11‏/5‏/2009

مشهد مقزز


طبعا كلنا عارفين فيلم (عمروسلمى) الي كان الصيف الي فات الي الحمد لله انا مادخلتوش لاني بشمئز من الكائن الي اسمه تامر ده المهم ان الفيلم اتعمل ومش مكفيهم جزء واحد لا اتحفونا بالجزء التاني منه ومن حظي السئ اني كنت بقلب في القنوات فشوفت اعلان الفيلم وبالتحديد شفت مشهد اقل مايقال عنه انه مقزز جدا

المشهد ان مي عز الدين نايمه وتامر بيقولها انتي زي الملايكه وانتي نايمه المهم هي بتصدر صوت شخير مقزز برضو يقوم هو يعمل ايه بقى واسفه على اللفظ الي هقوله يقوم هو تافف عليها

بصراحه انا اصابتني حاله من القرف فظيعه بعد ماشفت المشهد ده يعني بيعود الناس عدم الاحترام بين الازواج وان ده عادي انا بصراحه تخيلت الموقف ده نفسه حصل معايا لقيت ان رد فعلي الطبيعي على جوزي لو فكر انه يعملها بس اني بظهر ايدي وهديله قلم على وشه واروح بيت اهلي لان ساعتها هو انسان غير محترم ومش محترمني كمان ولو حتى كان بيهزر وبكل فخر هطلق

ده رايي بصراحه ياترى ايه رايكم وهل لاحظتم المشهد ده واصابكم الاشمئزاز زيي؟

هناك 54 تعليقًا:

الشعب لابد له من حكومه تشكمه يقول...

هههههههههه انا شفته بس بصراحه محصليش الاشمقلاط اللى حصلك انا ضحكت بصراحه..

وبعدين انتى زعلانه من تصرفه طب انا راضيه ذمتك ده صوت واحده تكون نايمه جمب جوزها وتعمله..!!!!!ههههههههههههههه

بس ازاى فاتكك اغنيه الفيلم الرائعه اللى بتقول(ودماغك خليها تاكلك)هههههههههه ..كانت ناقصاكى دى تسمعيها وهتنهار كل قواكى بعدها...

بسنت صلاح الدين يقول...

طبعا حاجه مش لطيفه خالص و اسلوب غير ادمى،لو اقتدى بيه الرجاله تبقى مصيبه بجلاجيل،وبعدين ايه يعنى لما الست تشخر؟،مالرجاله بيعملوا سيمفونيات طول الليل و مراتتهم ساكته، هى دى كمان فيها ست وراجل؟،عندك حق فى موضوع القلم ده او ممكن ترديهاله بنفس الطريقه، خليها تزغرد فى وشه،بس يكون من الاحسن لو نتعامل بأحترام بعيد عن الهمجيه دى،الحقيقه انا مشفتش الأعلان و كويس انى مشفتوش اصلى بقرف من الحاجات دى

MaNoOoSh يقول...

انا مش فاهمة.. هم يعنى كدة فاكرين انهم بيعملوا فيلم واقعى بيعبر عن الشباب؟؟
لا دى فعلا قلة ادب وعلى رايك شىء مقزز.

رؤية يقول...

^_^

بينى وبينك ماليش فى الافلام العربى خااالص
بس الفيلم دا على الرغم من ذيوعه الشديد
كان منتقد بشدة قوى

وكتير جدا السينما بتسوق سلوكيات خاطئة جدا تحت مسمى الضحك!!!!

ما تحرقيش دمك اهم حاجة
لانك هاتشوفى من دا كتير فى السينما العربية بصفة عامة

تحياتى لك

ريمان يقول...

السلام عليكم

انا مش شوفت المشهد

بس بصراحه زى ما قولتلى مشهد مقرف وغير لائق كمان


ما انتى عارفه افلام اليومين دول بقت افلام هابطه طبعا

وبايظه

وتافهه

وبتعلم الناس عدم الاحترام وقله الادب

وحاجات تانيه كتير

عمرو يقول...

