض يعززها ويحميها فوق طاقنها؟
يستاهل انه يتغير ويضيع الحب من قلبه ومن عينيه؟
لو راجل بجد ليه مش قد المسؤليه؟؟؟
لو كان قدها كان اصلا مخلاهاش تحس باي تغيير

نصيحتي ليها:
صلي استخاره وقيمي علاقتك كلها وشوفي الوحش اكتر ولا الحلو وخدي قرار ونفذيه بدون لحظه ندم

اللهم اختر لها ولا تخيرها

adel يقول...

بصي خليها تستني شوية صغيرة قوي قوي
لو فضل كده
تقوله سلاااااااام
تمشي و هي جواه شوية حب بدل ما يخليها تكره
ولا ايه ؟؟؟

AHMED SAMIR يقول...

لو هي حاسة بيه بجد كانت عذرته
كانت عرفت ان سبب حزنه و تغيره هو ان المصائب دي هتؤثر عليها هي كمان مش هو بس
كانت عرفت ان سبب اكتئابه و تغيره هو حبه لها و ليس العكس
هل المطلوب منه ان يرسم الوجه البلاستيكي المبتسم بدون اي سبب؟
لازم نحس ببعض اكتر من كدة

romansy يقول...

يه الحكايه بس
هقدر اقولك ان ظروف الحياه بقت صعبه قوى
واكيد الانسان دا بيحب قوى قوى ومش عاوز يعيش حبيبته فى غر المستوى اللى وعدها بيه
علشان كده دايما مشغول وسرحان وبيفكر ازاى هيقدر

فاتيما يقول...

حسوبتى
بصى عاجبنى جدا التعليقات
لأن فيها من النقيض للنقيض
و فيها كمان الوسط و دا أنا شخصيا أرجحه
يعنى قوليلها متقساش على روحها قوى لأنها هتنفجر ف الآخر و ضهرها ينقطم زى ما بتقول خيخة
و كمان قوليلها تعذره شوية كمان يمكن يفوق و يحس باللى هيضيع من إيده لو مغيرش حاله لأفضل من كدازى ما قال الواد عادل إبنى
اما تعليق أحمد سمير العزيز
فوجعلى قلبى .. و عاوزة أقوله
يا احمد محدش بيوصل للدرجة دى من الألم إلا بعد زمن من السكوت و الصبر و تجاهل الآخر له و انانيته و ثقته ف إنك مش رايح ف حتة إنتا قاعد و خلاص خدت على كدا ...
و فيه نقطة فعلا زى ما بتقول ستيتة لا يصح المساس بيها ومش تكّبر و لا تعنت
لأ ..دا خط احمر عشان العلاقة تكون صحية ...
ربنا يكتب لبطلة تدوينتك كل الخير
سلامى و خالص ودى

أحــوال الهـوي يقول...

من بدا طريق فعليه ان يكمله و من اعتاد العطاء فلا يقتر او ييبخل

عليهاان تستمر بالعطاء و الايثار فهو من احبت و من كان مثالا لمنتهي الحب حتي اصابه طارئ فخبي

سوف ياتي اليوم الذي تتضح فيه رؤيته و يفطن ان من اغدق عليه اكاسير الحياة و امن به هي


قولي لها الا تستسلمي

ملحوظه :عفوا اذا تحدثت بصيغة انك صاحبة القصه

مامة مازن يقول...

