21‏/5‏/2009

وتستمر الحياه ........


كان عندها احساس غريب بيقول ان اليوم ده هيحصل في حاجه وانه هيكون فيه حاجه غريبه بس ماحطتش الموضوع في بالها وكالعاده كل يوم صحيت الصبح وراحت شغلها وبعد الشغل راحت السوبر ماركت تشتري حاجات مامتها قالتلها عليها
وفي الوقت ده الموبايل رن على نغمه عمرو دياب (حبيبي يا مالك قلبي بالهوى.....) وشها ظهرت عليه ابتسامه جميله وردت على الموبايل
الو ازيك يا حبيبي ؟
الحمد لله يا حبيبتي وانتي؟
الحمد لله في السوق بشتري شويه حاجات

واستمرت المكالمه............

في الوقت ده كان في واحد بيراقبها وبيبصلها ولما خلصت المكامله قرب منها وجه قدامها
هي لما شفته واقف قدامها حست ان الزمن توقف ماقدرتش تكلم ماحستش باي شئ حواليها فضلت تبصله في صمت وبس

وبدا هو الكلام

- ازيك يا باشمهندسه بسمه؟

- (نزلت عينها في الارض وردت): الحمد لله ازيك انت يابشمهندس؟
- كويس الحمد لله ازي شغلك والدنيا معاكي
- الحمد لله الدنيا كويسه واشتغلت في شركه كويسه وانت عامل ايه؟
- اهو زي ما انا اه صحيح مبروك الخطوبه
- ( بلعت ريقها بصعوبه وقالت): الله يبارك فيك عقبالك
- هههههه صدقيني اول ما الاقي الانسانه الي تخليني اوفي بوعدنا هجوزها فورا عارفه انا مبسوط قوي انك لاقيتي الانسان ده حاسس اني مطمن عليكي انا اسف بس انا لاحظتك وانتي بتكلميه وشفت عينيكي وهي بتلمع وابتسامتك الحلوه عرفت وقتها انك بتحبيه وانك وفيتي وعدنا ان رغم فراقنا فكل واحد يجوز الي يحبه برضو مش اي حد


- (بصت هي للارض تاني كانها بتفتكر كل لحظه كانت بينهم سيل من الذكريات رجعلها في لحظه )وقالت بصوت منخفض ومش عايز يطلع : شكرا عقبالك يا باشمهندس


- بصلها هو قوي نفس نظره الوداع الي شافتها قبل كده بتكرر تاني قدامها وقالها: ماشي ربنا يسعدكم استاذن انا
- كانت عينها بتقوله خليك شويه ابصلك اطمن عليك بس لسانها ماقدرش يقولها وقالتله : ويسعدك يارب
- مع السلامه ويارب دايما اطمن عليكي
- ماقدرتش تكلم وتقوله مع السلامه رسمت على وشها مجرد ابتسامه وبس

مشي هو وهي لفت وشها تشوفه لاخر لحظات وابتسمتله وقالت لنفسها ياااااااه ماتغيرتش الحمد لله يارب اني شفته واطمنت عليه

وفضلت تبصله لغايه ما اختفى وسط الناس والزحام.............

----------------------------------------------------
طبعا انا عارفه اني مش بعرف اكتب قصص ولا حاجه بس دي زي ماجت على بالي كتبتها وانا اقصد منها ان ممكن الانسان يحب ويحصل فراق لاي سبب وهنا قصدت ماذكرش السبب لان مش ده موضوعنا انا قصدت ابين ان ممكن بعد الفراق يحصل حب تاني وجديد والحياه تستمر صحيح بتكون في اثر للذكريات زي ماشفنا لما هي شافته بس هي كمان بتحب خطيبها بالعكس ده كان اتفاق بينها وبين حبيبها السابق ان لازم كل واحد فيهم يحب تاني ويجوز عن حب مش مجرد جواز وبس

ياجماعه ادعولي عندي امتحان مهم جدا علشان قدمت في منحه يارب انجح
واسفه اني مقصره معاكم بس بزاكر بقى

هناك 42 تعليقًا:

ستيته حسب الله الحمش يقول...

طالما افترقوا زمان بيقى مؤكد كان بينهم اختلافات جذرية

ممكن لقاء بعد كتير من الفراق يفكرهم بشيء حلو

لكن مش هو ده الحب

وإلا بتحب خطيبها ازاي
الست مش ممكن تحط اتنين في نفس غرف القلب


ربنا ييسر لك وتنجحي وتفرحي وتفرحينا

حاسوباتيه يقول...

ماشي ماهي مابتحبوش هي بس افتكرت الذكريات بس هي بتحب خطيبها وده الي اقصده ان ممكن حب يبقى ذكرى ويجي بداله حب تاني والحياه تستمر

الشعب لابد له من حكومه تشكمه يقول...