تامر حسنى كله على بعضه هو اللى يستاهل الحركه المقززه اللى عملها
ده أصلا شاب هربان من التنجيد و أنتى عارفه طبعا اللى بيبقى هربان من التجنيد بيسموه أيه
يعنى واحد هربان من خدمة الوطن اللى هو أشرف عمل يقوم به الاٍنسان فى حياته مستنيه منه أيه ؟؟
ده مش فن ده قلة أدب

غير معرف يقول...

ما فىيه مشهد اكتر قذاذه من ده
ربنا يستر علينا بقي

الفقيرة إلى الله أم البنات يقول...

انا لله وانا اليه راجعون

حسام غانم يقول...

إن طلع العيب من أهل العيب ...

reem يقول...

تامر ده ظريف بغباء

ومى كمان بقت قمة فى قلة 000

بجد تمثيلهم بقى سخيف اووووى

adel يقول...

انا تامر بالنسية لي عادي

لكن الشئ اللي اسمه مي عزالدين بقي منتشر ولا انفلونزا الخنازير

و فعلا اخرها اللي عملوا تامر

و الفيلم مش هيكون حلو ..الجزء الاول كان كويس لكن مش لدرجة جزء تاني يعني

و عاوزة ايه من السبكي ؟؟ يعمل
brave heart ؟؟

صبرني يارب يقول...

ما حصليش القرف وما شوفتوش

طب وده مزعلك

طب وسرحان ونفيسه الى بيجى على موجه كومدي الى كل يوم بيفكر يقتل مراته بشكل

واعلان كوكاكولا زيرو

الى بيشبه الاحساس الجميل الى ممكن تعيشه لما تشرب كوكاكولا زفت انك تكون خاطب ندى ومصاحب منى فى نفس ذات الوقت


مع مشهد طبعا يدل على ذلك


يا بنتى هى كلها مشاهد وحاجات تحرق الدمممممممممممم

Eno يقول...

ههههههههههههههههههههههههههه
ههههههههههههههههه
حتت بوست جامد عشان الواحد يقول اللي في نفسه باه شوفت الاعلان ياستي وحصلي القرف ومعاكي حق في كل اللي قولتيه

كفايه في الاغنيه مش عارفه بيقوله يخرب بيت اهلك ولا ايه مش فاكره
اللي يغيظ انه معجبين تامر لما يشوفو الموقف ده يقولو ياي جنتل مان بجد وادل يعني !!

بجد كل واحد دماغه مرياحاه !!

تحياتي علي البوست الرائع ده :)

يوميات شاب منوفى يقول...

الاثنين عايزين الحرق انا بكرهم اووووووووووى البنت مى دى حاجة تجيب الشلل وتامر دة هارب من الجيش مش عارف البنات بتحبة على اية
الموقف مقرف بجد بس تقولى اية ان طلع العيب من اهلة
ارحمنا يارب من الفن واهله

عاشقه وغلبانه يقول...

تامر حسني .... قمه التفاهه مع قله الادب كفايه بس تسمعي الاغاني اللي بيألفها ويلحنها ويغنيها والله طارق الشيخ بتاع الميكروباصات احلي منه 100 مره ويتسمع عنه
حركاته وتتصرفاته وايحاءاته تدل علي انه انسان اسفه في الكلمه وااااااااااااااطي


اما المبجله ست الحسن والجمال مي عز الدين فأي تعليق من اي بنت هايتفسر علي انه غيره
بس مش هاقولك اكتر من شوفي مسلسلها مع يسرا لما كانت صغيره وشوفي بقي دلوقتي اثار النفخ والسيلكون اللي اي مخرج مصمم يركز عليهم وهي بقت بتتفنن في اظهارهم والتباهي بجمالها
وقال ايه هاتروح تتجوز محمد زيدان
بعد ده كله مع تامر حسني

مش عارفه الرجاله اتهبشت في عقلها ولا ايه

ربنا يستر علينا كلنا

غير معرف يقول...