الباشمهندسة الرقيقة
قصتك بتتكرر كل يوم من المفترض من حواء دايما انها تستحمل والا مش هتبقى بنت ناس زى ما بيقولوا
ماشى استحمل واستحمل واستحمل لكن علشان اقدر استحمل لازم احس بان اللى بستحمل علشانه مقدرنى انه شارينى مش بايعنى يعنى اوصله انى معاك هون على نفسك هستحمل علشانك انا مش عايزة غيرك وووووو لكن لما ما احسش انه هوكمان شايلنى فى عنيه ومقدر تحملى وبيقوينى مش بيحبطنى اكتر يبقى سورى يعنى هى محتاجة تراجع نفسها بجد لان فى مقومات كتير قوى علشان الحب ينجح ويستمر هى ممكن تفضل صابرة وتقول يمكن بعد ما نتجوز تهدا نفسيته ويرتاح ويطمن طب وبعدين ولو محصلش كده
هى لازم تحط النقط ع الحروف من دلوقتى لازم تعرف راسها من رجليها بالبلدى كده عايزها بجد واللا بهدله والسلام
معلش
اقولك قوليلها لازم تتكلم معاه من غير احراج او كسوف لازم دى حياة مش لعبة.

لكى مودتى واحترامى اختى

طوبه فضه وطوبه دهب يقول...

3ayza aolk ank msety gwa gwa alby bs aolk 7aga zrofna de el shma3a el bn3la 3leha mot agmal l7zat 7yatna odam 3nena wa7na wafen ntfrg bnmot kol yom wbrdo ytal zrof la ba el zrof de a7na el khlana el zrof wsbnaha kbrt l7d mbat 7wagz

بعبعه يقول...
أزال المؤلف هذا التعليق.
بعبعه يقول...

لازم البنى ادم يقف مع نفسه الوقفه دي

ويحدد هو يقدر يستحمل ايه وما يقدرش يستحمل ايه

هى ممكن تيجى على نفسها مثلا وتستحمله وتصبر والحاجز الى بينهم يكبر وتبقى حياتهم سوده تماما وفى الحاله دي هى لا هاتبقى اسعدته ولا اسعدت نفسها

وممكن تستحمله وتصبر وهو ظروفه تتحسن فيتغير


وعموما انا عندي راي قاسي شويه على صاحب الظروف دي

هو ان صاحب الظروف لما بيلاقي كل الناس بتراعي ظروفه بيستهبل فيها ويسوق فيها

زي بالظبط الطفل الصغير لما يكون مريض ويلاحظ اهتمام امه الزايد به فيسوق فيها ويستهبل اكتر واكتر واكتر

وفى هذه الحاله بيكون الطفل الصغير لازمله تلويح بالعين الحمرا من بعيد عشان يعود الى ادراجه وما يستهبلش


لكن برضه ارجع واقول الناس كلها هاتقولها اصبري واستحملي

لكن كام واحد فيهم يقدر يصبر ويستحمل لو كان مكانها

ولو قدر واحد هى مش مطالبه تقدر زيه

هى بس الي تحدد هي عايزه ايه


سوري على انى طولت يا جميل

القدر و انا يقول...

\حاسبوتية
وحشانى جدا
الحقيقة انا حانصحك بحاجتين قبل القرار
اولا تفكرى هل رصيد هذا الانسان كبير من حب وتضحية وعطاء سابق والا لا
ثانيا ما يمر به من صعوبات ماذا تشعرين لو كنت مكانه وما مدى تحملك للالم الذى يحسه الان ..
وفى النهاية لا تضر المحاولة مرة اخرى واشعاره برفق ان البشر لهم طاقة محددة ولا يقدر على كل شئ الا الله سبحانه
وفقك الله دائما وطمنينا عليك

موناليزا يقول...

انا معاكِ ن كل انسان وله قدرة وطاقة على التحمل
بس هى قالت ان عنده ظروف صعية ما بتحصلش لحد غير فى ظروف نادرة جدا
يعنى هو كمان حالته النفسية واضح جدا انها مش تمام
فماينفعش انها تسيبه فى محنته دى لو كانت لسه بتحبه بجد
الحب عطاء وتضحية والمواقف الصعبة هى اللى بتوضح حقيقة المشاعر
لو بتحبه بجد هتستحمل ولو الحب عادى هتحسم موقفها وتختار البعد

Foxology يقول...

الصبر طيب واللى يصبر ينول

ماضاقت الا ما فرجت ان شاء الله

فرجه قريب وادعى ربنا انه يفرجها ويزيح الهم والكرب :)

تحياتى :)

Kiara يقول...