ممممممممم لو حبت بجد خطيبها حتى الحب القديم مش هيكون ليه ذكريات عندها....بالعكس ولا هتقول كويس انى اطمنت عليه ولا كل الكلام ده هيكون مجرد لقاء عااااابر

فى اغنيه بتقول
(لو بايدى كنت انا ادعى ليهم بالهنا اللى راحوا وخلو قلبك يملى عمرى بالهنا)

اعتقد ده هيكون احساسها لكن حتى الحنين مش هيكون موجود

الشاعر الحزين يقول...

أنتى فعلا عندك حق

بس صدقينى أعتقد انه مش بينطبق على كل الناس

فيه ناس بتكون حساسه لدرجه بعيده قوى

حساسه بمعنى انها لما تحب حد تفضل توفى ليه طول العمر حتى لو هتفضل من غير زواج

أنتى أكيد هتقولى الكلام ده مش موجود لكن اللى خلانى أقول كده

انه فعلا موجود وعندى مثال لشخص قريب منى قوى عدى ال 35 ومش بيفكر اطلاقا فى الزواج بسبب حبه الأول

فى النهايه

بدعيلك من كل قلبى ربنا يوفقك فى امتحاناتك يارب واحنا معاكى

وربنا يقدملك كل ما فيه الخير

قلب ارهقته الاحلام يقول...

فعلا انا مع رأي ستوته لو كان حب حقيقي بجد كان استمر

وكان كل واحد فيهم حارب الدنيا علشان التاني

لكن الفشل بيجي من الاختلاف والاختلاف مش مبرر للحب أو عدمه انما تقبل الطرفين للإختلاف بل وحبهم ليه

بس بجد قصة جميله وسردتيها بأسلوب جميل

وربنا يارب يوفقك ويسمعنا خير عنك :)

تحياتي ,,,,,,,,

mahasen saber يقول...

ربنا يوفقك فى الامتحان وتاخدى المنحه ان شاء الله

واجمل نهايه وارقاها على الاطلاق هيا اليى انا شفتها دى

يسيبوا بعض بس متفقين ان كل واحد يتجوز حد بيحبه
والله الدنيالسه فيها ناس عقلاء برضه

طمنينا على اخبار الامتحان او الاختبار ده اى كان
ربنا يوفقك ان شاء الله

بسنت صلاح الدين يقول...

ممكن نفترق عشان عارفين ان حياتنا ماشيه فى طريقين صعب يتقابلوا، بس هانشيل فى قلوبنا دايما الذكريات الحلوه،وزى ماقلتى الحياه بتستمر و طول مالقلب بيدق بيرجع يحب تانى وتانى...
ربنا يوفقك فى امتحانك

احساس طفلة محبة للرومانسية بس واقعية يقول...

مش عارفة حاسة انه صعب
هى يا كانت بتحب الاول
وكل اللى حصل بعده كان مجرد وهم للنسيان ودا مش باين فى القصة بالعكس دى شكلها بتحب خاطيبها

يا كانت مش بتحب الشخص دا الحب الحقيقي
وان حبها كله لخطيبها بس دا مجرد ذكريات وخجلها دا عشان الذكرى والخلاف والفراق
وحد هى عرفتة بس

بس اللى عجبنى هو الاحترام وحتى الوعد اللى اخدوه لان مفيش اى مانع ان مادام حدث لقاء يكون بشكل محترم مهذب زى دا يحمل ذكرى لكل منهما مش لازم يكون فى بينهم مشاكل واختلاف

ربنا يوفقك وييسرلك طريقك
تقبلى مرورى

ريمان يقول...

لحظه صعبه مووووووت


طبعا يعنى


يااااااه


المهم يا قمر ربنا يوفقك يا رب فى امتحانك وانا كمان

عمرو يقول...

أولا ربنا معاكى و اٍن شاء الله تجتازى الاٍختبار بنجاح ..
ثانيا فعلا أوافقك تماما أنه حتى بعد ما بيحصل اٍنفصال بين أى أتنين بصفه عامه يعنى مش رط يكونوا فقط أحباب أو أزواج أو مخطوبين أو حتى شركاء فى شركه و أنفضت أن تنمحى كل الذكريات الطيبه كده فى لحظه و لكن الصح أن تظل العلاقه الطيبه و المشاعر النبيله هى السائده فى العلاقه ..
و الله أسلوبك بيعجبنى يا باشمهندسه لأنه مركز و واضح و بيصل للفكره بسهوله من غير تعقيدات كثيره ..
بارك الله فيكى و تقبلى تحياتى و تقديرى ..

حواء يقول...