علشان القرفة اللى جت لك ديه
ودول لايأتى من ورائهم الاالقرف
الوقت بتاعنا غالى وربنا حيسالنا عليه
فبلاش نضيعه هباء
شاهدى حاجة مفيدة حقا
وبعدين مين دول اللى حيعلموا الازواج
عدم الاحترام
التعلم يكون من القدوة ومن هم اكثر خبرة
وقدوتنا وحبيبنا محمد رسول الله صلى الله عليه وسلم وزوجاته امهات المؤمنين

اوعى تزعلى من النصيحة ياحاسوبنية
وياريت دائما نتناصح فى الله
ولكى حبى وتحياتى

Foxology يقول...

الحق مش عليه

الحق على الأفندى اللى كاتب السيناريو

مع العلم انه قصة تيمور يعنى دى اخلاقه !

الحق على المخرج اللى سمح لنفسه انه يخرج قرف زى ده

الحق على المعجبين اللى نافخينه ومخليينه فرانك سيناترا مصر والقرن الواحد والخمسين

بلا قرف

وهتشوفى الأيرادات عاملة ازاى .. مهو التفاهة والأسفاف سلعة رائجة فى بلدنا دى

عليه العوض

غير معرف يقول...

هههههههههه

هو ده اللي قرفك
ماهو عنده حق بصراحه لما مراته تشخر كده
ههههههههههههههههههههههههه

hager يقول...

انا اشمازيت من مناظر كتير مش المنظر ده بس
وربنا يهدي :|

مامة مازن يقول...

ماهى المهازل ممكن تبقى جزءين عادى
دمتى حبيبتى بسلام والناس اللى بتدخل سينمات علشان تشوف المهازل دى هما اللى بيشجعوهم على مزيد من المهازل
دا التيلر بتاع الفيلم كله يقرف
شوفتى البنات الصغيرة بتتكلم ازاى هى دى الحلاوة والسكر وبراءة الطفولة بالنسبة لهم
بقولك ايه متركزيش قوى سيبك
منهم لله وربنا يديهم على قد ضميرهم

القدر و انا يقول...

حاسبوتية
للاسف منظر مقزز يصدر من قدوة للشباب
اصبح الاعلام والعلان بما يقدمان من اسفاف ومعانى هابطة سبب انحدار وخيبة جيل باكمله ..
وكما قالت ايمان .. انا لله وانا اليه راجعون

هيثــم رمضـــان يقول...

بصراحة أنا ماشفتش الجزء الاول ولا هشوف الجزء الثاني طبعاً لاني ببساطه مابستلطفش تموره بحس إنه مزودها حبتين وعنده ميوعه غير مقبولة,وطبعاً المشهد اللي أنتي بتحكي عنه مرفوض وغيره كمان من المشاهد الاخري ومش هي دي الكوميديا يعني اللي من غيرها الناس مش هتضحك لا في كوميديا محترمة عن كده. يعني لو بنتي اللي عندها 4 سنين قعدا جانبي وانا بتفرج وشافت التصرف المتخلف ده هيكون إيه رد فعلها من الطبيعي إن هي تقلدوا بمنتهي السهوله ولا حول ولا قوة إلا بالله يا خسارة الرجال

MǿиY El-Shreef يقول...

بصي هي حاجه اخر قرف

لا والمشهد الي بتكون بفستان الفرح ويقلع البنطلون

قمة قله الذوق

انا كل الشباب المفستك ده مش بحبه

بس بحب اغاني تامر

ومش كلها بردوا عشان ماكدبش عليكي

حاجه بقت داون اخر حاجه

وبتأثر ع كل الشباب للاسف

romansy يقول...

انا اصلا مش بحب الافيهات اللى رخمه دى

بس انكتب علينا اننا نشوف دا

(صندوق الدنيا) يقول...