كلما ضاقت حلقاتها فرجت اصبري لان واضح انه في ازمه

سمكه واحده يقول...

اولا اذيك يا حاسو باتيه
وكل سنه وانتي طيبه
نيجي بقي للفضفضه
ناس كتير جدا قالو رئيهم وفي زي ما فتيما قالت من النقيض للنقيض وكل انسان بيقول حسب شخصيته وانه يحط نفسه مكان صاحب المشكله لو سمناها يعني مشكله
انا عن نفسي بقلك اولا تقيم العلاقه وتشوف الحلو والوحش انهي اكتر كمان تصلي استخاره وتقعد مع نفسها فتره مش كتير ولو لقت تقدر تستحمل ربنا معاها
لو لقت خلاص وهي علي البر
مع الف سلامه
ليه يعني الدنيا مش مستهله وهم وغم وارف وكئابه وعياط وديما حزن علي ايه هو احنا هنعيش اد ايه نتعامل مع بعض كويس وبما يرضي الله
ونعيش علي اد ما نقدر في هدوء نفسي وشويه منها وشويه منه يستحملوا بعض يعني الامر وصل ان محدش قادر يستحمل خلاص بعد كده مش هينفع لكن بردو تفكر كويس جدا لانها اكتر واحده تقدر تقيم نفسها وعلاقتها وايه تقدر تعمله وعارفه الطروف كويس وبردو تستخير وتستشير
نصيحه عن قرب مفيش حاجه اسمها استحمل ومستحملش والكلام ده لان بعد الجواز بتبقي حاجه مش تمام علي البر افضل شوفت ادامي كتير اتجوزوا ومش طيقين بعض والحياه فاتره وحياه كئيبه متستناش لحد ما توصل للحد ده
وربنا معاه ويعملها اللي فيه الخير
الفتره الجايه تقرب من ربنا اوي وتطلب منه هو ده ملناش غيره وان شاء الله ربنا يصلح الاحوال
تحياتي

أميرة علي كوكب مهجور يقول...

البوست ده فكرني بحاجة دايما بسألها احنا ليه بنقسي ع بعض و احنا في اشد الظروف مع اننا المفروض نكون محتاجين بعض نسند بعض مش نفسي ع بعش و نسيب بعض وليه لازم حد في الطرفين كل مهمته انه بستحمل و يضحي مع انه هيفرح اوي لو حبيبه اتسند عليه شيله همه معاه ومش قسي عليه بسأل نفسي احنا ليه كل حاجة حلوة بنضيعها مننا...بوست بجد جميل

الشاعر الحزين يقول...

الواضح من كلامك ان الأزمه اللى هو فيها كبيره قوى حتى هو مش قادر يتحملها

أنا مش هقولها زى كل الناس اصبرى واستحملى لأنى عارف انها خلاص وصلت لمرحلة انها مبقاش فيها طاقه للصبر

لكن هقولها تقيس مقدار الحب اللى بينهم على مقدار الشد العصبى اللى عنده بسبب الأزمه اللى هو فيها

فى الحاله دى هتقدر تقرر بالظبط ايه اللى هيحصل

أتمنى لها من كل قلبى الوصول الى القرار السليم الذى تبنى عليه بعد ذلك السعاده المطلقه وأتمنى أن تنتهى أزمته على خير وفى أسرع وقت

لكى منى كل التحيه

زهور الامل يقول...

بصراحة الواحد مش عارف يقول ايه
بس اللي انا شايفاه انه مادام زوجها مخنوق اوي كدة يبقى اللي مضايقه شيء جامد جدا ولازم تقف جمبه للنهاية
لان الواحدة اللي عندها اصل هي اللي تقف مع جوزها لاخر لحظة حتى لو عاملها باسلوب مش كويس لان يمكن ده يكون غصب عنها
وده دورها بجد انها تتحمله في اسوا لحظات حياته

ربنا يهدي سرهم ويعديهم من الازمة دي على خير

تحياتي

Ahmed يقول...