عارفه ياحسوباتيه
انا مره رجال قالي ان الرجاله ممكن تحب ست او اتنين او أكتر
وإلا ربنا مكنش عمل التعدد
بس انا راي حاجه تانيه
وهي ان مفيش انسان علي وجهه الارض ممكن يحب اتنين بجد
سواء كان راجل اوست
بس سعات بنفتكر الايام الجميله اللي كانت بينا

لكن حب تقدري علشانه تضحي بالغالي والنفيس
لا

الحب كلمه مينفعش تتقال علي اي مشاعر بين اتنين

صحيح والله احنا بنظلم الحب معانا

الحب كلمه واحساس صعب جدا حد يوصل لها ومش بسهوله


الحب ده اجمل حاجه في الدنيا

ربنا معاكي ومعايا
تحياتي

رؤية يقول...

اولا اللحظة جميلة وعبرتى ععنها كويس
وممكن جدا يحصل حب تانى وتالت عادى
بس دا يتوقف على استعداد الاشخاص وصفات الاخر

وربنا معاكى فى الامتحان
بالتوفيق

تحياتى

Foxology يقول...

طالما افترقو يبقى يتحملو نتيجة قرار الفراق :)

اوقات الواقعية بتبقى احسن بكتير من الذكريات :)

تحياتى على القصة الجميلة :)

يوميات شاب منوفى يقول...

ربنا معاكى وتنجحى فى الامتحان
اصعب شى فى الحب لحظة الفراق بس انا اعتقد انة مش بتحب خطبها لانها لو بتحبة مش هيكون لها اى زكرة مع الاولحبها لخطبها كان هينسيها كل زكريات الاول

شمس النهار يقول...

هو ايه وجع القلب ده
كل ماادخل مدونه يالاقي فراق يالاقي عزا
يالاقي ندب
حاسوباتيه
اكتبي حاجه فيها ابتسام شويه

وبعدين هي لسه بتحبه والا ايه
انا اللي اعرفه ان طالما حبت تاني مش عارفه ازاي
يبقا خلاص المفروض لما تشوفه لاترتبك والا اي حاجه
عادي زي اصاله ماقالت

هدعيلك ربنا يوفقك
ان شاء الله تنجحي في المنحه
شدي حيلك كده

hasona يقول...

السلام عليكم

هناك مشاعر وعلاقات تتحول الي ذكري
والذكري في بعض الاوقات تطربنا أو تعزينا علي ما مضي من حياتنا


و

مامة مازن يقول...

ربنا معاكى يا باشمهندسة
صراحة كتبتيها حلو وشدتنى اكملها يمكن اعرف تفاصيل اكتر
يارب تنجحى يارب وتطلعى من الاوائل زى ميرو بنتى ويكتبلك المنحة دى طالما فيها خير ليكى ربنا ييسر لك

MaNoOoSh يقول...

اسلوب القصة لذيذ وسلس.

بس ذكرياتها القديمة دى حتى وان كانت زمان مشاعر حب فهى دلوقتى تحولت لشىء تانى.

وانا شايفة انها بتحب خطيبها ومجرد انها بتتمنى السعادة لشخص جمعتها معاه أوقات حلوة ومرة قبل كدة فدة شىء عادى ومش معناه انها مش بتحب خطيبها يعنى.

لان الماضى هى ادته امنية بالسعادة بينما الخطيب فهى بتعمل كل جهدها علشان تسعده.. وللا ايه؟!!

سلام يا قمر

MaNoOoSh يقول...

وربنا معاكى فى الامتحانات ان شاء الله خير

MǿиY El-Shreef يقول...

اجمل حاجه الاحساس الي بتقولي عليه ده

مش لازم اما نفترق نكره

احساسها بزمان كان حلو اوي ووصفك كان بجد مؤثر فيا

تسلم اديكي

وربنا معاكي يارب ف الامتحان

Butterfly يقول...

أنا مقتنعه بده جدا
ان لازم الحياه تستمر ومش نقف نبص ورانا على اللى حصلنا لأ لازم نستمر سواء فى حب أو فى أى حاجه تانيه .

صوت من مصر يقول...

اقول ايه كلنا مش بنعرف نبدع فى القصصيه
بس اهو بنقول وخلاص

ELMASRYA - MRS WRITER يقول...

شدي حيلك يا حبيبتي وربنا معاكي ويارب أختك تكون بخير دلوقتي

هدف موضوعك جميل وهو إن الفشل في جانب من جوانب العلاقات الشخصية لا يؤثر على العلاقة الإنسانية

فيظل الإحترام وتظل الصداقة

بس المدهش إن رغم المشاعر الجميلة اللي بينهم دي ابتعدوا عن بعض

يارب لو فيه ناس متعرضين للحالةدي ربنا يوفقهم في حياتهم الجديدة ويديم الأخوة والصداقة البريئة بينهم

دمتي سالمة

hager يقول...