الحمد لله
ما حصليش القرف وما شفتهوش
بس مقروفه من مشاهد كتير تانية
تعرفي يا حاسوباتيه
عيونا دي نعمة كبيرة ونعمة البصر أكبر وأكبر
ولو افتكرنا اننا حا نفتحها ونشوف بيها الله عزّ وجل
ولا حا نشوف عمر وتامر...ولا مي ولا سلمى
نورتيني في مدونتي
حبيت أمر وأطمن عليكِ

ELMASRYA - MRS WRITER يقول...

مش بس المشهد ده يا باشمهندسة

الأفلام كلها مليان قلة أدب وقلة إحترام وخصوصا أفلام محمد سعد

أنا لاحظت إن أكتر الأفلام اللي كده من إنتاج عيلة السبكي

مستواهم البيئي مخليهم مش بيهتموا بنضافة أفلامهم لأن ده العادي بتاعهم في حياتهم

والباقي مش بيبعدوا قوي عنهم لكن أقل شوية

فعلا شيء مقزز

شكرا على ملاحظتك ودمتي سالمة

Amira يقول...

فعلا انا شفت المشهد المؤرف دة...وكمان علي فكرة في مشاهد تانية كتير في الفيلم دة تدل علي الانحطاط الفني في مصر ..بجد مش عارفة اقول ايه..زمفيش اخلاق ولا حتي فن راقي..وللاسف شوية الحشرات دي بيعتبرها بعض الناس قدوة وبيقلدوهم زي الاطفال...بجد الاعلام عندنا يستحق الرثاء

تامر علي يقول...

أحب أوضح لسيادتك ان مش كل اللي اسمهم تامر بالشكل المقزز ده :)))

طيب انت مستنيه ايه من الاشكال الضاله دي كلها ... انهم يقولوا مواعظ يعني .... الوسط كله وسط موبوء ولا يخرج منه الا كل سفالة ... ده انا كل مره باشوفه فيها بابقى نفسي أااااااا:)))))

maioya يقول...

انتي قولتي في الاول
ان تامر ده كائن مقزز
واساسا كل تصرفاته كده
نا مشوفتش المشهد
بس بكلامك يبقي مشهد ملوش لازمه في الدنيا زي بقيه مشاهد الفيلم

أحمد سعيد بسيوني يقول...

لاني بشمئز من الكائن

انتي قلتيها بالنيابة عنا

Ahmed يقول...

بضهر ايدك وقلم البوابين؟
هههههههه


لا لا متخافيش, المناظر المقرفه ديه مبتحصلش غير في السينما أو في البيوت المفتوحه على مصراعيها اصلا

يعني مش بيوتنا
البيوت اللي اهلها مش عيشين عيشتها الأصليه وبيحاولوا يعيشوا عيشه مش بتاعتهم

تامر بك بوسني, انا مش منتظر منه غير كده
ده الطبيعي يعني

الغريب بأه لما البيه ده يتجوز أو الهانم لما تتجوز ياترى هيكون شعرو اجوازهم ايه لما يتفرجوا على الحاجات ديه؟

جلال كمال الجربانى يقول...

السلام عليكم

طيب نسأل مين اللى عمل تامر أفندى حسنى ممثل
جمهور الشباب إذن شبابنا عيان للأسف وفقد القدره على التمييز
يبقى شبابنا عايز علاج
لأن تامر أفندى لما تراقبى تصرفاته مش تصرفات فنان عارف إنه نجم وإنه ممكن يكون قدوه
ومتزعليش
أتفوه على نجومنا الهايفين اللى بيأثرو على شبابنا وبيزرعوا فيهم قله الأحترام بحجه خفه الدم
وهل اللى إتهرب من الخدمه العسكريه وزور شهادتها ودخل السجن وطلع
ولسه بيفن على شبابنا دا يبقى فنان
عجبى

ودمتِ بخير

ودمتى بخير

صوت من مصر يقول...

فعلا مشهد مقرف للغايه لكن اظن ان الفيلم كله كده مش المشهد بس وده معروف عن النجم الشهير بسفالته

كيكى عوووووو يقول...