الحب شعور جميل بين شخصين, لما بيروح بننجرح جامد جدا
ياريت نعرف قيمته ونحافظ عليه, لاننها لو عرفنا ألم جرحه, هنتمنى اننا مكناش فرطنا فيه

الحب مفيهوش واحد غلطان وواحد معاه حق
الحب لازم يكون بين اتنين والأتنين يكون بينهم الصراحه, لما في حاجه تدايقني اصارح بيها اللي قدامي, مش اشيل في نفسي وابني جبال جوايا معرفش اخلص منها ابدا لغاية متتهد عليا انا واندفن تحتها

تعبت من الألم, وتعبت من التحمل لانها تدي كتير بس بتستنى منه المقابل, بتسنى منه انه يديها اكتر (مش عيب ولا غلط) بس لو مدهاش لازم تاحفظ على حبها وتصارحه وبعد كده تحدد طريقها

soulmate يقول...

معادش او اصلاالحياه مش كلها حب وبالنسبه للظروف فهيا اكيد حتضغط عليهم هما الاتنين ولازم تستحمل ولو لفتره لان اكيد لو جمعهم بيت واحد حيكون فى ضغط عصبى اكتر من كده لازم تاخد بالها ان الحياه مش كلها وردى مع ان كل البنات عايزين كده ومش كل اتنين ماشيين فى الشارع بينهم قصة حب وباين فى عيونهم معنى كده انهم حيفضلوا كده طول حياتهم فى حاجه برده اسمها الحب المغشوش بس الحب الحقيقى الى بيمر باوقات عصيبه كتير وبيفضل صامد طالما الاتنين متفقين من البدايه اعتقد انها لازم تقف جنب البنى ادم الى اختارته طالما هيا شافته من الاول مناسب ليها ومش اتغير الا مع الظروف يبقى غصب عنه

Unknown يقول...

فضفضة
وهى فضفضة
ومحدش حيقولك
الا استحملى لكن
انت الخصم والحكم
وانتِ اللى
حتقررى
ايه اللى تعمليه؟

Eno يقول...

للاسف فاهمه كل كلمه واحسه بيها :(

الله يعينها ويقويها علي اللي هي فيه
ويارب يرشدها الطريق الصح والتفكير الصح
يارب يرزقها الخير كله يارب هي انسانه كويسه وبجد تستاهل الخير :(

تحياتي

زهرة الحب يقول...

والله انا من رأى انها تستحمله كمان شويه يعنى هى استحملته كتير مش هتيجى على الاخر لحظه وتسيبه



ممكن تشرفينى فى مدونتى المتواضعه

بسنت صلاح الدين يقول...

هى دى الحياه و هى دى العلاقه بين الراجل و الست دائما وابدا،واضح انها شايله كتير بس اكيد هو كمان شايل لو نحس ببعض شويه و نمسك جامد فى ايدين بعض عشان نعدى الفتره الشديده دى يبقى هو ده الحب اللى يقف قصاد عواصف الحياه

مهرة سالم يقول...

السلام عليكم ....
كثر من يمرون بهذه الحاله إحباط هم تغير أو مهمى كان المسمى ...
بالنهايه كلووووو بيعدي ...
وأتمنى بإذن الله أن يكون للأفضل ...
......
في أمان الله

الشعب لابد له من حكومه تشكمه يقول...

كلاكيت تانى مره!!!!!!
اصلى اعرف قصه نفس القصه دى بالظبط ونفس الاحداث بالظظظظبط...فى راى المتواضع محدش يقدر يدى نصيحه خاالص لان محدش بيحس بالنار غير اللى ماسكها..بس عموما من القصه اللى اعرفها اقدر اتنبا هتخلص على ايه الحكايه دى...
ربنا يعين واللى فيه الخير يقدمه يارب

غير معرف يقول...