جميله اووي القصه
بس انا اول ما قريت بشمهندس وباشمهندسه اتخضيت هههههههههههه مبستريحش للقب ده ;)

بس فعلاا معاكي حق مش معني ان قصه حب متكتبلهاش انها تتم انها هتكون اخر قصه او اخر حب

وربنا معاكي في الامتحان :)

adel يقول...

جميل قوي و حسيتها قوي




يمكن عشان جربت الموقف :):)

Sometimes يقول...

السلام عليكم
ازيك يا جميل
ربنا يوفقك فى امتحانك يارب
انا مبسوطه منك اوى على فكره
شطورة:)

اقصوصه يقول...

عجبتني وايد

الله يوفقك بالامتحان يا رب :)

أحمـــــــــــــد أبو العلا يقول...

ربنا يوفقك في الامتحانات ان شاء الله

على فكره الكلام فكرته جميله جدا
وعجبتني
لانه طبيعي جدا جدا جدا

موناليزا يقول...

الدنيا مابتقفش لحد

طوبة ذهب وطوبة فضة يقول...

فعلا الحياه شئنا او ابينا لازم تستمر برضانا او عدمه بس اهم حاجه انها لما تتجوز التانى لازم تحبه وتقدر ما تحبش غيره عشان ما تبقاش ظلمته وظلمت نفسها قبلها تسلم ايدك قصه جميله

hager za3bal يقول...

مع انها بسيطه اوي
بس جميله اوي وحسيتها اوي ..

تسلم ايديكي بجد :)

وربنا معاكي يارب في امتحانك يا جميل

romansy يقول...

قصه فعلا جميله
بس اقولك فعلا هى صحيح بتحب خطيبها قوى بعد الحب الاول بس هيه منسيتش الحب الاول ابدا ودا شئ كويس الحب شئ جميل قوى
وبالذات على انغام عمرو دياب

نهــــــــــار يقول...

السلام عليكم......
ماشاء الله عليكِ....
القصه تبدو جدا واقعيه...
وعلى فكره هو هذا التصرف الطبيعي ...
.........
وبالتوفيق ...
والله يسهل أمورك يا قمر....
...
في أمان الله....

ابو على يقول...

ان شاء الله تكونى جاوبتى كويس وظهرت البشاير
على فكره هيا قصه جميله لو كانت من وقع خيالك
هههههههههههه
بس بجد بضحك لانها حصلتلى
هو فيه مشاعر متناقضه ساعتها الواحد بيحسها ويفتكر الحاجات الحلوه الى كانت بينا بس غريبه انها بتدى للبنى ادم عزه نفس حتى لو كان حصل فيها انكسار
انسان بلا ماضى هو انسان بلا حاضر ولا مستقبل
تقبلى مرورى

rooooe يقول...

هههههههههههه , هقول اية يعني؟ هاه
ربنا يوفق في الامتحان وتكون لجنة سايبة

Charisma Queen يقول...

انا شايفة اني لو مكانها و اتصرفت كده يبقي الشخص الي معايا كويس لكن مش مالي دماغي و سا يبلي فراغ بيفكرني بالي فات
بس دي طبيعتي اني بتجدد و فعلا بنسي اوي الماضي الي مبقالوش اثر في الحاضر
و اكيد مش كل الناس كده
عموما تحياتي للحاسوباتيه و علي فكره انا حاسوباتيه بردو بس لسه ما اخدتش اللقب
ربنا معاكي في الامتحان

gogo!sf يقول...

قصه جميله فعلا

بس هى لما فكرت فيه وهو بيسلم عليها ده مش عشان افتكرت الذكرى والكلام اللى بينهم
ده اسمه حنين للماض حتى لو كانت بتموت فى خطيبها

بجد قصه جميله اووووووووى

تسلم ايديك

وربنا معاكى بالتوفيق ان شاء الله

تقبلى مرورى

جوجو

ابو صهيب ( الجمعاوي الاصيل)سابقاً يقول...

الذكريات ابداً لاتنسى ولو مر عليها الزمن

وبمجرد تذكرها تشعر بها وكأنها تحدث الان

اتفق معك

وقصة جيدة

hager za3bal يقول...

عامله ايه في الامتحانات؟؟

mahasen saber يقول...

عملتى ايه فى امتحاناتك خير

مسمعناش اى اخبار جديده

يا رب تكونى انجزتى كويس

طمنينا

غير معرف يقول...

هاتفيدك جدا حاسوباتيه

http://noureldens.maktoobblog.com

nour_elden_1 يقول...

ودى جميله جدا بعنوان قصص حب من واقع الحياه

http://noureldens2.maktoobblog.com