طب سمعتى الاغنية بيقول فيها
يخربيتك...وواحدة تانى بيقولها جابتى اهلى
1!!!
بيردح فى الاغانى
عوووووووووووو

مهرة سالم يقول...

السلام عليكم...
حقيقتا شاهدة الجزء الأول بالطائره ...
والسؤال كيف يكون لتلك التفاهه جزء ثاني !!!!!!
وحصل جزء ثاني ولم أشاهده حقيقه بس
بالفعل أصبحت السينما هي مثال للأزواج ...
وخصوصا الصغار بالسن يتعلمون منها بإسلوب غريب ...
......
الله يصلح الأحوال...
....
في امان الله..

رحلتنا في الحياة يقول...

والله الافلام كلها بقيت مقززة جدا ومش ده بس انا مش عارفة الناس اصلا بتشجعهم ازاى وبتتدخل الافلام دى ربنا يصلح الاحوال ياااااااااارب

عاشقه الرومانسيه يقول...

هى فعلا حاجه تقرف
واللى يدهشك اكتر ان كل الشباب هيموتوا عليه
وشايفين انه وااااو وماحصلش
على خيبه ايه مش عارفه

منى يقول...

مشفتش الاعلان بس انتى خلتينى اتخيله
كنت بسمع زمان بيقولوا الفن ارتقاء ببالمشاعر ورساله ساميه
بس يبدو ساميه بتاعتهم ماتت
الحمد لله الذى عافانا مما ابتلى به غيرنا وفضلنا على خلقه تفضيلا
يا رب يكون مزاجك احسن
وحالك افضل يا جميل

princess يقول...

امال لو سمعتى اغانيه الجديدة اللى نازلة مع الفيلم يا بنتى كلام غريب
فى حد جاب سيرة سرحان ونفيسة هنا انا بحبهم اوى هههههههه

Unknown يقول...

العيب لو طلع من اهل العيب مايبقاش عيب....دة تامر يا سوسو والفيلم انتاج السبكى منتظرة ايه

شمس النهار يقول...

بصراحه هو بيخرف كتير
مع ان الولد ده لما ابتدا استبشرنا خير وخصوصا ان حسن ابو السعود لحن له اغاني لطيفه
لكن زيه زي غيره جيري وراء الماده واستهان بالفن اصلا
ربنا يهديه ويهدي القائمين علي الفن في مصر
بعد ماكنا رواد بقينا مش عارفه عكسها ايه

عمك ياض يقول...

ههههههههههههههههههههههههههههههه
ايه الموقف العجيب ده :D
اول مره اسمع الحكايه دي

د.خالدأمين يقول...

ياستي
بالرغم اني معتزل النت الفتره اللي فاتت واللي جايه دي كمان الا اني اما شوفت الموضوع ده وقرؤيته قولت لازم ارد

لاني بصراحه بسيطه خالص
اشارككك الراي بل واسبقك في بغض هذا الشخص
الانتهازي
الهارب من التجنيد
السافل
الغير محترم
وده كله مش غيبه ولا حاجه انا بس بوضف الحال اللي انا شايف عليه الشخص ده

ياستي انتي يعني شوفتي بقيت افلامه وكليباته وده الوحيد اللي ضايقك
واما كطان بيقرص البنات في ...........ده كان كويس؟
وبعدين انا عاوز امشي
لوقعدت هقول كلام وحش

وقبل ما امشي اسيبك مع بعض كلمات اغاني الشاب التافه تامر حسني
مش هارجعلك لو اتنططي
ولو وقفتي علي ايديكي
خليها تاكلك
ويابنت الايه
وطييييييييييييييييييييييييييييبه قلبك
عشان انا عادي وابويا كان عادي
كل مره اشوفك فيها ببقي نفسي أأأأأأأ


ده مش موقف اتوبيس ياجماعه
دي اغاني رومانسيه والله

موناليزا يقول...

هههههههههه
بضحك على رد فعلك لو زوجك عملها معاكِ
اما عن هذا المشهد فانا ماشوفتوش

mnoon يقول...