تستحملة وخلاص هو دة قدرها
وعموما كل الرجالة كدة
فبلاش تسيبة بدل ماتكرر الماساه من الاول وتاخد مقلب جديد

عمرو يقول...

معلش سامحينى فى اللى حأقوله :
لو مش حألاقى سعادتى و هنايا و سرورى و فرحتى و بهجتى و كل المعانى الحلوه و الأحاسيس الجميله مع حبيبى و لا حبيبتى يبقى فايدته بالنسبه لى أيه ؟؟
ما هو أنا مش بأحب حد و أفضل برضو محروم من السعاده !!
و بعدين الصبر له حدود ..
حتى الست سومه بتقول للصبر حدود ..
و اٍحنا بشر و لنا طاقه للتحمل و لو تحملنا فوق ما نطيق يبقى بنظلم نفسنا و بنظلم أحبائنا كمان لأن مشاعرنا حتنقلب لمشاعر سلبيه تجاههم ..
مش مضطر أصبر صبر يفوق تحملى و فى الآخر يحدث الفراق كنتيجه حتميه لمعاملة حبيبى اللى ليست على هوايا و بعدها أرجع أندم على ما فاتنى ..
تقبلى تحياتى و تقديرى ..

mohra يقول...

فان مع العسر يسرا
ان مع العسر يسرا

ربنا معاكى

كراكيب يقول...

:S مش عارفة ليه ادايقت كدة وحاسة اني مش عايزة ارد ولا اقول رأيي ولا الكلام ده لإني انا عارفة موقفها ده كويس علشان واحدة صاحبتي كانت كدة بالظبط

وفي الاخر عرفت تاخد القرار الصح وقالتله انا همشي.. ومشيت وتعبت وادايقت وعيطت وكل حاجة بتحصل في المواقف اللي زي دي.. بس هو مكانش كدة خالص وما اتأثرش غير قليل اوي
علشان كدة فترة وعدت عليها وربنا معاها بقى ويقويها

بيسو... انتي بقى كويسة؟؟.. انا داخله ابص عليكي واسلم وارمي التماسي واقول كل سنة وانتي طيبة

miro el niro kwanirooo

سلوى يقول...

هي بتقول انه واقع فى مشكله كبيرة
أعتقد لازم تتحمل شويه
يعني ع السراء والضراء

في النهايه لا شئ يدوم
وكل شئ هيرجع زي ما كان

كل سنه وانت طيبه وبخير وصحه وسلام انت وكل الأسرة

blue-wave يقول...

ياااااااااااااااة
بجد حسيت اوى بكل كلمه من الكلام دا
ومش عارف اعلق اقول ايه

سجود يقول...

كل عام وانتم الي الله اقرب وعلي طاعته ادوم

غير معرف يقول...

انا جاية عهلشان اقولك
كل سنة وانتى طيبة ياحاسوباتية
والسنة الجاية ربنا يكتب لكى فيها كل خير
وتحققى كل ماتتمنى
تحياتى

Migo Mishmish يقول...

احنا جايين نعدى عالحلوين ونقولهم كل سنه وانتو طيبيبن رمضان كرييييييييييييم
ميجو وزوجته مشمش من البلكونه

فكرة من الزمن ده يقول...

قلبي معاكي ويصلح الاحوال
وكل سنة وانتي بالف خير
وحشتيني

mohamed يقول...

كل سنه وانت بخير وسعاده

Aиgel يقول...


السلام عليكم ورحمة الله وبركاته

كل سنة وأنتي طيبة يا حاسوباتية
وربنا يعيده عليكي يارب وعلى الأسرة الكريمة
بكل خير وصحة وسعادة

....................
ملحوظة:
إن شاء الله هكون
طول شهر رمضان في مدونتي التانية
شذى الإسلام


أختك

╗╦═════════════╦╔
█▓▒░◄(Angel Love)►░▒▓█
╝╩═════════════╩╚



غير معرف يقول...

buy ativan ativan for dogs - considered overdose ativan