السلااااااام عليكم

أول زياره
متفقه معاكى جداً
إن مشهد زى دا لما يظهر عادى كده
كتير ممكن يكرروه على أساس إنه خلاص بقى عادى وممكن يحصل بين الزوجين

وبعدين لهم حق يعملوا جزء تانى وثالث
طالما قله الذوق إنتشرت

:)

سمكه واحده يقول...

انا متفقه معاكي جدا جدا جدا
سبحان الله اظاهر كده يابنات ان تلت تربع الاشخاص بيتفقوا علي حاجه واحده
تصوري من اكتر المشاهد اللي قرفتني واستفذتني المشهد ده والصوت اللي هي اصدرته ورد الفعل نفسه اه والله مش نفاق او كلام بجريكي فيه لا فعلا ده اخدت بالي منه وقرفني جدا
وفعلا كان بالصدفه
ربنا يهدي
تحياتي

سمكه واحده يقول...

اه ولا الاغنيه المستفدذه اللي بيغنيها للفلم
تامر حسني بيقول كلام غريب في اغنيه بجد

Unknown يقول...

منتظرة اية من اعلام فاسد
ووكاتب اغانى فيها مصطلحات قبيحة زى تامر حسنى ؟؟؟؟؟؟؟؟؟؟؟؟
لاحول ولا قوة الا بالله

Sweet Violet يقول...

للأسف المناظر دى بقت عادى جداا فى الافلام عندنا

على اساس انه كوميدى يعنى و انك لازم هتضحكى اول لما تشوفيها x:

ربنا يهدى بجد

ابو بدر الدين يقول...

سلام الله عليكم ورحمته وبركاته
والله الصراحة الافلام العربية كلها
مش المشهد ده بس
الا القليل
كلها بتدعو الى الانحراف الرذيلة وعدم احترام الاخرين
عدم احترام الازواج بعضهم لبعض واباحة الخيانة الزوجية وشرب الخمر
عدم احترام المعلم
عدم احترام الاصدقاء
عدم احترام الوالدين
الدعوة الى العري والفساد
الى شرب الخمر واضح جدا جدا جدا
السينما العربية كلها عايزة اعادة ترتيب
المهم
سلال ل ل ل ل م م م م م م

لاسع افندى يقول...

اللى يعمل كده مايبقاش راجل
واللى يعمل دور زى كده يبقى تامر

Dalia w Ahmed يقول...

معاكي حق والله
أصلاً البني آدم اللي اسمه تامر حسني ده عبارة عن كائن لزج لا يطاق

لسه بعقلى يقول...

لااااااااااااا
اصلك لسه ما تجوزتيش

مش سهل خالص انك تاخدى بعضك وتروحى لاهلك

وهو طبعا حاجة مش صح خالص المشهد ده بس كل واحد وتربيته وبعدين الحياة الزوجية مش وردى قوى كده

يعنى احتمال تلاقيه بيشخر
ما بيحلقش غير كل شهر مرة
ما بيغسلش سنانه
بيشرب العصير فى فنجان
حاجات كتييييييييير قوى

وانت تحملك بقى والا هتقعدى فى بيت اهلك على طول

هاني سعيد يقول...

هههههههههههههه
والله انتى عندك حق هو بقى اوفر شوية وانا فعلا بتخنق لما اشوف اعلان الفيلم دا او اعلان دكان شحاتة والله بتحنق وبشوف قرف قرف قرف مشفاهم هما عايزيين ايه بالظبط ناس مالهمش فى الفن ولا نيلة ايه دخلهم فيه؟
مع انى كنت بحترم خالد يوسف ومصاحبه على الفيس بوك لكن بجد بقيت حاسس انه ابتدا يخسر من رصيده عند الناس كلها بسبب اللى عمله اما تامر باشا حسنى فيكفى اللى انتى قولتيه عنه
تحياتى ونتقابل فى ظروف احسن ان شاء الله